6
Ngaeteel Momil nyegael mulhhael qiqgael mul hael eiq noteel'ae haelmeeqlye gee laeqngeel, yoqhhaeq e endianq mael alngeiqmyel haq mul; 2 Yoqhhaeq xilnye gee kaol'ae:"Ngael noq'ae hhaelgaeq biq e naohaeq'ae,
nol geezaeq mael ngael gaeq aeqwae;
ngael noq'ae jiul biq e naohaeq'ae,
ngael noq'ae baelzongl biq aeqwae."
Fu hhei, yaeqmeel laoq Momil cholyaeq'ae hhaelgaeq biq e naohaeq ngeelvae! Fu hhei, yaeqmeel laoq Momil cholyaeq'ae jiul biq e naohaeq ngeelvae! 3 Ngaeteel aeqchee silqinq mael taq vae eiq ochoq'ae maeq zonglboq biq yil, aeqgael mulhhael xilmael ochoq lye bi gaezaeq hhei maeqhe; 4 Daoldaolmyel, sa'oqboqhael laoqmyel e maeq qiqsheel e silqinq taq'ae aeqyoyoq laoq Momil e yaqhacheqzaq e cholyaeq lil lye zenlminq lil: Haeqfu eiq renqnail za, saeqlael puqlael, saeq pi, zai'nanl yo'lael, 5 Kaol alca maellye bi diq, bi ee'longl li, aeqvuqlaelvuqmyel onglci'ae zhol, duqhee'lye mul, maeq yuqxul li kiq, oqma myeq, 6 Kaol shol e neemae za, zhishiq za, zhee zityeq ongl, meeq e zongl, senllinq ganqdongl, zaqgiq maqgiq myel gaeq, 7 Kaol zaqgiq maqgiq e saeziq gee, Momil e onglzaeq mael za, laqsseq laeqbaelboq'ae gongyil e daqzhangldiq moqgoq ae'lye, 8 Rongqyaol paelsilmyel maduq maqza myel zonglpeq, meeq e miqyil paelsilmyel maeqmeeq e miqyil za. Fu hhei'laol ngaeteel laoq cholyaeq'ae cheeqmu laoqmyel hhae, ngeelfeiq, zaqgiq maqgiq yil; 9 Cholyaeqhael ngaeteel'ae maeq siqcongl laoqmyel hhae, qiqshiq laoq, aeqsul eiq ngaeteel yaol siqcongl'ae. Ngaeteel sil laoqmyel feiq, dyeqdeel lil; bi chenqfaq hhei laoqmyel feiq, maeq bi zonglsil hhei yil; 10 Nyuqsaeq laoqmyel feiq, duqlye hhaol mael za'ae; dyuqbaq maq zacongl laoqmyel feiq, haelnaeqmyel cholyaeq'ae bi zacongl; qiqgiq maq zacongl laoqmyel feiq, aeqchee eiq zacongl lil.
11 Ge'linqdo cholyaeqhael o, ngaeteel noteel'ae gee biq e saeziq mael laoq zaqgiq maqgiq yil, neemae eiq kuan lil. 12 Noteel neemae maeq kuan mael laoq ngaeteel gae'lye maeqngeel'ae, noteel aeqyoyoq neemae maeq kuan mael gae'lye hhae. 13 Noteel eiq kuan e neemae maellye ngaeq'ae meeqhoq laeq; ngael saeziq xilmael gee mael laoq aeqyoyoq e yaeqguq'ae gee biq laoqmyel lil.
Haeqfu eiq dyeqdeel e Momil e heelhaol
14 Noteel Yesu'ae maeq xinlzaeq e cholyaeq nyegael nuqkeeq qiq mal haeq pi. Gongyil kaol maeq gongyil mael aeqchee guanxil za hhaemaeq? Aeqcael kaol nahongq mael haelmillye qiqgael zhol laeq? 15 Jidu kaol Biqlyela haelmillyekaol hoqga'li kiq laeq? Hhaoqsongl'ae xiangxinl hael kaol Hhaoqsongl'ae maeq xiangxinl hael aeqchee guanxil za laeq? 16 Momil e heelhaol kaol cholyaeq lye zongldu hhei e momil haelmillyekaol qiqsheel kaollaeq? Aedeeteel laoq haeqfu eiq dyeqdeel e Momil e heelhaol'ae, Momil xilnye gee gol laoqmyel kaol'ae:
"Ngael yoqhhaeteel onglci'ae zhol kaol yilyil laellael mul maoq;
ngael yoqhhaeteel e Momil geiq maoq,
yoqhhaeteel laoq ngaeq e cholyaeq geiq maoqhhae."
17 Tyulkaol, Hhaoqsongl gee:
"Noteel aeqdilmyel yoqhhaeteel onglci ae'lye duyi maoqhhae,
kaol yoqhhaeteel zaellye zonglqyel du hhei;
maeqshol e moqgoq mael'ae haq pa,
xilnye laol, ngael noteel'ae sheeqcaq laqngeel.
18 Ngael noteel e Aeqdae geiq maoq,
noteel laoq ngaeq e yaeqmiq yaqyo geiq maoqhhae.
Xilmael laoq, hhael'onglzaeq zaeqli Hhaoqsongl gee hhae."