Jinqgaol kaol meeqlaeqmaeq lye naelhaeq mael
13
Xilmael laoq ngael dilsan cil noteel tyuqvae yil. "Aeqchee mael taq vae eiq, bael siqcongl e cholyaeq niq nulhhaeq, paelsilmyel suq nulhhaeq e myeqbongq ae'lye geedu hhei maellye maoqlaol, ngeel'ae lye maeq hhae gee'ae." 2 Yilkaefu golsiq zonglpizaeq e cholyaeq tyuhael kaol baeqjyelboq e haelzhol cholyaeqhael'ae, ngael noteel yaol dil'el cil mol fu gee gol laoqmyel, ngael yaeqmeel noteel tyuqvae maeq zhol feiq, zail qiq pu gee maoq siq: "Ngael zail yi kaollaoq, noteel'ae aeqdilmyel maeq baorongq vae." 3 Xilmael laoq, noteel Jidu ngaeq ae'lye saeziq gee e zenljul mael saelpo kaol'ae. Jidu noteel'ae lye gee'li'laol ruanqroq maeqngeel'ae, daoldaolmyel yoqhhaeq noteel onglci'ae zhee onglzaeq hhae. 4 Yoqhhaeq ruanqroq gae'lye shiqziljal taq'ae diqcheeq biq, ngeelfeiq, Momil e zhee onglzaeq gae'lye yoqhhaeq haeqfu eiq dyeqdeel hhae. Ngaeteel eiq yoqhhaeq e onglci'ae ruanqroq e cholyaeq peqyil aeqwae, ngeelfeiq, noteel gae'lye ngaeteel aeqgael Momil e zhee onglzaeq gae'lye yoqhhaeq nyegael haeqfu eiq qiqgael dyeqdeel maoqlye hhae.5 Noteel duqlye aeqyoyoq laoq xinlyangq onglci'ae zonglzhol hhaemaeq lye nyuq fufu hoq maoqhhae; noteel aeqyoyoq'ae kaoqshil kaoq laoqmyel kaoq fufu hoq maoqhhae. Noteel aeqyoyoq Yesu Jidu laoq noteel onglci'ae zhol hhae lye maeq loq gil laeq hhaemaeq? Maeqngeel laol, noteel laoq maeq kaoqgol e cholyaeq ngeelvae. 6 Ngael noteel loq biq lye xiwangl lil, ngaeteel laoq maeq kaoqgol ongl e cholyaeq maeqngeel yil. 7 Ngaeteel Momil'ae noteel vae duqlaq mael qiqgiq haeq bi zongl lye geezaeq biq lil; xilmael laoq, ngaeteel kaoqgol ongl lil lye zenlminq maeqngeel yil, noteel'ae aeqchee silqinq zongl mael eiq yiqzenlmyel maeq bi zongl lye kaollil, kaol ngaeteel maeq kaoqgol ongl nyedullye kaol'eiq maeqbeeq'ae. 8 Ngaeteel zhen'liq mael'ae hhaol maoqlaol, zhen'liq mael'ae diqqye e silqinq qiqgiq eiq maeq hhae zongl'ae. 9 Ngaeteel laoq ruanqroq noteel laoq aqhabo fu, ngaeteel eiq hhaol yae. Ngaeteel hael geezaeq mael laoq: Noteel qiqgiq geehhael maqza e cholyaeq peqlal biq lye lil. 10 Tyulkaol, ngael noteel e tyuqvae maeq zhol fu, saeziq xihael noteel'ae cu hhei biq, xilmael laoq, ngael noteel yaol mol fu, Hhaoqsongl lye ngaeq'ae heil laeq e laqtaq maellye, noteel'ae aeqlyeq maeq lyeq myel maeq zongl biq kael wae; laqtaq xilmael laoq cholyaeq'ae aqha bi bo'lael maoqlye hhae, cholyaeq yaol zonglmye maoqlye maeqngeel'ae.
11 Aeqnaol naolli laoq, aqsseq aeqnilhael o, noteel'ae hhaol biq lye nyuqlil. Qiqgiq geehhael maqza mael'ae zui'qiuq maoqhhae; ochoq neehongq gee hulm laeq mael'ae jyeqshel maoqhhae; neemae qiq siq laoqmyel ngeel maoqhhae; qiqhhaeq qiqhhaeq nyegael zilzheqlye zhol maoqhhae. Xilnye laol, gaeq kiq e, kaol bi hoqpinq e Momil laoq aeqdilmyel noteel nyegael qiqgael baelzhol'ae. 12 Noteel senljyeq e myeqchilnuq maellye qiqhhaeq qiqhhaeq'ae meeqlaeqmaeq lye naelhaeq maoqhhae. Haelzhol e senltuqhael noteel'ae meeqlaeqmaeq lye naelhaeq'ae.
13 Hhaoqsongl Yesu Jidu e enhuil mael, Momil e neemae maeqpaelmyel gaeq mael kaol senllinq e ganqdongl mael, duqlye noteel haelzhol cholyaeq nyegael baelzhol biq lye nyuqlil!