Yaeqmiq yaqyo kaol aeqdae aeqmae
6
Yaeqmiq yaqyo geiq hael, noteel Hhaoqsongl onglci'ae lye aeqdae aeqmae e saeziq mael naelhaeq maoqhhae, xilnye zongl mael laoq hoq hhae. 2-3 Aeqdae kaol aeqmae vae xiaolshunl biq maoqhhae, xilnye laol, noq'ae geeqlongq meeq, kaol milcaeq taq'ae aeqyil maol lye hhae zhol wae. Xilmael laoq, biq laqngeel lye gee e dilyiq gol gailminl'ae. 4 Aeqdae geiq hael, noteel e yaeqmiq yaqyo'ae haeq zongl hol biq, ngeelfeiq, Hhaoqsongl e guanqjiaol kaol geemyeq mael laoqmyel yoqhhaeteel'ae cu biq maoqhhae.Yaqhacheqzaq e cholyaeq kaol Hhaoqsongl
5 Yaqhacheqzaq e cholyaeq geiq hael, noteel laoq gu'ni'lye ngeel maoqhhae, noteel Jidu e saeziq mael naelhaeq laoqmyel, zaqgiq maqgiq e neemae maellye, noteel e milcaeq taq e hhaoqsongl e saeziq mael naelhaeq maoqhhae; 6 Ochoq'ae neezae bi lael maoqlyekaol ochoq e yiqsi'ae oqlye xilnye zongl mael laoq maq hoq'ae, Jidu e yaqhacheqzaq e cholyaeq geiq gae'lye neemae onglci ae'lye Momil e zhiqyil laoqmyel zongl yil maoqhhae. 7 Noteel laqheiqqyel lye yoqhhaeq'ae fuqsil biq maoqhhae, Hhaoqsongl'ae fuqsil biq laoqmyel ngeel maoqhhae, cholyaeq'ae fuqsil biq laoqmyel maeqngeel'ae, 8 Noteel xilnye loq kaol'ae: Hhaeq'ongq ongqzaeq e cholyaeq haoq, paelsilmyel zilyoq hael haoq, meeq e silqinq zongl kaollaoq, yoqhhaeq haelzongl laoqmyel Hhaoqsongl tyuqvae lye shangqcil hhamul'ae.
9 Hhaoqsongl geiq hael, noteel yaqhacheqzaq e cholyaeqhael vae eiq xilnye za biq maoqhhae, yoqhhaeteel'ae haq hagu biq, yoqhhaeteel kaol noteel'ae mqmae vae Hhaoqsongl qiq hhaeq zhol'ae lye loq maoqhhae, yoqhhaeq laoq qiqboq vae eiq maeq polzaeq'ae.
Duqlaq e qiq hhaeq nyegael diqgae
10 Aeqnaol naolli ngael gee maoqlye mael laoq, noteel Hhaoqsongl'ae kaolzaeq, kaol yoqhhaeq e onglzaeq e laqtaq maellye aqhabo e cholyaeq geiq maoqhhae. 11 Momil lye biq laq e daqzhangldiq fu dum e aelhongqhael dumda hhei maoqhhae, xilnye laol, niqhaeq haeqmae e zaqgiqgiq e loqho mael'ae diqqye ongl wae. 12 Aedeeteel laoq ruqtiq za e cholyaeq nyegael diq maeqngeel'ae, zhiqmoq hael, laqtaq za hael, nahongqlye e shilgail xilmael'ae guanqtyeq hael, kaol mqmae e duqlaq e yohael nyegael diq hhae. 13 Tyulkaol, Momil biq laq e daqzhangldiq fu dum e aelhongqhael heil hhei, xilnye laol, duqlaq e naohaeq vae diqrenq'ae diqqye ongl wae, kaol gilzuqmyel hael zonglbyel hhei aeqnaol'ae haoqtul deel ongl'ae siq. 14 Tyulkaol, haelmeeqlye haoqtul deelhhei, zhen'liq maellye oqlongl geiqzaq kaol paqda hhei, gongyil maellye neeto oheiq mael'ae ocongq e sulmba geiqzaq, kaol neeto oheiq vae zonglkaeq hhei, 15 Hoqpinq e fuqyin maellye, gaelmae deel maoqlye paeqgaelsael meeq e paqno geiqzaq, kaol aeqkeel mael'ae nuq da hhei. 16 Zail laoq, xinlxin mael daqzhangldiq fu ocongq e moqgoq geiqzaq kaol heil hhei, kaol duqlaq e tyutaeq e gilzuqmyel aeqzaeq doq e kamaq mael zonglmye biq. 17 Jiul'en e sulmba vuqcongq mael congq da hhei, senllinq e niqboqmyel ta e maejyel mael baq hhei, maejyel xilmael laoq, Momil e saeziq mael ngeelvae.
18 Senllinq mael'ae kaolzaeq kaol haeqfu qiqlaq eiq maeq qiqsheel e silqinq gae'lye heeldoq gee maoqhhae, kaol xilmael gae'lye yuqnyuqgeellye nailxin za lye haelzhol e senltuqhael'ae heeldoq bael gee biq, 19 Kaol ngaeq'ae myeqbongqdyeq mael bi za, kaol myeqbongq gu'ngae hheikaol qiqgiq maqguzaq myel, fuqyin e aolmiq mael bi gee'loq du hhei ongl biq lye heeldoq bael gee gil laeq, 20 Ngael fuqyin e aolmiq gae'lye sulmca maellye kaltoq laq e shiqtuq geiq, kaol ngaeq'ae ngael aeqdilmyel zongl maoq mael laoqmyel qiqgiq maqguzaq myel bi geegaeq laeq.
Geeqlongq biq biq mael
21 Yaeqmeel aedeeteel hhaelgaeq e, Hhaoqsongl'ae neemae qiqsiqmyel fuqsil e aqsseq aeqnil Tuijiguq laoq, noteel'ae ngaeq e silqinq mael, kaol ngael yaeqmeel haelmillye hhae lye mael bi loq laeq'ae, kaol yoqhhaeq noteel'ae xihael gilzuqmyel geegaeq hhei laeq maoqlye hhae. 22 Ngael baelyaelmyel yoqhhaeq yaol noteel tyuqvae moqheilheil du hhei mael laoq, noteel'ae ngaeteel e qinqkuangl mael bi loq, kaol yoqhhaeq yaol noteel e neemae mael'ae haeq nyuqsaeq lye bi gee maoqlye kaollil. 23 Neesaelhhae mael, gaeq mael kaol xinlxin mael, Aeqdae Momil kaol Hhaoqsongl Yesu Jidu ae'lye aqsseq aeqnilhael'ae yo'li biq lye nyuqlil. 24 Aedeeteel e Hhaoqsongl Yesu Jidu'ae qiqzael eiq maeq paelyil myel gaeq biq e haelzhol cholyaeqhael'ae, enhuil hhamul hhei biq lye nyuqlil.