Ael'yuq xeiq e dullaelmyel guqjin
4
Yesu eeldeel deelmae deeljyel vae yol geemyeq gil biq. Cholyaeq haelnaeqmyel yoqhhaeq zhol myel vae zhol'eeq deelhhei lael. Tyulkaol, yoqhhaeq eeldeel deelmae onglci vae za e hoq mael'ae da'li kaol zholgae deelhhei, haelzhol cholyaeqhael laoq eeldeel deelmae deeljyel vae zhol hhae. 2 Yesu dullaelmyel guqjin maellye haelnaeqmyel geemyeq gil biq, yoqhhaeq geemyeq gil biq fu gee: 3 "Noteel naelhaeq deelhhei gil! Ael'yuq xeiq e qiq hhaeq duyil kaol ael'yuq xeiq yil. 4 Xeiq fu, teel laoq aeqhael gaelmae gaeljyel'ae leeqgae deelhhei, kaol haeqzil beel laeq laol tuzaq byel vae. 5 Teel laoq haqlo taq'ae milcaeq maq zu myel vae leeqgae deelhhei, milcaeq maq zu kaol nae'naemyel dyeq du'lal. 6 Ngeelfeiq, aelcil maeq zhido yilkiq, kaol neelmae zhoq du'lal laol pe'nyuq hheikaol kuga vae. 7 Teel laoq aelgong gongbol dyeq myel milcaeq vae leeqgae deelhhei, aelgong gongbol dyeq du'lal laol, zaelsiq aelyaeq mael naqvuq biq vae, zaelsiq mael aelsiq maeq siq du lalkiq vae. 8 Teel laoq milmeeq vae leeqgae deelhhei, kaol alchichi du'lal kaol meeq da'lal laol zaelsiqsiq lael, aelcael qiq nul vae suqqyel siq siq lael, koqqyel siq siq lael eiq za, qiqhael (100) siq siq lael eiq za." 9 Yesu yol gee: "Naeqbol gaeq congl e cholyaeq laoq, naelhaeq maoqhhae."Aeqcheekaol dullaelmyel guqjin maellye gee
10 Yesu qiq hhaeq myel fu, yoqhhaeq'ae cho'lyeq e cholyaeqhael, kaol shiqtuq qyelniq hhaeq lael'ae, kaol dullaelmyel guqjin xihael aeqchee mael'ae gee hhaemaeq lye naelhaeq biq. 11 Yesu yoqhhaeteel'ae gee biq: "Momil e Goqja e aolmiq mael noteel'ae bi loq laeqngeel; ngeelfeiq, baeqjyelboq e cholyaeqhael'ae laoq dullaelmyel guqjin maellye gee biq maoqlye lil. 12 Xilnye laol yoqhhaeteel
'Mol laoq mol vae, ngeelfeiq, qiqgiq eiq maeq fudozaq ongl biq'ae;
gaeq laoq gaeq vae, ngeelfeiq, qiqgiq eiq maeq siqcongl biq'ae.
Aeqgael yoqhhaeteel polhoqlael laol,
Momil yoqhhaeteel'ae shelmianq biq maeqhe.'"
Ael'yuq xeiq e dullaelmyel guqjin mael aeqchee mael'ae gee hhae lye mael
13 Yesu yoqhhaeteel'ae yol gee biq: "Noteel dullaelmyel guqjin xi qiq mal maeq loq kaollaoq, haelmillyekaol baeqjyelboq e dullaelmyel guqjin mael loq laeq? 14 Ael'yuq xeiq e cholyaeq xeiq e ael'yuq mael laoq, Momil e saeziq ngeelvae. 15 Gaelmae gaeljyel vae leeqgae deelhhei e ael'yuq mael laoq, cholyaeqhael Momil e saeziq gaeq hhei fu, Saqdanl nae'naemyel lael, kaol yoqhhaeteel e neemae mael'ae xeiqdo hhei e Momil e saeziq mael diqkoqzaeq yil vae. 16-17 Haqlo taq'ae milcaeq maq zu myel vae leeqgae deelhhei mael laoq, cholyaeqhael Momil e saeziq gaeq hhei fu, nae'naemyel hhaol gae'lael aeqmyel naelhaeq dozaq hhei vae. Ngeelfeiq, yoqhhaeteel onglci'ae aelcil maeq zhido yilkiq kaol haeldyulmyel maeq hha dyeq'ae; Momil e saeziq gae'lye saeqlael puqlael kaol guaeq'ei diqqye biq laol, nae'naemyel Momil e saeziq mael beiqgae vae. 18-19 Aelgong gongbol dyeq myel'ae leeqgae deelhhei mael laoq, cholyaeqhael Momil e saeziq mael gaeq hhei aeqnaol laoq, xi qiqyil e ssuqhaoq caqzaq mael'ae zoqgiq gil biq, dyuqbaq lye cheeqmu gil yil biq, baeqjyelboq e aeqyoyoq zhee mulgoq e nyuq mael neemae mael'ae do'lal, kaol xihael lye Momil e saeziq mael naqvuq biq vae, kaol zaelsiq maeq siq laelkiq'ae. 20 Milmeeq vae leeqgae deelhhei mael laoq, cholyaeqhael Momil e saeziq gaeq hheikaol naelhaeq do zaq hhei vae. Tyulkaol, zaelsiqsiq lael, aelcael qiq nul vae suqqyel siq siq lael, koqqyel siq siq lael eiq za, qiqhael (100) siq siq lael eiq za."
Zonglhhaq deelhhei mael laoq loqzaeq hhei ngeelvae
21 Yesu yoqhhaeteel'ae yol gee biq: "Aeqdael doqhoq mael laoq keelcuq maellye congqkaeq biq laeq, paelsilmyel ssuqhhal holhhaqboq'ae baqdeel hhei laeq? Aeqdael doqhoq baqdeel e gonglbyu vae baqdeel maeqngeel maeq? 22 Zonglhhaq deelhhei e silqinq mael eiq bi molzaeq hhei ngeelvae, ochoq'ae maeq bi loq lye silqinq mael eiq bi mol du'lal maoqlye kaol'ae. 23 Naeqbol gaeq congl e cholyaeq laoq naelhaeq maoqhhae!"
24 Yesu yoqhhaeteel'ae yol gee biq: "Noteel naelhaeq do hhei mael neemae mael'ae nyuq deelhhei maoqhhae. Noteel ochoq'ae aeqchee coqloq maellye kuq biq laol, Momil eiq noteel'ae aeqchee coqloq maellye kuq laeq'ae, kaol noteel'ae xuldyul maeqcilmyel kuq laeq'ae. 25 Za hael'ae laoq, heil biq maoq siq; maqza hael'ae laoq, yoqhhaeq'ae halzahael dyel'eiq diqkoqzaeq biq maoq."
Ael'yuq alchichi kaol heeqda'lal e dullaelmyel guqjin
26 Yesu gee: "Momil e Goqja laoq cholyaeq aeqhael vae ael'yuq xeiq laoqmyel hhae. 27 Yoqhhaeq mqnao laoq aeqhaelmul, mqkiq laoq ssuqza, ngeelfeiq, ael'yuq mael alchichi kaol heeqda lal, yoqhhaeq aeqcheekaol xilnye hhae lye maeq loq'ae. 28 Milcaeq vae zaelsiq dyeqlal mael laoq beideelhhei hhae, zhoqmyel fu laoq aelyaeq mael heeqda lal, aeqnaol laoq aelnul du'lal, aeqnaol naolli laoq aelnul mael'ae zaelsiq maldeqlye siq lael. 29 Zaelsiq mao lael laol, lianqdao maellye yeqzaeq yil, heillezaq e naohaeq keellael vae kaol'ae."
Oqpa oqbye ael'yuq e dullaelmyel guqjin
30 Yesu gee: "Aedeeteel Momil e Goqja mael aeqchee qiqsheel laoqmyel dul'ae lye gee laeq? Aedeeteel aeqchee dullaelmyel guqjin maellye geedu hhei laeq? 31 Momil e Goqja laoq oqpa oqne qiq ne laoqmyel hhae, zhoq kae doyil fu, milcaeq taq'ae gilzuqmyel ael'yuqhael taq'ae hhael nil'ae. 32 Ngeelfeiq, kae do hhei'laol heeqda lal, kaol baeqjyelboq e oqbye mael taq'ae hhael heeq lael, allaq haeqheemyel laq du'lal vae. Mqmae e haeqzil mael yoqhhaeq e caelsiq holhhaqboq'ae zongl lael."
33 Yesu xihael laoqmyel dullaelmyel guqjin maellye zhee gee vae, yoqhhaeteel naelhaeq do'li kiq laoqmyel, yoqhhaeteel'ae Momil e saeziq mael geegaeq gil biq hhae; 34 Dullaelmyel guqjin maellye maq mul fu laoq, yoqhhaeteel'ae maeq gee biq'ae, ochoq maeq baelzhol fu laoq, gilzuqmyel hael caiq geedu gil biq wae siq.
Zaeqxil kaol eeldiqdiq mael Yesu e saeziq mael naelhaeq
35 Tyuqfu qiq mil mqkiq'ae, Yesu laqcaqhael'ae gee biq: "Aedeeteel eeldeel deelmae yulboq'ae he guq gil li maoq." 36 Laqcaqhael laoq cholyaeqhael ae'lye deelsae hhei vae, tyuqfu Yesu laoq hoq mael taq'ae zhol wae, yoqhhaeteel Yesu nyegael qiqgael yil vae, baeqjyelboq e hoqhael eiq yoqhhaeq nyegael qiqgael yil vae. 37 Qiqlaqmyel zaeqxil xilmae bo tullaeq, eeldiq mael maqqyemyel hoq mael'ae diq do'laq, hoq mael onglci'ae eelcuq bong'lye wae. 38 Ngeelfeiq, Yesu laoq hoq dongqmyeq vae vuq'ongq'ongq hheikaol yuqxul vae. Laqcaq yoqhhaeq yaol gul nyuq hheikaol gee biq: "Laoqsi, aedeeteel hhae sil goqbiq vae, nol maeq mol yil maeq?" 39 Yesu tullael kaol zaeqxil mael'ae gaezaeq biq, eeldeel deelmae mael'ae gee biq: "Yotyel haq du! Haeq dongni oq!" Kaol zaeqxil maeq bo vae, teel eiq maeq dongni vae. 40 Aeqnaol Yesu yoqhhaeteel'ae gee biq: "Aeqcheekaol xilnye gu gil laq hhaemaeq? Noteel xinlxin maqza gil laeq hhaemaeq?" 41 Laqcaqhael zhee gu gil biq'ae, kaol qiqhhaeq qiqhhaeq'ae geegaeq gil, gee: "Xitaeq aeqsul maeq? Zaeqxil kaol eeldeel deelmae dyel'eiq yoqhhaeq e saeziq mael naelhaeq laoq!"