2
Ngael aeqyoyoq nyuqmeeq aeqwae, aeqgael qiq pu laoq nyuqsaeq gae'lael aeqmyel noteel tyuqvae maq yi vae. 2 Ngaeq lye noteel'ae bi nyuqsaeq kaollaoq, noteel onglci'ae ngaeq'ae bi hhaol laeq e qiq hhaeq eiq maeq zhol wae, ngaeq lye noteel'ae bi nyuqsaeq vae kaol'ae. 3 Ngael noteel'ae silqinq xilmael cu gol biq mael laoq, aeqgael ngael keelyi fu, ngaeq'ae bi hhaol laeq maoq e cholyaeq tyutaeq, daoldaolmyel ngaeq'ae bi nyuqsaeq laeq maeqhe lye kaollil. Ngael eiq xiangxinl lil, ngaeq e hhaol mael laoq noteel haelzhol cholyaeq e hhaol mael ngeelvae. 4 Ngael laefuq neemae zhee nyuqsaeq myel, mabil zu'lye noteel'ae xinl cu biq mael laoq, noteel'ae bi nyuqsaeq maoqlye maeqngeel yil, noteel vae ngael laoq noteel'ae hhaelgaeq biq hhae lye bi loq maoqlye lil.Golsiq zonglpizaeq e cholyaeq'ae shelmianq biq maoqhhae
5 Qiqhhaeq laelhhaeq lye cholyaeq'ae bi nyuqsaeq kaollaoq, yoqhhaeq ngaeq'ae bi nyuqsaeq laeq dyul maeqcil, noteel haelzhol cholyaeq vae eiq aelheel bi nyuqsaeq ngeelvae. Ngael aelheel lye gee mael laoq, aeqgael geezongl naeq hhei maeqhe lye kaollil. 6 Xilnye cholyaeq'ae laoq haelnaeqmyel cholyaeq lye gaezaeq biq laol hhaeq vae, 7 Kaol yoqhhaeq'ae shelmianq biq, kaol haeq nyuqsaeq lye gee biq mael hhael hhaeq wae, aeqgael yoqhhaeq zhee nyuqsaeq biq laol maeq pityeq ongl biq maeqhe! 8 Tyulkaol, ngael noteel'ae haelmeeqlye gee laeqngeel, noteel yoqhhaeq'ae gaeq biq mael zenlminq du hhei biq maoqhhae. 9 Xilmael gae'lye, ngael laefuq eiq noteel'ae xinl cu biq mael laoq, noteel'ae shilfu maoq, kaol noteel aeqchee silqinq mael taq vae eiq ngaeq'ae naelhaeq maeq, maeq naelhaeq maeq lye fu maoqlye lil. 10 Noteel aeqsul'ae shelmianq biq laol, ngael eiq aeqsul'ae shelmianq biq hhaeq. Ngael shelmianq biq kaollaoq, Jidu yiqsi'ae noteel gae'lye shelmianq biq lil, 11 Aeqgael Saqdanl lye pinqyil zanlzaeq yil maeqhe, aedeeteel laoq yoqhhaeq e zaqgiqgiq e loqho mael maeq loq maeqngeel kaol'ae.
Baoqloq'ae zhollihhael maeqsael biq mael kaol haeq nyuqsaeq lye gee mael
12 Yilkaefu, ngael Jidu e fuqyin gae'lye Telloqyal vae keelyil, Hhaoqsongl ngaeq'ae oheiq pong hhei laeq vae. 13 Tyuqfu, ngael ngaeq e aqsseq aeqnil Tiqdo yaol maeq deelpuq hhei laeq'ae, tyulkaol, ngaeq e neemae onglci'ae zhollihhael maeqsael myel zongl laeq'ae, kaol tyuqvae e cholyaeqhael'ae deel maoqvae lye gee biq laol Maqqiqdunl vae yil aeqwae.
14 Ngaeteel Momil'ae meeqyaevae lye gee biq lil, yoqhhaeq duqlye ngaeteel'ae sheeqmyeq laeq'ae, kaol ngaeteel yaol Jidu onglci'ae zonglyinq e cholyaeqhael onglci'ae bi zhol laeq'ae, kaol ngaeteel ae'lye Jidu'ae siqcongl gae'lye za e nulsael mael haeqvae lael'ee myel geegaeq duyil, nulsael xilmael laoq Jidu ae'lye lael hhae. 15 Deqjiul e cholyaeq onglci'ae haoq, paelsilmyel myeyil e cholyaeq onglci'ae haoq, aedeeteel laoq gilzuqmyel Momil'ae heelda hhei biq e Jidu e nulsael mael'ae. 16 Myeyil e cholyaeq'ae lye gee'li'laol, xilmael laoq cholyaeq yaol bi sil hhei e nulsael lael aeqmyel mael'ae, kaol yoqhhaeq yaol bi myeyil hhei; deqjiul e cholyaeq'ae lye gee'li'laol, xilmael laoq cholyaeq yaol bi dyeq e nulsael lael aeqmyel mael'ae, kaol yoqhhaeq yaol bi dyeq. Silqinq xihael aeqsul pi ongl laeq? 17 Ngaeteel laoq haelnaeqmyel cholyaeq laoqmyel maeqngeel yil, yoqhhaeteel laoq Momil e saeziq mael moqgoq geiq kaol ongqzaeq hhae, ngaeteel laoq zaqgiq maqgiq, kaol Momil moqheilheil mael naelhaeq, kaol Momil e yiqsi'ae Jidu onglci'ae lye saeziq gee lil.