Yesu yaol Benqdiu Biqlado'ae eemoq li biq
15
Mqshoq keellael laol, jilsizhangqhael, zhangqlaoqhael, Momil e saeziq mael loq e laqkiqhael kaol Yoqtail Yilhuil vae zhol e cholyaeqhael, hhaellaelmyel geedazaq meeq hhei'laol, Yesu yaol kaltoq hheikaol Biqlado'ae eemoq li biq. 2 Biqlado Yesu'ae naelhaeq biq: "Nol Yoqtail cholyaeq e zongmae lilmaeq?" Yesu geehoq biq: "Nol gee hhae." 3 Jilsizhangqhael lye Yesu'ae haeldyul dyulmae konglgaol biq vae. 4 Biqlado Yesu'ae yol naelhaeq biq: "Nol gaeq wae maeq? Yoqhhaeteel noq'ae xuldyulmyel konglgaol bonggaebyel'ae! Nol qiqgiq lye maeq gee'naeqhoq yil maeq?" 5 Ngeelfeiq, Yesu qiqgiq lye eiq maeq gee'naeqhoq biq, kaol Biqlado'ae gaqmaqzuq li biq'ae.Yesu yaol shiqziljal mael'ae diqcheeq biq maoqlye hhae
6 Haeqfu qiqzael zaeqnao xilmael keellael fu, Biqlado laoq cholyaeqhael geezaeq laoqmyel, yoqhhaeteel'ae ee'longl biq e cholyaeq qiq hhaeq pyeqduhoq hhei biq maoqhhae. 7 Tyuqfu Ba'laba lye gul biq e qiq hhaeq zhol'ae. Yoqhhaeq yaol Loqmaq zenlfuq nyegael zongltyeltoq e cholyaeqhael nyegael qiqgael koqlongl deelhhei hhae, yoqhhaeteel aeqvuqlaelvuqmyel zongl gil fu, yoqhhaeq cholyaeq xyeq yo hhae. 8 Cholyaeqhael Biqlado'ae deel niqli, Biqlado'ae laefuq laoqmyel zongl lye geezaeq biq'ae. 9 Biqlado yoqhhaeteel'ae geehoq biq: "Noteel ngaeq yaol Yoqtail cholyaeq e zongmae xitaeq yaol, pyeqduhoq hhei gil laq maeq?" 10 Yoqhhaeq laoq jilsizhangqhael heiqcilnael biq kaol Yesu yaol eemoq laeq hhae lye loq'ae. 11 Ngeelfeiq, jilsizhangqhael laoq cholyaeqhael'ae cheeqmu biq, haelmillyekaol eiq Biqlado vae Ba'laba yaol yoqhhaeteel'ae pyeqduhoq hhei laq lye zongl biq hhae. 12 Kaol Biqlado yoqhhaeteel'ae yol gee biq: "Aelmaol, noteel zongmae lye gul biq e Yoqtail cholyaeq tyutaeq, noteel ngaeq yaol haelmillye zongl biq lye nyuq gil lilmaeq?" 13 Yoqhhaeteel gul gae'lael aeqmyel gee biq: "Yoqhhaeq yaol shiqziljal mael'ae diqcheeq biq!" 14 Biqlado gee: "Yoqhhaeq aeqdilmyel aeqchee silqinq zonglba hhaemaeq?" Yoqhhaeteel yotyel haeqheemyel gul'ae: "Yoqhhaeq yaol shiqziljal mael'ae diqcheeq hhei!" 15 Biqlado cholyaeqhael'ae neezae bi lael maoqlye nyuq biq, kaol Ba'laba yaol yoqhhaeteel'ae pyeqduhoq hhei biq vae, cholyaeqhael yaol Yesu'ae caxu maellye aqhatiqlye zheq hhei biq, kaol eemoq yil laol shiqziljal mael'ae diqcheeq hhei lye moqheilheil biq.
Dangbinkei e cholyaeq Yesu'ae pasa biq
16 Dangbinkei e cholyaeq lye Yesu yaol zongqdu laoqhaol e dyekaeq'ae sheeq do'li biq, kaol dangbinkei e cholyaeq gilzuqmyel gul'eeq laeq. 17 Yoqhhaeteel lye yoqhhaeq'ae ziqseq e poljye pyeqcheeq da hhei biq, aelgong maellye zongldu hhei e zongmae vuqcongq mael yoqhhaeq'ae congqda hhei biq, 18 Kaol yoqhhaeteel dolmoqmoq gaeyil kaol yoqhhaeq'ae gee biq: "Yoqtail cholyaeq e zongmae laoq maeq sil yilkiq'ae!" 19 Yoqhhaeteel mol'ongq maellye yoqhhaeq e vuqduq mael'ae diq biq, yoqhhaeq'ae eelcael mye biq, kaol yoqhhaeq'ae tongqheel biq, 20 Yoqhhaeq'ae pasa du hhei'laol, yoqhhaeq e ziqseq e poljye mael heiga biq, kaol aeqyoq e aelhongq mael dumda hoq hhei biq, kaol yoqhhaeq yaol sheeq duyil kaol shiqziljal mael'ae diqcheeq biq maoqlye hhae.
Yesu yaol shiqziljal mael'ae diqcheeq biq vae
21 Guqlilnail milcaeq e cholyaeq, Ximenq lye gul biq e qiq hhaeq pusiq ae'lye lael kaol tyuqvae deelpol duyil. Yoqhhaeq laoq Yallilshandal kaol Luqfuq e aeqdae'ae. Dangbinkei e cholyaeq lye shiqziljal mael yoqhhaeq'ae maeqnaelhaeq maeqzaeqmyel bi pi. 22 Yoqhhaeteel lye Yesu yaol Gegeta vae sheeq keellaeq. Gegeta laoq Cholyaeq Vuqho Milcaeq mael'ae gee hhae. 23 Yoqhhaeteel lye Molyaol zoq e zilbaeq mael yoqhhaeq'ae baqmoq hhei biq, ngeelfeiq, yoqhhaeq maeq dol nae'ae. 24 Kaol yoqhhaeteel lye yoqhhaeq yaol shiqziljal mael'ae diqcheeq biq, kaol suqhhaq oq gil maellye yoqhhaeq e aelhongq mael byelzaeq vae. 25 Yoqhhaeteel lye Yesu yaol shiqziljal mael'ae diqcheeq biq fu laoq mqshoq jiuqdianq fu'ae. 26 Yesu e zonglba hhae lye mael tyelpyuq mael'ae "Yoqtail cholyaeq e zongmae" lye cuda deelhhei hhae. 27 Yoqhhaeteel lye lolbiq diqkoqzaeq e cholyaeq niq nulhhaeq yaol, yoqhhaeq nyegael shiqziljal taq'ae qiqgael diqcheeq biq, qiq hhaeq laoq laqsseqboq'ae, qiq hhaeq laoq laeqbaelboq'ae.a 29 Tyuqvae gaelmae deel e cholyaeq maqqyemyel yoqhhaeq'ae geefu biq, vuqduq zheq'eel kaol gee: "Ei! Nol heelhaol mael cheqba hheikaol, suq nao'ae lye cutulhoq ongl e qiq hhaeq, 30 Nol aeqyoyoq yaol jiulzaeqhoq hheikaol Shiqziljal taq ae'lye gaeyi!" 31 Jilsizhangqhael kaol Momil e saeziq mael loq e laqkiqhael eiq yoqhhaeq'ae eel biq hhae, qiqhhaeq qiqhhaeq'ae geegaeq gil: "Yoqhhaeq ochoq'ae jiul ongl feiq, aeqyoq yaol laoq maeq jiulzaeqhoq ongl'ae!" 32 Yiqsellyel e zongmae Jidu o! Yaeqmeel ae'lye shiqziljal taq ae'lye gaeyi, ngaeteel'ae bi mol laeq laol xiangxinl hhaeq." Yesu nyegael shiqziljal mael'ae qiqgael diqcheeq biq e cholyaeq eiq yoqhhaeq'ae geefu biq hhae.
Yesu sil vae
33 Naoongl longlmae ae'lye mael xalvuq sandianq fu keellye, milcaeq holtaq'ae haeqvae eiq nahongqlye hhae. 34 Xalvuq sandianq laellye fu, Yesu yotyel haeqheemyel gul'ae: "Yiqloqyiq, yiqloqyiq, lamaq sabakeda'niq?" Xi qiq doq geedu hoq hhei'laol xilnye hhae: "Ngaeq e Momil, ngaeq e Momil, aeqcheekaol ngaeq'ae deelsae laeq lilmaeq?" 35 Dongqpyeq'ae haoqtul deelhhei e cholyaeq gaeq hhei biq laol gee: "Naelhaeq, yoqhhaeq Yiqlilyal'ae gul hhae!" 36 Cholyaeq qiq hhaeq ki'li kaol caeqmeel mael'ae zilqyel zongl jyel hhei, mol'ongq mael'ae kaltoq da hheikaol yoqhhaeq'ae dol lye baqmoq hhei biq, gee: "Qiqlaq doq hhei siq, aedeeteel Yiqlilyal lye yoqhhaeq yaol pyeqgae hhei biq maeqlye fu maoq." 37 Yesu yotyel haeqheemyel qiq doq gul laol, saeq'ol qye'li vae. 38 Sholhaol e geqchiq haeqpael mael, holtaq ae'lye holhhaq keellye niq pa gapa hhei. 39 Yoqhhaeq e yiqsi yulboq'ae haoqtul deelhhei e qiqhael (100) cholyaeq e zhiqmoq, yoqhhaeq xilnye saeq'ol qye'li mael mol hhei biq, kaol gee: "Xitaeq laoq aeqdilmyel Momil e Yaqyo she!" 40 Cholhae aeqmae qiq miq gaelmaolsae'lye chifu gil'ae, yoqhhaeteel onglci'ae Moqdalla e Maqlilyal, hhael nil e Yaqgel kaol Yoqxi e aeqmae Maqlilyal, kaol Saqloqmiq'ae. 41 Cholhae aeqmae xihael laoq, Yesu Ja'lillil vae zhol siq fu, yoqhhaeq'ae cho'lyeq deelhhei kaol zhaofu biq hael'ae, kaol baeqjyelboq e yoqhhaeq nyegael Ye'lulsa'lenq vae bal da'lal e cholhae aeqmaehael eiq bal zoq hhae.
Yesu yaol fuq'ongl mael'ae baqduqm biq
42 Kiqsulkiqxeiq keellael vae, yaeqnao laoq paeqgaelsael meeq deel e qiq nao'ae, xi qiq nao eiq anxiqriq e laefuq qiq nao'ae. 43 Yallilmaqtail milmae heeqmyel e Yoqsel laoq, maduq zhee za e Yoqtail Yilhuil onglci e qiq hhaeq'ae. Aeqyoq haeqfu eiq Momil e Goqja lael mael'ae panlwangl deelzaeq hhei hhae. Yoqhhaeq qiqgiq maeq gu myel Biqlado'ae saelpo li, Yesu e aeqhhaol mael baq laq lye geezaeq biq. 44 Biqlado Yesu sil vae lye gaeq hhei biq laol gaqmaqzuq li biq'ae, kaol qiqhael (100) cholyaeq e zhiqmoq yaol gul laeq, kaol Yesu sil e maolgael vae maeq lye naelhaeq biq. 45 Yoqhhaeq qiqhael (100) cholyaeq e zhiqmoq e saeziq ae'lye aeqdilmyel ngeel'ae lye loq hhei biq, kaol Yesu e aeqhhaol mael Yoqsel'ae baq hhei biq vae. 46 Yoqsel paelpul vul hhei, kaol Yesu yaol pyeqgae hhei, kaol paelpul maellye leelmeeq hhei'laol, haqlo loongl e geeqzhoq vae diqkeiq du hhei e fuq'ongl'ae baqdeel hhei, kaol haqlo qiq siq moq laeq kaol fuq'ongl oheiq'ae moqchiq hhei. 47 Moqdalla e Maqlilyal kaol Yoqxi e aeqmae Maqlilyal, Yesu yaol haeqvae baqduqm deelhhei hhae lye mol gil vae.