Senltuqhael'ae fenglxianl biq mael
16
Senltuqhael'ae dyuqbaqjin e silqinq xilmael, ngael laefuq Ja'latail e jiaolhuilhael'ae haelmillye moqheilheil biq laol, noteel eiq haelmillye zongl gil maoqhhae. 2 Haeqfu qiqzael siq nao e dilyiq tian'ae, haetaeq eiq aeqyoyoq lye zonglzaeq laeq hael onglci ae'lye teel heildu hhei, kaol taeq deelhhei, ngael lael fu caiq doul lil lye haeq zongl gil. 3 Ngael keellael fu, noteel haetaeq haetaeq yaol bi yil maoqlye xinl cu laq laol, ngael yoqhhaeteel yaol moqheilheil du hhei, kaol noteel e dyuqbaq mael Ye'lulsa'lenq vae bi heil yil hhaeq. 4 Ngael eiq hha yil hhae lye kaollaoq, yoqhhaeteel ngaeq nyegael qiqgael yil kael'ae.Baoqloq yil maoqlye nyuqmeeq deelhhei e gaelmae
5 Ngael Maqqiqdunl ae'lye deelpol duyil maoqlye nyuq lil; ngael Maqqiqdunl ae'lye deelpol duyil aeqnaol'ae, noteel e tyuqvae keelyil maoq, 6 Paelsilmyel noteel nyegael qiqtongq baelzhol, kaol noteel nyegael aqga baehae qiqgael bael gol maeqhe. Xilnye laol, ngael haeqvae yil haoq, noteel ngaeq'ae qiq qye bael sheeq du'laq kael'ae. 7 Ngael yaeqmeel gaelmae deepol duyil fu, noteel'ae qiqlaq mol goq yae lye dyul maeqngeel yil; Hhaoqsongl hhaeq lil lye kaollaoq, ngael noteel nyegael qiqtongq baelzhol maoqlye panlwangl lil. 8 Ngeelfeiq, Vuqxunq Zaeqnao keellye, ngael Yiqfuqsoq vae zhol maoq siq, 9 Ngaeteel'ae diqqye laq e cholyaeq zhee naeq'ae, ngeelfeiq, zhee heeq kaol xiaolgoq za e oheiq mael ngaeq gae'lye pong deelhhei laeq'ae.
10 Tiqmoqtail keellael kaollaoq, noteel yoqhhaeq'ae haelmeeqlye zhaofu biq maoqhhae, kaol yoqhhaeq'ae noteel e tyuqvae qiqgiq haeq bi gu, yoqhhaeq Hhaoqsongl e mulhhael mul mael ngael laoqmyel kaol'ae. 11 Tyulkaol, aeqsul eiq yoqhhaeq'ae maeq fu'qiq'ongl yae lye maeq hhae zongl biq'ae. Yoqhhaeq'ae neesaelhhae'lye qiq qye bael sheeq duyil biq, kaol yoqhhaeq yaol ngaeq e saeqvae bi keellael, ngael laoq yoqhhaeq aqsseq aeqnilhael nyegael qiqgael lael biq lye doq deelhhei kaollil.
12 Aqsseq aeqnil Yalbo'loq'ae laoq, ngael hae'nae pu myel yoqhhaeq vae aqsseq aeqnilhael nyegael noteel tyuqvae keelyil lye haelmeeqlye gee biq aeqwae; ngeelfeiq, yaeqmeel yoqhhaeq aeqdilmyel maq yil nae'ae, aeqgael jihuil za fu yoqhhaeq yi kiq'ae.
Aeqnaol naolli e geezaeq mael kaol meeqlaeqmaeq lye naelhaeq mael
13 Noteel yuqnyuqgeellye ngeel maoqhhae, xinlyangq taq'ae sseetae'lye haoqtul deel ongl maoqhhae, teel eiq maqguzaq myel ngeel maoqhhae, aqhabo'lye ngeel maoqhhae. 14 Noteel haelzonglhael laoq gilzuqmyel neegaeqgaeq maellye zongl maoqhhae.
15 Aqsseq aeqnilhael, noteel laoq Sitiqfaqnal qiqhaoq yaol loq'ae, Yalgaiyal milcaeq vae laefuq fuqli siq du'lal e aelsiq'ae; yoqhhaeteel laoq neemae qiqsiqmyel senltuqhael'ae fuqsil gil biq'ae. 16 Ngael noteel'ae xilnye cholyaeqhael'ae, kaol gilzuqmyel yoqhhaeq nyegael duqhee'lye mulhhael qiqgael mul e cholyaeqhael e saeziq mael naelhaeq biq lye haelmeeqlye gee lil. 17 Sitiqfaqnal, Fuqtuqnaqdu kaol Yalgaiguq saeqvae keellael vae, ngael laoq zhee hhaol yae, yoqhhaeteel laoq noteel ngaeq'ae maeq bael zonglkeel hhei laeq mael bael zongl laeq vae. 18 Yoqhhaeteel lye ngael kaol noteel e neemae onglci'ae zhee bi zholsael laeq'ae; xilnye cholyaeqhael vae laoq, noteel aeqdilmyel zunjinl biq maoqhhae.
19 Yalxilyal e jiaolhuilhael noteel'ae meeqlaeqmaeq lye naelhaeq hhae. Yalju'la, Baiqji'la, kaol yoqhhaeteel e laoqhaol e jiaolhuil, Hhaoqsongl onglci'ae noteel'ae meeqlaeqmaeq lye zhee naelhaeq hhae. 20 Aqsseq aeqnilhael gilzuqmyel noteel'ae meeqlaeqmaeq lye naelhaeq hhae. Senljyeq e myeqchilnuq maellye qiqhhaeq qiqhhaeq'ae meeqlaeqmaeq lye naelhaeq maoqhhae.
21 Ngael Baoqloq aeqyoyoq xinl cu kaol noteel'ae meeqlaeqmaeq lye naelhaeq lil. 22 Aeqsul Hhaoqsongl'ae maeq gaeq biq kaollaoq, cholyaeq xitaeq laoq doqchiq hhae bi gee hhae. Hhaoqsongl o, nol lael laeq lye nyuqlil! 23 Hhaoqsongl Yesu Jidu e endianq mael laoq, duqlye noteel haelzhol cholyaeqhael nyegael qiqgael baelzhol biq lye nyuqlil. 24 Ngaeq e gaeq mael Jidu Yesu onglci'ae lye noteel haelzhol cholyaeqhael nyegael qiqgael baelzhol'ae! Amen!