Geemeeq deelhhei yosheq e zhiqsil
3
Ngaeteel aeqyoyoq yaol yol gailsaolzaeq laeq? Ngaeteel eiq ochoq laoqmyel cholyaeq lye cu hhei e gailsaol xinl mael noteel'ae heil hhei biq, paelsilmyel noteel e gailsaol xinl mael ochoq'ae heil biq laeq? 2 Noteel laoq ngaeteel e gailsaol xinl ngeelvae, kaol ngaeteel e neemae onglci'ae cuda hhei, kaol cholyaeqhael'ae bi loq, bi duq, 3 Zhee fudu ongl'ae, noteel aeqyoyoq laoq Jidu e xinl'ae, ngaeteel ae'lye cu du hhei hhae. Meqshuiq maellye cu hhei maeqngeel'ae, haeqfu eiq dyeqdeel e Momil e yohael maellye cu hhei hhae; haqlo hoba taq'ae cuda hhei e maeqngeel'ae, neemae taq'ae cuda hhei hhae.4 Ngaeteel Jidu ae'lye Momil'ae xilnye xinlxin caiq za hhae. 5 Ngaeteel aeqyoyoq gae'lye aeqchee lael'ee silqinq zongl mael zae maeqngeel'ae, ngaeteel zae mael laoq Momil ae'lye lael hhae; 6 Yoqhhaeq lye ngaeteel'ae geemeeq deelhhei yosheq e zhiqsil geiq mael'ae bi zae laeq'ae. Geemeeq deelhhei yosheq xilmael laoq suqhhaq taq'ae cuda hhei e geemeeq deelhhei e saeziq maeqngeel'ae, senllinq ae'lye lael e geemeeq deelhhei e saeziq'ae; zil mael laoq cholyaeq yaol bi sil, senllinq mael cholyaeq yaol bi dyeq kaol'ae.
7 Cholyaeq yaol bi sil yil kiq e zil mael haqlo taq'ae keq da hhei vae, kaol rongqyaol za'ae, Yiqsellyel cholyaeqhael Moxi e maduq taq'ae aeqyae aeqyae'lye buyil e rongqyaol gae'lye, yoqhhaeq e maduq mael'ae dyel'eiq deelhae'lye maeq chifu peq biq kaollaoq, 8 Senllinq e mulhhael mael laoq rongqyaol hhal za maeqngeel maeq? 9 Cholyaeq'ae golsiq za'ae lye gee biq e mulhhael mael rongqyaol za kaollaoq, cholyaeq vae gongyil e cholyaeq'ae lye bi gul e mulhhael e rongqyaol tyulmael nyeq'ei hhael heeq wae. 10 Yilkaefu, rongqyaol za e tyulmael, hhael heeq e rongqyaol xilmael gae'lye rongqyaol za maeq suanl hhaeq wae; 11 Rongqyaol mael aeqyae aeqyae'lye buyil hhei e tyumael'ae dyel'eiq rongqyaol za kaollaoq, haeqfu eiq zadeel e xilmael'ae laoq rongqyaol hhal za wae.
12 Aedeeteel'ae panlwangl deelzaeq hhei e xilmael za laol, neemae hhael bozaeq wae, 13 Kaol aedeeteel laoq Moxi laoqmyel maeq dul'ae, yoqhhaeq paeltum maellye maduq mael eechiq hhei, kaol Yiqsellyel cholyaeqhael aeqyae aeqyae'lye buyil hhei e rongqyaol e jyeqjuq mael'ae deelhae'lye maeq hhae chifu'ae. 14 Ngeelfeiq, yoqhhaeteel neehaha, kaol yaeqnao keellye geemeeq deelhhei yogeil mael duq fu, qiqsheel e paeltum xilmael maeq heilgae wae siq; paeltum xilmael Jidu onglci'ae lye caiq beiqgae hhei kaol'ae. 15 Ngeelfeiq, yaeqnao keellye, haeqfu qiqzael Moxi e suqhhaq mael duq fu, paeltum mael yoqhhaeteel e neemae mael'ae cheelkaeq deelhhei wae siq. 16 Ngeelfeiq, yoqhhaeteel e neemae mael Hhaoqsongl boq'ae zhoq polhoqlael laol, Hhaoqsongl lye yoqhhaeq e paeltum mael heilgae biq vae. 17 Hhaoqsongl laoq yohael tyulmael ngeelvae; Hhaoqsongl e yohael mael haeqvae zhol laol, haeqvae laoq zilyoq za'ae. 18 Aedeeteel haelzhol cholyaeq laoq paeltum mael heilgae e maduq maellye, Hhaoqsongl e rongqyaol mael hhae mol vae, maekaeq onglci ae'lye mol du'lal laoqmyel hhae, kaol Hhaoqsongl laoqmyel dul e yanglziq peqlal, kaol rongqyaol za mael taq'ae rongqyaol hhal za, Hhaoqsongl e yohael ae'lye peqlal laoqmyel hhae.