Yesu e pusiq cholyaeqhael yoqhhaeq'ae xinq yae lye zongl biq hhae
6
Yesu tyuqvae lye deelsae vae, aeqyoyoq e pusiq vae keellael, yoqhhaeq e laqcaqhael yoqhhaeq'ae cho'lyeq deelhhei hhae. 2 Anxiqriq keellael vae, yoqhhaeq huiltangq vae zhoqmyel Momil e saeziq geemyeq gil biq. Cholyaeqhael gaeq hhei biq laol gaqmaqzuq li gil biq, gee: "Xitaeq yo'liq xihael haeqvae lye hhae'lael biq hhaemaeq? Yoqhhaeq'ae biq hhei biq e geel mael aeqchee maeq? Yoqhhaeq e aqlaq ae'lye haelzongl e shenqjiqhael aeqchee maeq? 3 Xitaeq laoq aelbol laqkiq maeqngeel maeq? Maqlilyal e yaqyo Yaqgel, Yoqxi, Yoqdal kaol Ximenq e algo maeqngeel maeq? Yoqhhaeq e dulmaehael eiq aedeeteel nyegael baelzhol maeqngeel maeq?" Tyulkaol, yoqhhaeteel Yesu'ae xinq yae lye zongl gil biq hhae. 4 Yesu yoqhhaeteel'ae gee biq: "Xianzhi vae laoq aeqyoq e pusiq, aeqyoq e minqcuq kaol aeqyoq toq cholyaeqhael maeq zunjinl biq kaolmaoqlaol, haetaeq eiq yoqhhaeq'ae zunjinl biq'ae." 5 Yesu lye nael biq e cholyaeq mee'nae hhaeq'ae aqlaq baqcheeq da hheikaol zonglmeeq biq dyul maoqlaol, tyuqvae qiqgiq shenqjiq eiq maeq hhae zongl biq'ae. 6 Yoqhhaeteel maeq xiangxinl gae'lye Yesu gaqmaqzuq li biq'ae.Yesu lye shiqtuq qyelniq hhaeq yaol moqheilheil du hhei
Yesu dongqpyeq dongqjyel e pusiq vae deeldyu byel vae, kaol cholyaeqhael'ae geemyeq gil biq. 7 Yoqhhaeq lye shiqtuq qyelniq hhaeq gul laeq, kaol niq nulhhaeq niq nulhhaeq lye moqheilheil du hhei, kaol yoqhhaeteel'ae maeqshol e yohael mael zonglyae ongl e laqtaq biq hhei biq. 8 Yesu yoqhhaeteel'ae moqheilheil biq, gee: "Zaeqngeeq mael maoqlaol, gaelmae vae qiqgiq eiq haeq heil, zaeq eiq haeq heil, palbye haeq heil, haeqpi pollo mael eiq dyuqbaq haeq pi. 9 Paqno qiq zul maoqlaol haeq nuq, onglci'ae dum do e aelhongq poljye niq ko haeq heil." 10 Yoqhhaeteel'ae yol gee biq: "Noteel haeqvae keelyil feiq, aeqsul toq'ae do'li laol, tyutoq'ae deelsae maoq fu keellye tyuqvae zhol gil. 11 Haeqvae milcaeq e cholyaeqhael noteel'ae maeq sheeqcaq laq, noteel gee e saeziq mael eiq maeq naelhaeq kaollaoq, noteel tyuqvae lye deelsae fu, aeqkeel mael'ae su e haeqlyel mael nuqhael gae hhei, xilnye zongl mael laoq, yoqhhaeteel haelzonglhael maq hoq'ae lye aeqyoteel'ae bi loq maoqlye kaol'ae." 12 Shiqtuqhael duyil, kaol cholyaeqhael'ae neemae paellael maoqhhae lye geegaeq gil biq, 13 Kaol niqhaeq haelnaeqmyel lyeqdu hhei, cholnael'ae zhoqcae cil soda hheikaol zonglmeeq gil biq vae.
Shelxiqzongl e Yoqhanl sil vae
14 Tyuqfu Yesu e cholmil mael loq e cholyaeq nyeq'ei hhael naeq vae, Xi'lyul zongmae Antiqpa'ae gaeq hhei biq. Qiq miq gee: "Shelxiqzongl e Yoqhanl cholsil onglci ae'lye dyeqhoqlal vae, tyulkaol, yoqhhaeq e onglci'ae shenqjiq zongl kiq e onglzaeq mael za hhae." 15 Qiq miq yol gee: "Yoqhhaeq laoq Yiqlilyal'ae." Baeqjyelboq e qiq miq yol gee: "Yoqhhaeq laoq xianzhi'ae, xianzhihael onglci e qiq hhaeq laoqmyel hhae." 16 Ngeelfeiq, Xi'lyul'ae gaeq hhei biq laol, gee: "Ngaeq lye vuqduq mael dega biq e Yoqhanl yoqhhaeq dyeqhoqlal vae!" 17 Yoqhhaeq xilnye gee mael laoq, yoqhhaeq lye laefuq Xi'loqdiq gae'lye, cholyaeq yaol moqheilheil du hhei, kaol Yoqhanl yaol deiqtyeq biq, kaol laoqgaiqkei laoqhaol vae koqlongl biq. Xi'loqdiq laoq Xi'lyul e aeqnil e haeqmiq'ae, ngeelfeiq, Xi'lyul lye yoqhhaeq yaol sheeqzaeq biq. 18 Yoqhanl Xi'lyul'ae hae'nae pu myel gee gol biq: "Nol nonil e haeqmiq yaol sheeqtyeqzaeq maq hoq'ae." 19 Tyulkaol, Xi'loqdiq Yoqhanl'ae neema zhee su biq hhae, kaol yoqhhaeq yaol xyeq goq biq hhae, ngeelfeiq, maq hha xyeq congl biq'ae. 20 Xi'lyul laoq Yoqhanl'ae gu biq hhae, yoqhhaeq laoq gongyil e cholyaeq kaol senljyeq cholyaeq'ae lye loq biq, tyulkaol, yoqhhaeq'ae ocongq biq, yoqhhaeq gee e saeziq mael gaeq hhei biq kaol haelmillye zongl maoqlye maeq loq biq feiq, yoqhhaeq gee mael naelhaeq goq biq kaol'ae. 21 Qiq nao laoq, jihuil za lal vae. Xi'lyul dyeqlal e qiq nao naohaeq keellael laol, yoqhhaeq laoq zhiqmoqhael, qiqca (1000) cholyaeq e zhiqmoqhael, kaol Ja'lillil e yoheeqhael vae baqwanq baqdeel hhei biq. 22 Xi'loqdiq e yaeqmiq do'lal kaol yinqjil dil lael, Xi'lyul kaol zhol deelhhei e daeqxihael zhee hhaol gil biq'ae. Zongmae yaeqmiyaeq'ae gee biq: "Nol aeqchee mulgoq laol ngaeq'ae geezaeq laeq aeqmeel, ngael noq'ae heil laeqngeel!" 23 Yoqhhaeq'ae aeqdilmyel faqsil yol kei biq: "Nol ngaeq'ae aeqchee eiq geezaeq laeq aeqmeel, ngaeq e goqja e qiq pa eiq aeqdilmyel noq'ae heil laeqngeel!" 24 Tyulnye laol, yaeqmiyaeq duyil kaol yoqhhaeq e aeqmae vae naelhaeq yil biq: "Ngael aeqchee geezaeq maoqhhae maeq?" Xi'loqdiq yoqhhaeq'ae gee biq: "Shelxiqzongl e Yoqhanl e vuqduq mael!" 25 Kaol yoqhhaeq nae'naemyel zongmae yiqsiboq'ae keelli, kaol zongmae vae geezaeq biq, gee: "Zongmae nol nae'naemyel shelxiqzongl e Yoqhanl e vuqduq mael, panqpan mael'ae heil da hheikaol ngaeq'ae baq laq laq lye nyuqlil!" 26 Xi'lyul zhee nyuqsaeq biq, ngeelfeiq, yoqhhaeq faqsilkei gol, kaol zhol deelhhei e daeqxihael gae'lye, kaol yoqhhaeq'ae maeq hhaeq'ae lye maeq gee sael biq'ae. 27 Xi'lyul zongmae nae'naemyel cholyaeq xyeq e qiq hhaeq vae Yoqhanl e vuqduq mael baq laq lye moqheilheil biq. Kaol cholyaeq xyeq e qiq hhaeq yil vae, laoqgaiqkei laoqhaol ae'lye Yoqhanl e vuqduq mael dega biq. 28 Vuqduq mael panqpan mael'ae baq da hheikaol yaeqmiyaeq vae baqmoq hhei biq'ae, yaeqmiyaeq laoq yoqhhaeq e aeqmae vae baqmoq hhei biq'ae. 29 Yoqhanl e laqcaqhael gaeq hhei biq laol, lael kaol yoqhhaeq e aeqhhaol mael baq hoqyil vae, kaol fuq'ongl vae baqduqm biq vae.
Aqba ngaeq mael kaol ngaeqdyel niq yaeq e shenqjiq
30 Shiqtuqhael Yesu yiqsiboq'ae deel'eeq laeq, yoqhhaeteel haelzongl e silqinqhael kaol hael geemyeq gil biq mael yoqhhaeq'ae geegaeq biq. 31 Yilyil laellael e cholyaeq naeq kaol yoqhhaeteel aelhoq zaeq maeqpol biq'ae. Tyulkaol, Yesu yoqhhaeteel'ae gee biq: "Lael gil, noteel ngaeq nyegael cholyaeq qiq hhaeq eiq maeq bi loq myel, byelcongq'ae hhaeqnaeq qiqlaq naeq yil gil maoq." 32 Yoqhhaeteel cholyaeq qiq hhaeq vae eiq maeq bi loq myel, hoq zhol hheikaol byelcongq'ae yil gil vae. 33 Cholyaeqhael yoqhhaeteel deelsae hhei mol hhei biq, kaol yoqhhaeteel yaol fuduzaq hhei. Tyulkaol, haelnaeqmyel cholyaeq haeqvae lael'ee myel milmae heeqmyel ae'lye deel duyi, kaol tyuboq'ae ki yil gil'ae, kaol cholyaeqhael laefuqmyel keelli vae. 34 Yesu hoq mael ae'lye zhoq gaeyi laol cholyaeq haelnaeqmyel mol hhei biq. Yoqhhaeteel laoq aqciq hoqzaq e cholyaeq maeq zhol e aqciqhael laoqmyel hhae, kaol yoqhhaeteel'ae hhaoqsaeqsaeq biq. Tyulkaol, yoqhhaeteel'ae zhoqmyel haelnaeqmyel silqinq geemyeq gil biq. 35 Neelmae leeqdo goqbiq fu, laqcaq lael kaol Yesu'ae gee biq: "Saeqvae laoq byelcongq'ae, neelmae leeqdo goqbiq vae, 36 Kaol yoqhhaeteel'ae hoqyil oqlye gee biq, dongqpyeq e pusiq'ae kaol pusiq siqyaeq vae zaeq e bi vulzaeq yil gil." 37 Yesu yoqhhaeteel'ae gee biq: "Noteel yoqhhaeteel'ae zaeq e heilmoq hhei gil biq!" Yoqhhaeteel yoqhhaeq'ae gee biq: "Ngaeteel pulziq dyuqbaqa niqhael (200) maellye aqba vul laq kaol yoqhhaeteel'ae bi zaeq laeq?" 38 Yesu yoqhhaeteel'ae gee biq: "Noteel'ae aqba haeldyul za siq maeq lye fu yil!" Tyulkaol, yoqhhaeteel fu yil vae, kaol Yesu'ae gee biq: "Aqba ngaeq mael kaol ngaeqdyel niq yaeq za siq." 39 Yesu laqcaqhael'ae moqheilheil biq, cholyaeqhael'ae qiq miq qiq miq lye haelsaeq mael taq'ae zholgae hhei gil lye gul biq. 40 Kaol cholyaeqhael qiq miq qiq miq lye zholgae hhei gil vae, qiq miq laoq qiqhael (100) hhaeq lye zoq, ngaeqqyel hhaeq lye eiq zoq. 41 Yesu aqba ngaeq mael kaol ngaeqdyel niq yaeq mael heilqei hhei, mqmae vae chifu hheikaol mqmae Aeqdae vae meeqyaevae lye gee biq laol, aqba mael heiqpa hheikaol laqcaqhael'ae heilmoq hhei biq kaol cholyaeqhael e yiqsiboq'ae bi heildeel hhei yil, ngaeqdyel niq yaeq mael eiq cholyaeqhael'ae byel hhei biq. 42 Cholyaeqhael zaeq gil vae, kaol zaeqdye vae. 43 Heiqpa yo feiq maeq zaeq byel ongl biq e aqba kaol ngaeqdyelhael laqcaqhael lye heil'eeq hoqlaeq, kaol guqlanq qyelniq mael heilbong hhei vae. 44 Aqba zaeq e cholyaeqhael onglci'ae, haqyoyaeq dyel'eiq ngaeqca (5000) hhaeq zoq'ae.
Yesu eeldeel deelmae taq'ae deel'ae
45 Tyulmael aeqnaol, Yesu nae'naemyel laqcaqhael yaol hoq mael'ae lyeq da biq, yoqhhaeteel yaol laefuqmyel yulboq e Boqsaildal milmae nilmyel'ae li gil lye gee biq hhae, yoqhhaeq laoq cholyaeqhael yaol gulsae hoq hhae. 46 Yesu cholyaeqhael zaellye deelsae vae, kaol geeqzhoq vae da'li kaol heeldoq gee li. 47 Kiqsulkiqxeiq fu, hoq mael laoq eeldeel deelmae taq'ae za, Yesu laoq yoqhhaeq qiq hhaeq lye deeljyel vae zholdeelsaeq. 48 Yesu e laqcaqhael zaeqxil bo'laeq boq'ae hoq he kaol hhaeqdyuldyul sil maoqmyel he mol hhei biq. Mqbaebae lael maoq fu, Yesu eeldeel deelmae taq'ae deel'ae, yoqhhaeteel zael'ae deel yil kaol yoqhhaeteel'ae deel jyeq maoqlye zongl hhae. 49 Laqcaqhael yoqhhaeq eeldeel deelmae taq'ae deel e mol hhei biq, kaol niqhaeq'ae lye kei gil biq'ae, tyulkaol, gul tul gil laeq. 50 Yoqhhaeteel gilzuqmyel yoqhhaeq yaol mol vae, kaol gusil maoqmyel gu gil biq'ae. Yesu nae'naemyel yoqhhaeteel'ae gee biq: "Pyeqkeel deeq maoqhhae, ngael lil, maq gu gil kael." 51 Tyulkaol, hoq mael'ae da'li vae, yoqhhaeteel nyegael qiqgael baelzhol laol, zaeqxil maeq bo vae. Laqcaqhael e neemae mael'ae gaqmaqzuq li gil biq'ae. 52 Yoqhhaeteel e neemae mael oheiq maeq pong hhei laoqmyel hhae, kaol Yesu aqba byel e shenqjiq mael maeq loq gil biq wae siq.
Yesu lye Geqniqsa'lel milcaeq e cholnael yaol zonglmeeq biq
53 Yoqhhaeteel eeldeel deelmae vae he guq yil laol, Geqniqsa'lel deeljyel vae keelli gil, kaol hoq mael kaltoq deelhhei. 54 Hoq mael ae'lye zhoq gaeyi laol, cholyaeqhael lye Yesu yaol nae'naemyel fuduzaq hhei. 55 Yoqhhaeteel tyuqvae halza milcaeq vae kidyu byel vae, yoqhhaeq haeqvae zhol hhae lye gaeq hhei biq laol, cholnaelhael yaol zashe maellye tyuqvae baq li biq. 56 Yesu hael keelyil e milcaeq vae, pusiq vae haoq, milmae heeqmyel vae haoq, pusiq siqyaeq vae haoq, cholyaeqhael lye cholnaelhael yaol gaiziq vae baqdeel hhei biq, kaol cholnaelhael Yesu e aelhongq e aelbuq'aelqyel mael'ae bi so hhei lye geezaeq biq'ae. Hal so yo e cholyaeqhael laoq gilzuqmyel meeqsholyil biq vae.