Yesu lye cholyaeq yuqca (4000) hhaeq yaol bi zaeqdye e shenqjiq
8
Tyuqfu naohaeq'ae, cholyaeq qiq miq yol zhol'eeq deelhhei lael, yoqhhaeteel'ae qiqgiq zaeq e maqza. Yesu lye laqcaqhael yaol gul laeq kaol yoqhhaeteel'ae gee biq: 2 "Ngael cholyaeq xi qiq miq'ae hhaoqsaeqsaeq yae, yoqhhaeteel aedeeteel nyegael suq nao baelzhol wae, qiqgiq zaeq e maqza. 3 Cholyaeq xihael onglci e qiq miq laoq gaelmaolsae'lye milcaeq ae'lye lael hhae, ngael yoqhhaeteel'ae myeq ga'lal aeqmyel laoqhaol vae bi hoqyil kaollaoq, yoqhhaeteel gaelmae ae'lye myeqleeq hhei'ae." 4 Laqcaq geehoq biq: "Saeqvae laoq byelcongq'ae, haeqvae lye aqba saelpo laeq laeq, kaol cholyaeq xihael vae bi zaeqdye laeq?" 5 Yesu yoqhhaeteel'ae naelhaeq biq: "Noteel'ae aqba hae'nae mael za siq maeq?" Yoqhhaeteel gee: "Siq mal." 6 Tyulkaol, Yesu cholyaeqhael'ae milcaeq vae zholgae hhei lye moqheilheil gil biq, kaol aqba xi siq mal heilqei hheikaol, Momil'ae meeqyaevae lye gee biq laol heiqpa hhei, kaol laqcaq vae heilmoq hhei biq, kaol yoqhhaeteel'ae cholyaeqhael e yiqsiboq'ae baqdeel hhei lye gee biq; kaol laqcaqhael lye cholyaeqhael e yiqsiboq'ae baqdeel hhei biq vae. 7 Yoqhhaeteel'ae ngaeqdyel dyelyaeq qiqniq yaeq za siq, Yesu Momil'ae meeqyaevae lye gee biq laol, xihael eiq cholyaeqhael e yiqsiboq'ae baq deelhhei biq lye moqheilheil biq. 8 Cholyaeqhael zaeq gil vae, kaol zaeqdye vae. Heiqpa yo feiq maeq zaeq byel ongl hael yoqhhaeteel lye heil'eeq hoqlaeq, kaol guqlanq siq mal heil bong hhei vae. 9 Tyuqfu cholyaeq yuqca (4000) hhaeq zoqlal maoqmyel hhae. Yesu lye cholyaeqhael yaol lyeqsae hoq vae. 10 Kaol nae'naemyel laqcaqhael nyegael hoq mael'ae qiqgael da'li, kaol Dalmaqnuqta milcaeq vae keellael.Faqlilsail cholyaeqhael Yesu'ae shenqjiq zonglfu hhei laeq lye geezaeq biq
11 Faqlilsail cholyaeqhael duyi laol nae'naemyel Yesu nyegael geegae; yoqhhaeteel Yesu'ae shilfu maoqlye nyuq gil'ae, yoqhhaeq vae mqmae ae'lye lael e shenqjiq zonglfu hhei laeq lye geezaeq biq. 12 Yesu e yohael mael saeq'olheeq biq'ae, gee: "Aeqcheekaol yaeqmeel dyeqdeel e cholyaeqhael shenqjiq mol hhei kaolmaoqlaol maeq xiangxinl hhaemaeq? Ngael aeqdilmyel geegaeq gil laeqngeel, shenqjiq mael yaeqmeel dyeqdeel e cholyaeqhael'ae qiqzael eiq maeq bi mol vae!" 13 Tyulkaol, Yesu yoqhhaeteel zaellye deelsae hhei vae, hoq mael'ae da'li kaol yulboq'ae yil vae.
Faqlilsail cholyaeq'ae kaol Xi'lyul e paofenq mael'ae fu'qyedeelzaeq hhei maoqhhae
14 Laqcaqhael aqba heil yelbael biq hhae, hoq mael taq'ae aqba qiq ba maoqlaol dongqpyeq'ae qiqgiq maqza vae. 15 Yesu yoqhhaeteel'ae moqheilheil biq, gee: "Noteel aeqyae'lye kei maoqhhae, Faqlilsail cholyaeq kaol Xi'lyul e paofenq mael'ae fu'qyedeelzaeq hhei maoqhhae." 16 Laqcaqhael qiqhhaeq qiqhhaeq'ae geezil geezae gil, gee: "Xilmael laoq aedeeteel aqba maqza kaol vae laoq." 17 Yesu'ae loq li biq kaol gee: "Aeqcheekaol noteel aqba maqza xilmael qiqhhaeq qiqhhaeq'ae geezil geezae gil lilmaeq? Noteel maeq loq, maeq nyuqtong ongl gil laeq wae siq maeq? Noteel e neemae mael oheiq maeq pong hhei laoqmyel wae siq maeq? 18 Noteel ma'ne cuq feiq maeq mol congl, naeqbol cuq feiq maeq gaeq congl laeq hhaemaeq? Noteel maeq nyuqdeel laeq hhaemaeq? 19 Ngaeq lye aqba ngaeq mael heiqpa hheikaol ngaeqca (5000) hhaeq'ae heil biq kaol bi zaeq gil, noteel heiqpa yo feiq maeq zaeq byel ongl hael heil'eeq hoqlaeq mael, hae'nae guqlanq heilbong hhei gil lilmaeq?" Yoqhhaeteel gee: "Qyelniq guqlanq." 20 "Aqba tyu siq mal cholyaeq yuqca (4000) hhaeq'ae heil biq kaol bi zaeq gil, noteel heiqpa yo feiq maeq zaeq byel ongl hael heil'eeq hoqlaeq mael, hae'nae guqlanq heilbong hhei gil lilmaeq?" Yoqhhaeteel gee: "Siq guqlanq." 21 Yesu gee: "Noteel maeq nyuqtong ongl gil laeq wae siq maeq?"
Yesu lye Boqsaildal milmae nilmyel e mabyeq yaol zonglmeeq biq
22 Yoqhhaeteel Boqsaildal'ae keellael laol, cholyaeq lye Yesu tyuqvae mabyeq qiq hhaeq sheeqlaeq biq, Yesu vae yoqhhaeq'ae so hhei biq lye geezaeq biq. 23 Yesu mabyeq qiq hhaeq e aqlaq mael'ae ee hheikaol, pusiq e nildu'ae sheeq duyil, kaol yoqhhaeq e ma'ne mael'ae eelcael myecheeq da hhei biq, kaol aqlaq niqboq myel deiqtyeq deelhhei, kaol yoqhhaeq'ae naelhaeq biq: "Nol aeqchee mol aeqwae maeq?" 24 Yoqhhaeq holtaqboq'ae chifu da hhei'laol gee: "Ngael cholyaeq mol aeqwae, yoqhhaeteel aelbol laoqmyel deelpudeelda myel deel gil'ae." 25 Tyulkaol, Yesu aqlaq maellye yoqhhaeq e ma'ne mael'ae yol qiq pu deiq hhei biq, yoqhhaeq chifu tyeq li laol, yoqhhaeq meeqhoqlael biq vae, kaol aeqchee eiq fu loq ongl biq vae. 26 Yesu yoqhhaeq'ae laoqhaol vae hoqli lye gee biq, gee: "Xi qiq pusiq vae nol eiq haq do'li oq."
Biqdeq Yesu laoq Jidu'ae lye gee hhae
27 Yesu kaol laqcaqhael duyil, Kaiqsa'lilyal Fei'lilbiq dongqpyeq e pusiq vae yil. Gaelmae ae'lye laqcaqhael'ae naelhaeq biq, gee: "Cholyaeqhael ngael aeqsul'ae lye gee hhaemaeq?" 28 Yoqhhaeteel geehoq biq: "Qiq miq laoq shelxiqzongl e Yoqhanl'ae lye gee, qiq miq laoq Yiqlilyal'ae lye gee, qiq miq laoq xianzhihael onglci e qiq hhaeq'ae lye yol gee hhae." 29 Yesu yoqhhaeteel'ae naelhaeq biq: "Aelmaol, noteel gee ngael aeqsul maeq?" Biqdeq geehoq biq: "Nol laoq Jidu'ae." 30 Yesu yoqhhaeteel'ae yoqhhaeq aeqsul'ae lye mael qiq hhaeq vae eiq haeq geegaeq duyil lye moqheilheil gil biq."
Yesu yoqhhaeq sil kaol dyeqhoqlal mael laefuq fuqli qiq pu geedu
31 Tyulkaol, yoqhhaeq zhoqmyel yoqhhaeteel'ae geemyeq biq, gee: "Cholyaeq Yaqyo'ae aeqdilmyel haeldyul dyulmae hhae bi zonglkyuq hhae, zhangqlaoqhael, jilsizhangqhael kaol Momil e saeziq mael loq e laqkiqhael lye maq mul lye bi zongl, kaol bi xyeq hhei, suq nao laol dyeqhoqlal maoqlye hhae." 32 Yesu loqlilshe'lye xilmael geedu gil biq, Biqdeq laoq Yesu yaol qiqjyelboq'ae eetael yil kaol vuq biq. 33 Yesu zipol hoqlal kaol laqcaqhael'ae chifu deelhhei, kaol Biqdeq'ae vuq biq, gee: "Saqdanl, ngaeq e aeqnaol'ae zitael yil! Nol nyuq mael laoq Momil nyuq laoqmyel maeqngeel'ae, cholyaeq nyuq laoqmyel kaol'ae." 34 Tyulkaol, yoqhhaeq lye cholyaeqhael kaol laqcaqhael gul laeq, kaol yoqhhaeteel'ae gee biq: "Cholyaeq qiq hhaeq ngaeq'ae cho'lyeq maoqlye kaollaoq, aeqyoyoq yaol beiqgae hhei, kaol aeqyoyoq e shiqziljal mael pi hheikaol ngaeq'ae cho'lyeq maoqhhae. 35 Aeqsul aeqyoq e aeqyil mael jiulzaeq maoqlye nyuq kaollaoq, aeqyoq e aeqyil mael maqza ngeelvae; ngeelfeiq, ngael kaol ngaeq e fuqyin gae'lye aeqyil mael maqza vae kaollaoq, aeqdilmyel aeqyoq e aeqyil mael hha dyeqdeel'ae. 36 Cholyaeq qiq hhaeq milcaeq taq e halzahael gilzuqmyel zonglzaeq laeq ongl feiq, aeqyoq e aeqyil mael bael zongldozaq hhei kaollaoq, aeqchee meeqyo'lael kiq maeq? 37 Cholyaeq aeqchee maellye aeqyoq e aeqyil mael pael hoqlaeq laeq? 38 Yaeqmeel dyeqdeel e cholyaeqhael haeqmiq haqyo zhol e cholyaeq ochoq nyegael neemaeba e golsiq zonglpizaeq. Aeqsul ngael kaol ngaeq e saeziq mael miqyil daoqcheeq yae lye kei kaollaoq, Cholyaeq Yaqyo laoq aeqyoq e aeqdae e rongqyaol onglci'ae lye, senljyeq mqmae yosonglhael nyegael qiqgael lael fu, yoqhhaeq vae eiq miqyil daoqcheeq e cholyaeq'ae lye fu biq maoq."