Cholyaeq Yesu'ae shenqjiq zonglfu hhei laeq lye geezaeq biq
16
Faqlilsail cholyaeq kaol Saqdugai cholyaeq Yesu'ae shilfu lael biq, yoqhhaeq'ae mqmae ae'lye lael e shenqjiq qiq mal yoqhhaeteel'ae zonglfu hhei laeq lye geezaeq biq. 2 Yesu yoqhhaeteel'ae geehoq biq: "Kiqsulkiqxeiq fu mqnyelnyel laol, noteel gee: 'Naeshoq aeqcael cuq'ae.' 3 Mqshoq mqnyel mqna myel laol, noteel gee: 'Yaeqnao zaeqxil bo kaol vuq'yel'yel maoqlye hhae.' Noteel laoq mqmae'ae chifu hhei'laol yaeqnao naeshoq haelmillye hhae lye fudu ongl'ae, ngeelfeiq, aeqcheekaol yaeqmeel e hoqlaq e shenqjiq laoq maeq fudu ongl gil laq hhaemaeq. 4 Yaeqmeel dyeqdeel e cholyaeqhael laoq, duqlaq kaol xinqlalmyel hhae. Yaeqmeel dyeqdeel e cholyaeqhael shenqjiq mael'ae saelpo, ngeelfeiq, Yonaq e shenqjiq mael maoqlaol, yoqhhaeteel'ae shenqjiq maeq bi fu vae." Tyulkaol, Yesu yoqhhaeteel zaellye deelsae hheikaol deel vae.Faqlilsail cholyaeq kaol Saqdugai cholyaeq'ae fu'qyedeelzaeq hhei
5 Laqcaqhael yulboq'ae guq keelli, aqba heil yelbael biq hhae. 6 Yesu yoqhhaeteel'ae gee biq: "Noteel aeqyae'lye kei maoqhhae, Faqlilsail cholyaeq kaol Saqdugai cholyaeq e paofenq mael'ae fu'qyedeelzaeq hhei maoqhhae." 7 Laqcaqhael qiqhhaeq qiqhhaeq'ae geezil geezae gil: "Xilmael laoq aedeeteel aqba maeq heil gae'lye kaol vae laoq." 8 Yesu loq hhei biq laol, gee: "Noteel xinlxin aelheel maoq maqza e cholyaeqhael o, aeqcheekaol aqba maqza gae'lye qiqhhaeq qiqhhaeq'ae geezil geezae gil lilmaeq? 9 Noteel maeq loq gil laeq wae siq maeq? Aqba ngaeq mael cholyaeq ngaeqca (5000) hhaeq'ae byel hhei biq, heiqpa yo feiq maeq zaeq byel ongl hael noteel lye hae'nae guqlanq heil'eeq hoq hhei lil lye maeq nyuqdeel gil laeq wae maeq? 10 Aqba siq mal lye yuqca (4000) hhaeq'ae byel hhei biq, heiqpa yo feiq maeq zaeq byel ongl hael noteel lye hae'nae guqlanq heil'eeq hoq hhei lil lye eiq maeq nyuqdeel gil laeq wae maeq? 11 Ngael noteel'ae 'Faqlilsail cholyaeq kaol Saqdugai cholyaeq e paofenq mael'ae fu'qyedeelzaeq hhei maoqhhae' lye gee biq, saeziq xilmael laoq aqba mael'ae gee maeqngeel yil, noteel haelmillyekaol maeq loq gil laeq hhaemaeq?" 12 Laqcaqhael caiq loq lil biq wae siq, yoqhhaeq gee mael laoq aqba e paofenq mael'ae fu'qyedeelzaeq hhei lye maeqngeel'ae, Faqlilsail cholyaeq kaol Saqdugai cholyaeq e geemyeq mael'ae fu'qyedeelzaeq hhei lye hhae.
Biqdeq Yesu laoq Jidu'ae lye gee
13 Yesu Kaiqsa'lilyal Fei'lilbiq e milcaeq vae keellael, kaol laqcaqhael'ae naelhaeq biq: "Cholyaeqhael Cholyaeq Yaqyo laoq aeqsul'ae lye gee hhaemaeq?" 14 Yoqhhaeteel gee: "Qiq miq laoq shelxiqzongl e Yoqhanl'ae lye gee, qiq miq laoq Yiqlilyal'ae lye gee hhae; qiq miq laoq Ye'lilmiq, paelsilmyel xianzhihael onglci e qiq hhaeq'ae lye eiq gee hhae." 15 Yesu yoqhhaeteel'ae naelhaeq biq: "Aelmaol, noteel gee ngael laoq aeqsul maeq?" 16 Ximenq Biqdeq geehoq biq: "Nol laoq Jidu'ae, haeqfu eiq dyeqdeel e Momil e Yaqyo'ae." 17 Yesu yoqhhaeq'ae geehoq biq: "Yonaq e yaqyo Ximenq, nol laoq geeqlongq meeq hhae! Xilmael laoq ruqtiq hhae lye e cholyaeq lye noq'ae qiqshil hhei biq maeqngeel'ae, ngaeq e mqmae vae zhol e aeqdae lye noq'ae qiqshil hhei biq kaol'ae. 18 Ngael noq'ae zail gee laeqngeel siq, nol laoq Biqdeq'ae, ngael ngaeq e jiaolhuil mael haqlo loongl xilmael taq'ae cutul hhei maoqlye lil, mil'oq e laqtaq mael xilmael'ae maeq jyeqli ongl'ae. 19 Ngael Mqmae Goqja e haedulm mael noq'ae heilmoq hhei laeqngeel, noq lye milcaeq vae hal kaltoqhael, mqmae vae eiq kaltoq biq maoq; noq lye milcaeq vae hael keelpyelhael, mqmae vae eiq keelpyel biq maoq." 20 Tyuqfu, Yesu laqcaqhael'ae yoqhhaeq laoq Jidu'ae lye qiq hhaeq eiq haeq geedu yil lye moqheilheil biq.
Yesu yoqhhaeq sil kaol dyeqhoqlal mael laefuq fuqli qiq pu geedu
21 Tyuq ae'lye aeqnaol, Yesu laqcaqhael'ae yoqhhaeq aeqdilmyel Ye'lulsa'lenq vae hha da'li, kaol zhangqlaoqhael, jilsizhangqhael, kaol Momil e saeziq mael loq e laqkiqhael lye zhee hhae bi zonglkyuq, kaol bi xyeq hhei, dilsan tian laoq dyeqhoqlal maoqlye lil lye caiq gee'loq hhei biq wae siq. 22 Biqdeq yoqhhaeq'ae eetyeq deelhhei, kaol yoqhhaeq'ae gaezaeq biq, gee: "Hhaoqsongl o, aeqdilmyel xilnye maeq zongl hhaeq'ae! Silqinq xilmael aeqdilmyel noq'ae maeq bi yo'lael hhaeq'ae." 23 Yesu zipol hoqlael kaol Biqdeq'ae gee biq: "Saqdanl, ngaeq e aeqnaolboq'ae zitael yil! Nol laoq ngaeq e aeqkeel'ae pyetoq e haqlo'ae, nol nyuq mael laoq Momil nyuq laoqmyel maeqngeel'ae, cholyaeq nyuq laoqmyel kaol'ae." 24 Tyulkaol, Yesu laqcaqhael'ae gee biq: "Cholyaeq qiq hhaeq ngaeq'ae cho'lyeq maoqlye kaollaoq, aeqyoyoq yaol beiqgae hhei, kaol aeqyoyoq e shiqziljal mael pi hheikaol ngaeq'ae cho'lyeq maoqhhae. 25 Aeqsul aeqyoq e aeqyil mael jiulzaeq maoqlye nyuq kaollaoq, aeqyoq e aeqyil mael maqza ngeelvae; ngeelfeiq, ngaeq gae'lye aeqyil mael maqza vae kaollaoq, aeqdilmyel aeqyoq e aeqyil mael hha dyeqdeel kaol'ae. 26 Cholyaeq qiq hhaeq milcaeq taq e halzahael gilzuqmyel zonglzaeq laeq ongl feiq, aeqyoq e aeqyil mael bael zongldozaq hhei kaollaoq, aeqchee meeqyo'lael kiq maeq? Cholyaeq aeqchee maellye aeqyoq e aeqyil mael pael hoqlaeq laeq? 27 Cholyaeq Yaqyo yoqhhaeq e aeqdae e rongqyaol onglci'ae lye, yoqhhaeq e mqmae yosonglhael nyegael qiqgael yi maoqlye hhae, tyuqfu, yoqhhaeq laoq haetaeq e xinqweiq mael haelmillye laol, haetaeq'ae haelmillye zonglhoq biq maoqlye hhae. 28 Ngael aeqdilmyel noteel'ae gee laeqngeel, saeqvae haoqtul deelhhei hael, qiq miq laoq sil mael maeq yo'li biq fu ae'lye, Cholyaeq Yaqyo laoq aeqyoq e goqja vae keellael mael hhae mol'ae."