Momil e saeziq mael maeq hhae beiqgae'ae
15
Tyuqfu, Faqlilsail cholyaeq, kaol Momil e saeziq mael loq e laqkiq Ye'lulsa'lenq ae'lye yi kaol Yesu'ae mol lael, gee: 2 "Noq e laqcaqhael aeqcheekaol yilkaeaeqnao cholyaeq lye beideelhhei e mael maeq zongl hhaemaeq? Yoqhhaeteel aelhoq zaeq fu aqlaq maeq ciq kaol'ae." 3 Yesu yoqhhaeteel'ae geehoq biq: "Noteel aeqcheekaol noteel e beideelhhei mael gae'lye, Momil e gailminl mael maeq zongl lilmaeq? 4 Momil gee: 'Aeqdae kaol aeqmae'ae xiaolshunl biq; yol gee: 'Aeqdae kaol aeqmae'ae doqchiq gee e cholyaeq laoq, aeqdilmyel zonglsil maoqhhae.' 5 Ngeelfeiq, noteel gee: 'Aeqsul aeqdae aeqmae'ae gee biq: Ngael noq'ae cu biq maoqlye mael fenglxianl aeqwae, 6 Xilnye laol, yoqhhaeq e aeqdae'ae maeq xiaolshunl biq kael vae.' Xilmael laoq, noteel beideelhhei ae'lye Momil e saeziq mael beiqgae hhei vae. 7 Gee kaol zongl mael maeq qiqsheel e cholyaeqhael o! Yiqsailyal noteel gae'lye peqlal maoqlye mael geedu mael laoq hoq she:8 'Cholyaeq xihael myeqbongq mael laoq,
ngaeq'ae zunjinl laeq'ae,
ngeelfeiq, yoqhhaeteel e neemae mael laoq,
ngaeq'ae gaelmaolsae'lye vae zhol hhae.
9 Yoqhhaeteel cholyaeq lye moqheilheil e saeziq mael,
Momil e saeziq'ae lye cholyaeq'ae geemyeq biq.
Tyulkaol, ngaeq'ae heel gil mael alngeiqmyel heel wae.'"
10 Yesu lye cholyaeqhael yaol gul laeq, kaol yoqhhaeteel'ae gee biq: "Noteel naelhaeq maoqhhae, loq eiq loq maoqhhae. 11 Myeqbongq ae'lye doyil mael cholyaeq yaol maeqshol myel maeq bi peqyil kiq'ae, myeqbongq ae'lye duyi mael laoq cholyaeq yaol maeqshol myel zonglpeq kiq'ae." 12 Tyuqfu, laqcaq deelniq laeq kaol yoqhhaeq'ae gee biq: "Faqlilsail cholyaeq laoq saeziq xilmael teel eiq maeq naelhaeq goq biq'ae lye nol loq lilmaeq?" 13 Yesu geehoq biq: "Hal dyeq e aelbol kaol haelsaeq mael, ngaeq e mqmae Aeqdae lye kae hhei maeqngeel kaollaoq, gilzuqmyel aelcil naelnaemyel olpudu maoqlye hhae. 14 Yoqhhaeteel aeqchee zongl zongl gil biq! Yoqhhaeteel laoq mabyeq'ae, kaol mabyeq e gaelmae sheeqmyeq e cholyaeq geiq hhae; mabyeq laoq mabyeq'ae gaelmae sheeqmyeq kaollaoq, niq nulhhaeq myel duqhongq'ae leeqdo hhei ngeelvae." 15 Biqdeq yoqhhaeq'ae geehoq biq: "Dullaelmyel guqjin xilmael, aeqchee yilsi'ae maeq lye ngaeteel'ae geedu laq." 16 Yesu gee: "Noteel eiq maeq loq gil laeq wae siq maeq? 17 Myeqbongq ae'lye doyil mael laoq, oqma ae'lye gol yil hhae, kaol kiqssul'ae kiq duyil hhae lye, noteel maeq loq laeq hhaemaeq? 18 Ngeelfeiq, myeqbongq ae'lye duyi mael laoq neemae ae'lye duyi hhae, xilmael laoq cholyaeq yaol maeqshol myel bi peqyil kiq hhae. 19 Neemae ae'lye duyi e duqlaq myel nyuq mael xihael laoqmyel kaol'ae: Cholyaeq xyeq, ochoq nyegael neemaeba, aeqsul nyegael eiq byuq ssuqza, lolbiq haoqzaeq, jaq e zoqzenlkei, kaol geekyuq. 20 Cholyaeq'ae maeqshol myel bi peqyil mael laoq xihael ngeelvae. Aqlaq maeq ciq myel aelhoq zaeq mael laoq, cholyaeq yaol maeqshol myel maeq bi peqyil kiq'ae."
Ja'nanq milcaeq e cholhae aeqmae e xinlxin mael
21 Yesu tyuqvae lye deelsae hhei, Tui'loq kaol Xidunl milcaeq vae yil. 22 Ja'nanq e cholhae aeqmae qiq hhaeq tyuqvae milcaeq ae'lye duyi, gul gae'lael aeqmyel gee: "Hhaoqsongl o, Dalweil e Yaqyo, ngaeq'ae hhaoqsaeqsaeq laeq! Ngaeq e yaeqmiq'ae niqhaeq guqzaeq li biq kaol zhee kyuq biq hhae." 23 Ngeelfeiq, Yesu saeziq qiq doq eiq maeq gee'naeq hoq biq'ae. Laqcaq laefuqboq'ae deel da laq, kaol yoqhhaeq'ae geezaeq biq: "Cholhae aeqmae xitaeq aedeeteel e aeqnaolboq'ae gul'ae, yoqhhaeq'ae hoqyil lye gee biq." 24 Yesu geehoq biq: "Ngaeq yaol moqheilheil duyi laq mael laoq, Yiqsellyel toq e gabu e aqciqhael e tyuqvae yil lye dyul wae." 25 Cholhae aeqmae tyutaeq yoqhhaeq'ae vuqduqtongq lael biq, gee: "Hhaoqsongl o, ngaeq'ae baelzongl laeq!" 26 Yoqhhaeq geehoq biq: "Yaeqguq e aqba mael heil hheikaol keeqyaeqhael'ae beiqmoq biq e maq hoq'ae." 27 Cholhae aeqmae gee: "Hhaoqsongl o, maq ba'ae, ngeelfeiq, keeqyaeqhael eiq yoqhhaeteel e hhaoqsongl e zaelzhee ae'lye leeqgae yi e zaelxulhael hhae zaeq'ae." 28 Tyulkaol, Yesu yoqhhaeq'ae geehoq biq: "Cholhae aeqmae, noq e xinlxin mael zhee heeq she! Kaol nol hael geezaeq laoqmyel bi peqlal laqngeel." Tyuq ae'lye aeqnaol laoq, yoqhhaeq e yaeqmiq meeqyil biq vae.
Yesu lye haelnaeqmyel cholyaeq yaol zonglmeeq biq
29 Yesu tyuqvae milcaeq ae'lye deelsae hhei, kaol Ja'lillil e eeldeel deeljyel'ae niqli aeqmyel vae keellael, geeqzhoq vae da'li kaol zholgae hhei. 30 Haelnaeq naeqmaemyel cholyaeq yoqhhaeq tyuqvae keellael, kaol yoqhhaeteel lye keeldilhael, mabyeqhael, aeqkeel aqlaq maq dyeq hael, naeqboqboq e yaqbahael, kaol baeqjyelboq e cholnaelhael sheeq hhei, kaol yoqhhaeq e aeqkeel dongqpyeq'ae sheeq deelhhei lael biq, kaol yoqhhaeq lye yoqhhaeteel yaol zonglmeeq biq vae. 31 Cholyaeqhael laoq naeqboqboq e yaqbahael saeziq gee kiq lael, aeqkeel aqlaq maq dyeq hael meeqyil biq, keeldilhael gaelmae deel yilkiq, kaol mabyeqhael mol congl lael vae lye mol hhei biq, tyulkaol, yoqhhaeteel gaqmaq zhee zuq gil biq'ae, kaol rongqyaol mael Yiqsellyel e Momil'ae biq biq.
Yesu lye cholyaeq yuqca (4000) hhaeq yaol bi zaeqdye e shenqjiq
32 Yesu laqcaqhael yaol gul laeq, gee: "Ngael cholyaeq xi qiq miq'ae hhaoqsaeqsaeq yae, yoqhhaeteel ngaeq nyegael saeqvae suq nao baelzhol aeqwae, zaeq e qiqgiq maqza'ae. Ngael yoqhhaeteel'ae myeq ga'lal aeqmyel maeq bi hoqyil goq yae, aeqgael yoqhhaeteel gaelmae ae'lye myeqleeq hhei maeqhe." 33 Laqcaqhael yoqhhaeq'ae gee biq: "Ngaeteel laoq saeqvae byelcongq ae'lye xuldyulmyel cholyaeq'ae bi zaeqdye e aqba haeqvae lye bi lael laeq?" 34 Yesu yoqhhaeteel'ae gee biq: "Noteel'ae aqba hae'nae mael za maeq?" Yoqhhaeteel gee: "Siq mal za'ae, kaol ngaeqdyel dyelyaeq qiqniq yaeq za siq." 35 Yoqhhaeq cholyaeqhael'ae milcaeq vae zholgae hhei lye moqheilheil biq, 36 Aqba xi siq mal kaol ngaeqdyel qiqniq yaeq heil hhei, kaol Momil'ae meeqyaevae lye gee biq laol, heiqpa hhei, kaol laqcaqhael'ae heilmoq hhei biq; laqcaqhael lye cholyaeqhael'ae yol heilmoq hhei biq. 37 Yoqhhaeteel haetaeq eiq zaeq vae, kaol zaeqdye vae, heiqpa yo feiq maeq zaeq byel ongl hael heil'eeq hoq hhei, kaol guqlanq siq mal heilbong hhei wae. 38 Zaeq hael onglci'ae, cholhae aeqmae kaol yaeqguq maeq bael gee do myel, haqyoyaeq yuqca (4000) hhaeq zoq hhae. 39 Yesu cholyaeqhael yaol gulsae hoq hhei'laol, hoq mael'ae da'li vae, kaol Maqjadan milcaeq vae keellael.