Yulyaeq mulzaeq e dullaelmyel guqjin
22
Yesu dullaelmyel guqjin maellye yoqhhaeteel'ae yol gee biq: 2 "Mqmae Goqja laoq, zongmae qiq hhaeq yoqhhaeq e yaqyo'ae yulyaeq mulzaeq e baqwanq baqdeel biq laoqmyel hhae. 3 Yoqhhaeq yaqhacheqzaq e cholyaeq yaol moqheilheil du hhei, kaol aelhoq gulzaeq biq e tyuhael vae baqwanq zaeq lael gil lye bi gul yil, ngeelfeiq, yoqhhaeteel maeq lael nae'ae. 4 Zongmae baeqjyelboq e yaqhacheqzaq e cholyaeq yaol moqheil yol heil du hhei, gee: 'Noteel laoq aelhoq gulzaeq biq e cholyaeqhael'ae geegaeq yil biq, ngaeq e baqwanq mael paeqgaelsael meeq deelhhei wae, aeqnuq kaol culdyeqlye jyeqyaeq xyeq meeq wae, gilzuqmyel paeqgaelsael meeq byel aeqwae, kaol noteel baqwanq zaeq lael gil hhaeq vae.' 5 Cholyaeq tyuhael qiqgiq lye maeq gee myel deel vae, qiq hhaeq laoq aeqyoyoq e haeldye vae yil vae, qiq hhaeq laoq senyil mulzaeq yil vae. 6 Baeqjyelboq hael lye yoqhhaeq e yaqhacheqzaq e cholyaeqhael yaol eetyeq biq, yoqhhaeteel'ae geekyuq biq, yoqhhaeteel yaol xyeq biq vae. 7 Kaol zongmae faqhoq guaeq'ei kei'ae, kaol yoqhhaeq e junduil e cholyaeqhael yaol moqheilheil du hhei, cholyaeq xyeq e tyuhael yaol bi zonglmye yil, kaol yoqhhaeteel e milmae heeqmyel mael pe biq. 8 Tyulkaol, zongmae yaqhacheqzaq e cholyaeqhael'ae gee biq: 'Yulyaeq mulzaeq e baqwanq mael paeqgaelsael meeq byel aeqwae, ngeelfeiq, aelhoq gulzaeq meeq deelhhei e cholyaeqhael maeq zae'ae. 9 Tyulkaol, noteel gaelmae gallaq vae yil gil, hael deelpuq lael hael'ae gilzuqmyel yulyaeq bael mulzaeq lael gil lye gee biq.' 10 Kaol yaqhacheqzaq e cholyaeq tyuhael duyil vae, gaelmae maemae vae keelyil laol, hael deelpuq hhei biq e meeq e cholyaeq haoq, duqlaq e cholyaeq haoq gilzuqmyel gul'eeq laeq, kaol baqwanq zaeq myel vae daeqxi zhol bong vae. 11 Zongmae do'lal kaol daeqxihael yaol mol lael, tyuqvae zhigaqlye aelhongq maeq dum hhei e cholyaeq qiq hhaeq mol hhei biq, 12 Kaol yoqhhaeq'ae gee biq: 'Yelchoq, nol saeqvae lael, aeqcheekaol zhigaqlye aelhongq maeq dum hhei lilmaeq?' Cholyaeq tyutaeq qiqgiq lye eiq maeq geehoq kiq biq'ae. 13 Tyulkaol, zongmae yoqhhaeq'ae cho'lyeq deelhhei e cholyaeqhael'ae gee biq: 'Yoqhhaeq e aeqkeel aqlaq mael kaltoq hhei, kaol yoqhhaeq yaol nildu e nahongqlye vae beiqdeel yil biq; yoqhhaeq tyuqvae nyul sil maoqmyel hhae nyul ngeelvae.' 14 Gulzaeq biq e cholyaeq laoq naeq, ngeelfeiq, hha do'li e cholyaeq laoq maeq naeq'ae."Kaiqsa vae shuilshangl biq
15 Tyulkaol, Faqlilsail cholyaeqhael duyil kaol geedazaq gil, Yesu e saeziq maellye yoqhhaeq'ae hail biq maoqlye zongl hhae, 16 Kaol yoqhhaeteel e laqcaq yaol kaol Xi'lyul dangq e cholyaeq yaol Yesu'ae bi mol yil, gee: "Laoqsi, nol cholyaeq'ae zaqgiq maqgiq'ae lye ngaeteel loq lil, kaol zhen'liq maellye Momil e gaelmaea mael cholyaeq'ae geemyeq gil biq, kaol aeqsul vae eiq qiqsheel meeq biq, qiq hhaeq e maduq gae'lye eiq maeq fu kaol'ae. 17 Ngaeteel'ae geedu laq, Kaiqsab vae shuilshangl biq e hhaeq maeq maeq hhaeq maeq? Nol haelmillye nyuq lilmaeq?" 18 Yesu laoq yoqhhaeteel e duqlaq e nyuq mael fudu hhei, kaol gee: "Gee kaol zongl mael maeq qiqsheel e cholyaeq o, aeqcheekaol ngaeq'ae shilfu laeq lilmaeq? 19 Ngaeq'ae shuilshangl fu mul e pulziq dyuqbaq qiq mal heil fu hhei laeq!" Kaol yoqhhaeteel lye yoqhhaeq'ae pulziq dyuqbaq qiq mal heilmoq hhei biq. 20 Yesu yoqhhaeteel'ae naelhaeq biq: "Xilmael'ae zonglda deelhhei mael aeqsul e vuqduq kaol aeqsul e cholmil maeq?" 21 Yoqhhaeteel gee: "Kaiqsa hhae." Tyulkaol, Yesu gee: "Xilnye laol, Kaiqsa mael laoq Kaiqsa'ae heilmoq hhei biq, Momil mael laoq Momil'ae heilmoq hhei biq." 22 Yoqhhaeteel gaeq hhei biq laol gaqmaq zhee zuq li gil biq'ae, kaol yoqhhaeq ae'lye deelsae hheikaol deel vae.
Cholyaeq dyeqhoqlal aeqnaol laoq maeq sheeqtoq maeq mulzaeq
23 Tyu qiq nao, Saqdugai cholyaeq Yesu'ae mol lael. Yoqhhaeteel laoq dyeqhoqlal e silqinq maqza'ae lye gee gil, tyulkaol, Yesu'ae naelhaeq biq: 24 "Laoqsi, Moxi gee: 'Cholyaeq qiq hhaeq yaeqguq maeq zhol myel sil hhei kaollaoq, yoqhhaeq e aeqnil laoq yoqhhaeq e haeqmiq yaol sheeqzaeq maoqhhae, kaol sil e algo vae houldail bi zhol gaeyil.' 25 Yilkaefu, ngaeteel saeqvae algo aeqnil siq hhaeq zhol'ae, laefuq fuqli qiq hhaeq haeqmiq sheeq hhei, yaeqguq maeq zhol myel sil vae, haeqmiq yaol yoqhhaeq e aeqnil'ae beiqdeelsaeq biq. 26 Dil'el, dilsan, dilqiq gol keellye, gilzuqmyel xilnye hhae. 27 Aeqnaol, cholhae aeqmae tyutaeq eiq sil vae. 28 Aelmaol, dyeqhoqlal fu, yoqhhaeq laoq xi siq hhaeq onglci e haetaeq e haeqmiq maeq? Yoqhhaeteel gilzuqmyel yoqhhaeq yaol sheeqzaeq gol vae kaol'ae." 29 Yesu yoqhhaeteel'ae geehoq biq: "Noteel ba vae, Momil e Suqhhaq mael maeq loq, kaol Momil e onglzaeq mael eiq maeq loq kaol'ae. 30 Dyeqhoqlal fu, cholyaeq sheeq eiq maeq sheeqzaeq mul eiq maeq mulzaeq'ae, mqmae taq e mqmae yosongl laoqmyel hhae. 31 Cholsil dyeqhoqlal mael'ae gee'li'laol, Momil noteel'ae haelgee biq e saeziq mael, noteel maeq duq gol yil maeq? 32 Yoqhhaeq gee: 'Ngael laoq Yalboqlahanl e Momil, Yiqsaq e Momil, Yaqgel e Momil lil.' Momil laoq cholsil e Momil maeqngeel'ae, choldyeq e Momil'ae." 33 Cholyaeqhael saeziq xihael gaeq hhei biq laol, yoqhhaeq e geemyeq mael'ae gaqmaq zhee zuq li gil biq'ae.
Gailminl onglci'ae hhal mulyo mael
34 Faqlilsail cholyaeqhael Yesu lye Saqdugai cholyaeq yaol chiqlye geechiq biq'ae lye gaeq hhei biq, kaol yoqhhaeteel qiqgael zhol'eeq deelhhei. 35 Yoqhhaeteel onglci'ae qiq hhaeq laoq lilfaq mael loq e laqkiq'ae, yoqhhaeq Yesu'ae shilfu maoqlye zongl hhae, kaol yoqhhaeq'ae naelhaeq biq: 36 "Laoqsi, lilfaq taq'ae gailminl hae qiq mal hhal mulyo hhaemaeq?" 37 Yesu yoqhhaeq'ae gee biq: "Nol laoq neemae qiqsiqmyel, kaol gilzuqmyel hael nyuq hael, kaol gilzuqmyel hael geel maellye Hhaoqsongl'ae gaeq biq maoqhhae. Hhaoqsongl laoq noq e Momil ngeelvae.' 38 Xilmael laoq hhal mulyo mael, kaol gailminl onglci e laefuq fuqli e qiq mal ngeelvae. 39 Dil'el gol eiq xilnye hhae, noq e dongqpyeq e cholyaeqhael'ae gaeq biq mael aeqyoyoq'ae gaeqzaeqhoq laoqmyel ngeel maoqhhae. 40 Gilzuqmyel lilfaq mael kaol xianzhi e suqhhaq mael laoq, gailminl xi niq mal taq ae'lye lael hhae."
Jidu kaol Dalweil e guanxil
41 Faqlilsail cholyaeqhael zhol'eeq deelhhei fu, Yesu yoqhhaeteel'ae naelhaeq biq: 42 "Jidu'ae gee keelli laol, noteel laoq haelmillye nyuq gil lilmaeq? Yoqhhaeq laoq aeqsul e houldail maeq?" Yoqhhaeteel gee: "Dalweil hhae." 43 Yesu gee: "Xilnye laol, Dalweil'ae senllinq ganqdongl biq fu, haelmillyekaol yoqhhaeq'ae Hhaoqsongl lye gul biq hhaemaeq? Gee:
44 'Yeheqhuaq ngaeq e Hhaoqsongl'ae gee biq:
Ngaeq lye noq e diqrenq yaol,
noq e aeqkeel baqda e toqmoq bi geiq fu keellye,
nol ngaeq e laqsseqboq'ae zhol deelhhei.'