Lulja Fuqyin
1
1-2 Maduq zhee za e Tiq'afei'loq o,Haeldyul dyulmae cholyaeq lye ngaeteel onglci'ae peqlal mael gilzuqmyel suqhhaq cu du hhei vae. Yesu haelzongl e silqinq mael zhoqmyel fu ae'lye bael mol e cholyaeqhael kaol Momil e yaqhacheqzaq e cholyaeqhael lye, ngaeteel'ae silqinq xihael gilzuqmyel geegaeq hhei laeq wae. 3 Tyulkaol, ngael xihael gilzuqmyel laefuq fuqli ae'lye ngeel maeq maq ngeel maeq lye fu gaeyi aeqwae, kaol noq'ae qiq mal qiq mal lye loqlilshe'lye cu laqngeel lye zongl lil. 4 Xilnye zongl mael laoq, nol haelgaeq e yo'liq mael aeqdilmyel ngeel hhae lye noq'ae bi loq laeqngeel.
Shelxiqzongl e Yoqhanl dyeqlal maoqlye hhae
5 Xi'lyul Yoqtail milcaeq e zongmae geiq fu, Yalbiqyaq yiq gol ban e jilsihael onglci'ae, cholmil mael Saqja'lilyal lye gul biq e qiq hhaeq zhol'ae. Yoqhhaeq e haeqmiq laoq Yallunq qiqzonglyaeq e cholyaeq'ae. Yoqhhaeq e haeqmiq e cholmil mael Yi'lilsabaiq lye gul biq hhae. 6 Yoqhhae niq nulhhaeq laoq Momil e yiqsi'ae gongyil e cholyaeq'ae. Yoqhhaeteel Hhaoqsongl e gailminl kaol tiaoqlil mael laoqmyel zongl yil hhae, kaol qiqgiq geehhael maqza'ae. 7 Ngeelfeiq, Yi'lilsabaiq yaeqguq maeq bo kiq biq'ae, yoqhhaeteel eiq cholhoq haelnaeq li aeqwae, tyulkaol, yoqhhaeteel'ae yaeqguq maeq zhol biq'ae.
8 Qiqzael laoq, Saqja'lilyal xi yiq gol ban e jilsihael Momil e yiqsiboq'ae jilsi e mulhhael mul maoq mael lunq keellaeq fu, 9 Jilsihael laoq haelzael'ae laoqmyel suqhhaq o gil'ae, kaol Saqja'lilyal'ae opuq hhei biq. Tyulkaol, yoqhhaeq Hhaoqsongl e heelhaol vae do'li kaol xiang pe li. 10 Xiang pe fu, gilzuqmyel cholyaeqhael nilduboq'ae heeldoq gee gil hhae. 11 Hhaoqsongl e mqmae yosongl qiq hhaeq, xiangtanq e laqsseqboq'ae haoqtul deelhhei kaol yoqhhaeq'ae bi molli. 12 Saqja'lilyal mol hhei biq laol dilgu'li biq, kaol gusil maoqmyel gu biq'ae. 13 Mqmae yosongl yoqhhaeq'ae gee biq: "Saqja'lilyal maq gu kael, noq e heeldoq mael Momil gaeq vae, noq e haeqmiq Yi'lilsabaiq noq'ae yaqyo qiq hhaeq bo hhei laeq'ae, nol yoqhhaeq'ae cholmil mael Yoqhanl lye gul biq maoqhhae. 14 Yoqhhaeq noq'ae zhee bi hhaol, neemae zhee bi zholsael laeq'ae, haeldyul dyulmae cholyaeq eiq yoqhhaeq dyeqlal gae'lye zhee hhaol maoqlye hhae. 15 Aeqgael yoqhhaeq Hhaoqsongl e yiqsiboq'ae laoq yoheeq'ae. Yoqhhaeq zilboq kaol zhee laq e zilbaeq maeq hhae dol'ae. Yoqhhaeq aeqmae oqma onglci'ae zhol fu, senllinq mael yoqhhaeq'ae bong'lye za'ae. 16 Yoqhhaeq lye haeldyul dyulmae Yiqsellyel cholyaeq yaol bi polhoqlael, kaol yoqhhaeteel e Hhaoqsongl Momil boq'ae bi pollael maoqlye hhae. 17 Yoqhhaeq'ae laoq Yiqlilyal e yohael kaol onglzaeq mael za, Hhaoqsongl e laefuqboq'ae deel. Yoqhhaeq laoq aeqdae kaol yaeqguqhael e guanxil mael bi maoqhoqli, Momil e saeziq mael maeq naelhaeq e cholyaeqhael yaol gongyil e cholyaeq e geel boq'ae bi polyil maoqlye hhae, xilnye laol, Hhaoqsongl lael fu, cholyaeqhael hhaol gae'lael aeqmyel Hhaoqsongl'ae hhae sheeqcaq wae."
18 Saqja'lilyal mqmae yosongl'ae gee biq: "Ngael haelmillyekaol silqinq xilmael aeqdilmyel peqlal kiq'ae lye hhae loq hhaemaeq? Ngael yaeqmoq oqyil vae, ngaeq e haeqmiq eiq cholhoq li aeqwae." 19 Mqmae yosongl geehoq biq: "Ngael laoq Momil e yiqsi'ae haoqtul deelhhei e Jabaiqlyel lil, noq'ae saeziq geegaeq hhei yil biq lye moqheilheil du hhei laq hhae, noq'ae saeziq yomeeq geegaeq yi aeqlil. 20 Naelhaeq! Naohaeq keellael fu, ngael haelgee e saeziq mael aeqdilmyel peqlal'ae; ngeelfeiq, nol ngael gee e saeziq mael maeq xiangxinl gae'lye, silqinq xilmael aeqdilmyel peqlal fu qiq nao keellye, nol yaqba hha peqyil, kaol saeziq maeq hhae gee'ae.
21 Cholyaeqhael Saqja'lilyal'ae doq deelhhei hhae, yoqhhaeq sholhaol onglci'ae lye haeldyul feiq maq duyi, kaol gaqmaqzuq li gil biq'ae. 22 Yoqhhaeq duyi fu, yoqhhaeq yoqhhaeteel nyegael saeziq gee'naeq maoqlye feiq maeq geedu lalkiq biq'ae, kaol yoqhhaeteel laoq yoqhhaeq sholhaol ae'lye yilxiangl mol hhei biq'ae lye loq vae; yoqhhaeq maqqyemyel yoqhhaeteel'ae aqlaq biq biq, yoqhhaeq yaqba peqyil biq kaol'ae. 23 Yoqhhaeq sholhaol vae haelzongl maoq mael zonglbyel hhei'laol, laoqhaol vae hoqli vae.
24 Naohaeq xihael aeqnaol laoq, yoqhhaeq e haeqmiq Yi'lilsabaiq'ae yaeqguqpi li vae, kaol ochoq'ae maeq bi loq myel baehae ngaeq siq zhol aeqwae, gee: 25 "Hhaoqsongl ngaeq'ae zhee meeq laeq e naohaeq'ae, ngaeq'ae xilnye fupol laeq mael laoq, cholyaeqhael e yiqsi'ae maduq maqza mael beiqgae laeq maoqlye hhae."
Yesu dyeqlal maoqlye hhae
26 Yi'lilsabaiq yaeqguqpi hhei mael baehae koq siq zoq lal fu, Momil lye mqmae yosongl Jabaiqlyel yaol moqheilheil du hhei, Ja'lillil milcaeq e Naqsa'lel pusiq'ae bi yil. 27 Yoqhhaeq laoq haqyoyaeq nyegael qiqgael maq bal ssuqza gol e yaeqmiyaeq qiq hhaeq zael'ae keelyil. Yaeqmiyaeq xitaeq e cholmil mael Maqlilyal lye gul biq hhae. Yoqhhaeq laoq Dalweil Zongmae toq e qiqzonglyaeq e Yoqsel lye gul biq e qiq hhaeq'ae biqzaq deelhhei aeqwae. 28 Mqmae yosongl do'li kaol yoqhhaeq'ae gee biq: "Noq'ae meeqlaeqmaeq? Momil hhaelgaeq gaeqli e yaeqmiyaeq o! Hhaoqsongl noq nyegael qiqgael baelzhol'ae!" 29 Yoqhhaeq saeziq xilmael gae'lye zoqgiq tullaeq biq, mqmae yosongl e saeziq xihael aeqchee mael'ae gee oqlolyaeq lye nyuqpu nyuqda myel nyuq'ae. 30 Mqmae yosongl gee: "Maqlilyal o, maq gu kael. Nol Momil e yiqsi'ae endianq hhamul vae. 31 Naelhaeq, nol yaeqguqpi li kaol yaqyo bogae hhei maoqlye hhae, kaol yoqhhaeq e cholmil mael Yesu lye mil hhei biq maoqhhae. 32 Yoqhhaeq yoheeq heeqmae peqlal maoqlye hhae, kaol hhaelgao gao'li Momil e Yaqyo lye gul biq maoqhhae. Hhaoqsongl Momil lye yaqyo xitaeq'ae, yoqhhaeq e aeqpyuq aeqdae Dalweil e zongmae duqtyel mael biq hhei biq maoqlye hhae. 33 Yoqhhaeq laoq Yaqgel e houldailhael onglci'ae haeqfu keellye zongmae geiq maoqlye hhae, yoqhhaeq haeqfu keellye zongmae geiq gayil ngeelvae." 34 Maqlilyal mqmae yosongl'ae gee biq: "Ngael maeq mulzaeq oqyilsiq, haelmillyekaol xilnye peqlal kiq laeq?" 35 Mqmae yosongl yoqhhaeq'ae geehoq biq: "Senllinq mael noq'ae yo'lael maoqlye hhae, hhaelgao gao'li Momil e onglzaeq maellye noq yaol baqlongl laeq'ae. Tyulkaol, dyeqlal maoqlye senljyeq qiqhhaeq'ae laoq Momil e Yaqyo lye gul biq maoqhhae. 36 Naelhaeq, noq e paeqyaeq Yi'lilsabaiq, yaeqmoq feiq yaqyo pi hhei vae. Yaeqguq maeq bo kiq'ae lye gee gil biq e qiq hhaeq laoq, yaeqmeel yaeqguqpi hhei mael baehae koq siq zoq vae. 37 Momil maeq zonglkeel ongl myel qiqgiq maqza'ae." 38 Maqlilyal gee: "Ngael laoq Hhaoqsongl e yaqhacheqzaq e haeqmiyaeq lil. Ngaeq e aeqhhaol taq'ae nol gee e saeziq mael laoqmyel peqlal biq!" Mqmae yosongl yoqhhaeq zaellye deelsae hhei vae.
Maqlilyal Yi'lilsabaiq'ae fu yil biq
39 Tyuqfu naohaeq'ae, Maqlilyal nae'naemyel geeqzhoq naeq e milcaeq vae deel yil, kaol Yoqdal milcaeq e milmae heeqmyel e qiqgael'ae keellael vae. 40 Yoqhhaeq Saqja'lilyal toq'ae do'li, Yi'lilsabaiq'ae meeqlaeqmaeq lye naelhaeq li biq. 41 Yi'lilsabaiq Maqlilyal meeqlaeqmaeq lye naelhaeq mael zhoq gaeq hhei biq laol, oqma onglci e albye dilni tullaeq'ae. Yi'lilsabaiq vae eiq senllinq bong'lye za'ae. 42 Yi'lilsabaiq yotyel haeqheemyel gul tullaeq, gee: "Nol yaeqmiqhael onglci'ae geeqlongq zhee meeq hhae! Noq e oqma onglci'ae pi hhei e albye eiq geeqlongq zhee meeq hhae! 43 Ngaeq e Hhaoqsongl e aeqmae saeqvae keellael, xilnye meeq e geeqlongq mael haelmillyekaol ngaeq'ae yo'lael hhaemaeq? 44 Nol ngaeq'ae meeqlaeqmaeq lye naelhaeq laeq e yotyel mael, ngaeq e naeqbol mael'ae zhoq gaeq hhei laeq laol, ngaeq e oqma onglci e albye zhee hhaol biq kaol dilni tullaeq'ae! 45 Yoqhhaeq Hhaoqsongl gee e saeziq mael aeqdilmyel peqlal kiq'ae lye xiangxinl'ae, kaol yaeqmiyaeq xitaeq geeqlongq meeq vae!"
Maqlilyal laoq Hhaoqsongl maeqdaeqhhaeq'ae lye gee hhae
Saq 2:1-10
46 Maqlilyal gee:
"Ngaeq e neemae onglci'ae
hhael heeq e qiq hhaeq laoq Hhaoqsongl'ae lye gee lil!
47 Ngaeq e yohael mael
ngaeq e Momil jiulzuq* gae'lye hhaol yae.
48 Yoqhhaeq laoq ochoq maeq fu'qiq'ongl e yaqhacheqzaq e haeqmiyaeq'ae fupol laeq'ae,
tyulkaol, saeq ae'lye aeqnaol laoq,
hae qiqyil e cholyaeqhael eiq
ngaeq'ae geeqlongq meeq e qiq hhaeq lye gul laeq wae.
49 Hhael'onglzaeq zaeqli qiq hhaeq,
ngaeq'ae cholyaeq maeq zonglkeel ongl myel e silqinq zongl hhei laeq vae,
kaol yoqhhaeq e cholmil mael laoq senljyeq hhae.
50 Momil laoq aeqyoq'ae zun eiq zunjinl gu eiq gu e cholyaeqhael'ae,
aeqgael hae qiqyil keellye hhaoqsaeqsaeq gil biq'ae.
51 Yoqhhaeq laqtaq za e aqlaq maellye,
neemae onglci'ae dilqeizaeq e cholyaeqhael yaol lyeqsae biq.
52 Yoqhhaeq lye laqtaq za e zongmae yaol
zongmae duqtyel ae'lye deiqgae biq'ae,
ochoq maeq fu'qiq'ongl e cholyaeqhael yaol
zongmae duqtyel'ae deiqda hhei biq'ae.
53 Yoqhhaeq lye oqma myeq e cholyaeqhael'ae bi zaeqdye hhei,
zacongl hael'ae aqlaq alngeiqmyel bi hoqli.
54-55 Yoqhhaeq aedeeteel e aeqpyuq aeqdae'ae gee gol biq e saeziq laoqmyel,
yoqhhaeq Yalboqlahanl kaol yoqhhaeq e houldailhael'ae
haeqfu keellye hhaoqsaeqsaeq biq maoqlye hhae.
Tyulkaol, yoqhhaeq aeqyoq e hhaoqsaeqsaeq mael maeq yelbael'ae,
yoqhhaeq laoq yoqhhaeq e yaqhacheqzaq e cholyaeq Yiqsellyel'ae baelzongl biq'ae.
56 Maqlilyal Yi'lilsabaiq nyegael baehae sul siq zoqlal maoqmyel baelzhol vae, aeqnaol laoqhaol vae hoqli vae.
Shelxiqzongl e Yoqhanl dyeqlal
57 Yi'lilsabaiq yaeqguq bo e naohaeq keellael vae, kaol yaqyo qiq hhaeq bo hhei. 58 Yoqhhaetoq e dongqpyeq'ae baelzhol e cholyaeqhael kaol yoqhhaeq e paeqyaeqhael, Hhaoqsongl yoqhhaeq'ae hhaoqsaeqsaeq biq'ae lye gaeq li biq, kaol Yi'lilsabaiq nyegael hhaellaelmyel hhaol gil'ae. 59 Heiq nao keellael laol, yoqhhaeteel yaeqguq'ae yeqgae gui'liq zongl lael biq, yoqhhaeq e aeqdae e cholmil maellye mil gae hhei, kaol Saqja'lilyal lye gul biq maoqlye zongl hhae. 60 Ngeelfeiq, yoqhhaeq e aeqmae gee: "Maeq hhaeq'ae! Yoqhhaeq'ae Yoqhanl lye gul biq maoq." 61 Yoqhhaeteel yoqhhaeq'ae gee biq: "Noq e qiqzonglyaeq'ae xilnye cholmil gul biq e qiq hhaeq eiq maeq zhol'ae." 62 Yoqhhaeteel yaeqguq e aeqdae'ae aqlaq biq biq, yaeqguq'ae aeqchee lye mil biq maoq maeq lye naelhaeq biq. 63 Yoqhhaeq zil cuda e tyelpyuq qiq mal sael laeq, kaol xilnye cu du hhei: "Yoqhhaeq e cholmil mael Yoqhanl lye gul biq hhae." Cholyaeqhael gilzuqmyel gaqmaqzuq li gil biq'ae. 64 Saqja'lilyal e myeqbongq kaol myeqhael mael qiqlaqmyel pong'lael biq vae, saeziq gee kiq hoqlael vae, kaol yotyel haeqheemyel Momil maeqdaeqhhaeq'ae lye gee'ae. 65 Dongqpyeq'ae zhol e cholyaeqhael zhee gu gil biq'ae, Yoqtail geeqzhoq naeq e milcaeq vae maqqyemyel silqinq xilmael gee bonggaebyel'ae. 66 Haelgaeq e cholyaeqhael silqinq xilmael neemae mael'ae nyuqtongq deelhhei, gee: "Hhaoqsongl e onglzaeq mael aeqdilmyel yaeqguq xitaeq nyegael baelzhol'ae. Yoqhhaeq aeqgael haelmillye cholyaeq peqlal maoqlye hhaemaeq?"
Saqja'lilyal laoq Hhaoqsongl maeqdaeqhhaeq'ae lye gee hhae
67 Yoqhhaeq e aeqdae Saqja'lilyal'ae senllinq bong'lye za, kaol peqlal maoqlye mael geedu:
68 "Hhaoqsongl Yiqsellyel e Momil'ae laoq maeqdaeqhhaeq'ae lye gee biq maoqhhae,
yoqhhaeq aeqyoyoq e cholyaeqhael'ae fupol biq'ae,
kaol yoqhhaeteel yaol suq duhoq laq biq'ae,
69 Yoqhhaeq laoq Momil e yaqhacheqzaq e cholyaeq Dalweil toq ae'lye,
aedeeteel'ae jiul'en* e vuqkyul qiq siq biq hhei laq vae.
70 Momil laoq yoqhhaeq e yilkaeaeqnao e
senljyeq xianzhihael e myeqbongq ae'lye
gee gol e saeziq mael laoqmyel zongl hhae.
71 Ngaeteel yaol diqrenq tyuqvae lye ee duhoq laq hhae,
kaol ngaeteel'ae neemasu zaq e cholyaeqhael e aqlaq ae'lye ee duhoq laq hhae.
72 Yoqhhaeq laoq ngaeteel e aeqpyuq aeqdae'ae hhaoqsaeqsaeq biq hhae,
kaol yoqhhaeq e senljyeq geemeeq deelhhei mael nyuqdeel'ae,
73 Geemeeq deelhhei xilmael laoq,
yoqhhaeq aedeeteel e aeqpyuq aeqdae Yalboqlahanl'ae faqsilkei gol biq mael ngeelvae,
74-75 Kaol aedeeteel yaol diqrenq e aqlaq ae'lye
jiul duhoq yi laq laol,
aedeeteel laoq qiqyil myel yoqhhaeq e yiqsiboq'ae
teel eiq maq gu myel senljyeq
kaol gongyil maellye yoqhhaeq'ae fuqsil biq.
76 Yaeqguq o!
Noq vae laoq hhaelgao gao'li Momil e xianzhi lye hhae bi gul'ae,
Nol Hhaoqsongl e laefuqboq'ae deel,
yoqhhaeq e gaelmae mael laefuqmyel pasael deelhhei biq,
77 Yoqhhaeq e cholyaeqhael'ae yoqhhaeteel e golsiq mael
shelmianq biq gae'lye jiul'en mael bi loq kaol'ae.
78 Aedeeteel e Momil e hhaoqsaeqsaeq kiq e neemae gae'lye,
mqshoq e aeqcael mael mqmae ae'lye aedeeteel'ae bi yo'lael laeq'ae,
79 Kaol aeqcael tyulmael nahongqlye onglci'ae
sil holhhaq vae zhol e cholyaeqhael'ae cuqmol hhei biq maoqlye hhae,
kaol aedeeteel e aeqkeel mael hoqpinq e gaelmae vae sheeq da'li laq maoqlye hhae."
80 Yoqhanl maeqyae maeqyae'lye heeqda lal, yohael mael nyeq'ei ta nyeq'ei hhael geel lael. Yoqhhaeq Yiqsellyel cholyaeqhael e yiqsiboq'ae deel mol du'laq laefuq laoq, haeqfu eiq byelcongq'ae zhol hhae.