Baeqjyelboq minqcuq e saeziq gee mael kaol xianzhi geemyeq mael
14
Noteel gaeq mael'ae zui'qiuq maoqhhae, yohael hhae lye e encil mael zhee mulgoq yae lye zongl maoqhhae, xianzhi e peqlal maoqlye mael geedu e onglzaeq mael'ae nyeq'ei hhal mul maoqhhae. 2 Baeqjyelboq minqcuq e saeziq gee e tyutaeq cholyaeq'ae gee biq maeqngeel'ae, Momil'ae gee biq hhae, cholyaeq qiq hhaeq eiq maeq loq kaol'ae; yoqhhaeq laoq senllinq ae'lye maeq qiqsheel e aolmiq geedu hhae. 3 Ngeelfeiq, xianzhi e peqlal maoqlye mael geedu mael laoq, cholyaeq'ae gee biq hhae, kaol cholyaeq'ae aqha bi bo'lael, haeq nyuqsaeq lye gee biq, kaol neehongq bi hulm lael maoqlye hhae. 4 Baeqjyelboq minqcuq e saeziq gee hael laoq, aeqyoyoq'ae aqha bi bo'lael hhae; xianzhi e peqlal maoqlye mael geedu mael laoq, jiaolhuil e cholyaeqhael'ae aqha bi bo'lael hhae. 5 Ngael laoq noteel baeqjyelboq minqcuq e saeziqhael gee kiq biq lye xiwangl lil, kaol noteel peqlal maoqlye mael geedu e xianzhi geiq biq lye nyeq'ei hhael xiwangl lil; baeqjyelboq minqcuq e saeziq gee hael laoq, aeqchee yilsi lye maeq gee'loq du hhei, jiaolhuil e cholyaeqhael'ae aqha maeq bi bo'lael kaollaoq, peqlal maoqlye mael geedu e xianzhi geiq e tyutaeq laoq yoqhhaeq taq'ae hhael onglzaeq wae.6 Aqsseq aeqnilhael, ngael noteel tyuqvae keelyil kaol saeziq geemyeq biq fu, qiqshil mael maq mul, paelsilmyel zhishiq maq mul, paelsilmyel peqlal maoqlye mael geedu e saeziq maq mul, paelsilmyel geemyeq e saeziq maq mul myel, baeqjyelboq minqcuq e saeziq oqlye gee kaollaoq, noteel'ae aeqchee bi meeqyo'li kiq laeq? 7 Tilliltoqloq kaol dilhongq laoqmyel yotyel gaeq duyi kiq maoqlaol aeqyil maqza e moqgoqhael, gaeq duyi e yotyel mael qiqsheel kaollaoq, haelmillyekaol bo kaol diq mael aeqchee'ae lye loq laeq? 8 Vuqkyul botyel mael loqdaeqlye maeqngeel kaollaoq, aeqsul daqzhangldiq maoqlye paeqgaelsael meeq kiq laeq? 9 Noteel eiq xilnye hhae; myeqhael maellye maeq naelhaeq kiq e saeziq gee kaollaoq, haelmillyekaol gee mael laoq aeqchee gee hhae lye loq laeq? Noteel laoq kong'qil mael'ae saeziq gee'naeq biq hhae. 10 Milcaeq taq'ae maeq qiqsheel e saeziq zhee za'ae, ngeelfeiq, hae qiqsheel eiq yilsi za hhae. 11 Ngael saeziq tyulmael e yilsi mael maeq loq kaollaoq, saeziq gee e cholyaeq laoq, ngael laoq suqhhaq maeq loq e cholyaeq'ae lye kei biq'ae, ngael eiq yoqhhaeq laoq suqhhaq maeq loq e cholyaeq'ae lye kei biq maoq. 12 Noteel eiq xilnye hhae, noteel laoq yohael hhae lye e encil mael'ae zhee mulgoq laol, jiaolhuil e cholyaeqhael'ae aqha bi bo'lael kiq e encil mael'ae hhael zui'qiuq maoqhhae.
13 Tyulkaol, baeqjyelboq minqcuq e saeziq gee hael, baeqjyelboq minqcuq e saeziq mael geepolduhoq kiq e encil mael'ae geezaeq maoqhhae. 14 Ngael baeqjyelboq minqcuq e saeziq maellye heeldoq gee kaollaoq, ngaeq e yohael mael heeldoq gee hhae; ngeelfeiq, ngaeq e neemae nyuq mael'ae xiaolgoq maqza'ae. 15 Ngael haelmillye zongl laeq? Ngael yohael maellye heeldoq gee maoq, neemae nyuq maellye eiq heeldoq gee maoq; ngael yohael maellye changlgo changl maoq, neemae nyuq maellye eiq changlgo changl maoq. 16 Xilnye maeqngeel laol, nol yohael maellye meeqyaevae lye gee fu, tyuqvae baelzhol e baeqjyelboq minqcuq e saeziq mael maeq naelhaeq kiq e cholyaeq, noq e saeziq mael maeq loq'ae, kaol nol meeqyaevae lye gee fu, "Amen" lye haelmillye bael gee laeq? 17 Noq e meeqyaevae lye mael laoq meeq hhae, ngeelfeiq, cholyaeq'ae aqha maeq bi bo'lael kiq'ae. 18 Ngael Momil'ae meeqyaevae lye gee, ngael baeqjyelboq minqcuq e saeziq gee mael noteel gilzuqmyel cholyaeq taq'ae hhael naeq wae siq; 19 Ngeelfeiq, jiaolhuil onglci'ae, ngael cholyaeqhael'ae baeqjyelboq minqcuq e saeziq qiqtongl (10000) doq maellye gee biq mael taq'ae laoq, liqgaiq ongl e saeziq ngaeq doq maellye geemyeq biq mael hhael meeq'ae.
20 Aqsseq aeqnilhael, nyuq mael taq'ae yaeqguq haq geiq gil. Ngeelfeiq, duqlaq e silqinq mael taq'ae yaeqguq geiq maoqhhae, nyuq mael taq'ae laoq haeqfu eiq cholhae geiq maoqhhae. 21 Lilfaq taq'ae cu deelhhei: "Hhaoqsongl gee:
Ngael baeqjyelboq minqcuq e cholyaeqhael e myeqhael,
kaol baeqjyelboq minqcuq e cholyaeqhael e myeqbongq maellye,
cholyaeq xihael'ae saeziq gee biq maoq;
xilnye feiq, yoqhhaeteel ngaeq e saeziq mael maeq naelhaeq nae'ae."
22 Xilnye fu hhei'laol, baeqjyelboq minqcuq e saeziq gee mael laoq, Yesu'ae xinlzaeq e cholyaeq gae'lye jilhaol geiq maeqngeel'ae, Yesu'ae maeq xinlzaeq e cholyaeq gae'lye hhae; xianzhi e peqlal maoqlye mael geedu mael laoq, Yesu'ae maeq xinlzaeq e cholyaeq gae'lye jilhaol geiq maeqngeel'ae, Yesu'ae xinlzaeq e cholyaeq gae'lye hhae. 23 Tyulkaol, jiaolhuil e gilzuqmyel cholyaeqhael qiqgael zhol'eeq deelhhei fu, aeqsul eiq baeqjyelboq minqcuq e saeziq maellye gee kaollaoq, qiqzael laelzael'ae baeqjyelboq minqcuq e saeziq mael maeq naelhaeq kiq e cholyaeq, paelsilmyel Yesu'ae maeq xinlzaeq e cholyaeq do'lal fu, noteel laoq muyil bi she lye gee laelkiq maeqngeel maeq? 24 Aeqsul eiq peqlal maoqlye mael geedu e xianzhi geiq kaollaoq, qiqzael laelzael'ae Yesu'ae maeq xinlzaeq paelsilmyel baeqjyelboq minqcuq e saeziq gee kiq e cholyaeq do'lal fu, cholyaeqhael lye yoqhhaeq e golsiq mael geedu hhei biq kaol shenqpanl biq laol, 25 Yoqhhaeq e neemae onglci'ae ochoq'ae maeq bi loq lye mael bi loqzaeq hhei vae, kaol naeqdeel mael milcaeq'ae tongqmaoq yil aeqmyel Momil'ae heel'ae, kaol yotyel ha'lye geedu hhei, gee: "Momil aeqdilmyel noteel onglci'ae zhol hhae."
Laefuq mael laefuq aeqnaol mael aeqnaol myel zongl maoqhhae
26 Aqsseq aeqnilhael, aelmaol, noteel haelmillye zongl maoq hhaemaeq? Noteel julhuilkei fu, haetaeq'ae shigo za, paelsilmyel geemyeq e saeziq za, paelsilmyel cholyaeq'ae qiqshil biq mael za, paelsilmyel baeqjyelboq minqcuq e saeziq gee kiq mael za, paelsilmyel saeziq mael geepolduhoq kiq mael za laol, aeqchee silqinq mael taq vae eiq cholyaeq'ae aqha bi bo'lael maoqhhae. 27 Baeqjyelboq minqcuq e saeziq gee e cholyaeq zhol kaollaoq, niq nulhhaeq maoq maeq hhae gee'ae, naeq kaol'eiq suq nulhhaeq maeq hhae jyeqli'ae, kaol qiq hhaeq qiq hhaeq lye gee maoqhhae, saeziq mael geepolduhoq e cholyaeq eiq qiq hhaeq zhol maoqhhae. 28 Saeziq mael geepolduhoq e cholyaeq maeq zhol kaollaoq, julhuilkei fu myeqbongq mqcuq hhei, aeqyoyoq'ae kaol Momil'ae gee biq laol hhaeq vae. 29 Xianzhihael peqlal maoqlye mael geedu fu, niq nulhhaeq paelsilmyel suq nulhhaeq maoqlaol maeq hhae gee'ae, baeqjyelboq e cholyaeq laoq hoq maeq maq hoq maeq lye loq maoqhhae. 30 Dongqpyeq vae zhol cholyaeq'ae qiqshil mael yo'li biq kaollaoq, saeziq laefuq gee e tyutaeq laoq myeqbongq mqcuq hheikaol saeziq haeq gee oq. 31 Xilnye laol, noteel qiq hhaeq qiq hhaeq lye peqlal maoqlye mael geedu mael laoq, cholyaeqhael'ae hhae bi xoqxiq kaol neehongq bi hulm li. 32 Xianzhi laoq aeqyoyoq e yohael mael zongltyeq ongl hhae, 33 Momil laoq cholyaeq yaol zonglbeeq e Momil maeqngeel'ae, cholyaeq yaol meeqlaellye qiqgael bi zhol e Momil kaol'ae.
Senltuqhael julhuilkei fu, 34 Cholhae aeqmae laoq myeqbongq mqcuq hheikaol qiqgiq haeq gee myel zhol maoqhhae; lilfaq mael taq'ae cu deelhhei laoqmyel, yoqhhaeteel'ae saeziq maeq bi gee, yoqhhaeteel'ae duqlye saeziq bi naelhaeq maoqhhae lye kaol'ae. 35 Yoqhhaeteel aeqchee xoqxiq maoqlye kaollaoq, laoqhaol vae lye aeqyoyoq e haqyo'ae naelhaeq biq maoqhhae, julhuilkei fu cholhae aeqmae saeziq gee mael laoq miqyil daoqcheeq kaol'ae. 36 Momil e saeziq mael laoq noteel ae'lye duyi e maeqhael ngeel? Noteel'ae oqlye yo'lael maeqhael ngeel? 37 Qiqhhaeq laelhhaeq aeqyoyoq laoq xianzhi, paelsilmyel yohael hhae lye e cholyaeq lil lye kei kaollaoq, ngaeq lye noteel'ae cu hhei biq mael laoq Hhaoqsongl e minllinl mael'ae lye loq maoqhhae. 38 Saeq maeq ol naeq nae e cholyaeq zhol kaollaoq, noteel eiq yoqhhaeq'ae saeq haeq ol naeq biq. 39 Tyulkaol, ngaeq e aqsseq aeqnilhael, noteel laoq xianzhi e peqlal maoqlye mael geedu kiq e encil mael zhee mulgoq yae lye zongl maoqhhae, baeqjyelboq minqcuq e saeziq maeq bi gee lye haeq diqqye. 40 Aeqchee silqinq zongl mael taq vae eiq guigui juqjuq myel, laefuq mael laefuq aeqnaol mael aeqnaol myel zongl maoqhhae.