Maqkeq Fuqyin
Shelxiqzongl e Yoqhanl
1
Xihael laoq Momil e Yaqyo Yesu Jidu e fuqyin gaeqlael e zhoqmyel fu mael'ae. 2 Yiqsailyal xianzhi e Suqhhaq taq'ae cu deelhhei e saeziq mael'ae:"Naelhaeq gil, ngael ngaeq e mqmae yosongl yaol
noq e yiqsiboq'ae moqheilheil du hhei maoqlye lil;
yoqhhaeq noq e gaelmae mael,
laefuqmyel pasael deelhhei maoqlye hhae.
3 Cholyaeq qiq hhaeq diqsheelleeldye ae'lye
yotyel haeqheemyel gul'ae:
'Hhaoqsongl e gaelmae mael paeqgaelsael meeq deelhhei maoqhhae,
yoqhhaeq e galchi mael eiq duqzhoq deelhhei maoqhhae!'"
4 Tyulnye laol, shelxiqzongl e Yoqhanl diqsheelleeldye ae'lye deel mol du'laq vae, kaol neemae paellael e ciq e gui'liq geegaeq gil biq, kaol cholyaeqhael neemae paellael kaollaoq golsiq mael hhae bi shelmianq wae. 5 Yoqtail halza milcaeq kaol Ye'lulsa'lenq milmae heeqmyel ae'lye cholyaeqhael duyi, kaol yoqhhaeq zael'ae keelli vae, aeqyoteel golsiq za yae lye gee gil'ae, tyulkaol, Yoqhanl lye Yoqdanl Lolbaeq'ae lye shelxiqzongl gil biq vae. 6 Yoqhanl'ae loltoq caeqhum aelhongq dumhhei hhae, saeqgeel e haeqpi mael haeqpipaqhhael vae paq hhei, aeldyel zaeq, baeqsho baq'eel dol hhae. 7 Yoqhhaeq gee: "Aeqgael ngaeq e aeqnaol'ae lael e qiq hhaeq, ngaeq taq'ae aeqchee eiq hhal kiq, aeqchee eiq hhael loq, ngael dolmoqmoq gayil kaol yoqhhaeq'ae paqno alca bael keelpyel biq eiq maeq zae'ae. 8 Ngael eelcuq maellye noteel'ae shelxiqzongl biq, ngeelfeiq, yoqhhaeq laoq senllinq maellye noteel'ae shelxiqzongl biq maoqlye hhae."
Yesu shelxiq vae
9 Tyuqfu, Yesu Ja'lillil milcaeq e Naqsa'lel pusiq ae'lye lael vae, kaol Yoqhanl lye Yoqdanl Lolbaeq'ae lye yoqhhaeq'ae shelxiqzongl biq vae. 10 Yoqhhaeq eelcuq vae lye zhoq da'lal laol, mqmae pong'lael e mol lael, senllinq mael haoqhaoq laoqmyel yoqhhaeq e aeqhhaol taq'ae loq dayi. 11 Mqmae taq ae'lye yotyel gee: "Nol laoq ngael gaeq e Yaqyo'ae, ngael noq'ae zhee hhaol yae."
Saqdanl Yesu'ae cheeqmu biq hhae
12 Senllinq mael Yesu'ae nae'naemyel diqsheelleeldye vae yil lye lyeq biq. 13 Yoqhhaeq tyuqvae yuqqyel nao zhol vae, Saqdanl lye cheeqmu biq. Yoqhhaeq byeljyeq zhol myel vae zhol hhae. Mqmae yosonglhael yoqhhaeq'ae fuqsil lael biq.
Yesu Ja'lillil vae Momil e saeziq geegaeq
14 Yoqhanl yaol ee'longl biq aeqnaol'ae, Yesu Ja'lillil vae keellael laol Momil e fuqyin mael geegaeq gil biq. 15 Yoqhhaeq gee: "Shiqshen keellael vae, Momil e Goqja niqlael vae, noteel neemae paellael, kaol fuqyin mael'ae xiangxinl maoqhhae."
Yesu lye laqcaq yuq hhaeq saelpodu hhei
16 Yesu Ja'lillil eeldeel deelmaea deeljyel cho'lomyel deel'ae, Ximenq kaol yoqhhaeq e aeqnil Andeqlyel eeldeel deelmae taq'ae hhaezongl jye mol hhei biq; yoqhhaeteel laoq ngaeqdyel niqzaq niqzaqmyel zhol e cholyaeq'ae." 17 Yesu yoqhhaeteel'ae gee biq: "Ngaeq'ae cho'lyeq lael gil, aeqgael, ngael noteel'ae ngaeqdyel haelnaeqmyel hhae'lael laoqmyel, cholyaeq haelnaeqmyel bi hhae'lael laeqngeel." 18 Yoqhhaeteel nae'naemyel hhaezongl mael beiqdeelsaeq, kaol yoqhhaeq'ae cho'lyeq li vae. 19 Yesu laefuqboq'ae teel deel du'li laol, Xibiqtail e yaqyo Yaqgel kaol Yaqgel e aeqnil Yoqhanl yaol mol hhei biq; yoqhhaeteel tyuqfu qiqlaq'ae hoq mael taq'ae hhaezongl mael shiltulhoq hhae. 20 Yoqhhaeq nae'naemyel yoqhhaeteel yaol gul laeq laol, yoqhhaeteel lye aeqdae Xibiqtail kaol yaqhacheqzaq e cholyaeq yaol, hoq mael taq'ae bi zholdeelsaeq hhae, kaol Yesu'ae cho'lyeq li vae.
Yesu lye maeqshol e yohael mael lyeqdu biq
Lul 4: 31-37
21 Yoqhhaeteel Jabaiqnongq vae keellael. Yesu anxiqriqb qiq nao huiltangq vaec do'li kaol Momil e saeziq mael geemyeq gil biq hhae. 22 Yoqhhaeq geemyeq gil biq e saeziq mael cholyaeqhael gaqmaqzuq li gil biq'ae. Yoqhhaeq geemyeq e saeziq mael laqtaq za e cholyaeq laoqmyel hhae, Momil e saeziq mael loq e laqkiqhael laoqmyel maeq dul'ae.
23 Tyuqfu qiqlaq'ae, huiltangq vae maeqshol e yohael guqzaeq li biq e cholyaeq qiq hhaeq gul tullaeq. 24 Gee: "Naqsa'lel cholyaeq Yesu, ngaeteel zongl mael noq'ae aeqchee bael heiq laeq hhaemaeq? Nol ngaeteel yaol zonglmye maoqlye lilmaeq? Ngael nol aeqsul'ae lye loq lil. Nol laoq Momil e senljyeq qiqhhaeq'ae." 25 Yesu yoqhhaeq'ae gaezaeq biq: "Myeqbongq mqcuq hhei! Xitaeq e aeqhhaol ae'lye duyi!" 26 Maeqshol e yohael xitaeq'ae ssukiqssu'nyel myel ssu biq, kaol yotyel haeqheemyel gul laol xitaeq e aeqhhaol ae'lye duyi vae. 27 Cholyaeqhael gilzuqmyel gaqmaq zhee zuq li gil biq'ae, tyulkaol, cholyaeqhael qiqhhaeq qiqhhaeq'ae geegaeq gil'ae: "Aeqcheekaol xilnye hhaemaeq? Xilmael laoq laqtaq za e yo'liq yosheq she! Yoqhhaeq maeqshol e yohael mael'ae minllinl biq laol, maeqshol e yohael yoqhhaeq e saeziq mael naelhaeq vae." 28 Yesu haelzonglhael qiqlaqmyel Ja'lillil milcaeq vae gaeqbyel yil vae.
Yesu cholnael zonglmeeq kaol niqhaeq lyeqdu
29 Yoqhhaeteel huiltangq ae'lye duyi laol, Yaqgel kaol Yoqhanl nyegael Ximenq kaol Andeqlyel toq'ae li gil vae. 30 Tyuqfu Ximenq e ssuqmae vuqduqpaeq biq kaol ssuqza deelhhei hhae, kaol yoqhhaeteel nae'naemyel Yesu'ae geedu biq. 31 Yesu yoqhhaeq e yiqsiboq'ae deel keelli laol, yoqhhaeq e aqlaq mael'ae zoqtyeq hheikaol baqtul hhei biq laol, yoqhhaeq vuqduq maeq paeq biq vae, kaol yoqhhaeteel'ae zhaofu biq.
32 Kiqsulkiqxeiq fu, cholyaeq lye cholnael kaol niqhaeq guqzaeq li biq hael yaol maqqyemyel Yesu yiqsiboq'ae sheeqlaeq biq. 33 Milmae heeqmyel e cholyaeqhael gilzuqmyel oheiq'ae zhol'eeq deelhhei hhae. 34 Yesu lye maeq qiqsheel myel naelgol nael biq e cholyaeqhael yaol zonglmeeq byel biq vae, niqhaeq eiq haelnaeqmyel lyeqdu vae, niqhaeq yoqhhaeq yaol loq hhae, kaol niqhaeq'ae saeziq maeq bi gee'ae.
Yesu Ja'lillil vae Momil e saeziq mael geegaeq gil biq
35 Aeqnaol qiq nao mqshoq, mqbae maeq bae siq fu, Yesu tullael kaol duyil, diqsheelleeldye vae keellael laol, tyuqvae heeldoq gee hhae. 36 Ximenq kaol yoqhhaeq nyegael qiqgael baelzhol e cholyaeqhael, Yesu'ae saelpo li gil'ae. 37 Yoqhhaeteel saelpopuq hhei'laol yoqhhaeq'ae gee biq: "Cholyaeqhael gilzuqmyel noq'ae saelpo hhae!" 38 Yesu yoqhhaeteel'ae gee biq: "Aedeeteel gaelniqniq myel e pusiq vae yil gil o, kaol ngael tyuqvae Momil e saeziq mael geegaeq gil biq maoq, ngael laoq silqinq xilmael gae'lye lael aeqlil." 39 Tyulkaol, yoqhhaeq Ja'lillil milcaeq vae deeldyu byel vae, yoqhhaeteel e huiltangq vae Momil e saeziq geegaeq gil biq, niqhaeq eiq lyeqsae hhae.
Yesu lye maqfeng nael biq e cholyaeq yaol zonglmeeq biq
40 Maqfeng nael biq e qiq hhaeq, Yesu yiqsiboq'ae keellael laol, vuqduqtongq gae hheikaol geezaeq biq: "Nol hhaeq lil lye kaollaoq, nol ngaeq yaol bi meeqshol yil ongl'ae." 41 Yesu hhaoqsaeqsaeq li biq'ae, kaol aqlaq baqqei hheikaol yoqhhaeq'ae so hhei biq, gee: "Ngael hhaeq lil, nol meeqshol yil vae!" 42 Maqfeng naelgol mael qiqlaqmyel yoqhhaeq e aeqhhaol ae'lye gabu vae, kaol yoqhhaeq meeqshol lael biq vae. 43 Yesu tyutaeq'ae wae hoqyil lye gee biq fu, yoqhhaeq'ae aeqlyeq maeqlyeq myel gee gol biq, 44 Gee: "Nol aeqdilmyel xihael qiq hhaeq vae eiq haeq geegaeq yil. Ngeelfeiq, nol jilsi'ae bi fu hhei yil, kaol meeqsholyil gae'lye, Moxi moqheilheil e zaelheel mael baq heelda hhei, xilnye laol, xilmael laoq zenljul'ae lye cholyaeqhael'ae bi fu hhei." 45 Ngeelfeiq, tyutaeq duyil laol, silqinq xilmael baelyaelmyel geedu byel yil'ae. Tyulkaol, Yesu diqsheelleeldye vae zhol maoqlaol, aeqsul eiq mol gae'lael aeqmyel milmae heeqmyel vae maq hha do'li biq'ae; ngeelfeiq, cholyaeqhael haeqvae lael'ee myel vae lye lael kaol yoqhhaeq'ae tyuqvae lael'ae.