Mqmae Goqja vae hhaelheeq heeqli e qiq hhaeq
18
Tyuqfu, laqcaq lael kaol Yesu'ae naelhaeq biq: "Mqmae Goqja vae hhaelheeq heeqli e qiq hhaeq aeqsul maeq?" 2 Yesu lye yaeqguq guqyaeq qiq hhaeq gul laeq, kaol yoqhhaeq yaol yoqhhaeteel onglci vae bi haoqtul deelhhei, 3 Gee: "Ngael aeqdilmyel noteel'ae geegaeq laeqngeel, noteel maeq polhoqlael, kaol yaeqguq guqyaeq laoqmyel maq peqyil kaollaoq, aeqdilmyel Mqmae Goqja vae maq hha do'li'ae. 4 Tyulkaol, aeqsul aeqyoyoq yaeqguq guqyaeq xitaeq laoqmyel maeq dilqeizaeq laol, yoqhhaeq Mqmae Goqja vae laoq hhaelheeq heeqli e qiq hhaeq ngeelvae. 5 Aeqsul ngaeq e cholmil gae'lye yaeqguq guqyaeq xitaeq laoqmyel e cholyaeq qiq hhaeq'ae sheeqcaq biq kaollaoq, ngaeq'ae sheeqcaq laq ngeelvae."Golsiq lye cheeqmu laeq mael'ae deiqtael maoqhhae
6 "Aeqsul lye ngaeq'ae xiangxinl e yaeqguqhael onglci e qiq hhaeq yaol golsiq bi zonglpizaeq kaollaoq, tyutaeq e kongqlongl mael'ae giho homae qiq siq kaltoq hhei, kaol eeldeel deelmae naq myel vae bi beiqdo hhei mael hhael meeq'ae! 7 Shilgail xilmael zaihuol za vae, yoqhhaeq lye cholyaeq yaol golsiq bi zonglpizaeq kaol'ae; cholyaeq yaol golsiq bi zonglpizaeq e silqinq laoq aeqdilmyel za hhae, ngeelfeiq, golsiq bi zonglpizaeq e qiq hhaeq laoq zaihuol za vae! 8 Noq e aqlaq qiqboq, paelsilmyel aeqkeel qiqboq lye noq yaol golsiq bi zonglpizaeq kaollaoq, dega hheikaol beiqgae hhei. Noq yaol aqlaq niqboq kaol aeqkeel niqboq myel cuq ga'lal aeqmyel qiqzael eiq maq myeyil kiq e aeqzaeq doq onglci'ae bi beiqdo hhei mael taq'ae laoq, aqlaq qiqboq maq lo, paelsilmyel aeqkeel qiqboq maq lo myel, haeqfu eiq zadeel e aeqyil za myel vae do'li mael hhael meeq'ae. 9 Noq e ma'ne qiqboq lye noq yaol golsiq bi zonglpizaeq kaollaoq, ma'ne mael heqdu hheikaol beiqgae hhei. Noq yaol ma'ne niqboq cuq ga'lal aeqmyel daq'oqlaqmae e aeqzaeq doq myel onglci'ae bi beiqdo hhei mael taq'ae laoq, ma'ne qiqboq maoq maq cu myel haeqfu eiq zadeel e aeqyil za myel vae do'li mael hhael meeq'ae."
Aqciq deelbu e dullaelmyel guqjin
10 "Noteel aeqyae'lye kei maoqhhae, ngaeq'ae xiangxinl e yaeqguqhael onglci e qiq hhaeq'ae maeq fu'qiq'ongl yae lye maeq zongl hhaeq'ae; ngael noteel'ae geegaeq laeqngeel, yoqhhaeteel e mqmae yosonglhael mqmae vae zhol, duqlye ngaeq e mqmae e aeqdae'ae molli hhae.a 12 "Cholyaeq qiq hhaeq'ae aqciq qiqhael (100) yaeq zhol'ae, onglci e qiq yaeq gaelmae deelbael biq kaollaoq, noteel haelmillye nyuq gil lilmaeq? Yoqhhaeq hhaoqqyel hhaoq yaeq tyuhael geeqzhoq vae bi zholdeelsaeq, kaol gaelmae deelbael e tyu qiq yaeq'ae saelpo hoqyil maeqngeel maeq? 13 Saelpopuq hhei kaollaoq, ngael aeqdilmyel noteel'ae geegaeq laeqngeel, yoqhhaeq aqciq xi qiq yaeq gae'lye hhaol biq mael, gaelmae maeq deelbael e hhaoqqyel hhaoq yaeq taq'ae hhael heeq'ae! 14 Noteel e mqmae vae zhol e aeqdae eiq xilnye hhae, ngaeq'ae xiangxinl e yaeqguqhael onglci e qiq hhaeq yaol eiq maeq bi baelyil goq'ae."
Silqinq zonglba e aqsseq aeqnil'ae za biq maoq mael
15 "Noq e aqsseq aeqnil lye noq'ae zonglzhil laeq kaollaoq, nol yil maoqhhae, nol kaol yoqhhaeq maoq maeq zhol fu ae'lye, yoqhhaeq zonglba mael geedu hhei biq. Yoqhhaeq nol gee mael naelhaeq kaollaoq, noq lye aqsseq aeqnil qiq hhaeq yaol jiul hoq hhei vae; 16 Yoqhhaeq maeq naelhaeq kaollaoq, nol baeqjyelboq e qiq hhaeq, paelsilmyel niq hhaeq yaol sheeqyil, 'Aeqchee mael taq vae eiq, bael siqcongl e cholyaeq niq nulhhaeq, paelsilmyel suq nulhhaeq e myeqbongq ae'lye geedu hhei maellye maoqlaol, ngeel'ae lye maeq hhae gee'ae'. 17 Yoqhhaeq yoqhhaeteel gee mael maeq naelhaeq kaollaoq, jiaolhuil'ae geedu li biq; jiaolhuil'ae maeq naelhaeq kaollaoq, yoqhhaeq yaol baeqjyelboq minqcuq kaol shuil shezaeq e cholyaeq'ae lye fupeq biq aeqmeel.
18 "Ngael aeqdilmyel noteel'ae geegaeq laeqngeel, noteel milcaeq vae hael kaltoqhael, mqmae vae eiq kaltoq maoq; noteel milcaeq vae hael keelpyelhael, mqmae vae eiq keelpyel maoq. 19 Ngael noteel'ae yol geegaeq laeqngeel, noteel onglci'ae niq nulhhaeq neemae qiq siq laoqmyel milcaeq taq'ae aeqchee silqinq geezaeq kaol'eiq, ngaeq e mqmae vae zhol e aeqdae yoqhhaeteel vae aeqdilmyel yoqhhaeteel geezaeq laoqmyel bi peqlal'ae. 20 Niq suq nulhhaeq ngaeq e cholmil maellye haeqvae julhuilkei laol, ngael tyuqvae yoqhhaeteel onglci'ae baelzhol kaollil."
Cholyaeq'ae maeq yuanqliangl e yaqhacheqzaq e cholyaeq
21 Tyuqfu, Biqdeq deelniq laeq, kaol Yesu'ae gee biq: "Hhaoqsongl o, ngaeq e aqsseq aeqnil ngaeq'ae zonglzhil laeq, ngael yoqhhaeq'ae hae'nae pu yuanqliangl biq maoqhhae maeq? Siq pu laol hhaeq vae maeq?" 22 Yesu gee: "Ngael noq'ae geegaeq laeqngeel, siq pu maeqngeel'ae, siq pu siq pu lye mael siqqyel pu ngeel maoqhhae. 23 Mqmae Goqja laoq zongmae qiq hhaeq, yoqhhaeq e yaqhacheqzaq e cholyaeqhael'ae dyuqbaq saelzaeqhoq biq laoqmyel kaol'ae. 24 Yoqhhaeq saelzaeqhoq fu, cholyaeq qiq hhaeq lye qiqtongl (10000) ta'lianqdeqb ca e yaqhacheqzaq e cholyaeq yaol sheeqlaeq. 25 Tyutaeq qiqgiq heilhoq maqza biq, tyulkaol, hhaoqsongl lye yoqhhaeq, yoqhhaeq e haeqmiq, yaeqmiq yaqyo kaol halzahael ongqzaeq hheikaol heilduhoq hhei lye minllinl hhae. 26 Yaqhacheqzaq e cholyaeq tyutaeq yoqhhaeq'ae vuqduqtongq gae hhei biq, gee: 'Ngaeq'ae qiqtongq doq laeq siq, ngael noq'ae gilzuqmyel heilhoq laeqngeel.' 27 Yaqhacheqzaq e cholyaeq tyutaeq e hhaoqsongl hhaoqsaeqsaeq li biq, kaol yoqhhaeq yaol pyeqduhoq hhei biq dyul maeqcilmyel, yoqhhaeq e jyelzu mael eiq maeq bi heilhoq vae. 28 Yaqhacheqzaq e cholyaeq tyutaeq duyi laol, yoqhhaeq'ae qiqhael (100) pulziq dyuqbaq ca e yelchoq qiq hhaeq yaol deelpuq hhei biq, kaol yoqhhaeq'ae eetyeq biq, yoqhhaeq e kongqlongl mael'ae niqtyeq deelhhei kaol gee: 'Nol ngaeq'ae ca hael heilhoq hhei laeq!' 29 Yoqhhaeq e yelchoq vuqduqtongq gae hheikaol yoqhhaeq'ae geezaeq biq, gee: 'Ngaeq'ae qiqtongq doq hhei laeq siq, ngael noq'ae heilhoq laeqngeel.' 30 Ngeelfeiq, yoqhhaeq maeq naelhaeq nae'ae, yoqhhaeq ca hael heilhoq byel fu keellye, yoqhhaeq yaol laoqgaiqkei laoqhaol vae koqlongl deelli biq. 31 Yelchoqhael yoqhhaeq zongl e silqinq mael mol hhei biq laol, zhee nyuqsaeq gil biq'ae, kaol silqinq xihael gilzuqmyel tyutaeq e hhaoqsongl'ae geedu hhei biq. 32 Tyulkaol, hhaoqsongl yoqhhaeq yaol gul laeq, yoqhhaeq'ae gee biq: 'Nol duqlaq e yaqhacheqzaq e cholyaeq o! Nol ngaeq'ae geezaeq laeq laol, ngael laoq nol ca hael gilzuqmyel maeq bi heilhoq yil vae; 33 Nol laoq ngael noq'ae hhaoqsaeqsaeq biq laoqmyel, noq e yelchoq'ae hhaoqsaeqsaeq biq maoq maeqngeel maeq?' 34 Kaol yoqhhaeq e hhaoqsongl faqhoq guaeq'ei kei'ae, kaol yoqhhaeq ca hael gilzuqmyel heilhoq byel fu keellye, yoqhhaeq yaol cholyaeq ee'longl e cholyaeq'ae eemoq biq. 35 Noteel aeqsul eiq neemae onglci ae'lye noq e aqsseq aeqnil'ae maeq yuanqliangl biq kaollaoq, ngaeq e mqmae Aeqdae eiq noteel'ae xilnye zongl maoqlye hhae."