Yesu lye maqfeng nael biq e cholyaeq yaol zonglmeeq biq
8
Yesu geeqzhoq ae'lye gaeyi, haelnaeq naeqmaemyel cholyaeq qiq miq yoqhhaeq'ae cho'lyeq biq. 2 Tyuqfu, maqfeng naelgol nael biq e cholyaeq qiq hhaeq yoqhhaeq'ae vuqduqtongq lael biq, gee: "Hhaoqsongl o! Nol hhaeq lil lye kaollaoq, nol ngaeq yaol bi meeqsholyil ongl'ae." 3 Yesu aqlaq tyuqdu hheikaol yoqhhaeq'ae so biq, gee: "Ngael hhaeq lil, noq'ae bi meeqsholyil laeqngeel!" Kaol yoqhhaeq e maqfeng naelgol mael qiqlaqmyel meeqsholyil biq vae. 4 Yesu yoqhhaeq'ae gee biq: "Nol aeqyae'lye kei maoqhhae, ochoq'ae maeq geedu yil biq hhaeq'ae, ngeelfeiq, jilsi'ae bi fu hhei yil, kaol Moxi moqheilheil e zaelheel mael baq heelda hhei, xilnye laol, xilmael laoq zenljul'ae lye cholyaeqhael'ae hhae bi fu hhei."Yesu lye qiqhael cholyaeq e zhiqmoq e yaqhacheqzaq e cholyaeq yaol zonglmeeq biq
5 Yesu Jabaiqnongq vae do'li, qiqhael (100) cholyaeq e zhiqmoq qiq hhaeq lael kaol yoqhhaeq'ae geezaeq lael biq, 6 Gee: "Hhaoqsongl o! Ngaeq e yaqhacheqzaq e cholyaeq ssuqhhal ae'lye maeq tullael kiq vae, laoqhaol vae ssuqza deelhhei hhae, zhee nael biq hhae." 7 Yesu gee biq: "Ngael yoqhhaeq'ae zonglmeeq yil biq hhaeq." 8 Qiqhael (100) cholyaeq e zhiqmoq geehoq biq: "Hhaoqsongl o, noq yaol ngatoq'ae bi yil mael, ngael maeq zae yae. Nol saeziq qiq doq gee laol, ngaeq e yaqhacheqzaq e cholyaeq laoq meeqyil wae. 9 Ngael laoq ochoq e laqtaq holhhaq'ae zhol lil, ngaeq e holhhaq eiq dangbinkei e cholyaeq zhol'ae. Ngael xitaeq'ae gee biq: 'Yil!' Yoqhhaeq yil vae. Ngael yultaeq'ae gee biq: 'Lael!' Yoqhhaeq lael vae. Ngaeq e yaqhacheqzaq e cholyaeq'ae gee biq: 'Silqinq xilmael zongl yil!' Yoqhhaeq eiq zongl yil vae." 10 Yesu gaeq hhei biq laol, gaqmaqzuq li biq'ae, kaol cho'lyeq e cholyaeqhael'ae gee biq: "Ngael aeqdilmyel noteel'ae geegaeq laeqngeel, xiqheemyel e xinlxin laoq, ngael Yiqsellyel vae dyel'eiq qiqzael eiq maeq mol gol yil. 11 Ngael noteel'ae yol geegaeq laeqngeel, aeqgael haelnaeqmyel cholyaeq neeldu aelheiq boq ae'lye, kaol neelgae aelheiq boq ae'lye lael, kaol Mqmae Goqja vae Yalboqlahanl, Yiqsaq kaol Yaqgel nyegael aelhoq qiqgael zaeq maoqlye hhae. 12 Aeqyoyoq e goqja e cholyaeqhael yaol laoq, nildu e nahongqlye vae bi beiq du hhei, kaol tyuqvae nyul sil maoqmyel hhae nyul kaol neessu hha ssu gahoq ngeelvae." 13 Yesu qiqhael (100) cholyaeq e zhiqmoq'ae gee biq: "Nol hoqyil oq! Noq e xinlxin gae'lye nol geezaeq laoqmyel bi peqlal laqngeel." Tyuqfu qiqlaq'ae, yoqhhaeq e yaqhacheqzaq e cholyaeq meeqsholyil biq vae.
Yesu cholnael zonglmeeq, niqhaeq lyeqdu
14 Yesu Biqdeq toq'ae keellael, Biqdeq e ssuqmae vuqduqpaeq biq kaol ssuqza deelhhei mol hhei biq. 15 Yesu yoqhhaeq e aqlaq mael'ae zhoq so hhei biq laol, vuqduq maeq paeq biq vae; tyulkaol, yoqhhaeq tullael kaol Yesu'ae zhaofu biq.
16 Kiqsulkiqxeiq fu, cholyaeqhael lye niqhaeq guqzaeq li biq e haelnaeqmyel cholyaeq yaol Yesu e yiqsi'ae sheeqlaeq biq, yoqhhaeq saeziq qiq doq maellye maeqshol e yohael mael lyeqdu byel hhei vae, kaol hael nael gil biq e cholyaeqhael yaol zonglmeeq byel biq vae. 17 Xilmael laoq Yiqsailyal xianzhi gee gol e saeziq mael peqlal vae, gee:
"Yoqhhaeq lye aedeeteel e ruanqroq mael heilgae laeq,
aedeeteel e naelgol mael eiq heiltael laeq."
Yesu'ae cho'lyeq maoqlye fu zongl maoq mael
18 Yesu laoq haelnaeqmyel cholyaeq aeqyoq'ae ongtyeq deelhhei mol hhei biq, kaol yulboq'ae guq yil maoqlye moqheilheil biq. 19 Momil e saeziq mael loq e laqkiq qiq hhaeq lael kaol yoqhhaeq'ae gee biq: "Laoqsi, nol haeqvae yil kaol'eiq, ngael noq'ae cho'lyeq maoq." 20 Yesu yoqhhaeq'ae gee biq: "Honglsaelnyulpyu'ae laoq gonglbyu za, mqmae e haeqzil'ae laoq byelbeeq za, ngeelfeiq, Cholyaeq Yaqyo'ae laoq vuq'ongq'ongq hhael eiq maqza'ae." 21 Baeqjyelboq e laqcaq qiq hhaeq Yesu'ae gee biq: "Hhaoqsongl o! Ngaeq'ae laoqhaol vae laefuq bi hoqli laq, aeqgael ngaedae yaol baqduqm maoqlye oqyilsiq." 22 Yesu yoqhhaeq'ae gee biq: "Sil e cholyaeq yaol yoqhhaeteel e cholsil'ae bi baqduqm yil. Nol ngaeq'ae cho'lyeq lael o!"
Zaeqxil kaol eeldiqdiq mael Yesu e saeziq mael'ae naelhaeq
23 Yesu hoq mael'ae da'li, laqcaqhael yoqhhaeq'ae cho'lyeq deelhhei hhae. 24 Eeldeel deelmae taq'ae qiqlaqmyel zaeqxil xilmae bo tullaeq, eeldiqdiq maellye hoq mael dyel'eiq naqvuq goqbiq vae, ngeelfeiq, Yesu laoq yuqxul hhae. 25 Laqcaqhael yoqhhaeq yaol gulnyuq biq, gee: "Hhaoqsongl o! Jiul gil laeq! Aedeeteel hhae sil goqbiq vae!" 26 Yesu yoqhhaeteel'ae gee biq: "Xinlxin aelheel maoq maqza e cholyaeqhael o! Aeqcheekaol gu gil laq hhaemaeq?" Tyulkaol, yoqhhaeq tullael, zaeqxil kaol eeldeel deelmae mael'ae gaezaeq biq, zaeqxil kaol eeldeel deelmae mael maeq bo maeq dongni vae. 27 Cholyaeqhael gilzuqmyel gaqmaqzuq li gil biq'ae, gee: "Xitaeq laoq haelmillye cholyaeq maeq, zaeqxil kaol eeldeel deelmae mael eiq yoqhhaeq e saeziq mael'ae naelhaeq laoq?"
Niqhaeq guqzaeq li biq e Jadalla milcaeq cholyaeq yaol zonglmeeq biq
28 Yesu yulboq'ae guq yil, Jadalla cholyaeq e milcaeq vae keellael, niqhaeq guqzaeq li biq e cholyaeq niq nulhhaeq fuq'ongl ongldye ae'lye yoqhhaeq boq'ae deel laeq. Yoqhhaeteel laoq sheqpyeq zilvuqlye zhee gu lal aeqmyel hhae, kaol qiq hhaeq eiq gaelmae tyuqvae lye maeq deelpol duyil peq biq'ae. 29 Yoqhhaeteel gul gae'lael aeqmyel gee: "Momil e Yaqyo, nol ngaeteel zongl mael aeqchee bael heiq laeq hhaemaeq? Naohaeq maeq keellael siq, nol saeqvae lael kaol ngaeteel yaol bi saeq maoqlye laeq?" 30 Yoqhhaeteel zaellye haelnaeq maol myel vae, aqhhaq yilchangq changqmae gazaq hhae. 31 Niqhaeq Yesu'ae geezaeq biq, gee: "Ngaeteel yaol lyeqdu maoqlye kaollaoq, ngaeteel yaol aqhhaq yuhael onglci vae bi doyil laq!" 32 Yesu yoqhhaeteel'ae gee biq: "Yil gil!" Kaol niqhaeqhael duyi vae, kaol aqhhaqhael'ae do'li vae. Qiqlaqmyel, aqhhaq tyuhael hhaqbyeq vae tongqgae byel yil, kaol eeldeel deelmae vae tongqpuq do byel yil vae, kaol neqsil byel vae. 33 Aqhhaq hoqzaqhael milmae heeqmyel vae kisae do'li, kaol hal peqlal e silqinq xihael kaol niqhaeq guqzaeq li biq e cholyaeqhael'ae puqli biq hael, gilzuqmyel cholyaeqhael'ae geegaeq hhei biq vae. 34 Milmae heeqmyel e haelzhol cholyaeqhael Yesu'ae chifu yi gil, yoqhhaeq yaol mol hhei biq laol, yoqhhaeq yaol yoqhhaeteel e milcaeq ae'lye deelsae hhei lye geezaeq biq hhae.