Yesu lye qiq hhaeq myel zhee da biq e cholyaeq yaol zonglmeeq biq
14
Anxiqriq'ae Yesu Faqlilsail cholyaeq e yoheeq toq'ae do'li kaol aelhoq zaeq li, cholyaeq qiq miq laoq yoqhhaeq'ae haoqchifu deelhhei hhae. 2 Tyuqfu qiqlaq'ae, yoqhhaeq e yiqsiboq'ae, qiq hhaeq myel zhee da biq e cholyaeq qiq hhaeq zhol'ae. 3 Tyulkaol, Yesu lilfaq mael loq e laqkiq kaol Faqlilsail cholyaeq qiq hhaeq'ae naelhaeq biq: "Anxiqriq'ae cholnael zonglmeeq hhaeq maeq maeq hhaeq maeq?" 4 Yoqhhaeteel yotyel qiq doq maq du'ae. Yesu cholnael'ae zoqtyeq deelhhei kaol yoqhhaeq yaol zonglmeeq biq, kaol yoqhhaeq yaol bi hoqyil vae. 5 Kaol yoqhhaeteel'ae gee biq: "Noteel onglci'ae aeqsul e yaqyo kaol aeqnuq mael, anxiqriq'ae eelduq vae leeqdo hhei kaollaoq, nae'naemyel maeq ee da hoqyil gil biq yil maeq?" 6 Yoqhhaeteel saeziq xihael'ae maeq geecaqda hoq laq ongl biq'ae.Yesu baqwanq zaeq fu cholyaeqhael'ae geemyeq gil biq
Zhen 25:6-7
7 Tyuqfu, Yesu laoq aelhoq zaeq lael gil e daeqxihael hhael meeq e zholhhael mael saelpo mol hhei biq, kaol dullaelmyel guqjin maellye yoqhhaeteel'ae gee biq: 8 "Noq'ae ochoq yulyaeq bael mulzaeq lael lye gul laeq fu, hhael meeq e zholhhael mael haeq zhol, aeqgael noq taq'ae maduq hhal za e daeqxi vae eiq gulzaeq biq maeqhe. 9 No niq nulhhaeq'ae aelhoq gulzaeq laeq e qiq hhaeq du'lal kaol noq'ae gee laeq: 'Zholhhael xilmael xitaeq'ae bi zhol.' Tyuqfu nol laoq saqdol gae'lael aeqmyel, deeltael hheikaol maeq hhael meeq e zholhhael mael'ae hhae zhol yil ngeelvae. 10 Noq'ae aelhoq gulzaeq laeq fu, maeq hhael meeq e zholhhael mael'ae zhol maoqhhae. Noq'ae aelhoq gulzaeq laeq e qiq hhaeq du'lal kaol noq'ae gee laeq: 'Yelchoq, hhael meeq e zholhhael mael'ae zhol da'li.' Tyuqfu nol laoq aelhoq qiqgael zaeq e cholyaeqhael e yiqsiboq'ae laoq maduq za vae. 11 Aeqsul aeqyoyoq yaol deiqqei da zaq laol, aeqgael bi deiqgae hhei ngeelvae; aeqyoyoq maeq dilqeizaeq hael laoq, aeqgael hhae bi deiqqei da hhei kaol'ae." 12 Yesu yoqhhaeq'ae aelhoq gulzaeq biq e qiq hhaeq'ae gee biq: "Nol mqnao baqwanq kaol mqkiq baqwanq baqdeel hhei fu, noq e yelchoqhael, algo aeqnilhael, paeqyaeq kaol dongqpyeq'ae zhol e zacongl hael'ae aelhoq haeq gulzaeq biq. Nol xilnye zongl kaollaoq, yoqhhaeteel noq'ae aelhoq yol gulzaeq hoq laeq kaol noq'ae meeqhoq laeq'ae; 13 Nol baqwanq baqdeel fu, saeqyaeqhael, canqjiqhael, keeldilhael kaol mabyeqhael'ae aelhoq gulzaeq biq maoqhhae, 14 Tyulnye laol, nol laoq geeqlongq meeq vae, yoqhhaeteel noq'ae qiqgiq meeqhoq biq maqza kaol'ae. Gongyil e cholyaeq dyeqhoqlal fu, Momil noq'ae meeqhoq laeq maoqlye hhae."
Baqwanq gulzaeq e dullaelmyel guqjin
15 Aelhoq qiqgael zaeq e cholyaeq qiq hhaeq, saeziq xihael gaeq hhei biq laol, Yesu'ae gee biq: "Momil e Goqja vae baqwanq zaeq e haetaeq eiq geeqlongq meeq vae." 16 Yesu yoqhhaeq'ae gee biq: "Cholyaeq qiq hhaeq cholyaeqhael'ae baqwanq wanqmae baq deel gil biq, kaol haelnaeqmyel daeqxihael'ae gulzaeq biq hhae. 17 Aelhoq zaeq hhaeq lael fu, yoqhhaeq lye yaqhacheqzaq e cholyaeq yaol aelhoq gulzaeq biq e cholyaeqhael'ae gul yil lye moqheilheil du hhei, gee: 'Aelhoq zaeq hhaeq vae! Aeqchee eiq paeqgaelsael meeq byel aeqwae." 18 Ngeelfeiq, cholyaeqhael qiqhhaeq qiqhhaeq lye maeq lael vae lye gee'ae, laefuq fuqli qiq hhaeq gee: 'Ngael aeqhael qiq koq vul hhei wae, aeqdilmyel fu yil maoq, kaol ngael maeq hhae lael yaevae.' 19 Baeqjyelboq e qiq hhaeq gee: 'Ngaeq lye aeqnuq qyel yaeq vul deelhhei lil, ngael yaeqmeel henq'ae maeqlye fu yil maoq, kaol ngael maeq hhae lael yaevae.' 20 Baeqjyelboq e qiq hhaeq laoq xilnye gee: 'Ngaeq'ae haeqmiq caiq sheeq hhei oqyilsiq, tyulkaol, maeq hhae lael yaevae.' 21 Yaqhacheqzaq e cholyaeq qiq hhaeq lye silqinq xihael hhaoqsongl'ae geegaeq hoqlael biq, kaol xitoq e hhaoqsongl faqhoqkei tullaeq, kaol yaqhacheqzaq e cholyaeq'ae gee biq: 'Nae'naemyel duyil, milmae heeqmyel e gaelmae maemae kaol galchi'ae yil, saeqyaeqhael, canqjiqhael, mabyeqhael kaol keeldilhael, gilzuqmyel saeqvae sheeqlaeq.' 22 Yaqhacheqzaq e cholyaeq gee: 'Hhaoqsongl o! Nol moqheilheilhael zonglbyel aeqwae, ngeelfeiq, zholhhael maeq zhol bong wae siq." 23 Hhaoqsongl yaqhacheqzaq e cholyaeq'ae gee biq: 'Nol duyil, milmae heeqmyel nildu e gaelmae vae kaol kilkul dongqpyeq vae zhol e cholyaeqhael yaol ee do'laq, kaol ngaeq e laoqhaol mael bi zhol bong hhei. 24 Ngael noteel'ae geegaeq laeqngeel, laefuq aelhoq gulzaeq gol biq e cholyaeqhael, ngaeq e baqwanq mael qiq hhaeq eiq maeq hhae bael zaeq aeqwae.'"
Laqcaq geiq e hhaeqpyuq
25 Haelnaeqmyel cholyaeq Yesu nyegael qiqgael deel'ae, Yesu zipol hoqlael kaol yoqhhaeteel'ae gee biq: 26 "Aeqsul haoq ngaeq e saeqvae lael kaollaoq, aeqyoyoq e aeqdae aeqmae, haeqmiq, yaeqmiq yaqyo, algo aeqnil, aelbae aeqnil'ae, kaol aeqyoyoq e aeqyil mael'ae gaeq mael, ngaeq'ae gaeq laeq mael taq'ae jyeqli kaollaoq, ngaeq e laqcaq maeq hhae geiq'ae. 27 Aeqsul eiq aeqyoyoq e shiqziljal mael maeq pi kaol ngaeq'ae maeq cho'lyeq kaollaoq, ngaeq e laqcaq eiq maq hha geiq'ae.
28 Noteel haeqgao gaomae myel laoqhaol qiq ssul cu maoqlye laefuq'ae, zholgae hheikaol, haeldyul dyuqbaq mul do'li maeqlye kaol laoqhaol cu du hhei ongl maeq, maeq cu du hhei ongl maeqlye suanl fufu maoq maeqngeel maeq? 29 Xilnye maeq zongl kaollaoq, congqciq paeqhhael diq du hhei dyul maoqlaol, laoqhaol maq cu du hhei ongl'ae. Haelmol e cholyaeqhael yoqhhaeq'ae eel gil biq maoqlye hhae, 30 Gee: Xitaeq laoqhaol cu feiq, maq cu du hhei ongl biq'ae.'
31 Zongmae qiq hhaeq baeqjyelboq e zongmae nyegael tyelgae yil laefuq'ae, yoqhhaeq laefuqmyel zholgae hheikaol aeqyoq e qiqtongl (10000) cholyaeq baeqjyelboq e zongmae e niqtongl (20000) cholyaeq'ae, tyel yinq ongl maeqlye haelmeeqlye nyuq fufu maeqngeel maeq? 32 Maeq tyel yinq ongl kaollaoq, diqrenqhael gaelmaolsae'lye fu, cholyaeq yaol moqheilheil du hheikaol yoqhhaeq nyegael haelmillye hoqpinq li ongl maeqlye bi geeda yil. 33 Qiqsheel ngeelvae, noteel onglci'ae aeqsul eiq, halzahael gilzuqmyel maeq beiqdeelsaeq kaollaoq, ngaeq e laqcaq maq hha geiq'ae.
Maeq haeq vae e caqdeq
34 "Caqdeq laoq meeq hhae, ngeelfeiq, caqdeq mael maeq haeq myel peqyil hhei kaollaoq, aeqchee maellye caqdeq mael bi haeq hoqlael laeq? 35 Caqdeq mael haeldye'ae bi heildeel yil, paelsilmyel, jyeqkeeq'ae heildeel yil, nildu'ae beiq deel maoqlaol, qiqgael eiq maq mulyo'ae. Naeqbol gaeq congl e cholyaeq laoq naelhaeq maoqhhae!"