Yilxiangl kaol qiqshil
12
Aeqyoyoq'ae hodazaq mael qiqgiq maeq meeqyo'lael feiq, ngael maq hodazaq maeq hhaeq'ae. Yaeqmeel ngael Hhaoqsongl ae'lye lael e yilxiangl kaol qiqshil gee maoq. 2 Ngael Jidu onglci'ae zhol e cholyaeq qiq hhaeq siqcongl lil, yoqhhaeq yaol qyel'yuq hoq laefuq'ae dilsan cenq mqmae vae ee da'li biq; aeqhhaol naelnaemyel maeqhe, ngael maeq loq yae, paelsilmyel aeqhhaol naelnaemyel maeqngeel maeqhe, ngael eiq maeq loq yae, Momil maoq maeq loq'ae. 3 Ngael siqcongl e xilnye cholyaeq qiq hhaeq laoq, aeqhhaol naelnaemyel maeqhe, paelsilmyel aeqhhaol naelnaemyel maeqngeel maeqhe, ngael qiqgiq maeq loq yae, Momil maoq maeq loq'ae. 4 Yoqhhaeq yaol Mqmae Zongqdei vae ee da'li biq, kaol zonglhhaq deelhhei e, cholyaeq maeq geedu hhei kiq e saeziq mael gaeq hhei biq vae. 5 Cholyaeq xitaeq gae'lye ngael hoda maoq; ngeelfeiq, ngael aeqyoyoq gae'lye laoq, ngaeq e ruanqroq mael hodazaq maoqlaol, ngaeq'ae hodazaq e qiqgiq maqza. 6 Ngael hoda goq kaol'eiq yaeqzhoq maeq suanl hhaeq'ae, ngael zaqgiq maqgiq e saeziq gee kaol'ae; ngeelfeiq, ngael myeqbongq muqcuq hheikaol qiqgiq maeq gee yil, aeqgael cholyaeq lye ngaeq yaol zhee onglzaeq'ae lye fu peq hhei, kaol yoqhhaeq ngaeq e aeqhhaol taq'ae haelgaeq haelmol mael taq'ae jyeqli hhei maeqhe; 7 Aeqgael ngaeq'ae hhae'lael laeq e qiqshil mael zhee heeq gae'lye, aeqyoyoq dilqeizaeq maeqhe, tyulkaol, aelgong qiq mal ngaeq e aeqhhaol taq'ae codo hhei laq, Saqdanl e moqheilheil du hhei e qiq hhaeq ngaeq'ae zonglkyuq lael laeq hhae, aeqgael ngael aeqyoyoq dilqeizaeq maeqhe lye kaol'ae. 8 Xilmael gae'lye, ngael Hhaoqsongl'ae aelgong xilmael ngaeq e aeqhhaol ae'lye bael eedu laeq lye suq pu geezaeq gol biq aeqwae. 9 Yoqhhaeq ngaeq'ae gee laeq: "Ngaeq e endianq mael nol mulloq'ae, ngaeq e onglzaeq mael laoq cholyaeq e ruanqroq taq'ae qiqgiq geehhael maqza myel mol du'lal kaol'ae." Tyulkaol, ngael aeqyoyoq e ruanqroq mael hhal hodazaq goq yae, kaol Jidu e onglzaeq mael ngaeq'ae bi ocongq yi. 10 Jidu gae'lye, ngael laoq ruanqroq, geekyuq, maeq yael, guaeq'ei bi diqqye, saeq, xihael laoq hhaol e silqinq'ae lye kei lil; ngaeq'ae haeqfu ruanqroq laq laol, haeqfu aqha bi bo'lael laeq kaol'ae.Baoqloq Ge'linqdo jiaolhuil'ae meeq biq
11 Ngael yaeqzhoqzhoq e cholyaeq peqyil mael laoq, noteel lye zonglpeq laq hhae, qiqshiq laoq, ngaeq'ae noteel lye laqma bi deiqqei maoqhhae. Ngael qiqgiq maeq suanl hhaeq'ae, ngeelfeiq, aeqchee silqinq mael taq vae eiq hhael heeq e shiqtuqhael dyul maeq onglzaeq myel maeqngeel yil. 12 Ngael noteel onglci'ae, zhee renqnail maellye, kaol shenqjiq, maeqdaeqhhaeq e silqinq, kaol maeqdaeqhhaeq myel onglzaeq ae'lye ngael aeqdilmyel shiqtuq lil lye zenlminq du hhei. 13 Ngael noteel'ae aeq'yel maeq bi pi e silqinq xilmael maoqlaol, noteel'ae za biq mael baeqjyelboq e jiaolhuilhael'ae maeqmil myel aeqchee za siq maeq? Saeqsael maeq dye e xi qiq mal laoq, noteel ngaeq'ae yuanqliangl laeq o.
14 Yaeqmeel, ngael dilsan cil noteel tyuqvae yi maoqlye paeqgaelsael meeq aeqwae. Ngael xi qiq pu eiq noteel'ae aeq'yel maeq bi pi yil, ngael mul maoqlye mael laoq noteel e dyuqbaq mael maeqngeel yil, noteel yaol mul maoqlye kaollil. Yaeqguq laoq aeqdae aeqmae gae'lye dyuqbaq maeq taeq kael'ae, aeqdae aeqmae laoq yaeqguq gae'lye dyuqbaq taeq deelhhei biq maoqhhae. 15 Ngael noteel e yohael gae'lye dyuqbaq du sheqhhaq, aqha eiq du sheqhhaq lil. Ngael noteel'ae nyeq'ei gaeq biq laol, noteel ngaeq'ae gaeq laeq mael nyeq'ei hhael saoq maeqhael ngeel? 16 Ngeel biq oq, ngael aeqyoyoq noteel'ae aeq'yel maeq bi pi yil, ngeelfeiq, noteel onglci e qiqhhaeq laelhhaeq laoq, ngael zaqgiqgiq, nyuq du hhei e loqho maellye noteel yaol ee'longqzaeq hhae lye gee. 17 Ngaeq lye noteel tyuqvae moqheilheil du hhei e cholyaeqhael onglci'ae lye, ngael haetaeq ae'lye noteel'ae pinqyil zanlzaeq gol laq maeq? 18 Ngael Tiqdo'ae noteel tyuqvae yil lye haelmeeqlye gee biq, aqsseq aeqnil tyutaeq yaol yoqhhaeq nyegael qiqgael bal yil lye yol moqheilhei du hhei, Tiqdo noteel'ae pinqyil zanlzaeq gol laq maeq? Ngaeteel haelzongl silqinq mael taq vae eiq qiqsheel neemae maeqngeel maeq? Qiqsheel e gaelmae deel maeqngeel maeq?
19 Noteel haeqfu eiq ngaeteel laoq noteel e yiqsi'ae aeqyoyoq gae'lye saeziq gee'loqzaeqhoq hhae lye kei gil laeq hhaemaeq? Qiqshiq laoq, ngaeteel laoq Jidu onglci'ae Momil e yiqsi'ae saeziq gee lil. Ngael gaeq hael o, gilzuqmyel silqinq mael laoq noteel'ae aqha bi bo'lael maoqlye hhae. 20 Aeqgael ngael zail lael fu, noteel yaol mol hhei'laol ngael nyuq laoqmyel maeqngeel, noteel eiq ngaeq yaol mol hhei'laol noteel nyuq laoqmyel maeqngeel maeqhe lye gu yae. Ngael laoq geegae, heiqcilnael, holzaeq, aeqyoyoq'ae maoq maeq nyuqzaeq, geekyuq, doqcaqcaq, dilqeizaeq kaol aeqvuqlaelvuqmyel zongl e silqinq xihael za maeqhe lye gu yae. 21 Aeqgael ngael zail lael fu, ngaeq e Momil ngaeq yaol noteel e yiqsi'ae bi saqdol laeq maeqhe lye gu yae, aeqgael haelnaeqmyel cholyaeq yilkaefu golsiq zonglpizaeq, maeqshol myel zongl, ochoq nyegael neemaeba, aeqchee zongl goq laol aeqchee zongl kaol neemae maeq paellael nae gae'lye nyuqsaeq maeqhe lye eiq gu yae.