Maeq gongyil e guanqja
16
Yesu laqcaqhael'ae yol gee biq: "Yoha toq'ae guanqja qiq hhaeq zhol'ae. Ochoq lye hhaoqsongl'ae guanqja xitaeq laoq, hhaoqsongl e jadangl mael haelmillye mulgoq laol haelmillye mul hhae lye geedu lal biq. 2 Hhaoqsongl yoqhhaeq yaol gul laeq, yoqhhaeq'ae gee biq: 'Ngael aeqcheekaol nol yulnye xilnye zongl'ae lye gaeqlael hhaemaeq? Nol guanqja maq hha geiq vae, kaol nol guanq e zanglmuq mael ngaeq'ae bi fu hhei laeq.' 3 Guanqja tyutaeq neemae mael'ae nyuq: 'Hhaoqsongl ngaeq'ae guanqja maeq bi geiq laq vae, ngael aeqchee zongl yil laeq? Aeqhael mul laol, ngael aqha maq zoq yae! Aelhoq saelzaeq laol, ngael saqdol yae! 4 Ngael haelmillye zongl maoqlye loq wae. Ngael guanqja maq geiq aeqnaol'ae, cholyaeqhael ngaeq yaol yoqhhaetoq'ae sheeqli laeq'ae.' 5 Tyulkaol, yoqhhaeq e hhaoqsongl'ae dyuqbaq ca e cholyaeqhael qiqhhaeq qiqhhaeq lye gul laeq, kaol laefuq fuqli qiq hhaeq'ae naelhaeq biq: 'Nol ngaeq e hhaoqsongl'ae haeldyul ca lilmaeq?' 6 Yoqhhaeq gee: 'Zhoqcae cil qiqhael (100) buqyaeq.' Guanqja gee: 'Nol jyelzu suqhhaq mael heil laeq, nae'naemyel zholgae hheikaol ngaeqqyel lye cu hhei.' 7 Baeqjyelboq e qiq hhaeq'ae yol naelhaeq biq: 'Nol laoq haeldyul ca lilmaeq?' Yoqhhaeq gee: 'Meqziq qiqhael (100) byesu.' Guanqja gee: 'Nol jyelzu suqhhaq mael heil laeq, kaol heiqqyel lye cu hhei.' 8 Kaol hhaoqsongl maeq gongyil e guanqja'ae silqinq zongl mael vuqno zoq she lye gee biq. Yaeqmeel naohaeq e cholyaeqhael aeqyoyoq e shilgail'ae silqinq zongl mael aeqcael e yaeqguq silqinq zongl mael taq'ae vuqnoq hhal zoq kaol'ae. 9 Ngael noteel'ae geegaeq laeqngeel, noteel e milcaeq taq e dyuqbaq mael lye yelchoqchoq yil maoqhhae, kaol dyuqbaq maq mulyo fu, yoqhhaeteel lye noteel yaol haeqfu eiq zadeel e laoqhaol vae sheeq do'li laq'ae.10 Mildi'lye e silqinq mael taq'ae neemae xyelpu maqpu kaollaoq, haeqheemyel e silqinq mael taq vae eiq neemae xyelpu maqpu ngeelvae; mildi'lye e silqinq mael taq'ae zaqgiqgiq kaollaoq, haeqheemyel e silqinq mael taq vae eiq zaqgiqgiq ngeelvae. 11 Noteel milcaeq taq e dyuqbaq mael'ae neemae xyelpupu kaollaoq, aeqsul noteel'ae Momil aeqdilmyel fuyo e moqgoq mael toqshiq hhei laeq'ee laeq? 12 Noteel ochoq e moqgoq mael neemae xyelpupu kaollaoq, aeqsul aeqyoq e moqgoq mael noteel'ae heiltyeq lye heilmoq hhei laeq'ee laeq?
Cholyaeq qiq hhaeq hhaoqsongl niq nulhhaeq'ae maeq hhae fuqsil'ae
13 "Yaqhacheqzaq e cholyaeq qiq hhaeq hhaoqsongl niq nulhhaeq'ae maeq hhae fuqsil'ae; yoqhhaeq xitaeq'ae neemasu zaq biq, yultaeq'ae gaeq biq, xitaeq'ae neemae xyelpu maqpu biq, yultaeq'ae maeq fu'qiq'ongl biq myel zongl ngeelvae. Noteel Momil vae fuqsil, Maqmenqa mael'ae yol fuqsil myel maeq zongl hhaeq'ae." 14 Saeziq xihael, dyuqbaq hhaol biq e Faqlilsail cholyaeqhael'ae gaeq hhei biq laol, Yesu'ae eel gil biq'ae. 15 Yesu yoqhhaeteel'ae gee biq: "Noteel cholyaeqhael e yiqsi'ae gongyil e cholyaeq lil lye gee zaeq hael laoq, Momil laoq noteel e neemae mael haelmillye hhae lye loq'ae; cholyaeq'ae lye fu'li'laol zhee pyuq hhae lye feiq, Momil'ae lye fu'li'laol hol lael aeqmyel hhae. 16 Lilfaq taq'ae cu deelhhei e saeziq kaol xianzhihael haelgee e saeziq mael, shelxiq zonglzaeq e Yoqhanl e naohaeq'ae guanq keel hhae, kaol tyuq ae'lye aeqnaol laoq, Momil e Goqja e fuqyin mael geegaeq duyil vae, tyulkaol, cholyaeqhael aeqsul eiq Momil e Goqja vae haelmillye hha do'li congl maeq lye byuqdo maoqhhae. 17 Mqmae milcaeq mael maqza myel peqyil hhei mael laoq, lilfaq mael teel hega hhei taq'ae hhael yael'ae. 18 Haeqmiq yaol maq mul biq myel baeqjyelboq e haeqmiyaeq yaol sheeqzaeq yil e qiq hhaeq laoq, ochoq nyegael neemaeba e golsiq hhae pi ngeelvae; haqyo lye maq mul biq e haeqmiyaeq yaol sheeqzaeq yil e qiq hhaeq eiq, ochoq nyegael neemaeba e golsiq hhae pi ngeelvae."
Yoha kaol Lasa'lul e dullaelmyel guqjin
19 "Yoha qiq hhaeq, ziqseq e poljye kaol keeldaelnil e ziq e aelhongq dum hhei, kaol naochomyel zaeqmeeq dolmeeq nyelhhae'ae. 20 Ngeelfeiq, yoqhhaetoq e oheiq vae, aeqhhaol qiqsiqmyel aelnaelnael biq e aelhoq saelzaeq e qiq hhaeq zhol'ae, cholmil mael Lasa'lul lye gul biq hhae. 21 Yoqhhaeq laoq yoha toq e zaelzhee ae'lye leeqgae yi mael hha ozaq maeqhe lye nyuq'ae, ngeelfeiq, aeqkeeq yoqhhaeq e aelnael mael'ae meq lal biq dyul wae.
22 Aeqnaol aelhoq saelzaeq e tyutaeq sil vae, mqmae yosongl lye Yalboqlahanl e yiqsiboq'ae sheeqli biq. Yoha tyutaeq eiq sil vae, kaol baqduqm biq vae. 23 Yoha mil'oq vae shelkuq hhae, vuqduq baqtul hhei'laol gaelmaolsae'lye, Yalboqlahanl kaol yoqhhaeq e yiqsiboq e Lasa'lul yaol mol hhei biq. 24 Kaol gul gae'lael aeqmyel gee: 'Ngaeq e aeqpyuq aeqdae Yalboqlahanl o! Ngaeq'ae hhaoqsaeqsaeq laeq! Lasa'lul yaol bi lael kaol aqlaq maellye eelcuq teel zongljyel hheikaol, ngaeq e myeqhael mael bi qyeq laq! Ngael saeqvae miqhulm onglci'ae zhee zholsaeq yae.' 25 Ngeelfeiq, Yalboqlahanl gee: 'Yaeqguq, nol maeq sil laefuq'ae haelmillye zholsael du'laq yae lye nyuq fufu hoq, Lasa'lul eiq haeldyul dyulmae shelkuq gol aeqwae. Yoqhhaeq yaeqmeel saeqvae lye qiqgiq maeq nyuqsaeq kael vae, ngeelfeiq, nol laoq hhae shelkuq hhae. 26 Xuldyul maeqcilmyel, ngaeteel xiboq ae'lye noteel yulboq'ae dongqto maqza e longlkaeq kaeqmae qiq mal kaeq hhae, cholyaeq xiboq ae'lye noteel tyuboq'ae guq yil maoqlye maeq ongl'ae, tyuboq ae'lye ngaeteel xiboq'ae guq lael maoqlye eiq maeq ongl'ae. 27 Yoha gee: 'Ngaeq e aeqpyuq aeqdae o! Xilnye hhae lye kaollaoq, Lasa'lul yaol ngaedae toq'ae moqheilheil du hhei lye geezaeq lil. 28 Ngaeq'ae algo aeqnil ngaeq hhaeq zhol wae siq, yoqhhaeq yoqhhaeteel'ae jinqgaol biq kael'ae, aeqgael yoqhhaeteel eiq saeqvae shelkuq myel vae keellael maeqhe.' 29 Yalboqlahanl gee: 'Yoqhhaeteel laoq Moxi kaol xianzhihael e saeziq mael naelhaeq kael'ae!' 30 Yoha gee: 'Maeq hhaeq'ae! Ngaeq e aeqpyuq aeqdae Yalboqlahanl o! Cholyaeq qiq hhaeq cholsil onglci ae'lye dyeqhoqlal kaol yoqhhaeteel zhol myel e tyuqvae keelyil laol, yoqhhaeteel laoq neemae paellael wae.' 31 Yalboqlahanl gee: 'Yoqhhaeteel Moxi kaol xianzhihael e saeziq mael maeq naelhaeq goq laol, cholyaeq qiq hhaeq cholsil onglci ae'lye dyeqhoqlal kaol'eiq, yoqhhaeteel eiq maeq naelhaeq nae'ae.'"