Milcaeq maellye zongldu hhei e moqgoq onglci'ae zoq e zhee pyuqjyeqjyeq mael
4
Tyulkaol, aedeeteel laoq Momil e hhaoqsaeqsaeq mael gae'lye fuqsil e zeqrenl mael hhamul hhei laeq laol, maeq zongl gaeyil ongl yaevae lye maq zoqgiq kael'ae, 2 Ngeelfeiq, zonglhhaq deelhhei e miqyil daoqcheeq e silqinq mael beiqgae hhei, jiaoqhuaq myel maeq zongl, Momil e saeziq e yilsi mael maeq geeba, zhen'liq mael oqlye geegaeq duyil, xilnye laol, Momil e yiqsi'ae aeqyoyoq yaol cholyaeqhael e liangqxin'ae gailsaol hhei biq. 3 Aedeeteel e fuqyin mael baqkaeq laeq kaol'eiq, myeyil e cholyaeq'ae baqkaeq biq dyul wae. 4 Yesu'ae maeq xinlzaeq e cholyaeq xihael e ma'ne mael milcaeq taq e momilhael lye zongl byeq biq, kaol yoqhhaeteel'ae Jidu rongqyaol e fuqyin mael maeq bi mol congl. Jidu laoq Momil e yanglziq ngeelvae. 5 Ngaeteel aeqyoyoq yaol geegaeqzaeq maeqngeel yil, Yesu Jidu laoq Hhaoqsongl'ae lye geegaeq lil, kaol aeqyoyoq laoq Yesu gae'lye noteel e yaqhacheqzaq e cholyaeq geiq lil. 6 Aeqcael mael'ae nahongq vae lye keeqmol du hhei lye moqheilheil biq e Momil, aedeeteel e neemae onglci vae keeqmol hhei laeq vae, kaol aedeeteel'ae Momil e rongqyaol e aeqcael mael Yesu Jidu e maduq mael'ae mol du'lal'ae lye bi loq laeq.7 Ngaeteel'ae pyuqjyeqjyeq xilmael, milcaeq maellye zongldu hhei e moqgoq onglci'ae heil do hhei laq mael laoq, zhee heeq e onglzaeq mael Momil ae'lye lael hhae, ngaeteel ae'lye lael maeqngeel'ae lye bi mol du'lal maoqlye hhae. 8 Ngaeteel'ae yulboq xiboq myel yaqpeq laq feiq, maeq bi zongltyeq hhei yil; neemae onglci'ae haelmillye zongl maoqlye maeq loq feiq, qiqgael'ae fuzaeq yil hhael maqza myel maeq zongl yil; 9 Yoqhhaeteel ngaeteel'ae guaeq'ei diqqye laq feiq, Momil ngaeteel'ae maeq beiqgae laeq'ae; yoqhhaeteel lye ngaeteel yaol milcaeq vae diq leeq laeq feiq, ngaeteel maq myeyil kiq'ae. 10 Ngaeteel e aeqhhaol taq'ae duqlye Yesu e sil mael pi hhei, kaol Yesu e dyeq mael ngaeteel e aeqhhaol taq'ae bi mol du'lal. 11 Aedeeteel dyeqdeel e cholyaeq xihael duqlye Yesu gae'lye sil hhael vae bi zonglkeel, kaol Yesu e aeqyil mael aedeeteel aeqdilmyel sil yilkiq e cholyaeq xihael e aeqhhaol taq'ae bi mol du'lal kaol'ae. 12 Xilnye fu hhei'laol, sil mael ngaeteel e aeqhhaol taq'ae mulhhael mul, ngeelfeiq, dyeq mael noteel e aeqhhaol taq'ae mulhhael mul hhae.
13 Ngeelfeiq, aedeeteel'ae qiqsheel e yohael ae'lye lael e xinlxin za'ae, Momil e Suqhhaq taq'ae cu deelhhei laoqmyel: "Ngael xiangxinl lil, tyulkaol, ngael saeziq gee lil", ngaeteel eiq xiangxinl lil, tyulkaol, saeziq eiq gee lil; 14 Aedeeteel xilnye loq kaol'ae, Hhaoqsongl Yesu yaol bi dyeqhoqlal e tyutaeq, aedeeteel yaol eiq Yesu nyegael qiqgael bi dyeqhoqlal laeq'ae, kaol ngaeteel yaol yoqhhaeq e yiqsi'ae noteel nyegael qiqgael bi haoqtul laeq'ae. 15 Aeqchee silqinq zongl mael eiq noteel gae'lye zongl lil, kaol enhuil mael cholyaeq hhael naeqlael gae'lye hhael bi naeqlael, kaol meeqyaevae lye mael bonghael duyi aeqmyel naeq, xilnye laol, rongqyaol mael Momil'ae biq biq.
Xinlxin maellye ssuqhaoq caqzaq
16 Tyulkaol, ngaeteel maq gu yil. Ngaeteel e nildu aeqhhaol laoq qiqnao qiqnao lye buq yil feiq, onglci e aeqyil laoq qiqnao taq'ae qiqnao yosheq hhal sheq lal. 17 Ngaeteel'ae qiqlaq laq'oqlye e meelzillye shelkuq mael puqlael mael laoq, ngaeteel'ae maeq biqjiaol lael e, haeqfu keellye za e haelnaeqmyel e rongqyaol mael bi peqlal laqngeel lye hhae. 18 Ngaeteel mol laelkiq mael'ae fuyo maeqngeel yil, maeq mol laelkiq mael'ae fuyo kaol'ae; mol laelkiq mael laoq qiqlaq wae, maeq mol laelkiq mael laoq haeqfu keellye hhae.