Yesu maduq zhee za aeqmyel Ye'lulsa'lenq vae do'li
11
Yesu kaol laqcaqhael Ye'lulsa'lenq vae deel keelli maoq fu. Zhoqcae Geeqzhoq vae keellael, Boqfaqqiq pusiq kaol Boqdalniq pusiq vae deel niqli maoq fu, Yesu lye laqcaq niq nulhhaeq yaol moqheilheil du hhei. 2 Yoqhhaeteel'ae gee biq: "Noteel laefuqboq e pusiq vae yil gil, zhoq do'li laol, tyuqvae mao'lyu lyuyaeq qiq yaeq kaltoq deelhhei e mol lael'ae, cholyaeq qiq hhaeq eiq maeq ziq yo wae siq, keelpyel hheikaol cheellaeq. 3 Ochoq aeqcheekaol xilnye zongl gil lilmaeq lye naelhaeq lael kaollaoq, noteel xilnye geehoq biq: 'Hhaoqsongl mao'lyu lyuyaeq mulyo biq hhae, qiqlaqlye laol saeqvae cheel hoqlaeq hhaeq.'" 4 Laqcaqhael yil gil vae, kaol mao'lyu lyuyaeq qiq yaeq oheiq nildu e gaiziq e gaelmae vae kaltoq deelhhei mol hhei biq, kaol keelpyel hhei vae. 5 Tyuqvae haoqtul deelhhei e cholyaeq yoqhhaeteel'ae naelhaeq biq: "Noteel aeqcheekaol mao'lyu lyuyaeq mael keelpyel lilmaeq?" 6 Laqcaqhael Yesu haelgee e saeziq laoqmyel geehoq gil biq, kaol cholyaeq tyuhael yoqhhaeteel'ae bi cheel yil vae. 7 Yoqhhaeteel lye mao'lyu lyuyaeq mael Yesu zael'ae cheellaeq biq, kaol aeqyoyoq e aelhongq mael mao'lyu lyuyaeq e dolcheq mael'ae heil da hhei biq, kaol Yesu ziq da'li vae. 8 Haelnaeqmyel cholyaeqhael lye aeqyoteel e nildu e aelhongq mael gaelmae vae beiqhoq deelhhei biq, cholyaeq qiq miq laoq aeqhael ae'lye alpaq de laq, kaol gaelmae vae baqhoq deelhhei biq. 9 Laefuq aeqnaol myel deel e cholyaeqhael gul bonggaebyel'ae, gee:"Heqsalnal,
Hhaoqsongl e cholmil maellye lael e qiq hhaeq laoq maeqdaeqhhaeq'ae!
10 Aeqgael lael maoqlye
aedeeteel e aeqpyuq aeqdae Dalweil e goqja laoq maeqdaeqhhaeq'ae!
Hhaelgao gao'li Momil eiq maeqdaeqhhaeq'ae!
11 Yesu Ye'lulsa'lenq vae keellael, kaol sholhaol vae do'li laol yulboq xiboq myel futongq byel vae. Maq naq vae lyekaol, shiqtuq qyelniq hhaeq nyegael milmae heeqmyel ae'lye duyil kaol Boqdalniq pusiq vae yil vae.
Yesu siqpyu'laq'oq e aelbol mael'ae doqchiq gee biq
12 Aeqnaol qiq nao, yoqhhaeteel Boqdalniq vae lye duyi fu, Yesu oqma myeq li biq. 13 Yoqhhaeq gaelmaolsae'lye siqpyu'laq'oq e aelbol qiq bol mol hhei biq, aelbol taq'ae alpaqpaq hhae, deel du'li kaol aelbol taq'ae aelsiqsiq'ae maeqlye fuzaeq li. Yoqhhaeq aelbol holhhaq'ae keellael, ngeelfeiq, alpaq maoqlaol qiqgiq maeq saelpo hhei'ae, yaeqmeel laoq siqpyu'laq'oq e aelsiq heille hoq e naohaeq eiq maeqngeel kaol'ae. 14 Yesu aelbol mael'ae gee biq: "Saeq ae'lye aeqnaol laoq noq e aelsiq mael cholyaeq qiq hhaeq eiq maeq zaeq aeqwae!" Yoqhhaeq e laqcaqhael eiq bael gaeq vae.
Yesu lye sholhaol vae moqgoq ongqzaeq hael yaol lyeqdu biq
15 Yoqhhaeteel Ye'lulsa'lenq vae keellael. Yesu sholhaol vae do'li, kaol zhoqmyel sholhaol e dyekaeq vae moqgoq ongqzaeq vulzaeq e cholyaeqhael yaol lyeqdu byel hhei, pulziq heilpael e cholyaeqhael e zaelzhee, kaol haoqhaoq ongqzaeq e cholyaeqhael e duqtyel mael deiqlol byel biq. 16 Qiq hhaeq yaol eiq moqgoq heil hheikaol, sholhaol vae lye maeq bi deelpol duyil'ae. 17 Kaol yoqhhaeq cholyaeqhael'ae zhoqmyel geemyeq gil biq: "Momil e Suqhhaq taq'ae cu deelhhei
'Ngaeq e heelhaol mael laoq, milcaeq holtaq e cholyaeqhael heeldoq gee e heelhaol'ae lye gul biq maoq maeqngeel maeq?
ngeelfeiq, noteel lye lolbiq diqkoqzaeq e cholyaeq e laoqhaol zonglpeq vae!'"
18 Jilsizhangqhael kaol Momil e saeziq mael loq e laqkiqhael vae gaeq hhei gil biq, kaol Yesu yaol haelmillye loqho maellye zonglsil maoqlye geedazaq gil, ngeelfeiq, yoqhhaeq'ae gu gil biq, cholyaeqhael yoqhhaeq geemyeq e saeziq mael'ae gaqmaqzuq gil biq kaol'ae. 19 Kiqsulkiqxeiq keellael fu, Yesu kaol laqcaqhael milmae heeqmyel nildu'ae duyil gil vae.
Xinlxin za laol aeqchee eiq zonglkeel ongl'ae
20 Mqshoq, yoqhhaeteel siqpyu'laq'oq e aelbol tyu qiq bol dyeq myel ae'lye deelpol duyil fu, aelbol dongqcil dyel'eiq kuga e mol hhei gil biq. 21 Biqdeq nyuq tullaeq biq kaol Yesu'ae gee biq: "Labiq o, nol fu! Noq lye doqchiq gee biq e siqpyu'laq'oq e aelbol mael kuga vae." 22 Yesu yoqhhaeteel'ae geehoq biq: "Noteel Momil'ae xinlxin za maoqhhae. 23 Ngael aeqdilmyel noteel'ae geegaeq laeqngeel, aeqsul haoq geeqzhoq xi qiq zhoq'ae gee biq: 'Tullael, eeldeel deelmae vae jyedo yil!' Yoqhhaeq e neemae onglci'ae maq huaiqyiq, aeqyoq gee mael aeqdilmyel peqlal kiq'ae lye xiangxinl laol, geeqzhoq xi qiq zhoq aeqdilmyel jyedo hhei ngeelvae. 24 Tyulkaol, ngael noteel'ae geegaeq gil laeqngeel, noteel aeqchee mael'ae heeldoq geezaeq feiq, hhamul'ae lye xiangxinl laol, aeqdilmyel hhamul wae. 25 Noteel haoqtul deelhhei myel heeldoq gee fu, aeqsul noteel'ae zonglzhil laeq'ae lye nyuq tullaeq laol, yoqhhaeq'ae yuanqliangl biq maoqhhae, xil'nye laol, noteel e mqmae Aeqdae eiq noteel lye zonglzhil mael yuanqliangl laeq'ae."a
Cholyaeqhael baelyaelmyel Yesu vae shilfu biq
27 Yoqhhaeteel Ye'lulsa'lenq vae yol keellael. Yesu sholhaol vae deel fu, jilsizhangqhael, Momil e saeziq mael loq e laqkiqhael kaol zhangqlaoqhael, Yesu zael'ae keellael, 28 Kaol yoqhhaeq'ae naelhaeq biq: "Nol aeqsul e laqtaq maellye silqinq xihael zongl lilmaeq? Aeqsul lye noq'ae xilnye laqtaq biq laq kaol silqinq xihael zongl lilmaeq?" 29 Yesu yoqhhaeteel'ae gee biq: "Ngael noteel'ae saeziq qiq doq naelhaeq gil laeqngeel, noteel ngaeq'ae geehoq gil laeq, tyulnye laol, ngael aeqsul e laqtaq maellye silqinq xihael zongl lil lye noteel'ae geedu gil laeqngeel. 30 Yoqhanl e ciq e gui'liq mael mqmae ae'lye lael, paelsilmyel cholyaeq ae'lye lael hhaemaeq?" Noteel ngaeq'ae geehoq gil laeq." 31 Yoqhhaeteel hhaellaelmyel geedazaq gil'ae: "Aedeeteel 'mqmae ae'lye lael hhae' lye geehoq kaollaoq, yoqhhaeq xilnye naelhaeq laelkiq: 'Noteel aeqcheekaol yoqhhaeq'ae maeq xiangxinl gil lilmaeq?' 32 Ngeelfeiq, aedeeteel 'cholyaeq ae'lye lael hhae' lye geehoq biq kaollaoq, yoqhhaeteel cholyaeqhael'ae gu gil biq hhae, cholyaeqhael Yoqhanl laoq aeqdilmyel xianzhi'ae lye kei gil biq kaol'ae." 33 Tyulkaol, yoqhhaeteel Yesu'ae geehoq biq: "Ngaeteel maeq loq yae." Yesu yoqhhaeteel'ae gee biq: "Ngael eiq noteel'ae aeqsul e laqtaq maellye silqinq xihael zongl lil lye maeq geedu."