13
Ngael laoq cholyaeq e saeziq gee kiq, kaol mqmae yosongl e saeziq eiq gee kiq feiq, gaeq mael maqza kaollaoq, ngael laoq meel laelkiq e qyehuqm, meel laelkiq e pianlchuaq laoqmyel peqyil hhei wae. 2 Ngael laoq xianzhi laoqmyel peqlal maoqlye mael geedu kiq, maeq qiqsheel e aolmiq kaol zhishiq eiq loq, kaol geeqzhoq mael bi taelyil ongl e xinlxin zhee za feiq, gaeq mael maqza kaollaoq, ngael qiqgiq maeq suanl hhaeq'ae. 3 Ngael laoq gilzuqmyel halngeiq kaol jadanglhael saeqyaeq'ae byel biq, ochoq'ae bi hoda maoqlyekaol aeqyoyoq e aeqhhaol mael bi pe sil kaol'eiq hhaeq lil, ngeelfeiq, gaeq mael maqza kaollaoq, ngaeq'ae qiqgiq maeq meeqyo'lael kiq'ae. 4 Gaeq mael laoq haeqfu keellye renqnail, ochoq vae eiq meeq biq; gaeq mael laoq heiqcil maeq nael zaeq; gaeq mael laoq aeqyoyoq'ae maq hodazaq kaol maeq dilqeizaeq'ae, 5 Saqdol lal aeqmyel maeq zongl, aeqyoyoq e meeqyo'lael mael'ae maeq geezaeq, hhaoqli hhaoqzaeqlye laoq faqhoq maeq kei'ae, cholyaeq e duqlaq mael maeq suqda'ae, 6 Maeq gongyil mael'ae maeq hhaol, ngeelfeiq, zhen'liq mael'ae laoq hhaol. 7 Gaeq mael laoq aeqchee silqinq mael taq vae eiq zityeq ongl, aeqchee silqinq mael taq vae eiq xiangxinl, aeqchee silqinq mael taq vae eiq panlwanglzaeq, aeqchee silqinq mael taq vae eiq renqnail'ae. 8 Gaeq mael laoq qiqzael eiq maq buyil kiq'ae. Xianzhi e peqlal maoqlye mael geedu e onglzaeq mael laoq cil li kiq'ae, baeqjyelboq minqcuq e saeziq gee kiq e onglzaeq mael eiq buyil kiq'ae; zhishiq mael eiq buyil kiq'ae. 9 Aedeeteel yaeqmeel loq mael laoq teel wae, xianzhi gee hael eiq teel wae, 10 Qiqgiq geehhael maqza e tyutaeq keellael laol, teel loq xihael eiq buyil hhei wae. 11 Ngael yaeqguq geiq fu, saeziq gee mael laoq yaeqguq laoqmyel lil, silqinq'ae fu mael laoq yaeqguq laoqmyel'ae, nyuq mael eiq yaeqguq laoqmyel hhae; heeqda lal kaol cholhae peqlal hhei'laol, yaeqguq fu haelzonglhael beiqgae vae. 12 Aedeeteel yaeqmeel laoq maekaeq maellye chifu kaol maeq fu'loq ongl laoqmyel hhae; tyuqfu keellael laol, aedeeteel laoq yoqhhaeq e maduq mael hhae mol wae. Ngael yaeqnao Momil'ae siqcongl mael laoq teel wae, ngeelfeiq, tyuqfu keellael laol, gilzuqmyel hhae siqcongl wae, kaol Hhaoqsongl ngaeq'ae siqcongl laoqmyel hhae.13 Yaeqnao za siq mael laoq, xinlxin, panlwangl kaol gaeq mael'ae, xi suq mael onglci'ae hhaelheeq heeqli mael laoq gaeq mael'ae.