Yesu geemyeq e yo'li suq mael
17
Yesu laqcaqhael'ae gee biq: "Cholyaeq yaol cheeqmu hheikaol golsiq bi zonglpizaeq e silqinq laoq aeqdilmyel za hhae. Ngeelfeiq, cholyaeq yaol golsiq bi zonglpizaeq e qiq hhaeq laoq zaihuol za vae! 2 Cholyaeq qiq hhaeq lye ngaeq'ae xiangxinl e yaeqguqhael onglci e qiq hhaeq yaol, golsiq bi zonglpizaeq kaollaoq, tyutaeq e kongqlongl mael'ae giho qiq siq kaltoq hheikaol, eeldeel deelmae vae bi beiqdo hhei mael hhael meeq'ae! 3 Noteel aeqyae'lye kei maoqhhae! Noq e aqsseq aeqnil qiq hhaeq golsiq zonglpizaeq kaollaoq, yoqhhaeq'ae gaezaeq biq maoqhhae; yoqhhaeq neemae paellael kaollaoq, yoqhhaeq'ae yuanqliangl biq maoqhhae. 4 Yoqhhaeq noq'ae qiq nao'ae lye siq pu zonglzhil laeq, kaol noq zael'ae siq pu hoqlal, gee: 'Ngael neemae paellael wae!' Xilnye kaollaoq, nol haeqfu eiq yoqhhaeq'ae yuanqliangl biq maoqhhae."5 Shiqtuqhael Hhaoqsongl'ae gee biq: "Nol ngaeteel'ae hhael naeq myel xinlxin biq hhei laq." 6 Hhaoqsongl gee: "Noteel e xinlxin mael oqpa oqne qiq ne hee zoq kaollaoq, shoq aelbol xi qiqboq'ae gee biq: 'Nol noq e aelcil mael eepu hhei, kaol eeldeel deelmae vae til doyil!' Aelbol xi qiq bol laoq noteel gee mael naelhaeq'ae.
7 "Noteel onglci'ae aeqsul qiq hhaeq laoq, noq e yaqhacheqzaq e cholyaeq haeldye qeiq yil, paelsilmyel aqciq hoqzaq yil kaol hoqlal fu, yoqhhaeq'ae 'nae'naemyel zholgae hheikaol aelhoq zaeq lael' lye gee biq lilmaeq? 8 Nol yoqhhaeq'ae xilnye gee biq maeqngeel maeq? 'Ngaeq'ae mqkiq e aelhoq caq yil laq, haeqpi paqda hheikaol ngaeq'ae fuqsil laeq. Ngael zaeqdye doldye hhei kaolmaoqlaol nol maeq hhae zaeq dol'ae.' 9 Yaqhacheqzaq e cholyaeq qiq hhaeq hhaoqsongl moqheilheil mael zonglbyel gae'lye, hhaoqsongl yoqhhaeq'ae meeqyaevae lye gee biq maeq? 10 Tyulkaol, noteel eiq xilnye ngeel maoqhhae, noteel'ae moqheilheil laeq mael zonglbyel hhei aeqnaol'ae, gee maoqhhae: 'Ngaeteel laoq qiqgiq maq mulyo e yaqhacheqzaq e cholyaeqhael lil, ngaeteel aeqdilmyel zongl maoq mael zongl dyul oqyil.'"
Yesu lye maqfeng nael biq e cholyaeq qyel hhaeq yaol zonglmeeq biq
11 Yesu Ye'lulsa'lenq vae yil e gaelmae'ae, Saqmaqlilyal kaol Ja'lillil e kaeqlaeq ae'lye deelpol duyil. 12 Yoqhhaeq pusiq qiq gael vae do'li fu, maqfeng nael biq e cholyaeq qyel hhaeq yoqhhaeq boq'ae deel laeq. Yoqhhaeteel gaelmaolsae'lye haoqtul deelhhei, 13 Kaol yotyel haeqheemyel gee: "Yesu o! Laoqsi o! Ngaeteel'ae hhaoqsaeqsaeq laeq!"
14 Yesu mol hhei biq laol, yoqhhaeteel'ae gee biq: "Yil gil, aeqhhaol mael jilsi'ae bi fu hhei." Yoqhhaeteel yil e gaelmae ae'lye meeqsholyil biq vae. 15 Onglci e qiq hhaeq aeqyoq meeqsholyil vae lye mol hhei biq laol, deelpol hoqlaeq kaol yotyel haeqheemyel Momil'ae rongqyaol biq biq, 16 Kaol Yesu e aeqkeel dongqpyeq'ae vuqduqtongq gae hheikaol yoqhhaeq'ae meeqyaevae lye gee biq hhae. Xitaeq laoq Saqmaqlilyal cholyaeq'ae. 17 Yesu gee: "Meeqsholyil e cholyaeq laoq qyel hhaeq maeqngeel maeq? Baeqjyelboq e hhaoq hhaeq laoq haeqvae zhol hhaemaeq? 18 Baeqjyelboq minqcuq e cholyaeq xitaeq maoqlaol, hoqlal kaol Momil'ae rongqyaol biq biq e qiq hhaeq eiq maeq zhol maeq?" 19 Yesu yoqhhaeq'ae gee biq: "Tullael, deel aeqkaovae, noq e xinlxin lye noq yaol bi meeqsholyil vae."
Zai'nanl nanlmae yo'lael e naohaeq
20 Faqlilsail cholyaeqhael Yesu'ae naelhaeq biq: "Momil e Goqja mael haeqfu keellael hhaemaeq?" Yoqhhaeq geehoq biq: "Momil e Goqja mael keellael fu cholyaeqhael maeq fudu ongl'ae. 21 Momil e Goqja mael noteel onglci'ae za hhae. Tyulkaol, cholyaeqhael 'fu hhei, saeqvae za hhae' paelsilmyel 'fu hhei, tyuqvae za hhae' lye xilnye gee maeq ongl'ae."
22 Yesu laqcaqhael'ae gee biq: "Naohaeq keellael goqbiq vae, noteel Cholyaeq Yaqyo gaeyi e naohaeq tyu qiq nao mol goq feiq, maeq hhae mol congl'ae. 23 Cholyaeqhael noteel'ae 'fu hhei, tyuqvae za hhae' paelsilmyel 'fu hhei, saeqvae za hhae' lye gee kaollaoq, noteel haq duyil, yoqhhaeteel vae eiq haeq cho'lyeq gil. 24 Mqmiq mael mqmae xiboq'ae miq laol, yulboq'ae mol keelyil laoqmyel, Cholyaeq Yaqyo gaeyi fu eiq xilnye ngeelvae. 25 Ngeelfeiq, yoqhhaeq aeqdilmyel laefuqmyel haelnaeqmyel hhae shelkuq hhae, kaol yaeqmeel dyeqdeel e cholyaeqhael lye maq mul lye zongl biq ngeelvae. 26 Cholyaeqhael Noqyal e naohaeq'ae haelzonglhael, Cholyaeq Yaqyo e naohaeq'ae eiq xilnye zongl gil ngeelvae. 27 Tyuqfu, cholyaeqhael haelzael'ae laoqmyel zaeq eiq zaeq, dol eiq dol, mul eiq mulzaeq, sheeq eiq sheeqzaeq. Noqyal hoq hoqmae mael'ae do'li e qiq nao keellye, haqmeq eeldeel deelmae lael vae, kaol yoqhhaeteel yaol gilzuqmyel zonglmye byel biq vae. 28 Loqdeq e naohaeq e cholyaeqhael eiq xilnye ngeelvae. Yoqhhaeteel haelzael'ae laoqmyel zaeq dol, moqgoq vulzaeq ongqzaeq, aeqhael mulzaeq kaol laoqhaol cuzaq gil hhae. 29 Ngeelfeiq, Loqdeq Soqdomaq ae'lye deelsae tyuqfu qiq nao'ae, aeqzaeq doq mael kaol liuqhuangq mael mqmae ae'lye vuq'yel'yel laoqmyel xyehael gae hhei, yoqhhaeteel yaol gilzuqmyel zonglmye biq vae. 30 Cholyaeq Yaqyo gaeyi e qiq nao eiq xilnye ngeelvae. 31 Tyuqfu qiq nao'ae, cholyaeq tongqgee'ae zhol, ngeelfeiq, moqgoqhael laoq laoqhaol onglci'ae za kaollaoq, heil hoqyil maoqlye haeq gaeyi; haeldye'ae zhol e cholyaeqhael eiq laoqhaol'ae haq hoqli. 32 Loqdeq e haeqmiq e guqjin mael nyuqdeel maoqhhae! 33 Aeqsul aeqyoq e aeqyil mael jiulzaeq maoqlye nyuq kaollaoq, aeqyoq e aeqyil mael maqza ngeelvae; ngeelfeiq, yoqhhaeq e aeqyil mael maqza vae kaollaoq, aeqdilmyel aeqyoq e aeqyil mael hha dyeqdeel'ae. 34 Ngael noteel'ae geegaeq laeqngeel, tyu qiq mil'ae ssuqhhal qiq mal taq'ae ssuqza deelhhei e cholyaeq niq nulhhaeq onglci'ae, qiq hhaeq yaol laoq sheeqli biq, qiq hhaeq yaol laoq beiqdeelsaeq biq ngeelvae. 35 Haeqmiyaeq niq nulhhaeq giho qiqgael gi fu, qiq hhaeq yaol laoq sheeqli biq, qiq hhaeq yaol laoq beiqdeelsaeq biq ngeelvae."a 37 Laqcaqhael Yesu'ae naelhaeq biq: "Hhaoqsongl o! Haeqvae peqlal maoqlye hhaemaeq?" Yesu yoqhhaeteel'ae gee biq: "Sil e aeqhhaol haeqvae za laol, haeqjyelhael eiq tyuqvae beel'eeq deelhhei lael."