Shelxiqzongl e Yoqhanl sil vae
14
Tyuqfu, tyuqvae milcaeq e zongmae Xi'lyul laoq Yesu haelzonglhael gaeq hhei biq, 2 Kaol yoqhhaeq e yaqhacheqzaq e cholyaeq'ae gee biq: "Xitaeq laoq shelxiqzongl e Yoqhanl'ae, yoqhhaeq laoq cholsil onglci ae'lye dyeqhoqlal hhae, tyulkaol, yoqhhaeq e onglci'ae xilnye onglzaeq mael za." 3 Yoqhhaeq xilnye gee mael laoq, Xi'lyul yoqhhaeq e aeqnil Fei'lil e haeqmiq Xi'loqdiq gae'lye, Yoqhanl yaol deiqtyeq hheikaol kaltoq biq, kaol laoqgaiqkei laoqhaol vae koqlongl biq hhae, 4 Yoqhanl Xi'lyul'ae "nol cholhae aeqmae xitaeq yaol sheeqtyeqzaeq maq hoq'ae" lye gee gol biq kaol'ae. 5 Kaol Xi'lyul yoqhhaeq yaol xyeq goq biq hhae, ngeelfeiq, cholyaeqhael'ae gu biq, yoqhhaeteel Yoqhanl laoq xianzhi'ae lye gee gil kaol'ae. 6 Xi'lyul e dyeqlal e naohaeq keellael vae, Xi'loqdiq e yaeqmiq cholyaeqhael e yiqsiboq'ae yinqjil dil lael, kaol Xi'lyul'ae zhee bi hhaol li'ae, 7 Tyulkaol, Xi'lyul yaeqmiyaeq'ae yoqhhaeq hael geezaeq laoqmyel heil laeqngeel lye faqsilkei biq hhae. 8 Yaeqmiyaeq'ae aeqmae lye tyuqcuq biq hhae, kaol gee: "Shelxiqzongl e Yoqhanl e vuqduq mael, panqpan mael'ae heil da hheikaol ngaeq'ae baq laq laq." 9 Kaol zongmae nyuqsaeq biq'ae, ngeelfeiq, yoqhhaeq faqsilkei gol, kaol aelhoq qiqgael bael zaeq e cholyaeqhael gae'lye, yoqhhaeq'ae heil hhei biq lye minllinl gae hhei; 10 Tyulkaol, cholyaeq yaol moqheilheil du hhei, kaol laoqgaiqkei laoqhaol ae'lye Yoqhanl e vuqduq mael dega biq vae, 11 Kaol vuqduq mael panqpan mael'ae baqda hhei, kaol yaeqmiyaeq tyutaeq'ae baq laq biq, yoqhhaeq lye yoqhhaeq e aeqmae'ae baqmoq yil biq vae. 12 Yoqhanl e laqcaq lael, kaol aeqhhaol mael baq hoqyil kaol baqduqm biq vae, kaol Yesu'ae yol geegaeq li biq.Aqba ngaeq mael kaol ngaeqdyel niq yaeq e shenqjiq
13 Yesu gaeq hhei biq laol, tyuqvae lye hoq mael'ae da'li, ochoq'ae maeq bi loq myel byelcongq'ae yil vae. Cholyaeqhael gaeq hhei biq laol, haeqvae lael'ee myel milmae heeqmyel ae'lye lael, keelyoqyoq gae'lael aeqmyel yoqhhaeq'ae cho'lyeq biq. 14 Yesu duyi laol, cholyaeq haelnaeq naeqmaemyel mol hhei biq laol, yoqhhaeteel'ae hhaoqsaeqsaeq biq'ae, kaol yoqhhaeteel e cholnaelhael yaol zonglmeeq biq vae. 15 Kiqsulkiqxeiq fu, laqcaq laefuqboq'ae lael kaol gee: "Saeqvae laoq byelcongq'ae, yaeqmeel laoq maq naq vae, kaol cholyaeqhael'ae hoqyil oqlye gee biq, tyulnye laol, yoqhhaeteel pusiq vae do'li kaol aeqyoyoq zaeqzael bi vulzaeq yil." 16 Yesu yoqhhaeteel'ae gee biq: "Yoqhhaeteel maq yil kael'ae, noteel yoqhhaeteel'ae bi zaeq hhei!" 17 Laqcaqhael gee: "Ngaeteel e saeqvae aqba ngaeq mael, kaol ngaeqdyel niq yaeq maoq maqza'ae." 18 Yesu gee: "Ngaeq'ae heil laeq laeq." 19 Tyulkaol, yoqhhaeq cholyaeqhael'ae haelsaeq taq'ae zholgae hhei gil lye moqheilheil biq, kaol aqba xi ngaeq mael, kaol ngaeqdyel niq yaeq mael heil hhei, kaol mqmae vae chifu hheikaol geeqlongq biq biq, kaol aqba mael heiqpa hhei, kaol laqcaqhael'ae heilmoq hhei biq'ae, laqcaqhael laoq cholyaeqhael'ae yol heilmoq hhei biq'ae. 20 Yoqhhaeteel haetaeq eiq zaeq vae, kaol zaeqdye vae. Heiqpa yo feiq maeq zaeq byel ongl hael laqcaqhael lye heil'eeq hoqlaeq vae, kaol bong'lye qyelniq guqlanq zoq hhae. 21 Zaeq e cholyaeqhael onglci'ae, cholhae aeqmae kaol yaeqguq maeq bael gee do myel, haqyoyaeq dyel'eiq ngaeqca (5000) hhaeq zoqlal maoqmyel hhae.
Yesu eeldeel deelmae taq'ae deel'ae
22 Silqinq tyulmael aeqnaol, Yesu nae'naemyel laqcaqhael yaol hoq mael'ae lyeq da biq, yoqhhaeteel yaol laefuqmyel yulboq'ae bi guq yil, yoqhhaeq laoq cholyaeqhael yaol gulsae hoq hhae. 23 Cholyaeqhael yaol gulsae hoq hhei'laol, yoqhhaeq qiq hhaeq myel geeqzhoq vae heeldoq gee li. Mqkiq keellael vae, yoqhhaeq qiq hhaeq myel tyuqvae zhol hhae. 24 Tyuqfu, hoq mael deeljyel ae'lye mee'nae gong'liq he yil aeqwae, zaeqxil maeq shunl biq, tyulkaol, eeldiqdiq maellye te gil biq hhae. 25 Mqbaebae lael maoq fu, Yesu eeldeel deelmae taq'ae deel, kaol laqcaqhael e tyuboq'ae yil. 26 Ngeelfeiq, laqcaqhael yoqhhaeq eeldeel deelmae taq'ae deel mol hhei biq laol, dilgu'li gil biq, gee: "Niqhaeq'ae!" Yoqhhaeteel gu biq kaol gul tul gil laeq. 27 Yesu nae'naemyel yoqhhaeteel'ae gee biq: "Pyeqkeel deeq maoqhhae, ngael lil, maq gu gil kael." 28 Biqdeq yoqhhaeq'ae geehoq biq: "Hhaoqsongl o, nol lil lye kaollaoq, ngaeq yaol eelcuq taq ae'lye noq e tyuqvae bi deel keelyil laeq." 29 Yesu gee: "Nol lael aeqmeel!" Kaol Biqdeq hoq taq ae'lye gaeyil, kaol Yesu tyuboq'ae yil maoqlye eelcuq taq'ae deel; 30 Ngeelfeiq, zaeqxil guaeq'ei bo biq, kaol gu tullaeq biq, leeqneq do goqbiq vae, kaol gul gae'lael aeqmyel gee: "Hhaoqsongl o, ngaeq'ae jiul laeq!" 31 Yesu nae'naemyel aqlaq tyuqdu hheikaol yoqhhaeq yaol eetyeq biq, kaol yoqhhaeq'ae gee biq: "Nol xinlxin maeq heeq e cholyaeq o, aeqcheekaol huaiqyiq lilmaeq?" 32 Yoqhhaeteel hoq mael'ae zhoq da'li laol, zaeqxil maeq bo vae. 33 Hoq mael taq'ae zhol e cholyaeqhael yoqhhaeq'ae heel biq, gee: Nol aeqdilmyel Momil e Yaqyo she."
Yesu lye Geqniqsa'lel milcaeq e cholnael yaol zonglmeeq biq
34 Yoqhhaeteel eeldeel deelmae vae he guq yil laol, Geqniqsa'lel deeljyel vae da'li gil. 35 Tyuqvae cholyaeqhael Yesu yaol fuduzaq hhei, kaol cholyaeq yaol tyuqvae dongqpyeq e halza milcaeq vae hael nael biq e cholyaeq yaol, Yesu tyuqvae sheeqli lye gee yil biq lye moqheilheil du hhei, 36 Kaol Yesu vae yoqhhaeteel'ae yoqhhaeq e aelhongq e aelbuq'aelqyel mael'ae maoqlaol maeq bi so laq kael lye geezaeq biq hhae. Hal so yo e cholyaeqhael laoq meeqshol byel yil biq vae.