19
Tyuqfu, Biqlado cholyaeqhael'ae Yesu yaol ee duyil, kaol yoqhhaeq'ae caxu maellye zheq biq lye minllinl gil biq. 2 Dangbinkei e cholyaeqhael laoq aelgong maellye zongmae vuqcongq zongldu hhei, kaol yoqhhaeq e vuqduq mael'ae congqda hhei biq, kaol yoqhhaeteel lye yoqhhaeq'ae ziqseq e poljye pyeqcheeq da hhei biq. 3 Aeqnaol, yoqhhaeq e yiqsi'ae keellael laol, gee: "Yoqtail cholyaeq e zongmae maeq sil yilkiq'ae!" Kaol laqho maellye yoqhhaeq'ae tyel biq. 4 Biqlado nilduboq'ae yol qiq pu duyil, kaol Yoqtail chaolyaeqhael'ae gee biq: "Naelhaeq gil! Ngael yoqhhaeq yaol sheeq duyi kaol noteel'ae sheeqmoq hhei gil laeqngeel, kaol ngael yoqhhaeq'ae aeqchee golsiq za'ae lye maeq saelpodu hhei yil lye noteel'ae bi loq maoq." 5 Tyulkaol, Yesu duyi, aelgong maellye zongldu hhei e zongmae vuqcongq mael congq hhei'ae, ziqseq e poljye mael pyeqcheeq da hhei'ae. Biqlado yoqhhaeteel'ae gee biq: "Fu, xitaeq ngeelvae!" 6 Jilsizhangqhael kaol songlqyezaq e cholyaeq Yesu yaol mol hhei biq laol, gul gae'lael aeqmyel gee: "Yoqhhaeq yaol shiqziljal mael'ae diqcheeq biq! Yoqhhaeq yaol shiqziljal mael'ae diqcheeq biq!" Biqlado yoqhhaeteel'ae gee biq: "Noteel aeqyoyoq yoqhhaeq yaol sheeqyil kaol shiqziljal mael'ae diqcheeq biq! Ngael laoq yoqhhaeq'ae aeqchee golsiq za'ae lye maeq saelpodu hhei yil." 7 Yoqtail cholyaeq geehoq biq: "Ngaeteel'ae lilfaq za lil, lilfaq tyulmael'ae lye gee'li'laol, yoqhhaeq laoq hhae sil hhae, yoqhhaeq laoq Momil e Yaqyo lil lye keizaeq kaol'ae."8 Biqlado saeziq xilmael gaeq hhei biq laol, hhal gu li biq'ae, 9 Kaol yoqhhaeq zongqdu e laoqhaol'ae do'li, kaol Yesu'ae naelhaeq biq: "Nol aeqdilmyel haeqvae lye lael lilmaeq?" Ngeelfeiq, Yesu yoqhhaeq'ae maeq geehoq biq'ae. 10 Biqlado yoqhhaeq'ae gee biq: "Nol ngaeq'ae saeziq maeq gee'naeq yil maeq? Nol ngael laoq noq yaol pyeqduhoq e laqtaq za, kaol noq yaol shiqziljal mael'ae diqcheeq e laqtaq eiq za'ae lye maeq loq laeq hhaemaeq?" 11 Yesu gee: "Mqmae ae'lye noq'ae laqtaq biq ga hhei biq kaolmaoqlaol, nol ngaeq'ae zongl e laqtaq maqza'ae; tyulkaol, ngaeq yaol noq'ae eemoq e tyutaeq laoq, golsiq hhael za vae." 12 Tyuq ae'lye aeqnaol, Biqlado laoq Yesu yaol pyeqduhoq goq biq; ngeelfeiq, Yoqtail cholyaeqhael gul gae'lael aeqmyel gee: "Nol cholyaeq xitaeq yaol pyeqduhoq kaollaoq, Kaiqsa'ae neemae qiqsiqmyel cho'lyeq e cholyaeq maeqngeel vae. Aeqsul aeqyoyoq zongmae lil lye keizaeq kaollaoq, Kaiqsa boq'ae maeq pol'ae."
13 Biqlado saeziq xihael gaeq hhei biq laol, Yesu yaol Haqlo Dyekaeq (Xiboqlaiq saeziq laoq Jabadal lye gul hhae) lye gul myel vae sheeq keellaeq biq, kaol tyuqvae shenqpanl biq hhae. 14 Tyuqfu qiq nao laoq Yuq'yeqjyeq'ae paeqgaelsael meeq e qiq nao'ae, naoongl keellael fu, Biqlado Yoqtail cholyaeqhael'ae gee biq: "Fu, noteel e zongmae!" 15 Kaol yoqhhaeteel gul tullaeq: "Yoqhhaeq yaol zonglsil hhei! Yoqhhaeq yaol zonglsil hhei! Kaol yoqhhaeq yaol shiqziljal mael'ae diqcheeq hhei!" Biqlado yoqhhaeteel'ae naelhaeq biq: "Ngael laoq noteel e zongmae yaol shiqziljal mael'ae diqcheeq biq hhaeq maeq?" Jilsizhangqhael geehoq biq: "Ngaeteel e zongmae laoq Kaiqsa qiq hhaeq wae!" 16 Tyulkaol, Biqlado lye Yesu yaol shiqziljal mael'ae diqcheeq hhei lye yoqhhaeteel'ae eemoq biq vae.
Yesu yaol shiqziljal mael'ae diqcheeq biq
17 Yoqhhaeteel lye Yesu yaol sheeq duyil. Yesu aeqyoyoq e shiqziljal mael pi hhei aeqmyel duyi, kaol "Vuqho" lye gul e milcaeq qiqgael vae keellael, Xiboqlaiq saeziq laoq Gegeta lye gul hhae. 18 Yoqhhaeteel tyuqvae lye Yesu yaol shiqziljal mael'ae diqcheeq biq; yoqhhaeq nyegael qiqgael bael diqcheeq biq e cholyaeq niq nulhhaeq zoq wae siq, qiqboq'ae qiq hhaeq'ae, Yesu laoq onglci vae. 19 Biqlado lye tyelpyuq qiq pyuq'ae zil cuda hhei, kaol shiqziljal holtaq'ae diqcheeq da hhei. Tyelpyuq taq'ae xilnye cu deelhhei: "Yoqtail cholyaeq e zongmae Naqsa'lel cholyaeq Yesu." 20 Tyuqfu, Yesu yaol shiqziljal mael'ae diqcheeq biq e milcaeq laoq milmae heeqmyel'ae niq hhae, tyelpyuq tyulmael taq'ae Xiboqlaiq saeziq, Ladin saeziq kaol Xi'lal saeziq maellye cuda hhei hhae, tyulkaol, haelnaeqmyel e Yoqtail cholyaeqhael tyelpyuq taq'ae cuda deelhhei mael duq vae. 21 Yoqtail cholyaeq e jilsizhangq Biqlado'ae gee biq: "'Yoqtail cholyaeq e zongmae' lye haq cu, 'xitaeq aeqyoyoq ngael Yoqtail cholyaeq e zongmae lil lye gee hhae' lye cu maoqhhae." 22 Biqlado gee: "Ngael cu maoqlye mael laoq, ngael cu wae!"
23 Dangbinkei hael lye Yesu yaol diqcheeq biq e aeqnaol'ae, yoqhhaeq e aelhongq mael heil laeq, kaol yuq pa eepa hhei, kaol dangbinkei hael qiq hhaeq qiq pa mul hhae. Yoqhhaeteel lye yoqhhaeq e onglci'ae dum do aelhongq mael eiq heilzaeq biq; onglci'ae dum do aelhongq xilmael laoq maq guq gol'ae, aqtaq ae'lye mael aq'oq'ae keellye qiq ko myel hhaq myel hhaq du hhei hhae. 24 Tyulkaol, yoqhhaeteel hhaellaelmyel gee: "Aedeeteel haeq eepa gil laeq, aedeeteel aeqsul hhamul maeq lye suqhhaq o gil maoq." Xilmael laoq Momil e Suqhhaq taq'ae gee e saeziq mael laoqmyel peqlal hhae:
"Yoqhhaeteel lye ngaeq e nildu aelhongq mael byelzaeq hhei,
kaol ngaeq e onglci'ae dum do e aelhongq mael gae'lye suqhhaq eiq o gil hhae."
Dangbinkei hael laoq aeqdilmyel xilnye zongl vae. 25 Yesu e shiqziljal dongqpyeq'ae haoqtul deelhhei e cholyaeqhael laoq, yoqhhaeq e aeqmae kaol yoqhhaeq e aeqmee, kaol Ge'loqba e haeqmiq Maqlilyal, kaol Moqdalla milcaeq e Maqlilyal'ae. 26 Yesu laoq aeqmae kaol yoqhhaeq gaeq biq e laqcaq tyutaeq dongqpyeq vae haoqtul deelhhei mol hhei biq, kaol aeqmae'ae gee biq: "Aeqmae, fu, noq e yaqyo." 27 Aeqnaol yoqhhaeq laqcaq tyutaeq'ae gee biq: "Fu, noq e aeqmae." Tyuq ae'lye aeqnaol, laqcaq tyutaeq lye Yesu e aeqmae yaol aeqyotoq'ae sheeqli vae.
Yesu sil vae
28 Silqinq xihael aeqnaol, Yesu laoq gilzuqmyel silqinqhael peqlal vae lye loq'ae, Momil e Suqhhaq taq e saeziq mael bi peqlal maoqlyekaol gee: "Ngael suq yaevae." 29 Tyuqvae zilqyel xye bong hhei aeqmyel buqyaeq qiq mal za'ae, kaol yoqhhaeteel lye caeqmeel mael'ae zilqyel zongl jyel hhei, kaol niuqxi haelsaeq mael'ae kaltoq da hhei, kaol yoqhhaeq e myeqbongq tyuqvae tyuqda hhei biq. 30 Yesu zilqyel tyulmael'ae dol laol, gee: "Zongl byel aeqwae!" Kaol vuqduq leeq'oq hhei'laol saeq'ol qye'li vae.
31 Tyuqfu qiq nao laoq paeqgaelsael meeq e qiq nao'ae, kaol anxiqriq e tyu qiq nao laoq naohaeq heeq e qiq nao'ae, tyulkaol, Yoqtail cholyaeqhael Biqlado'ae shiqziljal mael'ae diqcheeq biq e cholyaeqhael e aeqkeel mael diqco hhei, kaol yoqhhaeteel yaol baqsae yil lye geezaeq biq, aeqgael sil e aeqhhaol mael anxiqriq qiq nao shiqziljal taq'ae zadeel maeqhe lye hhae. 32 Tyulkaol, dangbinkei hael lael vae, kaol Yesu nyegael shiqziljal mael'ae qiqgael diqcheeq biq e cholyaeq tyu niq nulhhaeq e aeqkeel mael diqco gil biq vae. 33 Yoqhhaeteel Yesu tyuqvae keellael laol yoqhhaeq sil vae lye mol hhei biq, kaol yoqhhaeq e aeqkeel mael maeq diqco biq'ae. 34 Ngeelfeiq, dangbinkei e cholyaeq qiq hhaeq lye gongq maellye yoqhhaeq e nulhhael dongqpyeq'ae co hhei biq, kaol qiqlaqmyel siq kaol eelcuq yul duyi. 35 Silqinq xilmael bael mol e cholyaeqhael laoq zoqzenl bael kei vae, yoqhhaeq e zoqzenl mael laoq aeqdilmyel hhae, yoqhhaeq eiq aeqyoyoq gee mael laoq ngeel'ae lye loq'ae, kaol noteel vae eiq bi xiangxinl. 36 Silqinq xihael peqlal mael laoq, Momil e Suqhhaq taq'ae gee hael peqlal hhae: "Yoqhhaeq e saeq'yuq mael laoq qiq kongq eiq maq hha gaco'ae." 37 Momil e Suqhhaq taq e baeqjyelboq e qiqgael'ae gee: "Yoqhhaeteel laoq aeqyoyoq lye co biq e cholyaeq'ae chifu maoqlye hhae."
Yesu yaol fuq'ongl yosheq'ae baqduqm biq
38 Silqinq xihael aeqnaol'ae, Yallilmaqtail cholyaeq Yoqsel laoq Biqlado'ae Yesu e aeqhhaol mael baq laq lye geezaeq biq, kaol Biqlado hhaeq'ae lye gee biq, kaol yoqhhaeq lye Yesu e aeqhhaol mael baq yil vae. Yoqsel Yoqtail cholyaeq'ae gu biq, kaol yoqhhaeq yotyel maqdumyel Yesu e laqcaq geiq hhae. 39 Laefuq, mqkiq vae Yesu'ae mol lael e Niqgediqmuq eiq lael vae, molyaol kaol chenqxiang heil keq hhei e xiang'liaol suqqyel niq gil zoq lal aeqmyel heil laeq. 40 Yoqhhaeteel Yesu e aeqhhaol mael baq yil, kaol Yoqtail cholyaeqhael baqduqm e beideelhhei laoqmyel, paelpul kaol xiang'liaol maellye yoqhhaeq yaol leel meeq hhei vae. 41 Yesu yaol shiqziljal mael'ae diqcheeq e milcaeq vae, kilsaq qiqgael za'ae, kilsaq onglci'ae laoq cholyaeq maq baqduqm yo e fuq'ongl yosheq qiq mal za'ae. 42 Tyuqfu qiq nao laoq, Yoqtail cholyaeq e paeqgaelsael meeq e qiq nao'ae, fuq'ongl eiq tyuqvae niq hhae, tyulkaol, yoqhhaeteel lye Yesu yaol tyuqvae baqduqm biq vae.