Faqlilsail cholyaeq'ae fu'qyedeelzaeq hhei maoqhhae
12
Tyuqfu, mee'nae tongl zoqlal maoqmyel cholyaeq qiqgael zhol'eeq deelhhei hhae, qiq hhaeq e aeqkeel mael qiq hhaeq'ae nuq da'li aeqmyel hhae. Yesu zhoqmyel fu ae'lye laqcaqhael'ae gee biq: "Noteel Faqlilsail cholyaeqhael e paofenq mael'ae fu'qyedeelzaeq hhei maoqhhae, paofenq mael laoq, yoqhhaeteel e gee kaol zongl mael maeq qiqsheel mael ngeelvae. 2 Zonglhhaq deelhhei e silqinq mael eiq bi molzaeq hhei ngeelvae, ochoq'ae maeq bi loq lye silqinq mael eiq bi loqzaeq hhei ngeelvae. 3 Tyulkaol, noteel ochoq maeq loq myel vae lye haelgee mael, aeqsul eiq loq myel vae lye bi gaeqzaeq hhei ngeelvae, nulyaeq ae'lye naeqbol tongqmaoq li aeqmyel haelgee mael, laoqhaol honglbyu ae'lye bi gee duyil ngeelvae.Cholyaeq laoq aeqsul'ae gu maoq hhaemaeq
4 "Yelchoqhael o, ngael noteel'ae geegaeq laeqngeel, aeqhhaol xyeqsil ongl maoqlaol, baeqjyelboq'ae qiqgiq maeq zongl laelkiq e cholyaeqhael'ae maq gu gil kael. 5 Ngael noteel'ae aeqsul'ae gu maoqhhae lye tyuqmyeq gil laeqngeel: Noteel e aeqhhaol mael xyeqsil aeqnaol'ae, cholyaeq yaol daq'oqlaqmae vae beiqdo e laqtaq za e cholyaeq'ae gu maoqhhae. Ngeel'ae, ngael noteel'ae geegaeq laeqngeel, aeqdilmyel xitaeq'ae gu maoqhhae. 6 Nulzael ngaeq yaeq, geeqsheel dyuqbaq niq mal ongqzaeq maeqngeel maeq? Ngeelfeiq, Momil e yiqsi'ae laoq, qiq yaeq eiq maeq yelbael'ae. 7 Noteel e qyelkeel mael hae qiq ke eiq suqda yo wae. Maq gu gil kael, noteel laoq haeldyul dyulmae nulzael taq'ae hhael pyuq'ae.
Cholyaeq yiqsiboq'ae Hhaoqsongl yaol loq lil lye gee
8 "Ngael noteel'ae geegaeq laeqngeel, aeqsul cholyaeqhael e yiqsiboq ae'lye ngaeq yaol loq lil lye gee laol, Cholyaeq Yaqyo eiq Momil e mqmae yosongl yiqsiboq ae'lye yoqhhaeq yaol loq lil lye gee laeq'ae. 9 Cholyaeqhael e yiqsiboq ae'lye ngaeq yaol maeq loq yae lye gee kaollaoq, Momil e mqmae yosongl yiqsiboq ae'lye eiq yoqhhaeq yaol maeq loq yae lye hhae bi gee hhei ngeelvae. 10 Cholyaeq Yaqyo'ae saeziq maellye geekyuq kaollaoq, hhae bi shelmianq siq. Ngeelfeiq, senllinq mael'ae xyelduq laol, qiqzael eiq maeq hhae bi shelmianq'ae. 11 Cholyaeq lye noteel yaol huiltangq vae ee'li, kaol zhiqmoq yoheeq kaol laqtaq za e cholyaeqhael e yiqsiboq'ae ee'li laeq fu, noteel haelmillye geehoq maoqlye, aeqchee saeziq gee maoqlye maeq nyuq gil kael. 12 Tyuqfu, senllinq mael noteel'ae aeqchee saeziq gee maoqhhae lye geemyeq laeq'ae."
Yaeqzhoqzhoq e yoha hamae e dullaelmyel guqjin
13 Cholyaeqhael onglci qiq hhaeq Yesu'ae gee biq: "Laoqsi, ngaeq e algo'ae ngaeq nyegael ssuqhaoq byelzaeq lye moqheil bael heil hhei biq." 14 Yesu gee: "Yelchoq, aeqsul lye ngaeq yaol noteel e shenqpanl e zhiqmoq kaol noteel'ae ssuqhaoq bael byel biq e cholyaeq bi geiq laq hhaemaeq?" 15 Tyulkaol, yoqhhaeq cholyaeqhael'ae gee biq: "Cholyaeq qiq hhaeq e aeqyil mael ssuqhaoq'ae duqgongqgongqlye zacongl maq zacongl maellye maeq gee lael'ae. Tyulkaol, noteel aeqyae'lye kei maoqhhae, kaol neemaecuqm e cholyaeq haq peqyil." 16 Yesu yoqhhaeteel'ae dullaelmyel guqjin qiq mal lye gee gil biq, gee: "Yoha hamae qiq hhaeq e haeldye ae'lye zaelsiq duqgongqgongqlye heillezaq laq. 17 Yoqhhaeq e neemae onglci'ae nyuqzaeq, gee: 'Ngael haelmillye zongl laeq? Ngaeq e zaelsiqhael maq baq do dyel yaevae!' 18 Yol gee: 'Ngael xilnye zongl maoq: Ngael zaelsiq baqdeelzaeq e laoqhaolhael diqba hhei, kaol hhael heeq myel cu du beq hhei maoq, tyulnye laol, zaelsiqhael kaol jadanglhael gilzuqmyel tyuqvae baqdeel li maoq, 19 Aeqnaol, ngael ngaeq e yohael'ae gee biq: Yohael o! Noq'ae jadangl zhee za shevae, hae'nae hoq eiq hhamul shevae, hhaol gae'lael aeqmyel zaeq dol nyelhhae aeqkaovae!' 20 Ngeelfeiq, Momil yoqhhaeq'ae gee biq: 'Qiqgiq maeq loq e cholyaeq o! Yaeqmil noq e yohael mael heil hoqli maoq, nol noq'ae paeqgaelsael meeq deelzaeq hhei mael aeqsul'ae heil biq maoq maeq?' 21 Aeqyoyoq'ae dyuqbaq kaol moqgoq heil'eeq deelzaeq e qiq hhaeq eiq xilnye ngeelvae, yoqhhaeq laoq Momil e yiqsi'ae zacongl e cholyaeq maeqngeel'ae."
Qiqgiq eiq maq zoqgiq kael
22 Yesu laqcaqhael'ae yol gee biq: "Ngael noteel'ae geegaeq laeqngeel, aeqyil gae'lye aeqchee zaeq maoqlye haq zoqgiq, aeqhhaol gae'lye aeqchee dum maoqlye eiq haq zoqgiq. 23 Aeqyil laoq zaeqzael taq'ae hhal mulyo'ae, aeqhhaol laoq aelhongq taq'ae hhal mulyo'ae. 24 Noteel ha'na mael'ae nyuq fufu gil: "Yoqhhaeteel ael'yuq maeq xeiq kaol zaelsiq maeq heille, zaelsiq baqdeelzaeq e laoqhaol kaol pyuqtul eiq maqza'ae, ngeelfeiq, Momil yoqhhaeteel'ae cudyeq biq. Noteel'ae laoq nyeq'ei maeq gee kael vae! Noteel laoq haeqzilhael taq'ae hhael pyuq'ae!" 25 Noteel onglci'ae aeqsul zoqgiq ae'lye aeqyoq e aeqyil mael aelheel hhael bi maol laelkiq maeq? 26 Noteel mildi'lye xilnye silqinq mael eiq maeq zonglkeel ongl myel, haelmillyekaol baeqjyelboq mael zoqgiq laeq? 27 Byelcongq e eilya haelmillye heeqda lal lye noteel loq lilmaeq? Yoqhhaeteel aeqhael maq mul, haeqpael eiq maq hhaq. Ngeelfeiq, ngael noteel'ae geegaeq laeqngeel, Zongmae Soqloqmenq zhee henqdada fu dum e poljye mael, alyi xihael onglci e qiq yi mael vae eiq maeq jyeqli ongl'ae. 28 Xinlxin aelheel maoq maqza e cholyaeqhael o! Haeldye e haelsaeq, yaeqnao za siq, naeshoq laoq yuqduq'ae beiqdo biq, ngeelfeiq, Momil yoqhhaeq'ae xilnye zonglzhi hhei biq; noteel'ae laoq nyeq'ei maeq gee kael vae. 29 Noteel aeqchee zaeq maoq, aeqchee dol maoqlye mael'ae haeq cho'lyeq gil, kaol haq zoqgiq gil. 30 Xihael laoq milcaeq taq'ae Momil'ae maeq xiangxinl e cholyaeqhael cho'lyeq hhae. Noteel e aeqdae noteel xihael mulyo biq'ae lye haeqfu'ae'lye loq wae. 31 Noteel Momil e Goqja mael saelpo maoqhhae, kaol moqgoq xihael gilzuqmyel noteel'ae biq biq maoqlye hhae. 32 Noteel e aeqdae laoq hhaol gae'lael aeqmyel noteel'ae Momil e Goqja vae bi zhol laeq, tyulkaol, noteel cholyaeq maeq naeq e qiq miq o, maq gu gil kael. 33 Noteel halngeiq kaol jadanglhael ongqzaeq maoqhhae, qiqgiq maq zacongl e cholyaeq'ae heilmoq hhei biq. Xilnye kaollaoq, noteel maq mul byel ongl myel e pyuqjyeqjyeq e moqgoq mael mqmae taq'ae heil'eeq deelhhei vae. Mqmae taq e pyuqjyeqjyeq e moqgoq heil dozaq e palbye mael qiqzael eiq maq gazi yil kiq'ae. Tyuqvae, lolbiq maeq niqli ongl, kaol aeqbyuq maeq zaeq li kiq'ae. 34 Noteel e pyuqjyeqjyeq e moqgoq mael haeqvae za laol, noteel e neemae mael eiq tyuqvae za kaol'ae.
Yuqnyuqgeel e yaqhacheqzaq e cholyaeq
35 "Noteel haeqpi paqda hhei, aeqdael doqhoq mael haeqfu eiq bi doqdeel maoqhhae, 36 Aeqyoq e hhaoqsongl yulyaeq mulzaeq myel ae'lye hoqlal biq lye doq deelhhei laoqmyel hhae. Hhaoqsongl hoqlal laol oheiq mael'ae cheq fu, nae'naemyel yoqhhaeq'ae oheiq pong yil biq maoqhhae. 37 Hhaoqsongl hoq keellael fu, yaqhacheqzaq e cholyaeqhael yuqnyuqgeellye zhol e mol hhei biq kaollaoq, yoqhhaeteel laoq geeqlongq meeq vae. Ngael aeqdilmyel noteel'ae geegaeq laeqngeel, tyuqfu hhaoqsongl laoq haeqpi paq hheikaol, zhoqmyel yoqhhaeteel'ae aelhoq zaeq lye zhaofu biq, deel niqli kaol yoqhhaeteel'ae fuqsil biq hhae. 38 Hhaoqsongl sul'ongl vae hoqlal maeqhe, paelsilmyel baezulbaegeq fu hoqlal maeqhe, yaqhacheqzaq e cholyaeqhael xilnye zongl she lye mol hhei biq, kaol yoqhhaeteel laoq geeqlongq meeq vae. 39 Noteel aeqsul eiq loq maoqhhae, laoqhaol e hhaoqsongl lolbiq haeqfu lael lye loq kaollaoq, yoqhhaeq e laoqhaol mael'ae maeq bi duqbongq do'laq'ae. 40 Noteel haeqfu eiq laefuqmyel paeqgaelsael meeq deelhhei maoqhhae, Cholyaeq Yaqyo noteel maeq nyuqkeel myel fu lael maoqlye kaol'ae."
41 Biqdeq gee: "Hhaoqsongl o, nol dullaelmyel guqjin xilmael ngaeteel'ae gee lilmaeq, paelsilmyel cholyaeqhael'ae gee biq lilmaeq?" 42 Hhaoqsongl gee: "Neemae xyelpu maqpu kaol zhee geel e laoqhaol fu'qyezaq e cholyaeq, hhaoqsongl e laoqhaol vae yaqhacheqzaq e cholyaeqhael'ae bi guanqliq, kaol zaelsiq byelzaeq e naohaeq vae byel gil biq e qiq hhaeq laoq aeqsul maeq? 43 Hhaoqsongl keellael fu, yoqhhaeq xilnye zongl'ae lye mol hhei biq, tyutaeq laoq geeqlongq meeq vae. 44 Ngael aeqdilmyel noteel'ae geegaeq laeqngeel, hhaoqsongl lye aeqyoq e halngeiq kaol jadanglhael gilzuqmyel yoqhhaeq'ae bi guanqliq maoqlye hhae. 45 Ngeelfeiq, yaqhacheqzaq e cholyaeq tyutaeq neemae onglci'ae nyuq 'Ngaeq e hhaoqsongl yi'lo'lye maoq maeq lael'ae', kaol baeqjyelboq e yaqhacheqzaq e yaqyoyaeq'ae kaol yaqhacheqzaq e haeqmiyaeq'ae diq biq dyul maeqcilmyel, zaeq eiq zaeq, dol eiq dolbu myel zongl kaollaoq, 46 Yoqhhaeq maeq nyuqkeel kaol maeq loq e naohaeq'ae, yaqhacheqzaq e cholyaeq e hhaoqsongl hoq keellael vae, kaol yoqhhaeq yaol niq pa eepa biq, yoqhhaeq yaol maeq xiangxinl e cholyaeqhael zael'ae bi beiqdo hhei ngeelvae. 47 Yaqhacheqzaq e cholyaeq qiq hhaeq hhaoqsongl aeqchee lye nyuq lye loq feiq, laefuqmyel paeqgael maeq sael meeq deelhhei, kaol hhaoqsongl moqheilheil laoqmyel maeq zongl, kaol nyeq'ei hhae bi tyel ngeelvae. 48 Ngeelfeiq, hhae bi tyel e silqinq zongl yae vae lye maeq loq biq e cholyaeq'ae laoq, haeldyulmyel maeq hhae bi tyel'ae. Aeqsul'ae haelnaeqmyel heil biq laol, aeqsul ae'lye haelnaeqmyel heilhoqlaeq maoq, aeqsul'ae heildeel hhei yil biq laol, aeqsul ae'lye saelzaeq hoqlaeq maoq.
Cholyaeqhael aeqgael zonglgae tullaeq
49 "Ngael keellael mael laoq aeqzaeq doq mael milcaeq vae beiq deelhhei maoqlye lil, ngael aeqzaeq mael doq tullaeq vae lye zhee mol goq yaeq. 50 Ngaeq'ae ciq e gui'liq qiq mal bi zongl maoqlye oqyilsiq, zonglbyel laefuq'ae ngael zhee nyuqsaeq yae! 51 Noteel laoq ngael lael mael laoq, milcaeq taq'ae bi hoqpinq maoqlye hhae lye kei gil laeq hhaemaeq? Maeqngeel'ae! Ngael noteel'ae geegaeq laeqngeel, bi zonglgae tullaeq maoqlye lil. 52 Saeq ae'lye aeqnaol laoq, qiq haoq toq e cholyaeq ngaeq hhaeq laoq qiqboq'ae maeq pol, suq nulhhaeq niq nulhhaeq boq'ae maeq pol, niq nulhhaeq suq nulhhaeq boq'ae maeq pol. 53 Cholyaeqhael qiqhhaeq qiqhhaeq boq'ae maeq pol myel zongltul laeq:
Aeqdae yaqyo boq'ae maeq pol,
yaqyo aeqdae boq'ae maeq pol;
aeqmae yaeqmiq boq'ae maeq pol,
yaeqmiq aeqmae boq'ae maeq pol;
ssuqmae keeqmae boq'ae maeq pol,
keeqmae ssuqmae boq'ae maeq pol."
Shilgail haelmillye hhae lye fu du ongl maoqhhae
Tail 16: 2-3
54 Yesu cholyaeqhael'ae yol gee biq: "Noteel neelgae aelheiq boq'ae mqdul du'lal mol hhei'laol, gee: 'Vuq'yel yelmae yelgae yi goqbiq vae, aeqdilmyel xilnye hhae. 55 Nanqfang ae'lye zaeqxil bo tullaeq laol, gee: 'Hongl tullaeq goqbiq vae', aeqdilmyel eiq xilnye hhae. 56 Gee kaol zongl mael maeq qiqsheel e cholyaeq o! Noteel laoq haeqfu vuq'yel'yel paelsilmyel aeqcael cuq maoqlye hhae lye fu du hhei ongl'ae, aeqcheekaol yaeqmeel e shilgail mael maeq fu du ongl gil laeq hhaemaeq?
57 Noteel aeqyoyoq aeqcheekaol hoq maq hoq lye maeq panlduanl gil lilmaeq? 58 Nol noq'ae zhiqmoqkae laeq e cholyaeq nyegael zhiqmoq'ae mol yil kaol gaelmae deel siq fu, yoqhhaeq nyegael haelmillye maoqhoqli ongl maeqlye zongl maoqhhae, aeqgael yoqhhaeq lye noq yaol faqguan zael'ae eemoq li, faqguan lye noq yaol cholyaeq ee'longl e cholyaeq'ae sheeqmoq biq, cholyaeq ee'longl e cholyaeq lye noq yaol laoqgaiqkei laoqhaol vae ee'longl li laeqngeel. 59 Ngael noq'ae geegaeq laeqngeel, dyuqbaqhael gilzuqmyel maeq heilhoq byel biq kaollaoq, tyuqvae lye maq duyi ongl'ae."