Cholyaeqhael Yesu yaol xyeq maoqlye geedazaq gil
26
Yesu saeziq xihael gee byel hhei'laol, laqcaqhael'ae gee biq: 2 "Noteel loq'ae, qiqniq nao lye laol Yuq'yeqjyeq wae, Cholyaeq Yaqyo yaol yotyel maqdumyel ongqzaeq biq, kaol shiqziljal mael'ae diqcheeq biq maoqlye hhae." 3 Tyuqfu, jilsizhangqhael kaol cholyaeqhael e zhangqlaoqhael, Gaiyalfaq lye gul biq e daljilsi toq e dyekaeq vae zhol'eeq deelhhei gil. 4 Cholyaeqhael Yesu yaol haelmillye eetyeq hhei, kaol yoqhhaeq yaol xyeq biq maoqlye geedazaq gil hhae. 5 Ngeelfeiq, yoqhhaeteel gee: "Zaeqnao fu maeq hhaeq'ae, aeqgael cholyaeqhael aeqvuqlaelvuqmyel zongl tul gil laeq maeqhe."Hhaoqsongl'ae xianggao xyecheeq hhei biq
6 Yesu Boqdalniq pusiq e maqfeng naelgol nael biq e Ximenq toq'ae zhol hhae, 7 Haeqmiyaeq qiq hhaeq'ae yil e pinqpin qiq mal heil hhei hhae, onglci'ae laoq pyuqjyeqjyeq e xianggao deeq hhae, Yesu zhol deelhhei kaol aelhoq zaeq fu qiqlaq'ae, yoqhhaeq e vuqduq taq'ae xyecheeq da hhei biq. 8 Laqcaqhael mol hhei biq laol, teel eiq maeq hhaol biq'ae, gee: "Aeqcheekaol xilnye vae laeqdaeqmyel mul hhei hhaemaeq! 9 Xianggao xilmael dyuqbaq haelnaeqmyel ongqdu hhei, kaol saeqyaeqhael'ae heil biq kael'ae." 10 Yesu yoqhhaeteel e yilsi mael fudu hhei, kaol gee: "Aeqcheekaol haeqmiyaeq xitaeq'ae bi mulsaeq laeq? Yoqhhaeq ngaeq e aeqhhaol vae zongl mael laoq meeq e silqinq'ae. 11 Saeqyaeqhael duqlye noteel nyegael qiqgael zhol, ngeelfeiq, noteel laoq duqlye ngaeq nyegael qiqgael maeq hhae zhol kaol'ae. 12 Yoqhhaeq lye xianggao mael ngaeq e aeqhhaol taq'ae xyecheeq hhei laeq mael laoq, ngaeq yaol baqduqm e paeqgaelsael meeq hhae. 13 Ngael aeqdilmyel noteel'ae geegaeq laeqngeel, mqmae holhhaq vae, fuqyin xilmael haeqvae milcaeq vae geegaeq duyil kaol'eiq, haeqmiyaeq xitaeq haelzongl mael geegaeq duyil maoqlye hhae, xilnye zongl mael laoq, yoqhhaeq yaol nyuqdeel biq maoqlye hhae."
Yoqdal yotyel maqdumyel Yesu yaol ongqzaeq biq maoqlye hhae
14 Tyuqfu, shiqtuq qyelniq hhaeq onglci'ae Ja'lyul cholyaeq Yoqdal lye gul biq e qiq hhaeq zhol'ae, yoqhhaeq jilsizhangqhael yaol mol yil, 15 Gee: "Ngael yoqhhaeq yaol noteel'ae eemoq hhei laeqngeel, noteel ngaeq'ae dyuqbaq haeldyul heil laeqngeel maeq?" Yoqhhaeteel lye yoqhhaeq'ae pulziq suqqyel heilmoq hhei biq. 16 Tyuq ae'lye aeqnaol laoq, yoqhhaeq Yesu yaol yoqhhaeteel'ae eemoq biq mael haeqfu hhael zae'li kiq maeq lye saelpo hhae.
Yesu kaol laqcaqhael Yuq'yeqjyeq mael qiqgael zaeq gil hhae
17 Paofenq Maqzoq Zaeqnao e laefuq fuqli qiq nao, laqcaq Yesu'ae naelhaeq lael biq: "Nol ngaeteel yaol noq'ae Yuq'yeqjyeq e baqwanq zaeq mael, haeqvae paeqgaelsael meeq deelhhei lye nyuq lilmaeq?" 18 Yesu gee: "Noteel milmae heeqmyel vae do'li, kaol cholyaeq qiq hhaeq zael'ae li, kaol yoqhhaeq'ae gee biq: 'Laoqsi gee: Ngaeq e shiqshen keellael goqbiq vae, ngael kaol ngaeq e laqcaqhael notoq'ae Yuq'yeqjyeq gol maoq.'" 19 Laqcaqhael lye Yesu moqheilheil laoqmyel Yuq'yeqjyeq e baqwanq mael paeqgaelsael meeq deelhhei vae. 20 Mqkiq keellael laol, Yesu kaol shiqtuq qyelniq hhaeq aelhoq qiqgael zaeq gil hhae. 21 Yoqhhaeteel zaeq gil fu, Yesu gee: "Ngael aeqdilmyel noteel'ae geegaeq laeqngeel, noteel onglci'ae ngaeq yaol yotyel maqdumyel ongqzaeq maoqlye e qiq hhaeq zhol'ae." 22 Kaol yoqhhaeteel zhee nyuqsaeq gil biq'ae, qiqhhaeq qiqhhaeq lye yoqhhaeq'ae naelhaeq tullaeq biq: "Hhaoqsongl o, ngael maeqhael ngeel?" 23 Yesu geehoq gil biq: "Ngaeq nyegael panqpan mael'ae aqba qiqgael zanl zaeq e cholyaeq laoq, ngaeq yaol yotyel maqdumyel ongqzaeq maoqlye e qiq hhaeq ngeelvae. 24 Momil e Suqhhaq taq'ae yoqhhaeq'ae gee laoqmyel, Cholyaeq Yaqyo laoq deel maoqlye wae; ngeelfeiq, Cholyaeq Yaqyo yaol yotyel maqdumyel ongqzaeq e qiq hhaeq laoq zaihuol za vae! Cholyaeq tyutaeq laoq maq dyeqlal mael hhael shoq wae." 25 Yesu yaol yotyel maqdumyel ongqzaeq biq maoqlye e Yoqdal yoqhhaeq'ae geehoq biq: "Labiq, ngael maeqhael ngeel?" Yesu gee: "Nol aeqyoyoq gee vae."
Aeqnaol naolli e mqkiq e aelhoq
Keq 14:22-26; Lul 22:15-20; Linqqianq 11:23-25
26 Yoqhhaeteel zaeq fu, Yesu aqba mael heilqei hhei, kaol meeqyaevae lye heeldoq gee laol, heiqpa hheikaol laqcaqhael'ae heilmoq hhei biq, gee: "Noteel heil yil kaol zaeq gil. Xilmael laoq ngaeq e aeqhhaol'ae." 27 Yoqhhaeq beiziq mael yol heilqei hhei, meeqyaevae lye heeldoq gee laol, yoqhhaeteel'ae baqmoq hhei biq, gee: "Noteel xilmael dol gil, 28 Xilmael laoq ngael cholyaeqhael nyegael geemeeq deelhhei gae'lye yuldu hhei e siq ngeelvae, siq xilmael haelnaeqmyel cholyaeqhael gae'lye yuldu hhei lil, kaol yoqhhaeteel e golsiq mael shelmianq gil biq aeqwae. 29 Ngeelfeiq, ngael noteel'ae geegaeq laeqngeel, saeq ae'lye aeqnaol, ngael ngaedae e goqja vae noteel nyegael siqbaq zilbaeq zilsheq dol e naohaeq fu keellye, ngael siqbaq zilbaeq xilmael qiqzael eiq maeq dol vae." 30 Yoqhhaeteel shigo changl byel hhei'laol, duyi kaol Zhoqcae Geeqzhoq vae li gil vae.
Biqdeq Hhaoqsongl yaol maeq loq yae lye suq pu gee maoqlye hhae
31 Tyuqfu, Yesu yoqhhaeteel'ae gee biq: "Yaeqmil, noteel ngaeq gae'lye gilzuqmyel jye'leeq maoqlye hhae. Momil e Suqhhaq taq'ae xilnye cu deelhhei kaol'ae:
'Ngael aqciq hoqzaq e cholyaeq'ae diq biq laol,
aqciqhael kici byel maoqlye hhae.'
32 Ngeelfeiq, ngael dyeqhoqlal aeqnaol'ae, noteel e laefuqmyel Ja'lillil vae yil maoq." 33 Biqdeq yoqhhaeq'ae geehoq biq: "Haelzhol cholyaeqhael noq gae'lye jye'leeq hheikaol feiq, ngael aeqdilmyel maeq jye'leeq yil." 34 Yesu gee: "Ngael aeqdilmyel noq'ae geegaeq laeqngeel, yaeqmil haepyul maeq dyel lael laefuq'ae, nol ngaeq yaol maeq loq yae lye suq pu gee maoqlye hhae." 35 Biqdeq gee: "Ngael aeqdilmyel noq nyegael qiqgael hhae sil'ae lye kaol'eiq, aeqdilmyel noq yaol maeq loq yae lye maeq gee yil." Haelzhol e laqcaqhael eiq xilnye gee hhae.
Yesu Kelximaqniq vae heeldoq gee
36 Yesu kaol laqcaqhael Kelximaqniq lye gul e milcaeq qiqgael vae keellael. Yoqhhaeq yoqhhaeteel'ae gee biq: "Noteel saeqvae zhol deelhhei gil, ngael yulboq'ae heeldoq gee li maoq." 37 Tyulkaol, yoqhhaeq lye Biqdeq kaol Xibiqtail e yaqyo niq nulhhaeq yaol qiqgael bael sheeqyil. Yoqhhaeq neemae teel eiq maeq zholsael myel zongl tullaeq biq, zhee nyuqsaeq biq hhae, 38 Kaol yoqhhaeteel'ae gee biq: "Ngaeq e neemae zhee nyuqsaeq kaol sil lael maoqmyel oqyae vae; noteel saeqvae zhol gil, kaol ngaeq nyegael yuqnyuqgeellye ngeel maoqhhae." 39 Yoqhhaeq laefuqboq'ae teel deel du'li, kaol maduq mael milcaeq'ae tongqmaoq yil aeqmyel heeldoq gee: "Ngaeq e aeqdae o, hhaeq lil lye kaollaoq, beiziq xilmael ngaeq saeqvae lye heilsae yil laeq lye noq'ae geezaeq lil. Ngeelfeiq, ngael nyuq laoqmyel haeq bi ngeel, nol haelmillye nyuqtongq deelhhei laol haelmillye ngeel biq." 40 Yoqhhaeq laqcaqhael tyuqvae hoq keellael, yoqhhaeteel yuqxul deelhhei mol hhei biq, kaol Biqdeq'ae gee biq: "Noteel ngaeq nyegael yuqnyuqgeellye yiq gol xiaoqshiq eiq maeq zhol ongl gil laeq hhaemaeq? 41 Haeqfu qiqlaq eiq yuqnyuqgeellye heeldoq gee maoqhhae, aeqgael cheeqmu myel vae leeqdo gil laqngeel. Noteel e neemae mael laoq hhaeq'ae, ngeelfeiq, ruqtiq laoq ruanqroq biq hhae." 42 Yoqhhaeq dil'el cil heeldoq yol gee li: "Ngaeq e aeqdae o, nol beiziq xilmael ngaeq ae'lye maeq heilsae yil, ngael aeqdilmyel dol maoqhhae lye kaollaoq, noq e zhiqyil laoqmyel peqlal biq lye nyuqlil." 43 Yoqhhaeq yol lael, yoqhhaeteel yuqxul deelhhei mol hhei biq, yoqhhaeteel ma'ne mi'qye ga biq kaol'ae. 44 Yesu yoqhhaeteel ae'lye yol deelsae hhei, dilsan cil heeldoq gee li, gee saeziq mael laefuq laoqmyel hhae. 45 Aeqnaol, yoqhhaeq laqcaqhael tyuqvae keellael, kaol yoqhhaeteel'ae gee biq: "Noteel yaeqmeel keellye yuqxul kaol hhaeqnaeqnaeq gil oqyilsiq maeq? Fu hhei, shiqshen keellael vae, Cholyaeq Yaqyo yaol golsiq za e cholyaeq e aqlaq vae eemoq biq maoqlye hhae. 46 Tullael, aedeeteel deel gil o! Fu hhei, ngaeq yaol yotyel maqdumyel ongqzaeq e tyutaeq lael goqbiq vae."
Yesu yaol eetyeq biq
47 Yesu saeziq gee siq fu, shiqtuq qyelniq hhaeq onglci e Yoqdal lael vae, kaol haelnaeqmyel cholyaeq qiq miq haeqdul kaol maejyel baq hhei aeqmyel yoqhhaeq nyegael bael lael, cholyaeq xihael laoq jilsizhangqhael kaol cholyaeqhael e zhangqlaoqhael tyuqvae lye lael hhae. 48 Yesu yaol yotyel maqdumyel ongqzaeq biq e tyutaeq yoqhhaeteel'ae zonglmyeq hhei gil laeqngeel lye gee biq: "Ngael aeqsul'ae myeqchilnuq biq laol, aeqsul ngeelvae. Kaol noteel yoqhhaeq yaol eetyeq biq." 49 Yoqdal nae'naemyel deelniq laeq, kaol Yesu'ae "Labiq, noq'ae meeqlaeqmaeq" lye gee biq laol, yoqhhaeq'ae myeqchilnuq hhei biq. 50 Yesu yoqhhaeq'ae gee biq: "Yelchoq, nol haelzongl maoqlye silqinq mael zongl aeqkaovae." Tyulkaol, cholyaeq tyuhael da'lal, kaol Yesu yaol aqlaq maellye eetyeq biq. 51 Qiqlaqmyel, Yesu nyegael qiqgael bal zoq e cholyaeq qiq hhaeq aqlaq tyuqdu hheikaol maejyel eedu hhei, daljilsi e yaqhacheqzaq e cholyaeq'ae qiq pu de hhei biq, kaol yoqhhaeq e naeqbol qiqboq shega biq vae. 52 Yesu yoqhhaeq'ae gee biq: "Maejyel mael mabye mael'ae shiq dohoq hhei! Aeqsul maejyel ee'qei laol, maejyel holhhaqboq'ae hhae sil ngeelvae. 53 Nol laoq ngael ngaedae'ae qyelniq miqa maeqcilmyel e mqmae yosongl yaol, yaeqmeel moqheilheil du hhei laq lye maeq hhae geezaeq biq'ae lye kei laeq hhaemaeq? 54 Xilnye kaollaoq, Momil e Suqhhaq taq'ae peqlal maoqlye gee e silqinqhael, haelmillye bi peqlal laeq?" 55 Tyuqfu qiqlaq'ae, Yesu cholyaeqhael'ae gee biq: "Noteel maejyel kaol haeqdul baq hhei aeqmyel ngaeq'ae eetyeq gil laeq mael, lolbiq diqkoqzaeq e cholyaeq'ae eetyeq laoqmyel zongl laeq lilmaeq? Ngael naochomyel sholhaol vae zhol deelhhei kaol cholyaeqhael'ae geemyeq biq, ngeelfeiq, noteel ngaeq'ae maeq eetyeq laeq'ae. 56 Ngeelfeiq, silqinq xihael gilzuqmyel peqlal mael laoq, xianzhi suqhhaq taq e saeziq mael peqlal maoqlye kaol'ae." Tyuqfu, laqcaqhael gilzuqmyel yoqhhaeq ae'lye deelsae hheikaol kisae byel biq vae.
Yesu yaol zhiqmoqkae gil biq
57 Yesu yaol eetyeq biq e cholyaeqhael lye yoqhhaeq yaol Gaiyalfaq daljilsi tyuqvae sheeqli biq, Momil e saeziq mael loq e laqkiqhael kaol zhangqlaoqhael tyuqvae zhol'eeq deelhhei gil aeqwae. 58 Biqdeq gaelmaolsae'lye Yesu'ae cho'lyeq deelhhei, daljilsi toq e dyekaeq vae keellael, kaol onglci'ae do'li, songlqyezaq e cholyaeqhael nyegael qiqgael bael zholgae hhei, jyeqjuq mael haelmillye peqyil hhei maeq lye fu maoqlye hhae. 59 Jilsizhangq kaol Yoqtail Yilhuil vae haelzhol cholyaeqhael, jaq e zoqzenl saelpodu hheikaol Yesu'ae konglgaol biq, kaol yoqhhaeq yaol zonglsil biq maoqlye hhae. 60 Haelnaeqmyel cholyaeq jaq e zoqzenlkei lael feiq, zenljul maeq saelpodu hhei ongl gil biq'ae. Aeqnaol, cholyaeq niq nulhhaeq lael, 61 Gee: "Cholyaeq xitaeq gee gol: 'Ngael Momil e heelhaol mael cheqba hhei ongl lil, kaol suq nao maeq bong myel cutulhoq hhei ongl lil.'" 62 Daljilsi tullael kaol Yesu'ae gee biq: "Cholyaeq xihael zoqzenlkei, kaol noq'ae zhiqmoqkae e silqinq mael, nol qiqgiq lye maeq geehoq yil maeq?" 63 Ngeelfeiq, Yesu yotyel maq du'ae. Daljilsi yoqhhaeq'ae gee biq: "Ngael haeqfu eiq dyeqdeel e Momil'ae tyuq deelhhei kaol nol ngaeteel'ae faqsilkei laeq lye minllinl lil, nol laoq Jidu, Momil e Yaqyo maeqngeel yil maeq?" 64 Yesu yoqhhaeq'ae gee biq: "Nol aeqyoyoq gee vae. Ngeelfeiq, ngael noteel'ae geegaeq laeqngeel,
saeq ae'lye aeqnaol, noteel laoq Cholyaeq Yaqyo,
Hhael'onglzaeq zaeqli qiq hhaeq e laqsseqboq'ae zhol,
kaol mqmae e mqdul nyegael qiqgael lael hhae mol'ae."
65 Daljilsi aeqyoyoq e aelhongq mael eezi hheikaol, gee: "Yoqhhaeq xyelduq e saeziq gee vae, aedeeteel zoqzenlkei e cholyaeq mul kael siq maeq? Yaeqmeel noteel laoq yoqhhaeq gee e xyelduq e saeziq xihael gaeq vae. 66 Noteel laoq haelmillye nyuq lilmaeq?" Yoqhhaeteel geehoq biq: "Yoqhhaeq hhae sil hhae." 67 Kaol yoqhhaeteel yoqhhaeq e maduq mael'ae eelcael myecheeq biq, laqtu maellye yoqhhaeq'ae tyel biq, yoqhhaeq'ae laqho maellye eiq tyel gil biq hhae, 68 Gee: "Jidu o, ngaeteel'ae peqlal maoqlye mael geedu hhei gil laeq! Noq'ae tyel e qiq hhaeq aeqsul maeq?"
Biqdeq Hhaoqsongl yaol maeq loq yae lye suq pu gee
69 Biqdeq nilduboq e dyekaeq vae zhol deelhhei, yaqhacheqzaq e haeqmiyaeq qiq hhaeq deelniq laeq, gee: "Nol laoq haeqfu eiq Ja'lillil cholyaeq Yesu nyegael qiqboq hhae." 70 Ngeelfeiq, Biqdeq laoq cholyaeqhael e yiqsi ae'lye ngeel lil lye maeq gee'ae, gee: "Ngael nol aeqchee gee hhae lye maeq loq yae!" 71 Yoqhhaeq duyil, oheiq vae keellael, baeqjyelboq e yaqhacheqzaq e haeqmiyaeq qiq hhaeq yoqhhaeq yaol mol hhei biq, kaol tyuqvae zhol e cholyaeqhael'ae gee biq: "Cholyaeq xitaeq laoq Naqsa'lel cholyaeq Yesu nyegael qiqboq hhae." 72 Biqdeq maeqngeel yil lye yol gee, kaol faqsilkei: "Ngael cholyaeq tyutaeq yaol maeq loq yae." 73 Haeldyul maeqngeel laol, dongqpyeq vae haoqtul deelhhei e cholyaeq deelniq laeq, kaol Biqdeq vae gee biq: "Nol aeqdilmyel yoqhhaeteel nyegael qiqboq hhae, nol gee e yotyel mael gaeq hhei'laol loq wae." 74 Biqdeq doqchiq maellye faqsilkei: "Ngael cholyaeq tyutaeq yaol maeq loq yae." Zhoq geedu hhei'laol, haepyul dyel tullaeq vae. 75 Biqdeq Yesu gee gol e saeziq mael nyuq tullaeq biq: "Haepyul maeq dyel lael laefuq'ae, nol ngaeq yaol maeq loq yae lye suq pu gee maoqlye hhae." Yoqhhaeq duyil kaol guaeq'ei nyul yil.