Yesu laoq sholhaol mael aeqgael cheqba hhei'ae lye gee
24
Yesu sholhaol ae'lye duyi, kaol deelsae fu qiqlaq'ae, laqcaqhael laefuqboq'ae deel da laq, kaol cutul da hhei e sholhaol mael yoqhhaeq'ae tyuq fu hhei biq. 2 Yesu yoqhhaeteel'ae geehoq biq: "Noteel xihael gilzuqmyel mol gil maeqngeel yil maeq? Ngael aeqdilmyel noteel'ae geegaeq laeqngeel, aeqgael saeqvae laoq aeqdilmyel haqlo qiq siq holtaq'ae qiq siq maqza deel wae, hae qiq siq eiq cheqga hhei ngeelvae."Milcaeq e aeqnaol naolli qiq nao laefuq'ae peqlal maoqlye mael
3 Yesu Zhoqcae Geeqzhoq vae zhol deelhhei, laqcaq ochoq maeq bael gaeq myel vae lye yoqhhaeq'ae naelhaeq lael biq: "Ngaeteel'ae geedu laq, silqinq xihael haeqfu peqlal maoqlye hhaemaeq? Nol lael fu kaol shilgail e aeqnaol naolli fu, aeqchee jilhaol mol du'lal maoqlye hhaemaeq?" 4 Yesu yoqhhaeteel'ae geehoq biq: "Noteel aeqyae'lye kei maoqhhae, aeqgael cholyaeq noteel'ae zaqgiqgiq lal maeqhe. 5 Haelnaeqmyel cholyaeq ngaeq e cholmil maellye lael, 'ngael laoq Jidu lil' lye gee, kaol haelnaeqmyel cholyaeq yaol zaqgiq bi giqzaq maoqlye kaol'ae. 6 Noteel laoq daqzhangldiq kaol daqzhangldiq e yotyel gaeq maoqlye hhae. Ngeelfeiq, maq gu gil kael, silqinq xihael laoq aeqdilmyel peqlal maoqlye hhae, ngeelfeiq, milcaeq e jyeqjuq laoq maeq keellael siq kaol'ae. 7 Minqcuq qiq mal tullael kaol baeqjyelboq minqcuq'ae diq yil, goqja qiq mal tullael kaol baeqjyelboq e goqja vae diq yil, haeqvae eiq hoqlaq maeqmeeq qiqgiq zaeq eiq maqza kaol milhoho hhae. 8 Xihael laoq zai'nanl yo'lael e zhoqmyel fu'ae. 9 Tyuqfu, cholyaeq lye noteel yaol sheeqli kaol hhae bi zonglkyuq hhae, kaol noteel yaol eiq bi xyeq hhei; noteel laoq ngaeq e cholmil gae'lye eiq haelzhol e minqcuq lye neema hhae bi su zaq hhae. 10 Tyuqfu, haelnaeqmyel cholyaeq jye'leeq hhei, kaol qiqhhaeq qiqhhaeq'ae hail, qiqhhaeq qiqhhaeq'ae neemasu zaq; 11 Kaol jaq xianzhi haelnaeqmyel du'lal, kaol haelnaeqmyel cholyaeq yaol zaqgiq bi giqzaq hhei. 12 Lilfaq laoqmyel maeq zongl e silqinq nyeq'ei ta nyeq'ei hhael naeqlael, kaol haelnaeqmyel cholyaeq e neegaeqgaeq mael laefuq laoqmyel maeq naeq vae. 13 Ngeelfeiq, aeqnaol naolli'ae zhee zityeq gaeyil ongl e cholyaeqhael laoq hha deqjiul'ae. 14 Mqmae Goqja e fuqyin xilmael mqmae holhhaq vae haeqvae eiq geegaeq keelyil, kaol haelzhol e minqcuq'ae zoqzenlkei biq maoqlye hhae, kaol milcaeq taq e aeqnaol naolli qiq nao caiq keellael wae siq."
Zai'nanl nanlmae yo'lael e naohaeq
15 "Tyulkaol, noteel laoq Danlyiqliq xianzhi gee gol e 'hol lael aeqmyel zonglmye e qiqhhaeq' lye gul biq e tyutaeq laoq senljyeq milcaeq vae haoqtul deelhhei mol fu (Suqhhaq xilmael duq e cholyaeq aeqdilmyel loq maoqhhae), 16 Tyuqfu, Yoqtail vae zhol e cholyaeqhael laoq geeqzhoq vae ki da'li maoqhhae. 17 Tongqgee'ae zhol hael laoqhaol onglci'ae moqgoq heil li maoqlye haeq gaeyi. 18 Haeldye'ae zhol hael aelhongq haeq heil hoqli. 19 Tyuqfu naohaeq'ae, yaeqguqpi hhei hael kaol aeqchil bi dol hael zai'nanl za vae! 20 Noteel kisae fu, aqga baehae, paelsilmyel anxiqriq haeq bi puqlael lye geezaeq maoqhhae. 21 Tyuqfu naohaeq'ae zai'nanl nanlmae za hhae, mqdongq milbeibei fu ae'lye mael yaeqmeel keellye, xilnye zai'nanl maqza gol'ae, aeqgael eiq maqza kaol'ae. 22 Tyuqfu naohaeq mael zonglnul kaolmaoqlaol, ruqtiq za e cholyaeqhael qiq hhaeq eiq maeq hhae dyeqdeel'ae; ngeelfeiq, saelpodu hhei e cholyaeqhael gae'lye, naohaeq tyuhael zonglnul hhei hhae. 23 Tyuqfu, cholyaeq noteel'ae 'fu gil, Jidu saeqvae zhol hhae' paelsilmyel 'tyuqvae zhol hhae' lye gee laeq kaollaoq, noteel haeq xiangxinl gil. 24 Jaq Jidu kaol jaq xianzhi du'lal maoqlye hhae, kaol maeqdaeqhhaeq e shenqjiq kaol haeqheemyel e maeqdaeqhhaeq e silqinq zongl du hhei, hhaeq lil lye kaollaoq, saelpodu hhei e cholyaeqhael yaol eiq zaqgiq bi giq maoqlye hhae. 25 Naelhaeq gil, ngael noteel'ae laefuqmyel geegaeq biq wae. 26 Cholyaeq noteel'ae 'fu gil, Jidu diqsheelleeldye vae zhol hhae' lye gee laeq kaollaoq, noteel haq duyil gil; paelsilmyel 'fu gil, Jidu nulyaeq vae zhol hhae' lye gee laeq laol, noteel haeq xiangxinl gil. 27 Mqmiqmiq mael neeldu aelheiq ae'lye miq mael, neelgae aelheiq boq'ae mol keelyil laoqmyel, Cholyaeq Yaqyo gaeyi fu eiq xilnye hhae. 28 Sil e aeqhhaol haeqvae za laol, haeqjyelhael eiq tyuqvae beel'eeq deelhhei lael."
Cholyaeq Yaqyo mqdul nyegael qiqgael gaeyi maoqlye hhae
29 "Tyuqfu naohaeq e zai'nanl mael zhoq gol hhei'laol,
neelmae mael naheiqlye peqyil maoqlye hhae,
baehae mael aeqcael maeq mol du'lal kiq vae,
aeqgeelhael mqmae ae'lye leeqgae yi maoqlye hhae,
mqmae taq'ae hael gilzuqmyel ssu'ni beq lal maoqlye hhae.
30 Tyuqfu, Cholyaeq Yaqyo e jilhaol mael mqmae vae mol du'lal, milcaeq taq e minqcuqhael gilzuqmyel nyul gil maoqlye hhae. Yoqhhaeteel laoq onglzaeq kaol haeqheemyel rongqyaol za e Cholyaeq Yaqyo laoq, mqdul nyegael qiqgael gaeyi hhae mol'ae. 31 Yoqhhaeq mqmae yosonglhael yaol moqheilheil du hhei, kaol yotyel haeqheemyel dalhaol bi zhangq, kaol haeqvae lael'ee myel ae'lye, kaol mqmae e xiboq ae'lye mqmae e yulboq'ae keellye, yoqhhaeq lye saelpodu hhei e cholyaeqhael yaol qiqgael bi gul'eeq laeq."
Siqpyu'laq'oq e aelbol maellye yo'liq qiq mal xoqxiq
32 "Noteel laoq siqpyu'laq'oq e aelbol maellye dullaelmyel guqjin qiq mal xoqxiq hhei maoqhhae: Aelbol allaq mael naoqgaeqlye alpaqpaq du'lal fu, noteel yel'ongl baehae niqlael vae lye loq'ae. 33 Qiqsheel ngeelvae, noteel xihael gilzuqmyel mol hhei fu, naohaeq tyulmael niqlael wae, kaol oheiq vae keellael wae lye loq maoqhhae. 34 Ngael aeqdilmyel noteel'ae geegaeq gil laeqngeel, yaeqmeel dyeqdeel e cholyaeqhael dyeqdeel siq fu, xihael aeqdilmyel gilzuqmyel peqlal maoqlye hhae. 35 Mqmae milcaeq mael maqza myel peqyil maoqlye hhae, ngeelfeiq, ngaeq e saeziq mael laoq maq gabu yil kiq'ae."
Naohaeq tyulmael qiq hhaeq eiq maeq loq'ae
36 "Ngeelfeiq, naohaeq tyulmael, shiqshen tyulmael, qiq hhaeq eiq maeq loq'ae, mqmae e mqmae yosongl eiq maeq loq'ae, Yaqyo eiq maeq loq'ae, aeqdae loq dyul wae. 37 Noqyal e naohaeq vae haelmillye laol, Cholyaeq Yaqyo yi e naohaeq vae eiq haelmillye ngeelvae. 38 Haqmeq eeldeel deelmae laefuq e naohaeq tyuhael'ae, Noqyal hoq hoqmae vae do'li e tyuqfu qiq nao keellye, cholyaeq laefuq laoqmyel zaeq dol, haeqmiq sheeq, mul eiq mulzaeq. 39 Maeq nyuqkeel myel fu, haqmeq eeldeel deelmae lael vae, kaol yoqhhaeteel yaol pizaeq byel yil biq vae. Cholyaeq Yaqyo lael fu eiq xilnye hhae. 40 Tyuqfu, cholyaeq niq nulhhaeq haeldye vae zhol, qiq hhaeq yaol laoq sheeqli biq, qiq hhaeq yaol laoq beiqdeelsaeq biq ngeelvae. 41 Haeqmiyaeq niq nulhhaeq giho gi, qiq hhaeq yaol laoq sheeqli biq, qiq hhaeq yaol laoq beiqdeelsaeq biq ngeelvae. 42 Tyulkaol, noteel yuqnyuqgeellye ngeel maoqhhae, noteel e Hhaoqsongl haeqfu qiq nao keellael lye maeq loq kaol'ae. 43 Kaol noteel loq maoqhhae, qiq haoq toq e hhaoqsongl mqkiq'ae lolbiq haeqfu lael lye loq kaollaoq, yuqnyuqgeellye zhol, kaol lolbiq yaol laoqhaol mael'ae maeq bi duqbongq lael'ae. 44 Tyulkaol, noteel eiq paeqgaelsael meeq hhei maoqhhae, noteel maeq nyuqkeel myel fu, Cholyaeq Yaqyo lael maoqlye kaol'ae."
Neemae xyelpu maqpu kaol neemae xyelpupu cholyaeq
45 "Aelmaol, aeqsul laoq neemae xyelpu maqpu, geel eiq geel, hhaoqsongl yoqhhaeq'ae aeqyotoq e yaqhacheqzaq e cholyaeqhael'ae guanqliq, kaol naohaeq keellael laol yoqhhaeteel'ae zaelsiq byel biq lye moqheilheil biq e yaqhacheqzaq e cholyaeq maeq? 46 Hhaoqsongl keellael laol, yaqhacheqzaq e cholyaeq xilnye zongl mol hhei biq laol, yaqhacheqzaq e cholyaeq tyutaeq laoq geeqlongq meeq vae. 47 Ngael aeqdilmyel noteel'ae geegaeq gil laeqngeel, hhaoqsongl yoqhhaeq'ae halngeiq kaol jadangl guanqliq lye moqheilheil biq maoqlye hhae. 48 Duqlaq e yaqhacheqzaq e cholyaeq tyutaeq neemae onglci'ae xilnye nyuq kaollaoq: 'Ngaeq e hhaoqsongl aeqyae'lye maoq maeq lael'ae', 49 Kaol yoqhhaeq e yelchoq'ae diq biq, kaol zilbuhael nyegael hhaellaelmyel zaeq dol, 50 Maeq nyuqkeel myel e naohaeq'ae, kaol maeq loq myel fu, yaqhacheqzaq e cholyaeq tyutaeq e hhaoqsongl lael maoqlye hhae, 51 Kaol yoqhhaeq'ae gee kaol zongl mael maeq qiqsheel e cholyaeq'ae chenqfaq biq laoqmyel guaeq'ei chenqfaq biq maoqlye hhae, kaol yoqhhaeq tyuqvae nyul sil maoqmyel hhae nyul ngeelvae."