Jidu e dyeqhoqlal mael
15
Aqsseq aeqnilhael, ngael laefuq noteel'ae geegaeq gil biq e fuqyin mael noteel loq maoqhhae; fuqyin xilmael laoq noteel'ae hhamul hhei biq vae, kaol noteel eiq fuqyin mael'ae kaolzaeq kaol haoqtul ongl'ae, 2 Noteel laoq ngaeq lye noteel'ae geegaeq hhei biq e saeziq mael zongl gaeyil ongl kaollaoq, fuqyin xilmael gae'lye hha deqjiul wae, maeqngeel laol noteel laoq alngeiqmyel xiangxinl wae.3 Ngael tyuqfu qiq nao hhamul hhei laeq e fuqyin mael noteel'ae yol geegaeq hhei biq, hhal mulyo mael laoq: Momil e Suqhhaq taq'ae gee laoqmyel, Jidu aedeeteel e golsiq gae'lye sil vae, 4 Kaol baqduqm biq vae; Momil e Suqhhaq taq'ae gee laoqmyel, dilsan tian laoq dyeqhoqlal vae, 5 Kaol Jifaq'ae bi mol hhei wae siq, shiqtuq qyelniq nulhhaeq'ae yol bi mol hhei, 6 Aeqnaol qiq pu laoq aqsseq aeqnil ngaeqhael (500) hhaeq'ae bi mol hhei, cholyaeq xihael onglci'ae qiq miq laoq sil vae, ngeelfeiq, yaeqmeel keellye dyeqdeel siq e cholyaeq hhael naeq'ae. 7 Aeqnaol yoqhhaeq laoq Yaqgel'ae bi molli, zail laoq shiqtuqhael'ae yol bi molli'ae, 8 Aeqnaol naolli laoq ngaeq'ae bi mol hhei laeq'ae; kaol ngael laoq baehae maq lo myel bo hhei e cholyaeq laoqmyel hhae. 9 Ngael laefuq laoq shiqtuqhael onglci'ae hhaelnil nilli e qiq hhaeq lil, kaol shiqtuq lye bi gul maeq zae'ae, ngael laefuq Momil e jiaolhuil'ae guaeq'ei diqqye gol biq kaollil. 10 Ngeelfeiq, Momil e endianq gae'lye, yaeqnao e ngael caiq peqlal lil, kaol yoqhhaeq ngaeq'ae endianq biq laq mael laoq qiqgiq'ae lye maqza myel maeqngeel'ae. Ngael laoq shiqtuqhael taq'ae hhaeqdyul hhael dyul lil; qiqshiq laoq, ngael maeqngeel yil, Momil e endianq mael ngaeq nyegael qiqgael baelzhol hhae. 11 Ngael haoq, paelsilmyel baeqjyelboq e shiqtuqhael haoq, ngaeteel gilzuqmyel xilnye geegaeq lil, kaol noteel eiq gilzuqmyel xilnye xiangxinl vae.
Cholsil e dyeqhoqlal mael
12 Ngaeteel laoq Jidu cholsil onglci ae'lye dyeqhoqlal'ae lye geegaeq kaollaoq, noteel onglci'ae qiq miq laoq haelmillyekaol cholsil dyeqhoqlal e silqinq mael maqza'ae lye gee hhaemaeq? 13 Cholsil dyeqhoqlal e silqinq mael maqza kaollaoq, Jidu eiq maq dyeqhoqlal gol'ae. 14 Jidu maq dyeqhoqlal gol kaollaoq, ngaeteel hael geegaeq mael laoq alngeiqmyel wae, noteel xiangxinl mael eiq alngeiqmyel wae. 15 Xilnye laol, cholyaeq laoq ngaeteel Momil'ae jaq e zoqzenl bael kei biq e cholyaeq'ae lye kei laeq wae, ngaeteel laoq Momil lye Jidu yaol bi dyeqhoqlal hhae lye zoqzenl bael kei kaollil. Cholsil aeqdiqmyel maq dyeqhoqlal kaollaoq, Momil laoq Jidu yaol maeq bi dyeqhoqlal gol ngeelvae. 16 Cholsil maq dyeqhoqlal gol kaollaoq, Jidu eiq maq dyeqhoqlal gol'ae. 17 Jidu maq dyeqhoqlal gol kaollaoq, noteel e xiangxinl mael laoq alngeiqmyel wae, kaol noteel eiq golsiq onglci'ae zhol wae siq. 18 Jidu onglci'ae lye sil e cholyaeq eiq myeyil vae. 19 Aedeeteel Jidu onglci'ae panlwangl deelzaeq hhei mael xi qiqyil'ae oqlye kaollaoq, haelzhol e cholyaeqhael taq'ae hhaoqsaeq hhael saeq hhae.
20 Ngeelfeiq, Jidu laoq cholsil onglci ae'lye dyeqhoqlal wae, kaol sil e cholyaeqhael e laefuq fuqli hhoqlal e aelsiq peqlal. 21 Sil mael laoq cholyaeq qiq hhaeq ae'lye lael hhae, cholsil dyeqhoqlal mael eiq cholyaeq qiq hhaeq ae'lye lael hhae. 22 Yaldang onglci vae cholyaeqhael sil byel vae; qiqsheel ngeelvae, Jidu onglci e cholyaeqhael eiq gilzuqmyel dyeqhoqlal maoqlye hhae. 23 Ngeelfeiq, aeqsul eiq laefuq hael laefuq, aeqnaol hael aeqnaol myel dyeqhoqlal maoqlye hhae: Laefuq fuqli hhoqlal e aelsiq laoq Jidu'ae; aeqnaol yoqhhaeq lael fu laoq, Jidu hhae lye tyuhael dyeqhoqlal maoqlye hhae. 24 Aeqnaol laoq, aeqnaol naolli e shiqshen keellael vae, tyuqfu, Jidu lye zhiqmoq hael zaeq hael, laqtaq za hael, kaol onglzaeq hael gilzuqmyel zonglmye maoqlye hhae, kaol zongmae laqtaq mael Aeqdae Momil'ae heilmoq biq maoqlye hhae. 25 Jidu laoq Momil lye gilzuqmyel diqrenqhael yaol yoqhhaeq e aeqkeel holhhaq vae beiq deelhhei biq fu keellye, aeqdilmyel zongmae geiq maoqlye kaol'ae. 26 Yoqhhaeq zonglmye maoqlye e aeqnaol naolli e diqrenq laoq sil mael ngeelvae. 27 Momil e Suqhhaq taq'ae xilnye gee kaol'ae: "Momil lye halza haelzholhael gilzuqmyel yoqhhaeq e aeqkeel holhhaq vae maeq fuqcongq maeq hhaeq myel bi fuqcongq hhae." Halza haelzholhael yoqhhaeq'ae fuqcongq vae laol, halza haelzholhael yoqhhaeq'ae bi fuqcongq e Momil tyutaeq laoq, onglci'ae maq bal zoq'ae lye zhee fudu ongl hhae. 28 Xilnye kaollaoq, halza haelzholhael yoqhhaeq'ae fuqcongq lael vae, tyuqfu, Yaqyo aeqyoyoq eiq halza haelzholhael yoqhhaeq'ae bi fuqcongq lael e Momil tyutaeq e saeziq mael'ae naelhaeq maoqhhae, xilnye laol, Momil laoq halza haelzholhael onglci'ae, kaol halza haelzholhael holtaq'ae zhol hhae.
29 Xilnye maeqngeel laol, sil e cholyaeq e vuqtu mael bael shelxiq biq e tyuhael laoq, aeqchee gae'lye hhaemaeq? Cholsil maq dyeqhoqlal kiq kaollaoq, aeqcheekaol yoqhhaeteel'ae bael shelxiq biq laeq? 30 Aeqcheekaol ngaeteel haeqfu eiq weiqxianq myel vae zhol laeq? 31 Aqsseq aeqnilhael, ngael aedeeteel e Hhaoqsongl Jidu onglci'ae lye noteel'ae hoda biq laoqmyel, ngael gee e saeziq mael laoq aeqdilmyel hhae, ngaeq'ae naochomyel sil laelkiq e weiqxianq mael puqlael laeq hhae. 32 Cholyaeq'ae lye fu'li'laol, ngael Yiqfuqsoq vae byeljyeqhael nyegael diqgae fu, ngaeq'ae aeqchee meeqyo'lael kiq laeq? Cholsil maq dyeqhoqlal kaollaoq,
"Aedeeteel laoq zaeqlong'long dollong'long gil maoq!
Naeshoq laoq sil maoqlye kaol'ae."
33 Zaqgiq haeq bi giqzaq hhei;
"Cholba nyegael yelchoq geiq kaollaoq,
cholmeeq eiq cholba peqyil kiq'ae."
34 Noteel nyuqgeel lael kaol meeq mael zongl maoqhhae, kaol golsiq haeq zonglpizaeq gil oq; cholyaeq Momil'ae maeq loq kaol'ae. Ngael saeziq xilmael gee mael laoq noteel'ae bi saqdol maoqlye kaollil.
Dyeqhoqlal e aeqhhaol
35 Ngeelfeiq, qiqhhaeq laelhhaeq naelhaeq laelkiq: "Cholsil haelmillye dyeqhoqlal laeq? Yoqhhaeteel laoq haelmillye aeqhhaol maellye lael maoqlye hhaemaeq?" 36 Qiqgiq maeq loq e cholyaeq o, noq lye hael kae hhei mael laoq maeq sil hhei kaollaoq, maq dyeq du'lal kiq'ae. 37 Kaol noq lye hael kae hhei mael laoq aeqgael za e yanglziq maeqngeel'ae, meqziq haoq, paelsilmyel baeqjyelboq e zaelsiq haoq, gilzuqmyel alne dyul wae. 38 Ngeelfeiq, Momil aeqyoyoq e yilsi ae'lye yoqhhaeq'ae yanglziq qiq mal biq hhei biq hhae, kaol hae qiqsheel ael'yuq laol hae qiqsheel e yanglziq bi za'ae. 39 Ruqtiqhael e yanglziq mael laoq gilzuqmyel qiqsheel maeqngeel'ae: Cholyaeq laoq cholyaeq e yanglziq, jyeqyaeq laoq jyeqyaeq e yanglziq, haeqzil laoq haeqzil e yanglziq, ngaeqdyel laoq ngaeqdyel e yanglziq'ae. 40 Mqmae taq'ae halzahael laoq mqmae taq e aeqhhaol za'ae, milcaeq taq'ae halzahael laoq milcaeq taq e aeqhhaol za'ae; ngeelfeiq, mqmae taq'ae halzahael e aeqhhaol e rongqyaol mael laoq qiqsheel'ae, milcaeq taq'ae halzahael e aeqhhaol e rongqyaol mael laoq baeqjyelboq e qiqsheel'ae. 41 Neelmae laoq neelmae e rongqyaol za'ae, baehae laoq baehae e rongqyaol za, aeqgeel laoq aeqgeel e rongqyaol za'ae; aeqgeel xilmael kaol aeqgeel yulmael e rongqyaol mael maeq qiqsheel'ae.
42 Cholsil dyeqhoqlal mael eiq xilnye hhae. Duq vuq biq mael laoq buq yilkiq'ae, dyeqhoqlal mael laoq maq buq yilkiq'ae; 43 Duq vuq biq mael laoq maduq maqza myel hhae, dyeqhoqlal mael laoq rongqyaol hhae; duq vuq biq mael laoq ruanqroq hhae, dyeqhoqlal mael laoq aqhabo hhae; 44 Duq vuq biq mael laoq ruqtiq'ae, dyeqhoqlal mael laoq yohael hhae lye e aeqhhaol'ae. Ruqtiq za kaollaoq, yohael hhae lye e aeqhhaol eiq za'ae. 45 Momil e Suqhhaq taq vae xilnye cu deelhhei: "Laefuq fuqli e cholyaeq Yaldang aeqyil za e cholyaeq peqlal vae;" aeqnaol naolli e Yaldang laoq aeqyil biq e yohael peqlal vae. 46 Ngeelfeiq, yohael hhae lye e cholyaeq laefuq zhol maeqngeel'ae, ruqtiq hhae lye e cholyaeq laefuq zhol hhae, aeqnaol laoq yohael hhae lye e cholyaeq wae siq. 47 Dilyiq gol cholyaeq laoq milcaeq ae'lye lael hhae, kaol milxul hhae lye hhae; dil'el gol cholyaeq laoq mqmae ae'lye lael hhae. 48 Milxul hhae lye e tyutaeq haelmillye laol, milxul hhae lye hael eiq tyulnye hhae; mqmae hhae lye e qiq hhaeq haelmillye laol, mqmae hhae lye hael eiq gilzuqmyel tyulnye hhae. 49 Kaol aedeeteel'ae milxul hhae lye e cholyaeq e yanglziq za laoqmyel, aeqgael mqmae hhae lye e cholyaeq e yanglziq eiq za hhae.
50 Aqsseq aeqnilhael, ngael noteel'ae geegaeq maoqlye mael laoq: Ruqtiq laoq Momil e Goqja mael hhamul maoqlye maeq ongl'ae, buq yilkiq hael eiq maq buq yilkiq mael maq hhamul'ae. 51 Ngael yaeqnao noteel'ae aolmiq e silqinq qiq mal geegaeq laeqngeel: Aedeeteel haelzhol myel sil maoqlye maeqngeel'ae, gilzuqmyel paellael maoqhhae, 52 Qiqlaq myel, mamimi qiqlaq'ae, aeqnaol naolli'ae dalhaol zhangq fu, dalhaol zhangq, cholsil dyeqhoqlal kaol maq buq yilkiq myel peqlal maoqlye hhae, aedeeteel eiq paellael maoqlye kaol'ae. 53 Buq yilkiq xilmael aeqdilmyel maq buq yilkiq myel peqyil hhei; sil yilkiq e xilmael laoq haeqfu eiq maeq sil yilkiq myel peqyil hhei. 54 Buq yilkiq e xilmael laoq maq buq yilkiq myel peqyil hhei, sil yilkiq e xilmael laoq maeq sil yilkiq myel peqyil hhei, tyuqfu, Momil e Suqhhaq taq'ae "diq yinq maellye sil mael meqdo biq vae" lye cu deelhhei e saeziq mael peqlal vae.
55 "Sil mael o!
Noq e diq yinq e laqtaq mael haeqvae za hhaemaeq?
Sil mael o!
Noq e duq zoq e aelgong mael haeqvae za hhaemaeq?"
56 Sil e duq zoq e aelgong mael laoq golsiq mael ngeelvae, golsiq e laqtaq mael laoq lilfaq ngeelvae. 57 Aedeeteel laoq Momil'ae meeqyaevae lye gee biq maoqhhae, yoqhhaeq lye aedeeteel yaol aedeeteel e Hhaoqsongl Yesu Jidu e onglzaeq ae'lye bi zonglyinq laeq vae.
58 Tyulkaol, ngael gaeq e aqsseq aeqnilhael, noteel laoq aeqdilmyel sseeltae'lye haoqtul deelhhei kaol haeq dongni, duqlye Hhaoqsongl e mulhhael mael hael zonglkeel ongl myel zongl, noteel laoq noteel Hhaoqsongl onglci'ae duqhee'lye mul mael laoq, alngeiqmyel maeqngeel'ae lye loq kaol'ae.