Yesu dyeqhoqlal vae
24
Liqbailtian e mqshoq naqlye fu, cholhae aeqmaehael paeqgaelsael meeq deelhhei e nulsael lael aeqmyel mael, heil hheikaol fuq'ongl'ae keellael. 2 Haqlo mael fuq'ongl oheiq ae'lye leeqpong yi mol hhei biq. 3 Yoqhhaeteel do'li vae, ngeelfeiq, Hhaoqsongl Yesu e aeqhhaol mael maeq mol hhei biq'ae. 4 Yoqhhaeteel aeqcheekaol xilnye oqlolyaeq lye nyuq fu, aelhongq zheelniqlye dum hhei e cholyaeq niq nulhhaeq qiqlaqmyel yoqhhaeteel e dongqpyeq'ae haoqtul deelhhei. 5 Yoqhhaeteel gu gil biq, kaol maduq mael milcaeq vae tongqmaoq yil, tyu niq nulhhaeq yoqhhaeteel'ae gee biq: "Aeqcheekaol cholsil onglci'ae choldyeq saelpo lilmaeq? 6 Yoqhhaeq saeqvae maeq zhol'ae, dyeqhoqlal vae. Noteel laoq yoqhhaeq Ja'lillil vae zhol fu, noteel'ae haelmillye geegaeq laeq hhae lye mael nyuqdeel maoqhhae. 7 Yoqhhaeq gee: 'Cholyaeq Yaqyo yaol aeqdilmyel golsiq za e cholyaeq e aqlaq'ae eemoq biq, kaol shiqziljal mael'ae diqcheeq biq, kaol dilsan tian laoq dyeqhoqlal maoqlye hhae.'" 8 Yoqhhaeteel Yesu gee gol e saeziq mael nyuq tullaeq biq. 9 Tyulnye laol, fuq'ongl ae'lye hoqli vae, kaol silqinq xihael gilzuqmyel shiqtuq qyelqiq hhaeq'ae kaol baeqjyelboq e cholyaeqhael'ae geegaeq hhei biq. 10 Cholhae aeqmae xihael laoq Moqdalla e Maqlilyal, Yoqyalnaq, Yaqgel e aeqmae Maqlilyal, kaol yoqhhaeteel nyegael qiqgael baelzhol e baeqjyelboq e cholhae aeqmaehael'ae. Yoqhhaeteel lye silqinq xihael shiqtuqhael'ae geegaeq hhei biq. 11 Ngeelfeiq, shiqtuqhael saeziq xihael yiqzenlmyel gee hhae lye kei gil biq, kaol yoqhhaeteel'ae maeq xiangxinl biq'ae. 12 Biqdeq tullael kaol fuq'ongl za myel vae ki keellaeq, dolmoqmoq gayil kaol onglciboq'ae chifu do hhei, tyuqvae paelpul mol hhei biq dyul wae, kaol hoqyil vae, hal peqlal e silqinq mael gae'lye gaqmaqzuq li biq kaol aeqcheekaol xilnye oqlolyaeq lye nyuq'ae.Yesu Yiqmaqvuqsi gaelmae ae'lye yoqhhaeteel'ae bi molli
Keq16:12-13
13 Tyuqfu qiq nao, laqcaqhael onglci niq nulhhaeq pusiq qiqgael'ae yil gil'ae, pusiq tyulmael Yiqmaqvuqsi lye gul hhae, Ye'lulsa'lenq'ae shiqyiq gong'liq kaeq hhae. 14 Yoqhhaeteel hal peqlal e silqinq xilmael qiqhhaeq qiqhhaeq'ae geegaeq gil'ae. 15 Yoqhhaeteel geezil geezae gil siq fu, Yesu yoqhhaeteel'ae deel niqli, yoqhhaeteel nyegael qiqgael bael deel hhae. 16 Ngeelfeiq, yoqhhaeteel e ma'ne mael maeq bi fu'loq ongl'ae, kaol yoqhhaeq yaol maeq fuduzaq hhei'ae. 17 Yesu yoqhhaeteel'ae gee biq: "Noteel gaelmae deel fu, noteel qiqhhaeq qiqhhaeq'ae aeqchee silqinq geegaeq gil lilmaeq?" Yoqhhaeteel songl deelhhei, maduq mael'ae laoq teel eiq maeq hhaol gil biq'ae. 18 Niq nulhhaeq onglci'ae Geqliuqba lye gul biq e qiq hhaeq yoqhhaeq'ae geehoq biq: "Ye'lulsa'lenq'ae lael e cholyaeqhael onglci'ae, yaeqmeel xi qiqniq nao tyuqvae aeqchee silqinq peqlal hhae lye maeq loq mael nol qiq hhaeq wae. 19 Yesu yoqhhaeteel'ae naelhaeq biq: "Aeqchee silqinq peqlal hhaemaeq?" Yoqhhaeteel gee: "Naqsa'lel cholyaeq Yesu e silqinq'ae, xitaeq laoq xianzhi'ae, Momil kaol gilzuqmyel cholyaeqhael e yiqsiboq'ae zongl mael kaol gee mael laoq pyuqbo hhae. 20 Ngaeteel e jilsizhangqhael kaol yoheeqhael lye yoqhhaeq yaol ee duyil biq, hhae sil e golsiq za'ae lye gee biq, kaol shiqziljal taq'ae diqcheeq biq hhae. 21 Ngeelfeiq, ngaeteel haeqfu eiq panlwangl deelzaeq hhei e Yiqsellyel cholyaeq yaol jiulsuq maoqlye e qiq hhaeq laoq yoqhhaeq ngeelvae. Xilnye maeqcilmyel, silqinq xilmael peqlal mael yaeqnao keel laol suq nao zoq wae. 22 Ngaeteel onglci'ae cholhae aeqmae qiqniq nulhhaeq gae'lye, ngaeteel'ae gaqmaqzuq lal yae: Yoqhhaeteel mqshoq naqlye fuq'ongl'ae li gil vae, 23 Ngeelfeiq, Yoqhhaeq e aeqhhaol mael maeq saelpopuq hhei ongl biq'ae, hoqlal fu mqmae yosongl yaol mol lil lye gee'ae, mqmae yosongl tyuhael yoqhhaeq dyeqhoqlal vae lye gee hhae! 24 Ngaeteel nyegael qiqgael baelzhol e cholyaeq qiqniq nulhhaeq fuq'ongl'ae keelli, yoqhhaeteel haelmol mael cholhae aeqmaehael gee laoqmyel hhae, ngeelfeiq, yoqhhaeq yaol maeq mol yo'ae." 25 Yesu gee: "Ei, yaeqzhoq o, xianzhihael gee e saeziqhael, noteel e neemae mael haeldyul feiq maeq xiangxinl'ae. 26 Jidu laoq yoqhhaeq e rongqyaol'ae do'li laefuq'ae, aeqdilmyel kuqnanl xihael hhae pi maeqngeel maeq?" 27 Tyulkaol, yoqhhaeq zhoqmyel Moxi kaol xianzhihael lye suqhhaq taq'ae yoqhhaeq'ae cu deelhhei mael, gilzuqmyel yoqhhaeteel'ae gee'loq hhei biq.
28 Yoqhhaeteel keelyil maoqlye e pusiq vae keelli goqbiq fu, Yesu baelyaelmyel laefuq'ae deel maoqlye zongl wae siq. 29 Yoqhhaeteel yoqhhaeq'ae haelmillyekaol eiq zholdeelsaeq lye gee biq: "Maq naq vae, mqkiqkiq gayi goqbiq vae, ngaeteel nyegael qiqgael baelzhol oq!" Kaol yoqhhaeq do'li kaol yoqhhaeteel nyegael qiqgael bael zholgae hhei vae. 30 Aelhoq zaeq gil fu, yoqhhaeq aqba heilqei hhei, kaol meeqyaevae lye gee hhei'laol, heiqpa hheikaol yoqhhaeteel'ae heilmoq hhei biq. 31 Yoqhhaeteel e ma'ne mael pong'lael biq vae, Yesu yaol fuduzaq hhei vae! Ngeelfeiq, Yesu yoqhhaeteel e yiqsiboq ae'lye gabu hhei vae. 32 Yoqhhaeteel hhaellaelmyel geegaeq gil: "Yoqhhaeq gaelmae ae'lye ngaeteel'ae saeziq geechoq laeq, aedeeteel'ae Momil e Suqhhaq mael gee'loq laeq fu, aedeeteel e neemae mael laoq honglqye'lye maeqngeel maeq?" 33 Yoqhhaeteel nae'naemyel Ye'lulsa'lenq'ae hoqli gil vae, shiqtuq qyelqiq hhaeq kaol yoqhhaeteel nyegael qiqgael zhol'eeq deelhhei e cholyaeqhael, 34 'Hhaoqsongl aeqdilmyel dyeqhoqlal vae, Ximenq'ae bi molli vae.' lye gee mol hhei biq. 35 Tyulkaol, yoqhhae niq nulhhaeq laoq gaelmae ae'lye puqlael mael, kaol aqba heiqpa fu Yesu yaol haelmillye fuduzaq hhei lil lye e silqinq mael yoqhhaeteel'ae loqlilshe'lye geegaeq hhei biq.
Laqcaqhael dyeqhoqlal e Yesu yaol mol vae
36 Yoqhhaeteel saeziq xilmael gee siq fu, Yesu aeqyoq yoqhhaeteel onglci'ae haoqtul deelhhei, yoqhhaeteel'ae gee biq: "Noteel'ae neesaelhhae mael yo'li biq lye nyuqlil!" 37 Yoqhhaeteel zhee gu gil biq'ae, cholsil e yohael mol lael yae lye kei gil biq hhae. 38 Yesu yoqhhaeteel'ae gee biq: "Noteel aeqcheekaol gu gil laeq hhaemaeq, aeqcheekaol maeq xiangxinl gil lilmaeq? 39 Ngaeq e aeqkeel aqlaq mael'ae fu gil, aeqdilmyel ngael lil. Ngaeq'ae so fufu gil, yohael laoq saeqzil maeq gaecheeq saeq'yuq maq zoq, ngeelfeiq, noteel fu gil, ngaeq'ae laoq za'ae." 40 Saeziq xihael gee byel hhei'laol, aeqkeel aqlaq mael yoqhhaeteel'ae bi fu hhei vae. 41 Yoqhhaeteel maeq xiangxinl peq lal aeqmyel zongl gil biq, gaqmaqzuq gil biq, hhaol eiq hhaol gil biq. Yesu gee: "Noteel e saeqvae aeqchee zaeq e za maeq?" 42 Yoqhhaeteel yoqhhaeq'ae ngaeqdyel pe meeq aeqmyel qiq keiq heilmoq hhei biq'ae. 43 Yoqhhaeq heil pol hheikaol yoqhhaeteel yiqsiboq ae'lye zaeq vae.
44 Yesu yoqhhaeteel'ae gee biq: "Xilmael laoq ngael laefuq noteel nyegael qiqgael zhol fu, noteel'ae gee gol biq e saeziq mael'ae: Moxi e lilfaq, xianzhihael e Suqhhaq kaol Shipian taq'ae ngaeq'ae cu deelhhei hael, gilzuqmyel peqlal maoqlye hhae." 45 Tyulkaol, yoqhhaeq lye yoqhhaeteel e neemae mael bi nyuqgeel li vae, kaol yoqhhaeteel'ae Momil e Suqhhaq taq'ae saeziq mael bi loq li vae. 46 Yoqhhaeteel'ae yol gee biq: "Momil e Suqhhaq taq'ae xilnye cu deelhhei: "Jidu laoq aeqdilmyel hhae bi zonglkyuq hhae, dilsan tian laoq cholsil onglci ae'lye dyeqhoqlal maoqlye hhae. 47 Cholyaeqhael yoqhhaeq e cholmil maellye neemae paellael, kaol golsiq mael hhae bi shelmianq e yo'liq mael geegaeq gil maoqhhae, Ye'lulsa'lenq ae'lye mael haeqvae milcaeq keellye geegaeq keelyil maoqhhae. 48 Noteel laoq silqinq xihael bael mol e cholyaeq'ae. 49 Ngael ngaedae lye biq laqngeel lye gee gol mael noteel'ae bi yo'lael maoq, ngeelfeiq, noteel mqmae ae'lye lael e onglzaeq mael hhamul fu keellye, milmae heeqmyel vae doq deelhhei maoqhhae."
Momil lye Yesu yaol mqmae vae sheeq da hoqli vae
Keq 16:19-20; Tuq1:9-11
50 Yesu yoqhhaeteel yaol sheeq duyil, Boqdalniq e dongqpyeq'ae keellael, aqlaq niqboq myel baqqei hheikaol yoqhhaeteel'ae geeqlongq biq biq. 51 Geeqlongq biq biq siq fu, Yesu yoqhhaeteel zaellye deelsae hhei vae, kaol Momil lye yoqhhaeq yaol mqmae vae sheeq da hoqli vae. 52 Kaol yoqhhaeteel yoqhhaeq'ae heel biq, zhee hhaol gae'lael aeqmyel Ye'lulsa'lenq vae hoq keelli vae, 53 Sholhaol onglci'ae duqlye Momil laoq maeqdaeqhhaeq'ae lye gee'ae.