Yesu yaol eetyeq biq
18
Yesu saeziq xihael gee byel hhei'laol, laqcaqhael nyegael duyil hhei, kaol Ji'lunq lolgo ae'lye deelpol duyil. Tyuqvae kilsaq qiqgael za'ae, Yesu kaol laqcaqhael tyuqvae do'li vae. 2 Yesu yaol yotyel maqdumyel ongqzaeq biq e Yoqdal eiq tyuqvae milcaeq vae loq'ae, Yesu kaol laqcaqhael haeqfu eiq tyuqvae zhol'eeq gil kaol'ae. 3 Tyuqfu, Yoqdal laoq dangbinkei e cholyaeq qiq miq, jilsizhangqhael kaol Faqlilsail cholyaeq e songlqyezaq e cholyaeqhael yaol sheeq hhei, kaol den'long, aldoq, tyelgae moqgoq heil hhei aeqmyel tyuqvae keellael gil vae. 4 Yesu laoq aeqyoq'ae yo'lael maoqlye e silqinqhael gilzuqmyel loq biq, kaol duyi laol yoqhhaeteel'ae gee biq: "Noteel aeqsul'ae saelpo lilmaeq?" 5 Yoqhhaeteel Yesu'ae geehoq biq: "Naqsa'lel cholyaeq Yesu'ae saelpo lil!" Yesu gee: "Ngael lil." Yotyel maqdumyel Yesu yaol ongqzaeq biq e Yoqdal laoq yoqhhaeteel nyegael tyuqvae haoqtul deelhhei hhae. 6 Yesu "ngael lil" lye zhoq gee laol, yoqhhaeteel aeqnaolboq'ae naolzizi kaol milcaeq vae jye'leeq deelhhei vae. 7 Yoqhhaeq yoqhhaeteel'ae yol qiq pu naelhaeq biq: "Noteel aeqsul'ae saelpo gil lilmaeq?" Yoqhhaeteel gee: "Naqsa'lel cholyaeq Yesu'ae saelpo lil!" 8 Yesu geehoq biq: "Ngael noteel'ae geegaeq biq wae, ngael lil. Noteel saelpo mael ngael kaollaoq, cholyaeq xihael yaol bi deel oq." 9 Xilmael laoq Yesu gee gol e saeziq mael peqlal: "Noq lye ngaeq'ae biq hhei laq e cholyaeqhael laoq, ngael qiq hhaeq yaol eiq maeq bi gabu yil." 10 Ximenq Biqdeq'ae maejyel qiq mal pi hhei'ae, eedu hheikaol daljilsi e yaqhacheqzaq e cholyaeq Maqlelguq'ae she hhei biq, kaol yoqhhaeq e laqsseqboq e naeqbol mael shega biq. 11 Yesu Biqdeq'ae gee biq: "Maejyel mael mabye mael'ae shiq dohoq hhei! Aeqdae lye baqmoq hhei laeq e beiziq mael, ngael haelmillyekaol maeq dol laeq?"Daljilsi lye Yesu yaol zhiqmoqkae biq'ae
12 Tyulkaol, dangbinkei e tyu qiq miq kaol qiqca (1000) cholyaeq e zhiqmoqhael, kaol Yoqtail cholyaeq e songlqyezaq e cholyaeq lye Yesu yaol eetyeq biq, kaol yoqhhaeq yaol kaltoq biq, 13 Kaol laefuqmyel Yalnaq e yiqsi'ae sheeqli biq. Yalnaq laoq tyuqfu qiq hoq daljilsi geiq e Gaiyalfaq e ssuqpaeq'ae. 14 Gaiyalfaq laoq laefuq Yoqtail cholyaeq'ae "cholyaeq qiq hhaeq laoq cholyaeqhael gae'lye sil hhei, xilmael laoq meeq hhae" lye gee gol biq e tyutaeq ngeelvae.
Biqdeq Hhaoqsongl yaol maeq loq yae lye gee
15 Ximenq Biqdeq kaol baeqjyelboq e laqcaq qiq hhaeq Yesu'ae cho'lyeq deelhhei hhae; daljilsi laoq laqcaq tyutaeq yaol siqcongl'ae. Yoqhhaeq Yesu nyegael daljilsi toq e dyekaeq'ae do'li, 16 Ngeelfeiq, Biqdeq laoq oheiq nildu vae haoqtul deelhhei hhae. Daljilsi siqcongl e laqcaq tyutaeq duyi, kaol oheiq vae fu'qyezaq e yaqhacheqzaq e haeqmiyaeq'ae qiq doq gee biq, kaol Biqdeq yaol sheeq do'li vae. 17 Oheiq vae fu'qyezaq e yaqhacheqzaq e haeqmiyaeq tyutaeq Biqdeq'ae gee biq: "Nol eiq cholyaeq xitaeq e laqcaq maeqngeel yil maeq?" Yoqhhaeq gee: "Ngael maeqngeel yil." 18 Aqgaga hhae, kaol yaqhacheqzaq e cholyaeqhael kaol songlqyezaq e cholyaeqhael lye aeqzaeq bo doq hhei, kaol haoqtul deelhhei myel aeqzaeq hulm hhae; Biqdeq eiq yoqhhaeteel nyegael qiqgael haoqtul deelhhei kaol aeqzaeq bael hulm hhae.
Daljilsi Yesu'ae heqnaelhaeq biq
19 Tyuqfu, daljilsi laoq Yesu vae aeqyoq e laqcaqhael kaol aeqyoq e geemyeq e silqinq mael'ae heqnaelhaeq biq. 20 Kaol Yesu daljilsi'ae gee biq: "Ngael laoq yaeqmeel keellye milcaeq taq e cholyaeqhael'ae aeqsul eiq bael gaeq myel gee gil biq lil, ngael duqlye huiltangq kaol sholhaol vae zhol lil, haelzhol e Yoqtail cholyaeq zhol'eeq e milcaeq vae cholyaeqhael'ae geemyeq gil biq lil, ochoq maeq gaeq myel'ae laoq ngael qiqgiq eiq maeq gee yil. 21 Nol aeqcheekaol ngaeq'ae naelhaeq laeq lilmaeq? Ngael gee mael gaeq yo e cholyaeq tyuhael'ae naelhaeq gil biq, yoqhhaeteel laoq ngael aeqchee lye gee gol'ae lye loq'ae." 22 Yesu saeziq xihael gee hhei'laol, dongqpyeq vae haoqtul deelhhei e songlqyezaq e cholyaeq qiq hhaeq lye, yoqhhaeq'ae laqho maellye qiq pu tyel hhei biq, gee: "Nol daljilsi'ae dyel'eiq xilnye geehoq peq laeq?" 23 Yesu yoqhhaeq'ae gee biq: "Ngael geeba hhei kaollaoq, nol ngael haeqvaehael'ae geeba hhae lye geedu hhei; ngael gee mael hoq kaollaoq, nol laoq aeqcheekaol ngaeq'ae tyel laeq lilmaeq?" 24 Yalnaq lye Yesu yaol kaltoq hhei aeqmyel daljilsi Gaiyalfaq tyuqvae ee'li biq.
Biqdeq Hhaoqsongl'ae maeq loq yae lye yol gee
25 Ximenq Biqdeq aeqzaeq doq dongqpyeq'ae haoqtul deelhhei kaol aeqzaeq hulm wae siq. Cholyaeq qiq hhaeq yoqhhaeq'ae gee biq: "Nol eiq yoqhhaeq e laqcaq maeqngeel yil maeq?" Biqdeq gee: "Ngael maeqngeel yil." 26 Daljilsi e yaqhacheqzaq e cholyaeq qiq hhaeq, gee: "Ngael laoq nol kaol yoqhhaeq kilsaq vae zhol e mol maeqngeel maeq?" Naelhaeq e xitaeq laoq Biqdeq lye naeqbol shega biq e tyutaeq e paeqyaeq ngeelvae. 27 Biqdeq maeqngeel yil lye zhoq geedu hhei'laol, haepyul dyel tullaeq vae.
Yesu yaol Biqlado'ae eemoq li biq
28 Mqshoq naqlye fu, Yoqtail cholyaeq lye Yesu yaol Gaiyalfaq tyuqvae lye zongqdu e laoqhaol vae ee'li biq. Yoqhhaeteel aeqyoyoq laoq maeqshol myel zonglpeq hhei'laol, Yuq'yeqjyeq e mqkiq e aelhoq maeq hhae zaeq maeqhe lyekaol, zongqdu e laoqhaol vae maq bal do'li'ae. 29 Tyulkaol, Biqlado nilduboq'ae deel duyil kaol yoqhhaeteel'ae mol yil, gee: "Noteel cholyaeq xitaeq'ae zhiqmoqkae biq mael aeqchee silqinq gae'lye hhaemaeq?" 30 Yoqhhaeteel yoqhhaeq'ae geehoq biq: "Xitaeq maeqmeeqmyel maeq zongl kaollaoq, ngaeteel yoqhhaeq yaol noq'ae maeq eemoq yil." 31 Biqlado yoqhhaeteel'ae gee biq: "Noteel aeqyoyoq yoqhhaeq yaol sheeqyil, kaol noteel e lilfaq laoqmyel yoqhhaeq'ae shenqpanl biq." Yoqtail cholyaeq gee: "Ngaeteel cholyaeq'ae hhae sil e golsiq za'ae lye shenqpanl e laqtaq maqza'ae." 32 Xilmael laoq, Yesu laefuq yoqhhaeq aeqgael haelmillye hhae sil hhae lye gee gol e tyu qiq doq peqlal mael ngeelvae.
33 Biqlado zongqdu e laoqhaol'ae yol do'li, kaol Yesu yaol gul laeq, kaol yoqhhaeq'ae naelhaeq biq, gee: "Nol laoq Yoqtail cholyaeq e zongmae lilmaeq?" 34 Yesu yoqhhaeq'ae geehoq biq: "Saeziq xilmael laoq nol aeqyoyoq gee, paelsilmyel ochoq ngaeq'ae gee mael noq'ae geegaeq laeq hhaemaeq?" 35 Biqlado gee: "Ngael Yoqtail cholyaeq maeq? Noq e minqcuq e cholyaeqhael kaol jilsizhangqhael lye noq yaol ngaeq'ae eemoq hhei laeq, nol aeqdilmyel aeqchee silqinq zongl gol lilmaeq?" 36 Yesu geehoq biq: "Ngaeq e goqja milcaeq xilmael taq'ae maqza'ae; ngaeq e goqja milcaeq xilmael taq'ae za kaollaoq, ngaeq e yaqhacheqzaq e cholyaeqhael daqzhangldiq tullaeq, tyulnye laol, ngaeq yaol Yoqtail cholyaeq'ae maeq hhae bi eemoq wae. Ngeelfeiq, ngaeq e goqja laoq milcaeq xilmael taq'ae za maeqngeel'ae." 37 Tyulkaol, Biqlado yoqhhaeq'ae naelhaeq biq: "Aelmaol, nol laoq zongmae lilmaeq?" Yesu gee: "Ngael laoq zongmae'ae lye nol gee vae. Ngael zhen'liq gae'lye zoqzenlkei maoqlyekaol dyeqlal lil, kaol xilmael gae'lye milcaeq taq'ae lael lil. Zhen'liq ae'lye lael e cholyaeq laoq, gilzuqmyel ngaeq e yotyel mael naelhaeq'ae." 38 Biqlado yoqhhaeq'ae naelhaeq biq: "Zhen'liq mael aeqchee maeq?"
Yesu yaol shiqziljal mael'ae diqcheeq biq maoqlye hhae
Biqlado saeziq xilmael gee hhei'laol, yol duyil kaol Yoqtail cholyaeqhael'ae mol yil, kaol yoqhhaeteel'ae gee biq: "Ngael yoqhhaeq'ae aeqchee golsiq za'ae lye maeq saelpodu hhei yil. 39 Ngeelfeiq, haelzael'ae zongl laoqmyel, Yuq'yeqjyeq fu, ngael noteel'ae ee'longl biq e cholyaeq qiq hhaeq pyeqduhoq hhei biq maoqhhae. Noteel ngaeq yaol Yoqtail cholyaeq e zongmae xitaeq yaol pyeqduhoq hhei lye laeq?" 40 Yoqhhaeteel gul gae'lael aeqmyel gee: "Yoqhhaeq yaol maq mul yil! Ba'laba yaol mul maoq!" Ba'laba xitaeq laoq lolbiq diqkoqzaeq e cholyaeq'ae.