5
Ngaeteel loq kaol'ae, ngaeteel e milcaeq taq e haeqpael haelcula mael cheqba hhei kaollaoq, aeqgael ngaeteel'ae Momil lye cu hhei laq e laoqhaol za'ae, cholyaeq e aqlaq maellye cu hhei maeqngeel'ae, mqmae taq'ae haeqfu keellye za keel e laoqhaol'ae. 2 Aedeeteel laoq haeqpael haelcul xilmael onglci vae saeq'olheeq, mqmae ae'lye lael e laoqhaol tyulmael hhamul laq lye doqdeelzaeq, kaol aelhongq dumda hhei laoqmyel hhae; 3 Dumda hhei kaollaoq, aeqhhaol nyelguqlye maeqngeel wae.b 4 Qiqshiq laoq, aedeeteel haeqpael haelcul onglci vae zhol e cholyaeq laoq duqhee'lye saeq'olheeq, milcaeq taq e haeqpael haelcul mael heiga goq yae lye maeqngeel'ae, mqmae taq e laoqhaol mael dumda hhei goq yae lye zongl hhae, kaol aeqyil lye aeqdilmyel sil yilkiq e xilmael bi meqdo hhei. 5 Aedeeteel'ae xilmael paeqgaelsael meeq laeq e tyutaeq laoq Momil'ae, yoqhhaeq aedeeteel'ae senllinq mael biq hhei laq kaol zenljul geiq hhae.6 Tyulkaol, ngaeteel duqlye neemae bozaeq lil, kaol ngaeteel loq lil, ngaeteel aeqhhaol xilmael'ae zhol siq laol, Hhaoqsongl nyegael kaeqlaeq qiq mal za wae siq. 7 Ngaeteel haelzongl silqinq mael laoq xinlxin maellye hhae, ma'ne mol maellye maeqngeel'ae. 8 Ngaeteel neemae bozaeq, aeqhhaol ae'lye deelsae hheikaol Hhaoqsongl nyegael qiqgael hhael zhol goq yae. 9 Tyulkaol, aeqhhaol onglci'ae zhol haoq, paelsilmyel aeqhhaol nildu'ae zhol haoq, ngaeteel Hhaoqsongl'ae bi hhaol maoqlye nyuqmeeq aeqwae. 10 Aedeeteel haelzhol cholyaeq laoq aeqdilmyel Jidu e shenqpanltaiq e yiqsi'ae haoqtul deelhhei, kaol hhae bi shenqpanl hhae, haetaeq eiq aeqyoyoq haelzongl maellye, meeq e zongl haoq, paelsilmyel duqlaq zongl haoq hhae bi zonglhoq kaol'ae.
Momil nyegael maoqhoqli maoqhhae
11 Aedeeteel Hhaoqsongl'ae gu maoqhhae lye loq vae laol, cholyaeq'ae haelmeeqlye gee biq maoqhhae; ngeelfeiq, Momil laoq aedeeteel'ae siqcongl'ae, kaol ngael noteel e liangqxin mael eiq ngaeteel'ae siqcongl biq lye panlwangl deelzaeq hhei lil. 12 Ngaeteel noteel'ae aeqyoyoq yaol yol gailsaolzaeq maeqngeel yil, noteel vae ngaeteel'ae hoda laq e jihuil bi za maoqlye lil, kaol noteel'ae cholyaeq e nildu vae fu maoqlaol, cholyaeq e neemae onglci'ae maeq fu myel e hoda e cholyaeq vae geehoq biq e saeziq bi za. 13 Ngaeteel mu kaollaoq, Momil gae'lye lil, ngaeteel geelxu'lye kaollaoq, noteel gae'lye lil, 14 Jidu e gaeq mael ngaeteel'ae mulhhael wae mul lye lyeq laeq kaol'ae. Ngaeteel xilnye gee kael'ae, cholyaeq qiq hhaeq haelzhol cholyaeq hhae sil e vuqtu mael bael sil biq laol, haelzhol cholyaeq gilzuqmyel sil vae. 15 Kaol yoqhhaeq haelzhol cholyaeq e vuqtu mael bael sil biq mael laoq, dyeqdeel e cholyaeq tyuhael aeqyoyoq gae'lye dyeqdeel maeqngeel'ae, yoqhhaeteel e vuqtu mael bael sil biq, kaol dyeqhoqlal e Hhaoqsongl gae'lye dyeq lye hhae.
16 Tyulkaol, yaeqnao ae'lye laol, ngaeteel cholyaeq e nyuq maellye cholyaeq'ae siqcongl lael maeqngeel'ae, yilkaefu ngaeteel laoq cholyaeq e nyuq maellye Jidu'ae siqcongl hhae, ngeelfeiq, yaeqmeel laoq yoqhhaeq'ae xilnye siqcongl maeqngeel wae. 17 Tyulkaol, aeqsul Jidu onglci'ae zhol kaollaoq, yoqhhaeq laoq Momil lye zongldu hhei biq e cholsheq wae, laefuq e silqinq mael buyil hhei'laol yosheq peqlal aeqwae. 18 Xihael gilzuqmyel Momil ae'lye lael hhae; yoqhhaeq Jidu ae'lye ngaeteel yaol yoqhhaeq nyegael bi maoqhoqli laeq, kaol cholyaeq'ae yoqhhaeq nyegael maoqhoqli lye haelmeeqlye gee biq e mulhhael mael aedeeteel'ae yol toqshiq hhei laeq. 19 Xilmael laoq: Momil Jidu onglci'ae lye milcaeq taq e cholyaeqhael yaol aeqyoq nyegael bi maoqhoqli, kaol yoqhhaeteel lye zonglzhil mael yoqhhaeteel e aeqhhaol taq'ae maq baqcheeq da hhei biq'ae, kaol maoqhoqli e saeziq xilmael aedeeteel'ae toqshiq hhei laeq wae. 20 Tyulkaol, ngaeteel Jidu e moqheilheil duyil e cholyaeq geiq, Momil ngaeteel ae'lye noteel'ae haelmeeqlye gee biq laoqmyel hhae. Ngaeteel Jidu'ae dailbiaoq kaol noteel'ae Momil nyegael maoqhoqli gil lye geezaeq lil! 21 Momil lye golsiq maqza e tyutaeq yaol, aedeeteel e vuqtu bi geiq kaol golsiq za e qiq hhaeq bi peqyil hhei, xilnye laol, Jidu laoq aedeeteel yaol yoqhhaeq e onglci'ae Momil e gongyil e cholyaeq bi peqlal laq vae.