5
Tyulkaol, noteel Momil gaeq laeq e yaeqmiq yaqyo geiq hael laoq, Momil zongl laoqmyel bael zongl maoqhhae. 2 Jidu aedeeteel'ae gaeq laeq kaol aedeeteel gae'lye aeqyoyoq yaol bi sil hhei, kaol aeqyoyoq yaol nulsael lael aeqmyel e heelda hhei e liqvuq kaol zaelheel geiqzaq laol Momil'ae heelda hhei biq laoqmyel, noteel neegaeqgaeq maellye silqinq zongl maoqhhae.3 Ochoq nyegael neemaeba kaol gilzuqmyel xinqlalmyel mael, paelsilmyel neemaecuqm, xihael noteel onglci'ae gee dyel'eiq maeq hhae gee'ae, xilnye kaol caiq senltuq geiq mael'ae zae'li ongl hhae. 4 Noteel laoq saqdol lal aeqmyel saeziq, yaeqzhoqzhoq e saeziq, kaol xinqlalmyel hae'naeq e saeziq, xihael gee e maeqmeeq'ae; ngeelfeiq, duqlye meeqyaevae lye e saeziq gee maoqhhae. 5 Aeqdilmyel loq maoqhhae, ochoq nyegael neemaeba hael haoq, xinqlalmyel zongl hael haoq, neemaecuqm hael laoq, (Neemaecuqm mael laoq cholyaeq lye zongldu hhei e momilhael'ae heel mael ngeelvae), Jidu kaol Momil e Goqja vae zaeqdye halngeiq maq hhamul'ae.
Momil e yaeqguq laoqmyel ngeel maoqhhae
6 Cholyaeq e qiqgiq yilsi maqza myel e saeziq maellye zaqgiq haeq bi giq hhei, xihael gae'lye, Momil e faqhoqkei mael saeziq maeq naelhaeq e cholyaeqhael'ae yo'li biq maoqlye hhae. 7 Tyulkaol, yoqhhaeteel nyegael qiqboq haeq bael pol. 8 Laefuq noteel laoq nahongqlye vae zonglzhol hhae, ngeelfeiq, yaeqmeel Hhaoqsongl onglci'ae laoq aeqcael onglci vae zonglzhol wae, kaol aeqchee silqinq zongl mael eiq aeqcael e yaeqmiq yaqyo laoqmyel ngeel maoqhhae. 9 Aeqcael maellye siq du hhei e aelsiq mael laoq, gilzuqmyel neemae meeq mael, gongyil, zaqgiq maqgiq mael ngeelvae. 10 Noteel duqlye Hhaoqsongl laoq aeqchee silqinq mael'ae hhaol biq hhaemaeq lye nyuq fufu maoqhhae. 11 Nahongqlye vae qiqgiq boq'ae maeqyo myel zongl gil e silqinq mael'ae haeq bael zongl, daoldaolmyel, xilnye zongl gil e silqinq mael geedu yil biq maoqhhae. 12 Yoqhhaeteel ochoq maeq loq myel haelzonglhael laoq, geedu hhei kaol'eiq miqyil daoqcheeq kaol'ae. 13 Aeqcael maellye bi cuqmol hael laoq gilzuqmyel mol du'lal kiq'ae, 14 Gilzuqmyel hael bi mol du'lal e tyutaeq laoq aeqcael kaol'ae. Tyulkaol, Momil e Suqhhaq taq'ae xilnye gee:
"Yuqxul e cholyaeq nyuq lael oq!
Cholsilhael onglci ae'lye dyeqhoqlal maoqhhae,
Jidu laoq aeqcael maellye noq'ae cuqmol hhei biq maoqlye hhae."
15 Noteel aeqchee zongl feiq aeqyae'lye kei maoqhhae, yaeqzhoqzhoq e cholyaeq laoqmyel haeq ngeel, geel cholyaeq laoqmyel ngeel maoqhhae. 16 Jihuil mael haelmeeqlye mul kiq maoqhhae, yaeqmeel e naohaeq laoq duqlaq kaol'ae. 17 Yaeqzhoqzhoq e cholyaeq haq geiq, Hhaoqsongl e zhiqyil mael haelmillye hhae lye loq maoqhhae. 18 Zilbaeq haq bu, zilbaeq lye cholyaeq yaol aeqchee zongl goq laol aeqchee bi zongl yil kiq'ae; senllinq lye bong'lye bi zhol bong maoqhhae. 19 Shipian, laqma deiqqei biq e changlgo, kaol senllinq ae'lye lael e changlgo changl maellye qiqhhaeq qiqhhaeq'ae gee'naeq biq, kaol neemae qiqsiqmyel haelmeeqlye Hhaoqsongl'ae changlgo changl biq maoqhhae. 20 Aeqchee silqinq mael taq vae eiq aedeeteel e Hhaoqsongl Yesu Jidu e cholmil maellye, Aeqdae Momil'ae duqlye meeqyaevae lye gee biq maoqhhae.
Haqyo kaol haeqmiq
21 Jidu'ae zun eiq zunjinl gu eiq gu e neemae za kaollaoq, qiqhhaeq qiqhhaeq e saeziq mael naelhaeq maoqhhae. 22 Haeqmiq geiq hael, Hhaoqsongl e saeziq mael naelhaeq laoqmyel, noteel aeqyoyoq e haqyo e saeziq mael naelhaeq maoqhhae. 23 Jidu laoq jiaolhuil e vuqduq laoqmyel, haqyo laoq haeqmiq e vuqduq'ae; jiaolhuil laoq Jidu e aeqhhaol'ae, Jidu laoq aeqhhaol xilmael e jiulzuq'ae. 24 Jiaolhuil laoq Jidu e saeziq mael haelmillye naelhaeq laol, haeqmiq eiq aeqchee silqinq mael taq vae eiq haqyo e saeziq mael tyulnye naelhaeq maoqhhae. 25 Noteel haqyo geiq hael, aeqyoyoq e haeqmiq'ae gaeq biq maoqhhae, Jidu jiaolhuil'ae gaeq biq kaol jiaolhuil gae'lye aeqyoyoq yaol beiqgae hhei, 26 Eelcuq maellye jiaolhuil mael ciqshol hhei, kaol saeziq ae'lye jiaolhuil mael senljyeq wae lye bi peqlal hhei'laol, 27 Aeqyoyoq'ae bi heelda hhei, kaol qiqgiq maeq zongl su, baqzuq maq zuq, baeqjyelboq e maeqmeeqmyel maqza, senljyeq kaol qiqgiq geehhael maqza e rongqyaol e jiaolhuil bi geiq laoqmyel hhae. 28 Haqyohael laoq aeqyoyoq e aeqhhaol'ae gaeqzaeqhoq laoqmyel, haeqmiq vae eiq xilnye gaeq biq maoqhhae; haeqmiq'ae gaeq biq laol aeqyoyoq'ae gaeqzaeqhoq ngeelvae. 29 Cholyaeq aeqyoyoq e aeqhhaol mael'ae neemasu yae lye qiq hhaeq eiq maeq zongl'ae, haeqfu eiq aeqhhaol'ae haelmeeqlye pa'longlzaeq kaol pasaelzaeq hhae, Jidu jiaolhuil'ae meeqlaellye za biq laoqmyel hhae, 30 Aedeeteel laoq Jidu e aeqhhaol, jiaolhuil e zhitiq'ae. 31 "Xilmael gae'lye, haqyoyaeq laoq aeqdae aeqmae zael ae'lye deelsae hhei, kaol haeqmiq nyegael qiqgael kaeqmaoq deelhhei laoqmyel ngeel maoqhhae, kaol niq nulhhaeq laoq aeqhhaol qiq siq laoqmyel peqlal." 32 Xilmael laoq maeqdaeqhhaeq e aolmiq'ae, ngael laoq Jidu kaol jiaolhuil'ae gee lil. 33 Ngeelfeiq, noteel aeqyoyoq'ae gaeqzaeqhoq laoqmyel, haetaeq eiq aeqyoyoq e haeqmiq'ae gaeq biq maoqhhae; haeqmiq eiq yoqhhaeq e haqyo'ae zunjinl biq maoqhhae.