Yaeqmiq alsheq e vuqduq tongqchoq qyel hhaeq
25
"Tyuqfu, Mqmae Goqja laoq yaeqmiq alsheq e vuqduq tongqchoq qyel hhaeq aeqdael doqhoq baq hhei myel, yaqyo alsheq yaol sheeqcaq yil laoqmyel hhae. 2 Xihael onglci'ae ngaeq hhaeq laoq zhoq biq hhae, ngaeq hhaeq laoq geel hhae. 3 Zhoq biq hael laoq aeqdael doqhoq baq hhei feiq, zhoqcae cil maeq heil hhei hhae; 4 Geel hael laoq aeqdael doqhoq baq hhei, kaol zhoqcae cil xyedo hhei e moqgoq mael eiq heil hhei hhae. 5 Yaqyo alsheq haeldyul feiq maeq keellael, kaol yoqhhaeteel yuqxulngei gil biq, kaol yuqxul vae. 6 Sul'ongl'ae cholyaeq qiq hhaeq gul tullaeq: 'Fu gil, yaqyo alsheq lael vae, noteel duyi kaol yoqhhaeq'ae sheeqcaq yil biq.' 7 Yaeqmiq alsheq e vuqduq tongqchoq tyuhael gilzuqmyel nyuq lael, kaol yoqhhaeteel e aeqdael doqhoq e denxin mael tyuqda hheikaol hhael bi doq tullaeq. 8 Zhoq biq hael geel hael'ae gee biq: 'Ngaeteel e aeqdael doqhoq mael sil goqbiq vae, kaol noteel e zhoqcae cil mael ngaeteel'ae teel byel hhei laeq.' 9 Geel hael geehoq biq: 'Nol kaol ngael hhaellaelmyel mul kaollaoq maq mulloq maeqhe; noteel aeqyoyoq zhoqcae cil ongq myel vae vul yil gil.' 10 Yoqhhaeteel vul yil fu, yaqyo alsheq keellael vae. Paeqgaelsael meeq deelhhei e tyuhael laoq, yoqhhaeq nyegael do'li kaol yulyaeq bael mulzaeq li laol, oheiq mael piqtyeq vae. 11 Aeqnaol baeqjyelboq e yaeqmiq alsheq e vuqduq tongqchoqhael eiq lael vae, gee: 'Hhaoqsongl o, hhaoqsongl o, ngaeteel'ae oheiq pong hhei laeq!' 12 Ngeelfeiq, yoqhhaeq geehoq biq: 'Ngael aeqdilmyel noteel'ae geegaeq laeqngeel, ngael noteel yaol maeq siqcongl yae.' 13 Tyulkaol, noteel yuqnyuqgeellye ngeel maoqhhae, naohaeq tyulmael, shiqshen tyulmael, noteel maeq loq kaol'ae."Haetaeq'ae haeldyul onglzaeq laol haeldyul heil biq
14 "Mqmae Goqja laoq cholyaeq qiq hhaeq gaelmaolsae'lye hhae yil maoqlye laoqmyel hhae, kaol yoqhhaeq e yaqhacheqzaq e cholyaeqhael yaol gul laeq, kaol yoqhhaetoq e halza haelzholhael gilzuqmyel yoqhhaeteel'ae heilmoq hhei biq. 15 Yoqhhaeq yoqhhaeteel'ae haetaeq laoq haeldyul onglzaeq laol, dyuqbaq haeldyul heil biq: Qiq hhaeq vae ngaeqca (5000) heil hhei biq, qiq hhaeq vae niqca (2000) heil hhei biq, qiq hhaeq vae qiqca (1000) heil hhei biq laol, gaelmaolsae'lye vae yil vae. 16 Ngaeqca (5000) heil hhei e tyutaeq nae'naemyel heil hheikaol senyil mulzaeq yil vae, kaol tyulmael taq ae'lye ngaeqca (5000) zonglzaeq hhei vae. 17 Niqca (2000) heil hhei e tyutaeq eiq tyulmael taq ae'lye niqca (2000) zonglzaeq hhei vae. 18 Ngeelfeiq, qiqca (1000) heil hhei e tyutaeq laoq, milcaeq duqhongq hhei, kaol hhaoqsongl e dyuqbaq mael duq vuq vae. 19 Haelnaeq gol hhei'laol, yaqhacheqzaq e cholyaeq tyuhael e hhaoqsongl lael vae, kaol yoqhhaeteel'ae dyuqbaq saelhoq biq. 20 Ngaeqca (5000) heil hhei e tyutaeq lye baeqjyelboq e ngaeqca (5000) mael eiq heil laeq, gee: 'Hhaoqsongl o, noq lye ngaeq'ae ngaeqca (5000) heil hhei laeq. Fu hhei, ngaeq lye ngaeqca (5000) yol zonglzaeq hhei aeqwae.' 21 Hhaoqsongl gee: 'Meeq'ae, nol neemae meeq, neemae xyelpu maqpu e yaqhacheqzaq e cholyaeq, nol aeqdilmyel meelhee'lye silqinq mael'ae neemae xyelpu maqpu'ae, kaol ngael noq'ae haelnaeqmyel e silqinq bi guanqliq laeqngeel, do'lal kaol noq e hhaoqsongl nyegael qiqgael bael hhaol lael!' 22 Niqca (2000) heil hhei e tyutaeq eiq deelniq laeq, gee: 'Hhaoqsongl o, noq lye heil hhei laeq e niqca (2000). Fu hhei, ngaeq lye niqca (2000) yol zonglzaeq laeq aeqwae.' 23 Hhaoqsongl gee: 'Meeq'ae, nol neemae meeq, neemae xyelpu maqpu e yaqhacheqzaq e cholyaeq, nol aeqdilmyel meelhee'lye silqinq mael'ae neemae xyelpu maqpu'ae, kaol ngael noq'ae haelnaeqmyel e silqinq bi guanqliq laeqngeel, do'lal kaol noq e hhaoqsongl nyegael qiqgael bael hhaol lael!' 24 Qiqca (1000) heil hhei e tyutaeq eiq deelniq laeq, gee: 'Hhaoqsongl o, ngael laoq nol aeqlyeq maeq lyeq lael e cholyaeq'ae lye loq lil: Maeq kae hhei myel vae eiq yeqzaeq goq, maeq xeiq hhei myel vae eiq heillezaq goq, 25 Kaol ngael gu laq hhae, kaol noq e dyuqbaq qiqca (1000) mael milcaeq vae duq vuq yil aeqlil. Fu hhei, noq e dyuqbaq mael saeqvae za hhae.' 26 Yoqhhaeq e hhaoqsongl yoqhhaeq'ae geehoq biq: 'Nol duqlaq kaol qiqgiq maq mulzaeqnaol e yaqhacheqzaq e cholyaeq o, nol laoq ngael maeq kae hhei myel vae eiq yeqzaeq goq, maeq xeiq hhei myel vae eiq heillezaq goq'ae lye loq, 27 Nol ngaeq e dyuqbaq mael yinqhangq'ae heildeel yil laol, ngael hoqlal fu, aelyaeq aeqmae myel qiqgael hhae heilzaeqhoq laeq wae. 28 Kaol yoqhhaeq e xi qiqca (1000) mael diqkoq laeq, kaol qiqtongl (10000) za e tyutaeq'ae heilmoq hhei biq. 29 Za hael vae laoq yoqhhaeq'ae heil biq maoq siq, kaol yoqhhaeq'ae bi naeq du'lal; maqza hael vae laoq, yoqhhaeq'ae halzahael eiq diqkoq laeq maoq. 30 Qiqgiq maq mulyo e yaqhacheqzaq e cholyaeq xitaeq yaol nildu e nahongqlye vae beiqdeel yil biq, yoqhhaeq tyuqvae nyul sil maoqmyel hhae nyul wae.'"
Haelzhol minqcuq'ae shenqpanl maoqlye hhae
31 "Cholyaeq Yaqyo yoqhhaeq e rongqyaol onglci'ae lye, haelzhol e mqmae yosonglhael nyegael yi fu, yoqhhaeq e rongqyaol e duqtyel mael'ae zhol da hhei maoqlye hhae. 32 Haelzhol minqcuq yoqhhaeq e yiqsi'ae zhol'eeq deelhhei maoqlye hhae. Yoqhhaeq yoqhhaeteel yaol byelpa du hhei maoqlye hhae, aqciq hoqzaq e cholyaeq lye aeqyol kaol aqciq mael byelpa du hhei laoqmyel hhae, 33 Aeqyolhael yoqhhaeq e laqsseqboq'ae bi zhol, aqciqhael yoqhhaeq e laeqbaelboq'ae bi zhol. 34 Tyulkaol, zongmae yoqhhaeq e laqsseqboq hael'ae gee biq maoqlye hhae: 'Noteel ngaedae lye geeqlongq biq biq hael o, mqdongq milbeibei fu ae'lye noteel'ae paeqgaelsael meeq deelhhei biq e goqja mael mul gil oq. 35 Hhamul mael laoq xilnye kaol'ae: Ngael myeq fu, noteel ngaeq'ae bi zaeq laeq'ae, suq fu, noteel ngaeq'ae bi dol laeq'ae, ngael baeqjyelboq e milcaeq ae'lye lael fu, noteel ngaeq'ae bi baelzhol laeq'ae; 36 Ngael aeqhhaol nyelguqlye fu, noteel ngaeq'ae bi dum laeq'ae, ngaeq'ae nael laeq fu, noteel ngaeq'ae zhaofu laeq'ae, ngaeq'ae laoqgaiqkei laoqhaol vae koqlongl laeq fu, noteel ngaeq'ae fu lael laeq'ae.' 37 Gongyil e cholyaeq geehoq biq: 'Hhaoqsongl o! Ngaeteel haeqfu nol myeq biq mol hhei'laol noq'ae bi zaeq, nol suq biq mol hhei'laol noq'ae bi dol laeq? 38 Nol baeqjyelboq e milcaeq ae'lye lael mol fu, noq'ae bi baelzhol, paelsilmyel aeqhhaol nyelguqlye fu, noq'ae bi dum laeq? 39 Noq'ae nael biq haeqfu mol, paelsilmyel laoqgaiqkei laoqhaol vae zhol fu, noq'ae fu lael biq laeq?' 40 Zongmae yoqhhaeteel'ae geehoq biq: 'Ngael aeqdilmyel noteel'ae geegaeq laeqngeel, noteel silqinq xihael ngaeq e aqsseq aeqnilhael onglci'ae hhaelnil nilli e qiq hhaeq e aeqhhaol taq'ae zongl biq laol, ngaeq e aeqhhaol taq'ae zongl ngeelvae.'
41 "Zongmae laeqbaelboq hael'ae gee biq: 'Noteel doqchiq bi gee e cholyaeqhael o, ngaeq ae'lye deelsae hhei! Niqhaeq haeqmae'ae kaol yoqhhaeq e mqmae yosonglhael gae'lye paeqgaelsael meeq deelhhei biq e, qiqzael eiq maq myeyil kiq e aeqzaeq doq myel vae doyil! 42 Aeqzaeq doq myel vae hha doyil mael laoq xilnye kaol'ae: Ngael myeq fu, noteel ngaeq'ae maeq bi zaeq laeq; suq fu, noteel ngaeq'ae maeq bi dol laeq; 43 Ngael baeqjyelboq e milcaeq ae'lye lael fu, noteel ngaeq'ae maeq bi baelzhol laeq; ngael aeqhhaol nyelguqlye fu, noteel ngaeq'ae maeq bi dum laeq; ngaeq'ae nael laeq fu, kaol ngaeq'ae laoqgaiqkei laoqhaol vae koqlongl laeq fu, noteel ngaeq'ae maeq zhaofu laeq'ae.' 44 Tyuqfu, yoqhhaeteel eiq geehoq maoqlye hhae: 'Hhaoqsongl o, ngaeteel haeqfu nol myeq, suq biq, paelsilmyel baeqjyelboq e milcaeq ae'lye lael, paelsilmyel aeqhhaol nyelguqlye, paelsilmyel nael biq, paelsilmyel laoqgaiqkei laoqhaol vae koqlongl deelhhei mol, kaol noq'ae maeq zhaofu lael biq laeq?' 45 Tyuqfu, zongmae yoqhhaeteel'ae geehoq biq maoqlye hhae: 'Ngael aeqdilmyel noteel'ae geegaeq laeqngeel, noteel silqinq xihael ngaeq e aqsseq aeqnilhael onglci'ae hhaelnil nilli e qiq hhaeq e aeqhhaol taq'ae maeq zongl biq laol, ngaeq e aeqhhaol taq'ae maeq zongl ngeelvae.' 46 Cholyaeq xihael laoq haeqfu keellye zadeel e chenqfaq myel vae hha doyil hhae; gongyil e cholyaeq tyuhael laoq haeqfu eiq zadeel e aeqyil za myel vae hha doyil hhae."