Baoqloq'ae Maq'eqta vae lye hael puqli biq mael
28
Ngaeteel deqjiul hhei aeqnaol, daoq tyulmael Maq'eqta lye gul hhae lye caiq loq oqyilsiq. 2 Tyuqvae milcaeq e cholyaeqhael ngaeteel'ae zhee meeq laeq'ae; vuq'yel qiq bongq yelgae gol, aqga eiq ga hhae, tyulkaol, yoqhhaeteel aeqzaeq bodoq hheikaol ngaeteel'ae zhaofu laeq hhae. 3 Baoqloq aeqzaeq qiq yel o'laq, kaol baqdoq da hhei fu, duq zoq e oqhol qiq yaeq, hongl biq kaol zhi duyi, kaol yoqhhaeq e aqlaq mael'ae koqtyeq biq. 4 Tyuqvae milcaeq e cholyaeqhael oqhol tyulmael yoqhhaeq e aqlaq mael'ae gaecheeq deelhhei mol hhei biq laol, qiqhhaeq qiqhhaeq'ae geegaeq gil: "Cholyaeq xitaeq laoq aeqdilmyel cholyaeq xyeq gol e cholyaeq she, eeldeel deelmae ae'lye kihezaq feiq, mqmae toq yoqhhaeq'ae maeq bi dyeqdeel'ae." 5 Ngeelfeiq, Baoqloq lye oqhol tyu qiq yaeq mael aeqzaeq doq myel vae zu do biq, aeqyoq'ae teel eiq maeq zonglnael biq'ae. 6 Yoqhhaeteel laoq Baoqloq'ae zhee lael biq, paelsilmyel qiqlaqmyel sil hhei maeqlye fu deelhhei hhae. Ngeelfeiq, haelnaeq doq vae, yoqhhaeq'ae qiqgiq maeq zongl li biq she lye mol hhei gil biq, kaol yoqhhaeteel nyuqpael hhei, kaol yoqhhaeq laoq momil'ae lye gee gil. 7 Tyuqvae dongqpyeq'ae haeldye teel za'ae, daoq xilmael e yoheeq Bulbaiqliuq hhae. Yoqhhaeq ngaeteel'ae sheeqcaq laq, kaol ngaeteel'ae haelmeeqlye suq nao zhaofu laeq vae. 8 Tyuqfu, Bulbaiqliuq e aeqdae oqma yocil nael biq, vuqduqpaeq biq kaol ssuqhhal vae ssuqza deelhhei hhae, Baoqloq yoqhhaeq e tyuqvae li kaol yoqhhaeq'ae aqlaq baqcheeq da hheikaol heeldoq gee biq, kaol yoqhhaeq yaol zonglmeeq biq vae. 9 Tyuq ae'lye aeqnaol, daoq taq'ae zhol e baeqjyelboq e naelgol nael biq hael eiq gilzuqmyel lael vae, kaol gilzuqmyel eiq zonglmeeq gil biq vae. 10 Yoqhhaeteel aeqchee taq vae eiq ngaeteel'ae zunjinl laeq'ae; kaol ngaeteel hoq kai maoqlye fu, ngaeteel hal mulyo e moqgoq heil gil laeq laeq hhae.Baoqloq Loqmaq vae keelli
11 Baehae sul siq gol hhei'laol, ngaeteel Yallilshandal ae'lye lael e daoq taq'ae aqga baehae gol lal e hoq qiq mal'ae zhol da'li. Hoq tyulmael laoq "Zhoulsi Haeqmoq" lye gul hhae. 12 Ngaeteel Xullaguq vae keelli laol, tyuqvae suq nao zhol gil aeqwae. 13 Tyuqvae lye hoq eetyeq e sulmde mael ee'qei hhei, kaol Lilji'ong vae keelli. Qiq nao gol hhei'laol, nanqbian boq ae'lye zaeqxil bo laeq, aeqnaol qiq nao Buldiu'lil vae keelli. 14 Ngaeteel tyuqvae lye aqsseq aeqnil qiq miq deelpuq hhei, yoqhhaeteel ngaeteel'ae baelzhol lye gee laeq, kaol hhaellaelmyel siq nao zhol gil aeqwae. Xilnye laol, ngaeteel Loqmaq vae keellael aeqwae. 15 Aqsseq aeqnilhael ngaeteel lael vae lye gaeq hhei biq laol, Loqmaq ae'lye duyi, kaol Yalbiqvu kaol San'guanq vae ngaeteel'ae sheeqyi laeq hhae. Baoqloq yoqhhaeteel yaol mol hhei biq laol, Momil'ae meeqyaevae lye gee biq, kaol neemae hhael bozaeq lael biq vae.
Baoqloq Loqmaq vae fuqyin geegaeq gil biq
16 Ngaeteel Loqmaq vae keelli aeqwae, Baoqloq aeqyoq qiq hhaeq myel yoqhhaeq'ae fu'qyezaq e dangbinkei e cholyaeq nyegael qiqgael bi baelzhol hhae. 17 Suq nao gol hhei'laol, Baoqloq Yoqtail cholyaeq e yoheeqhael yaol gul laeq. Yoqhhaeteel keellael vae, kaol Baoqloq gee: "Algo aeqnilhael o, ngael cholyaeqhael'ae maeq diqqye biq kaol aedeeteel aeqpyuq aeqdae e gui'liq mael'ae maeq diqqye gol feiq, ee'longl li biq e cholyaeq'ae deiqtyeq laoqmyel deiqtyeq laeq hhae, kaol Ye'lulsa'lenq ae'lye mael Loqmaq cholyaeq e aqlaq mael'ae eemoq laeq hhae. 18 Yoqhhaeteel ngaeq'ae heqnaelhaeq laeq aeqnaol'ae, ngaeq yaol pyeqduhoq maoqlye zongl hhae, ngaeq'ae hhae sil e golsiq maqza kaol'ae. 19 Ngeelfeiq, Yoqtail cholyaeqhael maeq naelhaeq nae, kaol Kaiqsa zael'ae maeq kae li maeq hhaeq kaol caiq kae li aeqlil, ngael ngaeq e minqcuq e cholyaeqhael'ae zhiqmoqkae biq maoqlye maeqngeel yil. 20 Tyulkaol, ngael noteel yaol gul laeq kaol noteel'ae geegaeq biq. Ngaeq yaol sulmca maellye kaltoq laq mael laoq, Yiqsellyel cholyaeqhael e chifuzaeq mael gae'lye hhae." 21 Yoqhhaeteel gee: "Ngaeteel Yoqtail ae'lye lael e noq'ae gee e xinl maeq heil yo hhei yil, algo aeqnilhael onglci e cholyaeq qiq hhaeq qiqgiq maeq gee lael'ae, noq'ae maeqmeeq e saeziq eiq maeq gee'ae. 22 Ngeelfeiq, ngaeteel nol haelmillye gee maeq lye naelhaeq goq yae, ngaeteel laoq haeqvae lael'ee myel e cholyaeqhael ngaeteel xiangxinl gil e xi qiqsheel mael'ae zhee diqqye gil hhae lye loq kaollil." 23 Yoqhhaeteel Baoqloq nyegael naohaeq qiq nao geemeeq deelhhei vae, tyuqfu qiq nao keellael laol, haelnaeqmyel cholyaeq yoqhhaeq zhol myel vae yoqhhaeq'ae mol lael. Baoqloq yoqhhaeteel'ae mqshoq ae'lye mael mqkiq'ae keellye geemyeq gil biq, kaol Momil e Goqja gae'lye zoqzenl zhee kei vae, Moxi e lilfaq kaol xianzhi e saeziq maellye cholyaeqhael'ae Yesu'ae xinlzaeq maoqhhae lye geemyeq gil biq. 24 Yoqhhaeq haelgee e saeziq mael, xiangxinl e cholyaeq zhol, maeq xiangxinl e cholyaeq eiq zhol'ae. 25 Yoqhhaeteel hhaellaelmyel maq hoqga'li ongl kaol kici byel vae. Maq kici laefuq'ae, Baoqloq saeziq qiqniq doq gee gil biq: "Senllinq mael Yiqsailyal xianzhi ae'lye noteel e aeqpyuq aeqdae'ae haelgee biq e saeziq mael teel eiq maq ba'ae. 26-27 Yoqhhaeq gee: 'Nol cholyaeq xihael'ae geegaeq yil biq:
'Cholyaeq xihael e neemae mael mq yil biq,
naeqbol deiqchiq hhei, ma'ne mi'qye hhei,
aeqgael ma'ne mol hhei, naeqbol gaeq hhei,
neemae mael loq li biq kaol polhoqlael laol,
ngael yoqhhaeteel'ae zonglmeeq biq maeqhe.'
Tyulkaol,
noteel hae'nae zael gaeq vae,
ngeelfeiq, maeq loq'ae,
hae'nae zael mol vae,
ngeelfeiq, maeq fu'loq ongl biq'ae.'
28 Tyulkaol, noteel loq maoqhhae, Momil e jiul'en xilmael laoq baeqjyelboq minqcuq'ae geegaeq duyil aeqwae, kaol yoqhhaeteel eiq aeqdilmyel naelhaeq'ae."a 30 Baoqloq aeqyoyoq lye dyuqbaq du hheikaol zhol e laoqhaol vae niq hoq zhol bong vae. Aeqsul yoqhhaeq'ae mol lael kaol'eiq yoqhhaeq sheeqcaq gil biq'ae. 31 Baoqloq qiqgiq maqguzaq myel Momil e Goqja e fuqyin mael cholyaeqhael'ae geegaeq gil biq, kaol Hhaoqsongl Yesu Jidu haelzongl e silqinq mael yoqhhaeteel'ae geemyeq gil biq hhae. Yoqhhaeq'ae diqqye biq e cholyaeq qiq hhaeq eiq maeq zhol'ae.