Yoqhanl Fuqyin
Momil e Saeziq mael cholyaeq peqlal vae
1
Mqmae milcaeq zonglbeibei du hhei laefuq'ae, Saeziq za vae, Saeziq mael Momil nyegael qiqgael zhol hhae, Saeziq mael laoq Momil ngeelvae. 2 Saeziq xilmael mqmae milcaeq zonglbeibei du hhei laefuq ae'lye Momil nyegael qiqgael zhol wae. 3 Halza haelzholhael laoq yoqhhaeq ae'lye zonglbeibei du hhei hhae, hael zongldu hhei hael laoq, hae qiqsheel eiq yoqhhaeq ae'lye zongldu hhei hhae, 4 Kaol aeqyil mael yoqhhaeq e onglci'ae za, aeqyil xilmael laoq cholyaeq e aeqcael ngeelvae. 5 Aeqcael mael nahongq vae cuqmol do hhei, nahongq mael aeqcael mael'ae maeq jyeqli ongl'ae.6 Momil lye Yoqhanl lye gul biq e cholyaeq qiq hhaeq yaol moqheilheil du hhei. 7 Yoqhhaeq yi mael laoq zoqzenlkei maoqlye hhae, aeqcael tyulmael'ae zoqzenl ngeelvae, kaol cholyaeqhael'ae yoqhhaeq ae'lye bi xiangxinl maoqlye hhae. 8 Yoqhhaeq aeqcael tyulmael maeqngeel'ae, ngeelfeiq, aeqcael tyulmael'ae zoqzenl bael kei hhae. 9 Aeqcael tyulmael milcaeq taq'ae yi, kaol cholyaeqhael'ae cuqmol biq e aeqdilmyel e aeqcael'ae. 10 Milcaeq taq hael yoqhhaeq ae'lye zongldu hhei vae, ngeelfeiq, yoqhhaeq milcaeq taq'ae zhol fu, milcaeq taq e cholyaeqhael yoqhhaeq'ae maeq siqcongl biq'ae. 11 Yoqhhaeq aeqyoyoq e milcaeq vae keelyi, ngeelfeiq, aeqyoyoq e cholyaeqhael yoqhhaeq'ae maeq sheeqcaq biq'ae. 12 Yoqhhaeq'ae sheeqcaq biq e cholyaeqhael laoq, yoqhhaeq'ae xiangxinla e cholyaeq ngeelvae, kaol yoqhhaeq yoqhhaeteel'ae Momil e yaeqmiq yaqyo geiq e laqtaq biq hhei biq. 13 Cholyaeq xihael laoq siq ae'lye bo hhei maeqngeel'ae, haeqmiyaeq kaol haqyoyaeq saqdol lal aeqmyel mulgoq tyulmael ae'lye bo hhei maeqngeel'ae, cholyaeq nyuq mael ae'lye bo hhei eiq maeqngeel'ae, yoqhhaeteel yaol laoq Momil lye bo hhei hhae.
14 Saeziq tyulmael cholyaeq qiq hhaeq peqlal vae, kaol aedeeteel onglci'ae zhol, yoqhhaeq'ae endianq kaol zhen'liq bong'lye za. Ngaeteel yoqhhaeq e rongqyaol mael mol gol wae, aeqdae ae'lye lael e Yaqyo qiqhhaeq hhaeqli e rongqyaol mael ngeelvae. 15 Yoqhanl yoqhhaeq'ae zoqzenl bael kei biq, kaol yotyel haeqheemyel gul: "Xitaeq gae'lye ngael xilnye gee gol: 'Aeqnaol'ae lael maoqlye e tyutaeq laoq ngaeq taq'ae hhael heeq'ae, yoqhhaeq laoq ngaeq e laefuq ae'lye zhol kaol'ae.'" 16 Aedeeteel yoqhhaeq e duqgongqgongqlye za onglci ae'lye, endianq hhamul'ae, kaol hhaelgaeq taq'ae hhaelgaeq laeq'ae. 17 Lilfaq mael laoq Moxi ae'lye gee gaeyi hhae, ngeelfeiq, endianq kaol zhen'liq mael laoq Yesu Jidu ae'lye lael hhae. 18 Momil yaol mol gol e cholyaeq qiq hhaeq eiq maeq zhol'ae, aeqdae nyegael guanxil zhee meeq e Yaqyo qiqhhaeq hhaeqli lye Momil yaol bi mol du'lal hhae.
Shelxiqzongl e Yoqhanl e zoqzenl mael
19 Sa'oqboqhael laoq Yoqhanl e zoqzenl mael'ae: Yoqtail cholyaeq lye Ye'lulsa'lenq vae lye jilsi kaol Lilveil cholyaeq yaol Yoqhanl tyuqvae yil lye moqheilheil du hhei, kaol yoqhhaeq'ae naelhaeq biq: "Nol aeqsul lilmaeq?" 20 Yoqhanl qiqgiq maeq geehhaq myel cenqrenl'ae, kaol loqlilshe'lye gee: "Ngael Jidu maeqngeel yil." 21 Yoqhhaeteel yoqhhaeq'ae yol naelhaeq biq: "Aelmaol, nol aeqsul lilmaeq? Nol Yiqlilyal lilmaeq?" Yoqhhaeq gee: "Ngael maeqngeel yil." "Xianzhi tyutaeq lilmaeq?" Yoqhhaeq geehoq biq: "Maeqngeel yil." 22 Tyulkaol, yoqhhaeteel yoqhhaeq'ae yol naelhaeq biq: "Nol aeqdilmyel aeqsul lilmaeq? Nol aeqsul lil lye aeqyoyoq geedu hhei, kaol ngaeteel laoq ngaeteel'ae moqheilheil laeq e cholyaeq'ae geegaeq hoqli biq maoq yae." 23 Yoqhhaeq gee: "Yiqsailyal xianzhi gee gol laoqmyel, ngael laoq diqsheelleeldye vae yotyel haeqheemyel 'Hhaoqsongl e gaelmae mael duqzhoq deelhhei maoqhhae' lye gul e qiq hhaeq lil." 24 Cholyaeq tyuhael laoq Faqlilsail cholyaeq lye moqheilheil du hhei hhae. 25 Yoqhhaeteel Yoqhanl'ae naelhaeq biq: "Nol Jidu maeqngeel, Yiqlilyal maeqngeel, xianzhi tyutaeq eiq maeqngeel, aelmaol, nol aeqcheekaol cholyaeqhael'ae shelxiqzongl gil biq lilmaeq?" 26 Yoqhanl geehoq biq: "Ngael laoq eelcuq maellye shelxiqzongl, ngeelfeiq, noteel onglci'ae noteel maeq siqcongl e qiq hhaeq zhol'ae, 27 Yoqhhaeq laoq ngaeq e aeqnaol'ae lael e tyutaeq ngeelvae, ngael yoqhhaeq'ae paqno alca bael keelpyel biq eiq maeq zae'ae." 28 Silqinq xihael laoq Yoqdanl Lolbaeq e neeldu aelheiq e Boqdalniq vae, Yoqhanl shelxiqzongl e milcaeq vae peqlal hhae.
Momil e aeqyol yolyaeq
29 Dil'el tian, Yoqhanl laoq Yesu yoqhhaeq boq'ae lael e mol hhei biq, kaol gee: "Fu gil, xitaeq laoq Momil e aeqyol yolyaeq'ae, milcaeq taq e cholyaeqhael e golsiq mael zonglgae hhei e tyutaeq ngeelvae!" 30 Ngael xitaeq gae'lye xilnye gee gol: 'Cholyaeq qiq hhaeq, ngaeq e aeqnaol'ae lael e tyutaeq, yoqhhaeq ngaeq e aeqnaol'ae lael feiq, ngaeq taq'ae hhael heeq hhae, yoqhhaeq laoq ngaeq e laefuq ae'lye zhol kaol'ae.' 31 Ngael laefuq laoq yoqhhaeq yaol maeq siqcongl yil, ngeelfeiq, Yiqsellyel cholyaeqhael'ae yoqhhaeq laoq aeqsul'ae lye bi loq maoq, tyulkaol, ngael eelcuq maellye shelxiqzongl yi aeqlil." 32 Yoqhanl zoqzenl yol kei, gee: "Ngael laefuq senllinq mael haoqhaoq laoqmyel mqmae ae'lye loq gayi, kaol yoqhhaeq e aeqhhaol taq'ae zhol deelhhei mol lil. 33 Ngael laefuq laoq yoqhhaeq yaol maeq siqcongl yil, ngeelfeiq, ngaeq yaol eelcuq maellye shelxiqzongl yi lye moqheilheil laeq e tyutaeq ngaeq'ae gee laeq: 'Nol senllinq mael loq gayi, kaol aeqsul e aeqhhaol taq'ae zhol deelhhei mol laol, aeqsul laoq senllinq maellye shelxiqzongl maoqlye e tyutaeq ngeelvae.' 34 Ngael mol hhei'laol, zoqzenlkei wae, gee: 'Xitaeq laoq Momil e Yaqyo'ae.'"
Yesu lye laefuq fuqli qiq pu saelpodu hhei e laqcaqhael
35 Qiq nao gol hhei'laol, Yoqhanl kaol laqcaq niq nulhhaeq tyuqvae zhol deelhhei. 36 Yoqhanl laoq Yesu deelpol duyil mol hhei biq fu, gee: "Fu gil, Momil e aeqyol yolyaeq'ae!" 37 Laqcaq tyu niq nulhhaeq yoqhhaeq gee e saeziq mael gaeq hhei biq laol, Yesu'ae cho'lyeq li vae. 38 Yesu zipol hoqlael laol tyu niq nulhhaeq yoqhhaeq'ae cho'lyeq mol hhei biq, kaol yoqhhaeteel'ae naelhaeq biq: "Noteel aeqchee mulyo yae maeq?" Yoqhhaeteel geehoq biq: "Labiq, nol haeqvae haq lilmaeq?" Labiq e yilsi laoq laoqsi'ae gee hhae. 39 Yesu gee: "Noteel fu lael gil!" Tyulkaol, yoqhhaeteel yoqhhaeq haq myel'ae fu'li vae, tyuqfu laoq xalvuq sildianq laellye fu'ae; tyuqfu qiq nao yoqhhaeteel Yesu nyegael qiqgael bael haq hhae. 40 Yoqhanl gee e saeziq mael gaeq hhei'laol, Yesu'ae cho'lyeq li e tyu niq nulhhaeq'ae onglci e qiq hhaeq laoq, Ximenq Biqdeq e aeqnil Andeqlyel'ae. 41 Yoqhhaeq laefuqmyel aeqyoq e algo Ximenq yaol saelpopuq hhei, kaol yoqhhaeq'ae geegaeq biq: "Ngaeteel Miqsailyal yaol deelpuq wae!" Miqsailyal e yilsi laoq Jidu lye hhae. 42 Kaol Andeqlyel lye yoqhhaeq yaol Yesu e tyuqvae sheeqli biq. Yesu yoqhhaeq'ae chifu deelhhei kaol gee: "Nol laoq Yoqhanl e yaqyo Ximenq'ae, noq'ae Jifaq lye bi gul maoqhhae." Jifaq e yilsi laoq Biqdeq, paelsilmyel Haqlo lye hhae.
43 Qiq nao yol gol hhei'laol, Yesu Ja'lillil vae yil maoqlye hhae. Yoqhhaeq Fei'lil yaol deelpuq hhei biq, kaol yoqhhaeq'ae gee biq: "Ngaeq'ae cho'lyeq lael!" 44 Fei'lil laoq Boqsaildal milcaeq e cholyaeq'ae, yoqhhaeq laoq Andeqlyel kaol Biqdeq nyegael qiq pusiq e cholyaeq'ae. 45 Fei'lil lye Naqdanl'yel yaol saelpopuq hhei, kaol yoqhhaeq'ae geegaeq biq: "Moxi lye lilfaq suqhhaq taq'ae cuda deelhhei e, xianzhihael eiq cu gol e tyutaeq, ngaeteel deelpuq wae, yoqhhaeq laoq Yoqsel e yaqyo Naqsa'lel cholyaeq Yesu ngeelvae." 46 Naqdanl'yel gee: "Naqsa'lel vae aeqchee meeq e du'lal kiq laeq?" Fei'lil gee: "Nol fu lael laoq!" 47 Yesu laoq Naqdanl'yel yoqhhaeq boq'ae deel laeq mol hhei biq, kaol yoqhhaeq'ae gee tullaeq, gee: "Fu hhei, xitaeq laoq aeqdilmyel Yiqsellyel cholyaeq'ae, yoqhhaeq e neemae onglci'ae zaqgiq maq zoq'ae." 48 Naqdanl'yel yoqhhaeq'ae naelhaeq biq: "Nol ngaeq yaol haelmillye loq laeq hhaemaeq?" Yesu geehoq biq: "Fei'lil noq'ae maeq gul biq laefuq'ae, nol siqpyu'laq'oq e aelbol holhhaq vae zhol fu, ngael noq yaol mol aeqwae." 49 Naqdanl'yel gee: "Labiq, nol laoq Momil e Yaqyo'ae, nol laoq Yiqsellyel e zongmae'ae!" 50 Yesu yoqhhaeq'ae gee biq: "Nol laoq ngael noq'ae 'Nol siqpyu'laq'oq aelbol holhhaq'ae zhol e mol aeqwae' lye geegaeq biq gae'lye, ngaeq'ae xiangxinl lilmaeq? Nol xilmael taq'ae hhael heeq myel e silqinq hhae mol wae siq." 51 Yesu yol gee: "Ngael aeqdilmyel noteel'ae geegaeq laeqngeel, noteel mqmae pong'lael, kaol Momil e mqmae yosonglhael Cholyaeq Yaqyo e aeqhhaol'ae da'li gaeyi e mol maoqlye hhae."