Cholyaeqhael baelyaelmyel Yesu vae shilfu lael biq
20
Tyuqfu naohaeq e qiq nao laoq Yesu sholhaol onglci'ae cholyaeqhael'ae geemyeq gil biq kaol fuqyin geegaeq gil biq fu, jilsizhangqhael, Momil e saeziq mael loq e laqkiqhael kaol zhangqlaoqhael Yesu yiqsiboq'ae deel da laq. 2 Yoqhhaeq'ae gee biq: "Nol ngaeteel'ae geedu laq, nol aeqchee laqtaq maellye silqinq xihael zongl lilmaeq? Noq'ae laqtaq xilmael biq laq e qiq hhaeq aeqsul maeq?" 3 Yesu yoqhhaeteel'ae geehoq biq: "Ngael eiq noteel'ae qiq doq naelhaeq maoq, noteel ngaeq'ae geegaeq laeq: 4 Yoqhanl e ciq e gui'liq mael mqmae ae'lye lael, paelsilmyel cholyaeq ae'lye lael hhaemaeq?" 5 Yoqhhaeteel hhaellaelmyel geedazaq gil'ae: "Aedeeteel 'mqmae ae'lye lael hhae' lye geehoq kaollaoq, yoqhhaeq naelhaeq laelkiq: 'Noteel aeqcheekaol Yoqhanl'ae maeq xiangxinl gil lilmaeq?' 6 Aedeeteel 'cholyaeq ae'lye lael hhae' lye geehoq kaollaoq, gilzuqmyel cholyaeqhael Yoqhanl laoq xianzhi'ae lye xiangxinl hhae, yoqhhaeteel haqlo heil hheikaol aedeeteel'ae beiq lael kiq'ae." 7 Tyulkaol, yoqhhaeteel haeqvae lye lael hhae lye maeq loq yae lye geehoq biq. 8 Kaol Yesu yoqhhaeteel'ae gee biq: "Ngael eiq noteel'ae aeqchee laqtaq maellye silqinq xihael zongl lil lye maeq geedu."Aeqhael mulpazaq e cholyaeqhael e dullaelmyel guqjin
9 Tyulkaol, Yesu cholyaeqhael'ae dullaelmyel guqjin xilmael geegaeq gil biq: "Cholyaeq qiq hhaeq siqbaq qiq koq kae deelhhei, aeqhael mulpazaq e cholyaeqhael'ae bi mulpazaq hhae, kaol gaelmaolsae'lye hhae yil vae. 10 Aelsiq chezaq hhaeq fu, aeqhael e hhaoqsongl lye hhaeq'ongq ongqzaeq e cholyaeq yaol aeqhael mulpazaq e cholyaeqhael zael'ae moqheilheil du hhei, yoqhhaeteel'ae aeqhael ae'lye du'lal e aelsiq mael yoqhhaeq'ae byelpa hoq hhei laeq lye gee yil biq, aeqhael mulpazaq e cholyaeqhael lye yoqhhaeq'ae diq biq, kaol aqlaq alngeiqmyel bi hoqli vae. 11 Aeqhael e hhaoqsongl baeqjyelboq e hhaeq'ongq ongqzaeq e cholyaeq yaol, yoqhhaeteel zael vae yol moqheilheil du hhei, aeqhael mulpazaq e cholyaeqhael lye yol diq biq, yoqhhaeq'ae geekyuq biq, kaol aqlaq alngeiqmyel bi hoqli vae. 12 Tyulkaol, aeqhael e hhaoqsongl lye dilsan gol yaol moqheilheil du hhei, aeqhael mulpazaq e cholyaeqhael yoqhhaeq yaol eiq diqkyuq biq, kaol yoqhhaeq yaol lyeqdu biq vae. 13 Aeqhael e hhaoqsongl gee: 'Ngael haelmillye zongl laeq? Ngael ngaeq e zhee gaeq e yaqyo yaol moqheilheil du hhei maoq, yoqhhaeteel xitaeq'ae zunjinl biq maeqhe.' 14 Ngeelfeiq, aeqhael mulpazaq e cholyaeqhael yoqhhaeq yaol mol hhei biq laol, hhaellaelmyel geedazaq gil, gee: 'Xitaeq laoq aeqgael zaeqdye halngeiq e hhaoqsongl geiq maoqlye hhae; lael gil, aedeeteel yoqhhaeq yaol xyeq hhei'laol, zaeqdye halngeiq mael laoq aedeeteel wae.' 15 Tyulkaol, yoqhhaeteel lye aeqhael e hhaoqsongl e yaqyo yaol siqbaq aeqhael ae'lye lyeqdu biq kaol xyeqsil biq vae. Tyulnye kaollaoq, aeqhael e hhaoqsongl laoq yoqhhaeteel'ae haelmillye zongl biq maoqlye hhaemaeq? 16 Yoqhhaeq lael kaol aeqhael mulpazaq e cholyaeqhael yaol zonglmye biq kaol siqbaq aeqhael mael ochoq'ae bi mulpazaq maoqlye hhae." Gaeq e cholyaeqhael gee: "Xilnye maeq zongl hhaeq'ae!"
17 Yesu yoqhhaeteel'ae chifu deelhhei, kaol gee: "Aelmaol, Momil e Suqhhaq taq'ae xilnye cu deelhhei'ae:
'Laoqhaol cuzaq e cholyaeq lye beiqgae e haqlo mael laoq,
congqciq paeqhhael e hhal mulyo e haqloa peqlal vae.'
Saeziq xihael aeqchee yilsi maeq? 18 Haqlo tyu qiq siq taq'ae jyecheeq dayil e cholyaeq laoq, jyexul hhei ngeelvae; haqlo tyu qiq siq aeqsul'ae jyecheeq dayil laol, aeqsul yaol tongqnu hhei ngeelvae." 19 Momil e saeziq mael loq e laqkiqhael, kaol jilsizhangqhael Yesu gee e dullaelmyel guqjin xilmael yoqhhaeteel'ae gee hhae lye loq biq, tyulkaol, yoqhhaeq yaol nae'naemyel eetyeq goq biq wae, ngeelfeiq, yoqhhaeteel cholyaeqhael'ae gu biq kaol maeq eetyeq gil peq biq'ae.
Yesu'ae shilfu gil biq
20 Momil e saeziq mael loq e laqkiqhael kaol jilsizhangqhael, haoqchifu yil e cholyaeqhael yaol meeq e cholyaeq'ae lye bi geiq kaol moqheilheil du hhei, kaol Yesu'ae bi haoqchifu yil. Yoqhhaeteel yoqhhaeq e saeziqhael onglci'ae lye haeqvae hael'ae geeba hhei maeq lye saelpo hhae, saelpopuq hhei'laol, zongqdu zael'ae ee'li kaol zhiqmoqkae biq maoqlye hhae. 21 Haoqchifu yil e cholyaeqhael Yesu'ae naelhaeq biq: "Laoqsi, nol geemyeq e saeziqhael gilzuqmyel hoq hhae lye ngaeteel loq lil, nol aeqsul maduq gae'lye eiq maeq fu, kaol zhen'liq maellye Momil e gaelmaeb mael cholyaeq'ae geemyeq gil biq hhae. 22 Ngaeteel Kaiqsa'ae shuilshangl biq hhaeq maeq maeq hhaeq maeq?" 23 Yesu lye yoqhhaeteel e shilfu mael fuduzaq biq, kaol yoqhhaeteel'ae gee biq: 24 "Ngaeq'ae siqbil dyuqbaq qiq mal bi fu laeq. Xilmael'ae zonglda deelhhei mael aeqsul e vuqduq kaol aeqsul e cholmil maeq?" Yoqhhaeteel gee: "Kaiqsa hhae." 25 Yesu yoqhhaeteel'ae gee biq: "Kaiqsa mael laoq Kaiqsa'ae heilmoq hhei biq, Momil mael laoq Momil'ae heilmoq hhei biq." 26 Yoqhhaeteel cholyaeqhael e yiqsiboq ae'lye Yesu e saeziqhael onglci'ae lye geeba hhei e saeziq maeq saelpopuq hhei onglbiq'ae, yoqhhaeq geehoq e saeziq mael gaqmaqzuq li gil biq'ae, kaol yotyel qiq doq eiq maq du vae.
Cholyaeq dyeqhoqlal aeqnaol laoq haeqmiq maeq sheeq maeq mulzaeq
27 Saqdugai cholyaeqhael laoq cholyaeq dyeqhoqlal kiq'ae lye e silqinq maqza'ae lye kei gil biq hhae, yoqhhaeteel onglci e mee'nae hhaeq Yesu'ae naelhaeq lael biq: 28 "Laoqsi, Moxi lye laefuq aedeeteel'ae cu deelhhei laeq mael taq'ae gee: 'Cholyaeq qiq hhaeq e algo haeqmiq sheeq hhei, yaeqguq lye eiq maeq zhol myel sil hhei, yoqhhaeq e aeqnil laoq algo e haeqmiq yaol sheeqzaeq maoqhhae, kaol sil e algo vae houldail bi zhol gaeyil." 29 Yilkaefu, algo aeqnil siq hhaeq zhol'ae, hhael heeq e qiq hhaeq haeqmiq sheeq hhei vae, ngeelfeiq, yaeqguq maeq zhol myel sil vae; 30-31 Dil'el gol dilsan gol eiq sil e qiq hhaeq e haeqmiq yaol sheeq yo vae; siq hhaeq myel xilnye hhae, gilzuqmyel yaeqguq maeq zhol myel sil byel vae. 32 Aeqnaol cholhae aeqmae xitaeq eiq sil vae. 33 Siq hhaeq myel cholhae aeqmae xitaeq yaol sheeq yo vae, aelmaol, yoqhhaeq dyeqhoqlal fu laoq aeqsul e haeqmiq maeq?"
34 Yesu yoqhhaeteel'ae gee biq: "Yaeqmeel dyeqdeel e cholyaeqhael laoq sheeq eiq sheeqzaeq, mul eiq mulzaeq. 35 Ngeelfeiq, aeqgael yi maoqlye e naohaeq kaol cholsil onglci ae'lye dyeqhoqlal mael'ae zae'li ongl e cholyaeqhael laoq, sheeq eiq maeq sheeqzaeq, mul eiq maeq mulzaeq. 36 Yoqhhaeteel dyeqhoqlal vae, tyulkaol, maeq sil yilkiq wae. Xilnye kaollaoq, yoqhhaeteel mqmae yosongl laoqmyel hhae. Yoqhhaeteel laoq Momil e yaeqguqhael'ae. 37 Cholsilhael onglci ae'lye dyeqhoqlal mael laoq, Moxi e Suqhhaq taq'ae cu deelhhei vae. Aelgong aelbol aeqzaeq doq e guqjin onglci'ae, Moxi laoq Hhaoqsongl'ae Yalboqlahanl e Momil, Yiqsaq e Momil kaol Yaqgel e Momil lye gul biq hhae. 38 Momil'ae lye fu hhei'laol, gilzuqmyel cholyaeqhael laoq dyeq hhae. Tyulkaol, Momil laoq sil e cholyaeqhael e Momil maeqngeel'ae, dyeqdeel e cholyaeqhael e Momil'ae." 39 Momil e saeziq mael loq e laqkiq mee'nae hhaeq Yesu'ae gee biq: "Laoqsi, nol gee mael meeq yae." 40 Tyuq ae'lye aeqnaol laoq, yoqhhaeteel yoqhhaeq'ae qiqgiq maeq naelhaeq peq biq vae.
Jidu kaol Dalweil e guanxil
41 Yesu yoqhhaeteel'ae naelhaeq biq: "Cholyaeq haelmillyekaol Jidu laoq Dalweil e Yaqyo'ae lye gee hhaemaeq? 42-43 Dalweil laoq Shipian taq'ae xilnye gee:
'Yeheqhuaq ngaeq e Hhaoqsongl'ae gee biq:
Ngaeq lye noq e diqrenq yaol,
noq e aeqkeel baqda e toqmoq bi geiq fu keellye,
nol ngaeq e laqsseqboq'ae zhol deelhhei.'
44 Dalweil laoq Jidu'ae Hhaoqsongl lye gul biq kaollaoq, Jidu haelmillyekaol Dalweil e yaqyo ngeel kiq laeq?"
Yesu Momil e saeziq mael loq e laqkiqhael'ae gaezaeq biq
45 Gilzuqmyel cholyaeqhael naelhaeq siq fu, Yesu laqcaqhael'ae gee biq: 46 "Noteel laoq Momil e saeziq mael loq e laqkiqhael'ae fu'qyedeelzaeq hhei maoqhhae, Yoqhhaeteel poljye dum hheikaol deelpudeelda myel deel mael hhaol biq hhae, gaiziq vae cholyaeqhael yoqhhaeteel'ae meeqlaeqmaeq lye naelhaeq biq mael zhee hhaol biq, huiltangq onglci'ae kaol baqwanq baqdeel myel'ae, hhael meeq e zholhhael mael eiq zhee hhaol biq hhae. 47 Yoqhhaeteel lye miqchiq e halzahael zaeqneq biq dyul maeqcilmyel, baelyaelmyel heeldoq zhee qiqlaq gee tyeqli lil lye zongl'ae. Cholyaeq xihael laoq hhael naeq myel e chenqfaq hhae shel ngeelvae."