Aqciq deelbu e dullaelmyel guqjin
15
Tyuqfu, gilzuqmyel shuil shezaeq e cholyaeqhael kaol golsiq za e cholyaeqhael, Yesu gee e saeziq mael naelhaeq maoqlyekaol yoqhhaeq e dongqpyeq'ae lael gil'ae. 2 Faqlilsail cholyaeqhael kaol Momil e saeziq mael loq e laqkiqhael hhaellaelmyel geezil geezae gil: "Xitaeq golsiq za e cholyaeqhael'ae sheeqcaq biq, kaol yoqhhaeteel nyegael aelhoq qiqgael zaeq." 3 Yesu yoqhhaeteel'ae dullaelmyel guqjin mael lye geegaeq gil biq'ae, gee: 4 "Noteel onglci'ae aeqsul e aqciq qiqhael (100) onglci e qiq yaeq deelbu hhei kaollaoq, hhaoqqyel hhaoq yaeq yaol hoqzaq myel vae bi zholdeelsaeq, kaol deelbu e tyu qiq yaeq'ae saelpopuq hhei fu keellye saelpo maeqngeel maeq? 5 Saelpopuq hhei'laol, hhaol gae'lael aeqmyel baqtaq mael'ae baqda hhei. 6 Laoqhaol'ae hoq keelli laol, yelchoq kaol dongqpyeq'ae zhol e cholyaeqhael gul laeq, kaol yoqhhaeteel'ae gee biq: 'Ngaeq e deelbu e aqciq mael saelpopuq hhei wae, kaol ngaeq nyegael qiqgael bael hhaol gil!' 7 Ngael noteel'ae geegaeq gil laeqngeel, golsiq za e cholyaeq qiq hhaeq neemae paellael kaollaoq, Momil kaol mqmae yosonglhael eiq xilnye hhaol gil mael, neemae maeq paellael kael e gongyil e cholyaeq hhaoqqyel hhaoq hhaeq taq'ae hhael hhaol'ae."Pulziq dyuqbaq gabu e dullaelmyel guqjin
8 "Cholhae aeqmae qiq hhaeq'ae pulziq dyuqbaq qyel mael onglci e qiq mal gabu biq kaollaoq, yoqhhaeq aeqdael doqhoq keeqdoq hhei, laoqhaol yashol hheikaol haelmeeqlye saelpo, saelpopuq hhei fu keellye saelpo maeqngeel maeq? 9 Saelpopuq hhei'laol, yelchoq kaol dongqpyeq'ae zhol e cholyaeqhael gul laeq, kaol yoqhaeqteel'ae gee biq: 'Ngaeq e gabu e pulziq dyuqbaq mael saelpopuq hhei aeqwae, kaol ngaeq nyegael qiqgael bael hhaol gil!' 10 Ngael noteel'ae geegaeq gil laeqngeel, qiqsheel ngeelvae, golsiq za e cholyaeq qiq hhaeq neemae paellael kaollaoq, Momil e mqmae yosonglhael eiq yoqhhaeq gae'lye xilnye hhaol gil ngeelvae."
Hhaoqsaeqsaeq kiq e aeqdae
11 Yesu yol gee: "Cholyaeq qiq hhaeq'ae yaqyo niq nulhhaeq zhol'ae. 12 Hhael nil e yaqyo aeqdae'ae gee biq: 'Aeqdae, ngaeq'ae byelpa laq maoq e ssuqhaoq mael ngaeq'ae byel hhei laeq.' Aeqdae lye halngeiq kaol jadanglhael yoqhhaeteel'ae byelpa hhei biq vae. 13 Hae'nae nao maeqngeel laol, hhael nil e yaqyo gilzuqmyel heil hheikaol, gaelmaolsae'lye vae yil vae; yoqhhaeq tyuqvae aeqchee zongl goq laol aeqchee zongl'ae, dyuqbaq eiq haelmillye mulgoq laol haelmillye mul hhae. 14 Yoqhhaeq'ae halzahael gilzuqmyel mul byel vae, tyuqvae milcaeq'ae hoqlaq maeqmeeq qiqgiq zaeq eiq maqza myel peqlal, kaol yoqhhaeq saeq li biq'ae. 15 Tyulkaol, yoqhhaeq tyuqvae milcaeq e cholyaeq qiq haoq toq'ae cho'lyeqzaeq li, tyutaeq lye haeldye'ae aqhhaq hoqzaq yil lye moqheilheil du hhei biq. 16 Yoqhhaeq aqhhaqhael zaeq e oqdeeq mael bael zaeq maqkiqmyel zongl biq hhae, ngeelfeiq, cholyaeq yoqhhaeq'ae maeq heil biq'ae. 17 Yoqhhaeq nyuqgeel lael biq, gee: 'Ngaedae'ae yaqhacheqzaq e cholyaeq zhee zhol'ae, yoqhhaeteel'ae zaeqzael maeq zaeq byel ongl myel za'ae, ngeelfeiq, ngael laoq saeqvae myeqsil laeq? 18 Ngael hoqli maoq yae, ngaedae zael'ae keelli kaol yoqhhaeq'ae gee biq: Aeqdae, ngael Momil vae zonglzhil biq, noq vae eiq zonglzhil biq yae vae. 19 Ngael noq e yaqyo geiq e maeq zae yaevae, ngaeq yaol noq e yaqhacheqzaq e cholyaeq'ae lye fu laeq oq." 20 Tyulkaol, yoqhhaeq tullael kaol aeqyoq e aeqdae zael'ae li vae. Yoqhhaeq gaelmaolsae'lye fu, yoqhhaeq e aeqdae yoqhhaeq yaol mol hhei biq, kaol hhaoqsaeqsaeq li biq, ki duyil kaol yoqhhaeq'ae baqcongq yil biq, kaol yoqhhaeq'ae myeqchilnuq biq. 21 Yaqyo gee: 'Aeqdae, ngael Momil vae zonglzhil biq, noq vae eiq zonglzhil biq yae vae.' 22 Ngeelfeiq, aeqdae yaqhacheqzaq e cholyaeqhael'ae gee biq: 'Nae'naemyel hhael meeq e poljye mael heil laeq kaol yoqhhaeq'ae dumda hhei biq, nyulbaeq mael yoqhhaeq e laqnyul mael'ae doqda hhei biq, paqno mael yoqhhaeq e aeqkeel mael'ae nuq da hhei biq. 23 Hhael meeq e lalbu buyaeq qiq keel cheellaeq kaol xyeq hhei, ngaeteel hhaellaelmyel qiqgael zaeq dol kaol hhaol maoq yae! 24 Ngaeq e yaqyo xitaeq laoq sil aeqmyel ae'lye dyeqhoqlal hhae, gabu aeqmyel ae'lye hoqlal hhae!' Yoqhhaeteel hhaol tul gil laeq vae.
25 "Tyuqfu, yaqyo hhael heeq e qiq hhaeq laoq haeldye vae zhol hhae. Yoqhhaeq laoqhaol dongqpyeq'ae hoq keellael fu, diqhodiq kaol yinqjildil e yotyel gaeq hhei biq laol, 26 Yaqhacheqzaq e cholyaeq qiq hhaeq gul laeq, kaol yoqhhaeq'ae aeqchee zongl gil hhaemaeq lye naelhaeq biq. 27 Yaqhacheqzaq e cholyaeq qiq hhaeq gee: 'Nonil hoqlal vae, nodae laoq nonil maeqpaeq maeqnaelmyel hoqlal gae'lye kaol hhael meeq e lalbu buyaeq mael xyeq hhei biq.' 28 Yaqyo hhael heeq e qiq hhaeq hol biq kaol maq do'li nae'ae. Yoqhhaeq e aeqdae duyi kaol yoqhhaeq'ae haelmeeqlye gee yi biq. 29 Yoqhhaeq aeqdae'ae gee biq: 'Ngael laoq noq'ae xi nae hoq zhaofu biq, noq e minllinl mael'ae maeq naelhaeq lye qiqzael eiq maeq zongl yil. Ngael eiq yelchoqhael nyegael qiqgael hhaol goq yae, ngeelfeiq, nol ngaeq'ae qiqzael eiq aqciq qiq yaeq maq biq gol laq'ae. 30 Ngeelfeiq, noq e yaqyo xitaeq laoq maeqmeeq e haeqmiyaeq nyegael noq e halngeiq kaol jadanglhael zaeqneq vae, yoqhhaeq zhoq hoqlal laol, nol laoq yoqhhaeq'ae hhael meeq e lalbu buyaeq mael xyeq hhei biq'ae! 31 Aeqdae yoqhhaeq'ae gee biq: 'Yaeqguq o, nol laoq ngaeq nyegael haeqfu eiq qiqgael baelzhol, ngaeq e halzahael laoq gilzuqmyel noq e ngeelvae. 32 Ngeelfeiq, nonil xitaeq laoq sil aeqmyel ae'lye dyeqhoqlal hhae, gabu aeqmyel ae'lye hoqlal hhae, ngaeteel hhaol gil mael laoq hoq'ae!"'