Yohael hhae lye e encil
12
Aqsseq aeqnilhael o, yohael hhae lye e encil mael'ae gee'li'laol, ngael noteel laoq loq biq lye nyuqlil. 2 Noteel loq'ae, noteel baeqjyelboq minqcuq e cholyaeq geiq fu, duqlye bi cheeqmu hhei, kaol yotyel maq du kiq e cholyaeq lye zongldu hhei e momilhael'ae heel yil lye bi sheeqba hhei. 3 Tyulkaol, ngael noteel'ae bi loq maoq, Momil e yohael ganqdongl li biq hael laoq, cholyaeq qiq hhaeq eiq "Yesu laoq doqchiq pi maoqhhae" lye maeq gee kiq'ae; senllinq ganqdongl li biq maeqngeel kaollaoq, cholyaeq qiq hhaeq eiq "Yesu laoq Hhaoqsongl'ae" lye maeq gee kiq'ae. 4 Encil mael laoq hae'nae sheel myel za hhae, ngeelfeiq, senllinq qiq hhaeq lye biqga hhei hhae. 5 Fuqsil mael laoq hae'nae sheel myel za'ae, ngeelfeiq, Hhaoqsongl qiq hhaeq vae fuqsil hhae. 6 Mulhhael laoq hae'nae sheel myel za'ae, ngeelfeiq, Momil laoq qiq hhaeq wae, yoqhhaeq lye haelzhol cholyaeqhael onglci'ae halza mulhhael mael bi mul tullaeq hhae. 7 Senllinq mael haetaeq e aeqhhaol taq'ae bi mol du'lal mael laoq, cholyaeq'ae bi meeqyo'li maoqlye hhae. 8 Qiqhhaeq laelhhaeq laoq senllinq ae'lye geel e saeziq hhamul; qiqhhaeq laelhhaeq laoq senllinq xitaeq'ae kaolzaeq kaol zhishiq e saeziq mael eiq hhamul hhei biq'ae; 9 Qiqhhaeq laelhhaeq laoq senllinq xitaeq ae'lye xinlxin hhamul; qiqhhaeq laelhhaeq laoq senllinq xitaeq ae'lye cholnael zonglmeeq kiq e encil hhamul; 10 Qiqhhaeq laelhhaeq laoq shenqjiq zongl ongl, qiqhhaeq laelhhaeq laoq xianzhi geiq ongl, qiqhhaeq laelhhaeq laoq hae qiqsheel yohael'ae lye loq ongl'ae, qiqhhaeq laelhhaeq laoq baeqjyelboq minqcuq e saeziq gee kiq, qiqhhaeq laelhhaeq laoq baeqjyelboq minqcuq e saeziq mael geepolduhoq hhei ongl'ae. 11 Xihael gilzuqmyel qiq hhaeq hhaeqli e senllinq xitaeq lye mulhhael mul du hhei hhae, kaol aeqyoyoq e zhiqyil maellye haetaeq'ae hae qiqsheel heil biq maoqlye laol hae qiqsheel heil biq.Aeqhhaol qiq siq'ae laoq zhitiq haelnaeqmyel cuq'ae
12 Aeqhhaol laoq qiq siq wae, ngeelfeiq, zhitiq laoq naeq hhae, aeqhhaol e zhitiq naeq feiq, aeqhhaol laoq qiq siq wae, Jidu eiq xilnye laoqmyel hhae. 13 Aedeeteel laoq Yoqtail cholyaeq haoq, Xi'lal cholyaeq haoq, hhaeq'ongq ongqzaeq e cholyaeq haoq, zilyoq e cholyaeq haoq, gilzuqmyel senllinq xilmael ae'lye shelxiq hheikaol aeqhhaol qiq siq peqlal, kaol neemae onglci'ae senllinq xitaeq zhol'ae.
14 Aeqhhaol vae laoq zhitiq qiq mal cuq dyul maeqcil'ae, zhitiq haelnaeqmyel cuq'ae. 15 Aeqkeel mael "ngael laoq aqlaq maeqngeel yil, tyulkaol, aeqhhaol e maeqngeel yil" lye gee kaollaoq, aeqkeel mael xilnye gae'lye aeqhhaol e maeqngeel waemaeq? 16 Naeqbol mael "ngael ma'ne maeqngeel yil, tyulkaol, aeqhhaol e maeqngeel yil" lye gee kaollaoq, naeqbol mael xilnye gae'lye aeqhhaol e maeqngeel waemaeq? 17 Aeqhhaol qiqsiqmyel ma'ne kaollaoq, haelmillye yotyel gaeqlael kiq laeq? Aeqhhaol qiqsiqmyel naeqbol kaollaoq, haelmillye shi'nul kiq laeq? 18 Ngeelfeiq, yaeqmeel Momil laoq aeqyoyoq e yilsi lye, zhitiq mael aeqhhaol taq'ae qiq mal qiq mal lye zonglcuq da hhei vae. 19 Gilzuqmyel zhitiq qiq mal oq kaollaoq, aeqhhaol mael haeqvae za hhaemaeq? 20 Ngeelfeiq, yaeqmeel zhitiq mael naeq feiq, aeqhhaol laoq qiq siq wae. 21 Ma'ne mael aqlaq mael'ae "ngael noq yaol maq mulyo yae" lye maeq hhae gee biq'ae, vuqduq mael eiq aeqkeel mael'ae "ngael noq yaol maq mulyo yae" lye maeq hhae gee biq'ae. 22 Tyulnye maeqngeel myel, aeqhhaol taq e zhitiq mael, cholyaeq lye kei laol ruanqroq hhae lye mael laoq nyeq'ei mulyo'ae; 23 Aeqhhaol taq e zhitiq mael, aedeeteel'ae lye fu'li'laol maeq fuyo mael'ae nyeq'ei hhael fuyo biq maoqhhae; aedeeteel e saqdol lal aeqmyel e zhitiq mael'ae nyeq'ei zhigaqlye hhael dulmkaeq hhei biq maoqhhae. 24 Aedeeteel e maq saqdol lal aeqmyel e zhitiq mael'ae maeq zonglzhi biq kael'ae; ngeelfeiq, Momil lye aeqhhaol mael'ae peilda meeq hhei wae, kaol hhael naeq myel e fu'qiq'ongl mael maq lo e zhitiq'ae heil hhei biq, 25 Zhitiq mael qiq mal qiq mal'ae zhaofu maoqhhae, aeqgael aeqhhaol e zhitiqhael maq hoqga'li kiq maeqhe. 26 Zhitiq qiq mal'ae saeq biq kaollaoq, zhitiqhael hhaellaelmyel saeq wae; zhitiq qiq mal rongqyaol za kaollaoq, zhitiqhael hhaellaelmyel hhaol wae.
27 Noteel laoq Jidu e aeqhhaol'ae, kaol haetaeq eiq zhitiq'ae. 28 Momil jiaolhuil vae zongltul hhei mael laoq, dilyiq laoq shiqtuq'ae; dil'el laoq xianzhi'ae; dilsan laoq laoqsi'ae; aeqnaol laoq, shenqjiq zongl kiq hael'ae; zail laoq, cholnael zonglmeeq kiq e encil za hael, cholyaeq'ae baelzongl biq hael, guanqliq hael, kaol baeqjyelboq minqcuq e saeziq gee kiq hael'ae. 29 Haetaeq myel shiqtuq maeqhael ngeel? Haetaeq myel xianzhi maeqhael ngeel? Haetaeq myel laoqsi maeqhael ngeel? Haetaeq myel shenqjiq zongl kiq e cholyaeq maeqhael ngeel? 30 Haetaeq myel cholnael zonglmeeq kiq e encil za maeqhael ngeel? Haetaeq myel baeqjyelboq minqcuq e saeziq gee kiq maeqhael ngeel? Haetaeq myel baeqjyelboq minqcuq e saeziq gee mael geepolduhoq kiq maeqhael ngeel? 31 Noteel laoq hhael heeq encil tyulmael'ae zui'qiuq maoqhhae.
Gaeq mael
Ngael yaeqmeel hhaelmeeq meeqli e gaelmae mael noteel'ae tyuqmyeq gil laeqngeel.