Yesu dyeqhoqlal vae
20
Liqbailtian e mqshoq naqlye, mqbae maeq bae lael siq fu, Moqdalla e Maqlilyal fuq'ongl dongqpyeq vae keellael, kaol haqlo mael fuq'ongl ae'lye leeqpong yi'ae lye mol hhei biq. 2 Kaol yoqhhaeq ki yil kaol Ximenq Biqdeq kaol Yesu gaeq e laqcaq tyutaeq'ae mol yil, kaol yoqhhaeteel'ae gee biq: "Cholyaeq lye Hhaoqsongl yaol fuq'ongl ae'lye baqsae yil aeqvae, ngaeteel laoq yoqhhaeteel lye yoqhhaeq yaol haeqvae baqdeel yil hhae lye maeq loq yae." 3 Biqdeq kaol laqcaq tyutaeq duyil laol fuq'ongl tyuqvae li gil. 4 Niq nulhhaeq myel qiqgael ki, laqcaq tyutaeq laoq Biqdeq taq'ae hhal ki henq hhae, kaol laefuqmyel fuq'ongl vae keelli vae, 5 Kaol dolmoqmoq gayil kaol onglciboq'ae fu do hhei, paelpul mael tyuqvae za deel'ae siq lye mol hhei biq, ngeelfeiq, yoqhhaeq laoq maq do'li'ae. 6 Aeqnaol Ximenq Biqdeq eiq keellael vae; yoqhhaeq fuq'ongl'ae do'li, kaol paelpul mael tyuqvae heildeel hhei siq lye mol hhei biq, 7 Kaol Yesu e vuqduq mael'ae leeltyeq e haeqpael mael paelpul nyegael maeq heildeel hhei, kaol lutyeq aeqmyel qiqjyelboq'ae heildeel hhei mol hhei biq. 8 Tyuqfu, laefuqmyel fuq'ongl'ae keelli e laqcaq tyutaeq eiq do'li vae, yoqhhaeq mol hhei'laol xiangxinl vae. 9 Yoqhhaeteel Momil e Suqhhaq taq'ae gee e "Yoqhhaeq laoq cholsil onglci ae'lye aeqdilmyel dyeqhoqlal'ae" lye xi qiq doq e yilsi mael maeq loq biq wae siq. 10 Tyulkaol, laqcaq tyu niq nulhhaeq laoq laoqhaol'ae hoqli vae.Yesu aeqyoyoq yaol Moqdalla e Maqlilyal'ae bi molli
11 Maqlilyal laoq fuq'ongl nilduboq'ae haoqtul deelhhei myel nyul'ae. Yoqhhaeq nyul fu, dolmoqmoq gayil kaol onglciboq'ae chifu, 12 Kaol Mqmae yosongl niq nulhhaeq aelhongq bachi'lye dum hhei myel, Yesu e aeqhhaol baqdeel myel milcaeq vae, qiq hhaeq laoq vuqduq boq'ae, qiq hhaeq laoq aeqkeel boq'ae zhol deelhhei mol hhei biq. 13 Mqmae yosongl yoqhhaeq'ae naelhaeq biq: "Cholhae aeqmae, nol aeqcheekaol nyul lilmaeq?" Yoqhhaeq gee: "Cholyaeq lye ngaeq e Hhaoqsongl yaol baqsae yil vae, ngael yoqhhaeteel lye yoqhhaeq yaol haeqvae baqdeel yil hhae lye maeq loq yae." 14 Maqlilyal saeziq xihael gee byel hhei'laol zipol hoqlael, Yesu tyuqvae haoqtul deelhhei mol hhei biq, ngeelfeiq, yoqhhaeq laoq Yesu'ae lye maeq loq biq hhae. 15 Yesu yoqhhaeq'ae gee biq: "Cholhae aeqmae, nol aeqcheekaol nyul lilmaeq? Nol aeqsul'ae saelpo lilmaeq?" Maqlilyal Yesu laoq kilsaq fu'qyezaq e cholyaeq'ae lye kei biq hhae, kaol yoqhhaeq'ae gee biq: "Algo, noq lye baqsae yil'ae kaollaoq, haeqvae baqdeel yil aeqlil lye ngaeq'ae geedu laq, xilnye laol, ngael yoqhhaeq yaol baq hoqyil maoq." 16 Yesu yoqhhaeq'ae gee biq: "Maqlilyal!" Maqlilyal zipol hoqlael, kaol Xiboqlaiq saeziq maellye yoqhhaeq'ae gee biq: "Labo'niq!" ("Labo'niq" e yilsi laoq "Laoqsi" vae gee hhae.) 17 Yesu gee: "Ngael da'li kaol Aeqdae'ae maeq mol li oqyilsiq, kaol ngaeq'ae haeq eetyeq laeq. Nol laoq ngaeq e aqsseq aeqnilhael tyuqvae li, kaol yoqhhaeteel'ae xilnye geegaeq yil biq: Ngael da'li kaol ngaedae'ae mol li maoq, ngaedae laoq noteel e Aeqdae eiq ngeel'ae; ngaeq e Momil'ae mol li maoq, Momil laoq noteel e Momil eiq ngeelvae." 18 Moqdalla e Maqlilyal yil laol laqcaqhael'ae geegaeq biq: "Ngael Hhaoqsongl yaol mol aeqwae!" Yoqhhaeq lye Hhaoqsongl yoqhhaeq'ae gee biq e saeziqhael yoqhhaeteel'ae geegaeq hhei biq.
Yesu aeqyoq yaol laqcaqhael'ae bi molli
19 Liqbailtian e kiqsulkiqxeiq fu, laqcaqhael qiqgael zhol'eeq deelhhei hhae, yoqhhaeteel Yoqtail cholyaeqhael'ae gu gil biq, kaol oheiq piqtyeq deelhhei hhae. Yesu lael laol yoqhhaeteel onglci'ae haoqtul deelhhei, gee: "Noteel'ae neesaelhhae mael yo'li biq lye nyuqlil!" 20 Saeziq xilmael gee hhei'laol, nulhhael dongqpyeq vae kaol aqlaq mael yoqhhaeteel'ae bi fu'ae. Laqcaqhael Hhaoqsongl yaol mol hhei'laol hhaol gil biq'ae. 21 Yesu yoqhhaeteel'ae yol gee biq: "Noteel'ae neesaelhhae mael yo'li biq lye nyuqlil. Aeqdae ngaeq'ae haelmillye moqheilheil duyi laq laol, ngael eiq noteel'ae haelmillye moqheilheil duyil laqngeel." 22 Saeziq xilmael gee hhei'laol, yoqhhaeteel'ae saeq qiq pu bo hhei gil biq hhae, gee: "Noteel senllinq mael mul gil oq! 23 Noteel aeqsul e golsiq mael shelmianq biq laol, aeqsul e golsiq mael hhae bi shelmianq wae; noteel aeqsul e golsiq mael maq shelmianq biq laol, aeqsul e golsiq mael maeq hhae bi shelmianq'ae."
Yesu Domaq'ae bi molli
24 Laqcaq qyelniq hhaeq onglci'ae, qiq hhaeq laoq "Haeqmoq" (Xi'lal saeziq "Haeqmoq" mael "Diqtuqmaq" lye cu hhei hhae") lye gul biq e Domaq laoq, Yesu lael fu, laqcaqhael nyegael qiqgael maeq baelzhol'ae. 25 Baeqjyelboq e laqcaq yoqhhaeq'ae gee biq: "Ngaeteel Hhaoqsongl yaol mol aeqwae." Domaq yoqhhaeteel'ae gee biq: "Ngael yoqhhaeq e aqlaq e dinziq diq do gol e naelheiq mael maeq mol, kaol ngaeq e laqnyul maellye naelheiq tyulmael'ae maeq tyuqdo hhei, kaol ngaeq e aqlaq maellye yoqhhaeq e nulhhael dongqpyeq'ae maeq tyuqdo hhei kaollaoq, ngael laoq aeqdilmyel maeq xiangxinl yil."
26 Heiq nao gol hhei'laol, Laqcaqhael laoqhaol onglci'ae yol zhol hhae, Domaq eiq yoqhhaeteel nyegael qiqgael baelzhol'ae, kaol oheiqhael eiq piqtyeq hhei vae. Yesu lael vae, kaol yoqhhaeteel onglci'ae haoqtul deelhhei, gee: "Noteel'ae neesaelhhae mael yo'li biq lye nyuqlil!" 27 Aeqnaol Domaq'ae gee biq: "Noq e laqnyul mael saeqvae tyuq deelhhei, kaol ngaeq e aqlaq mael'ae fu hhei! Noq e aqlaq mael tyuqdu hhei, kaol ngaeq e nulhhael dongqpyeq'ae pa fufu! Haq huaiqyiq, xiangxinl maoqhhae!" 28 Domaq yoqhhaeq'ae gee biq: "Ngaeq e Hhaoqsongl! Ngaeq e Momil!" 29 Yesu gee: "Nol xiangxinl mael laoq, ngaeq yaol mol kaol'ae; maeq mol myel xiangxinl tyuhael laoq geeqlongq meeq vae."
Aeqcheekaol suqhhaq xilmael cu
30 Yesu laqcaqhael e yiqsiboq'ae baeqjyelboq e shenqjiq zhee zongl wae siq, suqhhaq xilmael taq'ae maq cu deelhhei'ae. 31 Ngeelfeiq, silqinq xihael cuga hhei mael laoq, noteel'ae Yesu laoq Jidu kaol Momil e Yaqyo ngeelvae lye bi xiangxinl maoqlye hhae, kaol noteel xiangxinl laol yoqhhaeq e cholmil gae'lye aeqyil hhamul wae.