Niqhaeq guqzaeq li biq e Geqlasen milcaeq cholyaeq yaol zonglmeeq biq
5
Yoqhhaeteel eeldeel deelmae yulboq'ae keelli laol, Geqlasen cholyaeq e milcaeq vae do'li. 2 Yesu hoq mael ae'lye zhoq gaeyi laol, maeqshol e yohael guqzaeq li biq e cholyaeq qiq hhaeq, fuq'ongl ongldye ae'lye yoqhhaeq e yiqsiboq'ae deel laeq. 3 Xitaeq fuq'ongl ongldye vae zhol hhae, yoqhhaeq'ae qiq hhaeq eiq maq kaltoq ongl'ae, sulmca maellye eiq maq kaltoq ongl biq'ae. 4 Yilkaefu, cholyaeq lye hae'nae pu maeqcilmyel, aeqkeel mael'ae kaltoq e sulmca kaol zhiqgeel zoq e sulmca maellye kaltoq biq, ngeelfeiq, zhiqgeel zoq e sulmca mael yoqhhaeq lye dong'qye byel hhei, aeqkeel mael'ae kaltoq e sulmca mael eiq tyelqye byel hhei, qiq hhaeq eiq yoqhhaeq yaol maeq zonglyae ongl'ae. 5 Yoqhhaeq mqkiq mqnao myel fuq'ongl ongldye kaol geeqzhoq vae yotyel haeqheemyel gul'ae, haqlo maellye aeqyoyoq'ae tongqzaeqhoq hhae. 6 Yoqhhaeq gaelmaolsae'lye Yesu yaol mol hhei biq laol, ki yil kaol Yesu yiqsiboq'ae vuqduqtongq gae hhei biq. 7-8 Yesu yoqhhaeq'ae gee biq: "Maeqshol e yohael, nol xitaeq e aeqhhaol ae'lye duyi!" Tyulnye laol, yoqhhaeq Yesu'ae yotyel haeqheemyel gul kaol gee biq: "Hhaelgao gao'li Momil e Yaqyo Yesu o! Nol ngaeteel zongl mael aeqchee bael heiq laeq hhaemaeq? Momil'ae tyuq deelhhei kaol noq'ae geezaeq laeqngeel, ngaeq'ae haeq zonglkyuq laeq." 9 Yesu yoqhhaeq'ae naelhaeq biq: "Noq'ae aeqchee lye gul laeq hhaemaeq?" Yoqhhaeq geehoq biq: "Ngaeteel haelnaeqmyel lil, tyulkaol, cholmil mael Naeq lye hhae." 10 Yoqhhaeteel yaol tyuqvae milcaeq ae'lye haeq lyeqsae laeq lye, hae'nae pu myel Yesu'ae geezaeq biq'ae.11 Tyuqfu, geeqzhoq geeqxil vae aqhhaq yilchangq changqmae gazaq hhae. 12 Tyulnye laol, maeqshol e yohael mael Yesu'ae geezaeq biq, gee: "Ngaeteel yaol aqhhaq yuhael onglci'ae bi doyil laq, kaol yoqhhaeteel e aeqhhaol mael'ae bi do'li laq." 13 Yesu yoqhhaeteel'ae hhaeq'ae lye gee biq. Maeqshol e yohael mael duyi vae, kaol aqhhaq yuhael'ae do'li vae. Tyulkaol, aqhhaq tyuhael hhaqbyeq'ae tongqgae byel yil, kaol eeldeel deelmae vae tongqpuq do yil kaol neqsil byel vae. Aqhhaq mael niqca (2000) yaeq zoqlal maoqmyel hhae. 14 Aqhhaq hoqzaq e cholyaeqhael kisae byel vae, kaol milmae heeqmyel vae kaol pusiq e cholyaeqhael'ae geegaeq yil biq, tyulkaol, yoqhhaeteel duyi kaol aeqchee silqinq peqlal hhaemaeq lye fu lael gil'ae. 15 Yoqhhaeteel Yesu zael'ae keellael laol, Naeq lye gul biq e niqhaeq mael guqzaeq li gol biq e cholyaeq tyutaeq tyuqvae zhol deelhhei, aelhongq dum hhei, neemae eiq nyuqgeel hoqlael biq vae lye mol hhei biq laol, yoqhhaeteel gu gil biq'ae. 16 Silqinq xihael bael mol e cholyaeqhael, niqhaeq guqzaeq li gol biq e cholyaeq kaol aqhhaq tyuhael'ae puqli biq e silqinq mael, gilzuqmyel baeqjyelboq cholyaeqhael'ae geegaeq hhei biq vae. 17 Yoqhhaeteel Yesu yaol yoqhhaeteel e milcaeq ae'lye deelsae hhei lye geezaeq biq hhae. 18 Yesu hoq mael'ae da'li maoq fu, niqhaeq guqzaeq li gol biq e cholyaeq, yoqhhaeq nyegael qiqgael baelzhol maoqlye geezaeq biq hhae. 19 Ngeelfeiq, Yesu maeq hhaeq'ae lye gee biq, kaol yoqhhaeq'ae gee biq: "Noq e laoqhaol vae kaol noq e qiqzonglyaeq zael'ae hoqli. Hhaoqsongl lye noq'ae aeqchee zongl hhei laeq hhae lye e silqinq mael, kaol yoqhhaeq noq'ae haelmillye hhaoqsaeqsaeq laeq hhae lye mael, gilzuqmyel yoqhhaeteel'ae geegaeq hhei biq." 20 Tyutaeq deelsae hhei vae, milmae heeqmyel qyel gael vae Yesu yoqhhaeq'ae haelmillye zongl laeq hhae lye e silqinq mael geegaeq gil biq laol, cholyaeqhael gaqmaqzuq li gil biq'ae.
Yesu lye yaeqmiyaeq kaol cholhae aeqmae yaol zonglmeeq biq
21 Yesu hoq yol zhol hheikaol eeldeel deelmae yulboq'ae keelli; cholyaeq haelnaeqmyel yoqhhaeq zael'ae deel'eeq laeq; tyuqfu yoqhhaeq eeldeel deelmae deeljyel vae zhol hhae. 22 Tyuqfu huiltangq'ae guanq e cholyaeq keellael vae. Yoqhhaeq e cholmil mael Yelluq lye gul biq hhae. Yoqhhaeq Yesu yaol zhoq mol hhei biq laol, yoqhhaeq e aeqkeel dongqpyeq'ae vuqduqtongq gae deelhhei yi. 23 Hae'nae pu myel yoqhhaeq'ae geezaeq biq, gee: "Ngaeq e yaeqmiq miqyaeq sil li goqbiq vae, nol bael lael kaol aqlaq mael yoqhhaeq e aeqhhaol mael'ae baqcheeq da hhei biq, xilnye laol, yoqhhaeq meeqshol yil kaol dyeq gayil ongl wae." 24 Kaol Yesu yoqhhaeq nyegael qiqgael bal yil vae. Cholyaeq haelnaeqmyel yoqhhaeq'ae cho'lyeq gil biq, yoqhhaeq'ae byuq gil biq.
25 Tyuqfu, tyuqvae haeqmiyaeq qiq hhaeq zhol'ae. Yoqhhaeq'ae siqza biq mael maq qye'li kiq e naelgol nael biq mael qyelniq hoq zoq vae. 26 Cholnael zonglmeeq e cholyaeqhael e aqlaq ae'lye zhee shelkuq aeqwae, yoqhhaeq e dyuqbaqhael gilzuqmyel mul byel vae, ngeelfeiq, teel eiq maeqmeeq yil biq dyul maeqcilmyel, nyeq'ei ta nyeq'ei hhael nael lael biq. 27-28 Yoqhhaeq Yesu haelzongl e silqinqhael gaeq li biq, kaol cholyaeqhael e kaeqlaeq ae'lye Yesu e aeqnaolboq'ae keelli. Yoqhhaeq neemae onglci'ae nyuq: "Ngael yoqhhaeq e aelhongq e aelbuq'aelqyel mael'ae so yo hhei'laol, ngael aeqdilmyel meeqsholyil wae." Tyulnye laol, Yoqhhaeq Yesu e aelhongq e aelbuq'aelqyel mael'ae so hhei li vae. 29 Yoqhhaeq e siq yul mael qiqlaqmyel qye'li biq vae. Yoqhhaeq e aeqhhaol naelgol mael meeqyil yaevae lye loq li biq. 30 Yesu qiqlaqmyel onglzaeq mael aeqhhaol ae'lye duyil yae lye loq li biq laol zipol hoqlael kaol cholyaeqhael'ae gee biq: "Aeqsul ngaeq e aelhongq mael'ae so lal lilmaeq?" 31 Laqcaq yoqhhaeq'ae gee biq: "Fu hhei, xuldyulmyel cholyaeq noq'ae byuq'ae, nol laoq aeqcheekaol 'aeqsul ngaeq'ae so yo hhaemaeq' lye naelhaeq lilmaeq?" 32 Yesu haeqvae lael'ee myel chifu'ae, silqinq xilmael zongl e haeqmiyaeq yaol mol maoqlye zongl hhae. 33 Haeqmiyaeq tyutaeq yoqhhaeq e aeqhhaol'ae peqlal e silqinq mael loq li biq, kaol gu'ni'lye Yesu yiqsiboq'ae deelniq laeq kaol vuqduqtongq gae hhei, kaol aeqdilmyel peqlal e silqinq mael gilzuqmyel Yesu'ae geedu hhei biq vae. 34 Yesu yoqhhaeq'ae gee biq: "Yaeqmiq o! Noq e xinlxin lye noq yaol bi meeqyil vae, neesaelhhae'lye hoqyil o, noq e naelgol mael meeqsholyil vae."
Yesu lye yaeqmiyaeq yaol bi dyeqhoqlal
35 Yesu saeziq gee siq fu, huiltangq'ae guanq e cholyaeq toq ae'lye cholyaeq keellael, gee: "Noq e yaeqmiq sil vae, aeqcheekaol laoqsi'ae bi yil siq laeq?" 36 Yesu laoq yoqhhaeteel'ae maeq gee'naeqhoq biq'ae, kaol huiltangq'ae guanq e cholyaeq'ae gee biq: "Maq gu kael! Xinlxin za laol hhaeq vae!" 37 Yesu laoq Biqdeq, Yaqgel kaol Yaqgel e aeqnil Yoqhanl maoqlaol, baeqjyelboq e cholyaeqhael yaol laoq yoqhhaeq nyegael maeq bi bal yil'ae. 38 Yoqhhaeteel huiltangq'ae guanq e cholyaeq toq'ae keellael, Yesu laoq tyuqvae cholyaeqhael nyul sil maoqmyel nyul bonggaebyel e mol hhei biq. 39 Yesu deel do'li kaol yoqhhaeteel'ae gee biq: "Aeqcheekaol yotyel ha'lye nyuqsaeq lael aeqmyel nyul gil lilmaeq? Yaeqguq sil e maeqngeel'ae, yuqxul hhae." 40 Tyulnye laol, cholyaeqhael yoqhhaeq'ae eel gil biq. Ngeelfeiq, Yesu lye cholyaeqhael yaol lyeqdu biq, yaeqguq e aeqdae aeqmae kaol yoqhhaeq nyegael bael lael e laqcaqhael yaol sheeq hheikaol, yaeqguq zhol e nulyaeq'ae do'li. 41 Yesu yaeqguq e aqlaq mael'ae zoqtyeq deelhhei kaol yoqhhaeq'ae gee biq: "Dallildal guqmiq!" Xi qiq doq geepolduhoq hhei kaollaoq: "Yaeqmiyaeq, ngael noq'ae tullael lye moqheilheil lil!" 42 Yaeqmiyaeq xitaeq nae'naemyel tullael kaol deel'ae; tyuqfu yoqhhaeq qyelniq hoq zoq wae. Cholyaeqhael gaqmaqzuq li gil biq'ae. 43 Yesu yoqhhaeteel'ae mee'nae pu myel gee biq'ae, silqinq xilmael ochoq'ae haeq bi loq gil, kaol yaeqmiyaeq'ae zaeq e teel heilmoq hhei biq lye moqheilheil gil biq'ae.