Hhaoqsongl'ae xianggao xyecheeq hhei biq
12
Yuq'yeqjyeq maeq keellael e koq nao fu, Yesu Boqdalniq pusiq vae keellael, tyuqvae laoq, Lasa'lul zhol e milcaeq vae ngeelvae; Lasa'lul laoq Yesu lye cholsil onglci ae'lye bi dyeqhoqlal e qiq hhaeq'ae. 2 Cholyaeq lye Yesu'ae tyuqvae baqwanq paeqgaelsael meeq deelhhei biq. Maqdal tyuqvae zhaofu gil biq hhae, Lasa'lul kaol baeqjyelboq e qiq miq eiq Yesu nyegael aelhoq qiqgael zaeq hhae. 3 Maqlilyal pyuqjyeqjyeq e aeqdilmyel e naqdaq xianggao qiq gil heil hhei, kaol Yesu e aeqkeel mael'ae soda hhei biq, kaol yoqhhaeq e qyelkeel maellye xyegee biq; kaol laoqhaol qiq ssul myel xianggao xiang bongbyel'ae. 4 Yesu e laqcaq qiq hhaeq, aeqnaol Yesu yaol yotyel maqdumyel ongqzaeq biq e Ja'lyul cholyaeq Yoqdal ngeelvae, yoqhhaeq gee: 5 "Xianggao xilmael pulziq dyuqbaq suqhael (300) ongqdu hhei, kaol saeqyaeqhael'ae heil biq, aeqcheekaol xilnye maeq zongl hhaemaeq?" 6 Yoqhhaeq saeziq xilnye gee mael laoq, yoqhhaeq aeqdilmyel saeqyaeqhael'ae saeq biq maeqngeel'ae, yoqhhaeq laoq lolbiq'ae, dyuqbaq palbye mael guanq hhae, kaol dyuqbaq palbye onglci'ae zoq e dyuqbaq mael duqlye heilzaeq kaol'ae. 7 Yesu gee: "Yoqhhaeq aeqchee zongl zongl biq, yoqhhaeq xianggao xilmael taeq deelhhei mael laoq, ngaeq yaol baqduqm e naohaeq gae'lye paeqgaelsael meeq deel hhae. 8 Noteel laoq haeqfu eiq saeqyaeq nyegael qiqgael hhae baelzhol'ae, ngeelfeiq, ngaeq nyegael duqlye qiqgael maeq hhae baelzhol'ae."9 Haelnaeqmyel Yoqtail cholyaeqhael Yesu tyuqvae zhol hhae lye loq biq, kaol gilzuqmyel lael gil vae, yoqhhaeteel laoq Yesu gae'lye lael dyul maeqcil'ae, Yesu lye cholsil onglci ae'lye bi dyeqhoqlal e Lasa'lul yaol eiq fu gil maoqlye kaol'ae. 10 Tyulkaol, jilsizhangqhael Lasa'lul yaol eiq xyeq maoqlye geedazaq gil'ae, 11 Haelnaeqmyel Yoqtail cholyaeqhael Lasa'lul gae'lye yoqhhaeteel'ae deelsae hhei, kaol Yesu'ae xinlzaeq vae kaol'ae.
Yesu maduq zhee za aeqmyel Ye'lulsa'lenq vae do'li
12 Aeqnaol qiq nao, haelnaeqmyel cholyaeqhael zaeqnao zaeq li maoqlye da'li gil, Yesu Ye'lulsa'lenq vae lael maoqlye hhae lye gaeq hhei gil biq, 13 Kaol congqzheel congqpaq heil hheikaol yoqhhaeq'ae sheeqcaq yil biq, hhaol gae'lael aeqmyel gul:
"Heqsalnal, Yiqsellyel e zongmae!
Hhaoqsongl e cholmil maellye lael e qiq hhaeq laoq maeqdaeqhhaeq'ae!"
14 Yesu lye mao'lyu lyuyaeq qiq yaeq saelpopuq hhei, kaol ziq da'li, suqhhaq taq'ae cu deelhhei laoqmyel:
15 "Xi'an milmae heeqmyel e cholyaeqhaela o, maq gu gil kael!
Fu hhei, noq e zongmae lael vae,
yoqhhaeq mao'lyu lyuyaeq ziq hheikaol lael vae."
16 Laqcaqhael zhoqmyel fu laoq silqinq xihael maeq loq biq wae siq, ngeelfeiq, Yesu rongqyaol hhamul hhei biq aeqnaol'ae, yoqhhaeteel saeziq xihael yoqhhaeq'ae gee hhae lye caiq nyuq tullaeq biq wae siq, kaol cholyaeqhael eiq aeqdilmyel yoqhhaeq'ae silqinq xihael zongl biq vae. 17 Yesu nyegael qiqgael baelzhol e tyuhael laoq, Yesu laoq Lasa'lul'ae fuq'ongl ae'lye duyi lye gul biq, kaol yoqhhaeq yaol cholsil onglci ae'lye bi dyeqhoqlal mael bael mol e cholyaeqhael, gilzuqmyel xilmael'ae zoqzenl bael kei biq'ae. 18 Cholyaeqhael yoqhhaeq xilnye shenqjiq zongldu hhei'ae lye gaeq hhei biq, tyulkaol, yoqhhaeq'ae sheeqcaq yil biq. 19 Tyulkaol, Faqlilsail cholyaeqhael hhaellaelmyel geegaeq gil: "Noteel fu gil, noteel laoq alngeiqmyel zongl wae, milcaeq taq e cholyaeqhael yoqhhaeq'ae cho'lyeq byel yil vae!"
Xi'lal cholyaeqhael Yesu'ae mol lael
20 Zaeqnao fu, heel li e cholyaeqhael onglci'ae, qiq miq laoq Xi'lal cholyaeq'ae. 21 Yoqhhaeteel Ja'lillil e Boqsaildal cholyaeq Fei'lil tyuqvae keellael, yoqhhaeq'ae geezaeq biq, gee: "Algo, ngaeteel Yesu'ae mol goq yae." 22 Fei'lil laoq Andeqlyel'ae geegaeq yil biq, Andeqlyel kaol Fei'lil laoq Yesu'ae geegaeq yil biq. 23 Yesu yoqhhaeteel'ae gee biq: "Cholyaeq Yaqyo rongqyaol hhamul e naohaeq keellael vae! 24 Ngael aeqdilmyel noteel'ae geegaeq laeqngeel, meqziq qiq ne, milcaeq vae leeqgae deelhhei kaol maeq sil kaollaoq, haeqfu eiq qiq ne wae; sil hhei kaollaoq, haelnaeqmyel zaelsiqsiq du hhei. 25 Aeqyoyoq e aeqyil mael'ae gaeqzaeqhoq kaollaoq, aeqyil mael hhae sil ngeelvae; milcaeq xilmael taq e aeqyoyoq e aeqyil mael'ae neemasu zaq hoq e cholyaeqhael laoq, aeqyil mael haeqfu eiq zadeel'ae. 26 Cholyaeq ngaeq'ae fuqsil kaollaoq, ngaeq'ae cho'lyeq lael maoqhhae; ngael haeqvae zhol laol, ngaeq'ae fuqsil e cholyaeq eiq haeqvae zhol hhae, cholyaeq ngaeq'ae fuqsil kaollaoq, ngaeq e aeqdae eiq yoqhhaeq'ae zunjinl biq'ae.
27 "Ngael yaeqmeel neemae teel eiq maeq zholsael yae, ngael aeqchee lye gee siq laeq? 'Aeqdae o, ngaeq'ae naohaeq xilmael ae'lye jiul du hhei laeq' lye gee laeq? Ngeelfeiq, ngael laoq naohaeq xilmael gae'lye yi aeqlil. 28 Aeqdae o, nol noq e cholmil mael rongqyaol bi za lye nyuqlil!" Tyuqfu, mqmae taq ae'lye yotyel gee'ae: "Ngael ngaeq e cholmil mael rongqyaol bi za wae, rongqyaol zail bi za maoq siq." 29 Dongqpyeq'ae haoqtul deelhhei e cholyaeqhael gaeq hhei biq laol, gee: "Mqziqziq vae." Baeqjyelboq e qiq miq gee: "Mqmae yosongl yoqhhaeq'ae saeziq gee'naeq biq hhae." 30 Yesu gee: "Yotyel xilmael laoq ngaeq gae'lye maeqngeel'ae, noteel gae'lye geedu hhei hhae. 31 Yaeqmeel laoq milcaeq xilmael taq e cholyaeqhael'ae shenqpanl e naohaeq'ae, yaeqmeel milcaeq xilmael'ae guanq e tyutaeq yaol bi lyeqdu maoqlye hhae. 32 Ngaeq yaol milcaeq ae'lye deiqqei laeq fu, haelnaeqmyel cholyaeq ngaeq saeqvae hoqlal maoqlye hhae." 33 Yoqhhaeq saeziq xihael gee mael laoq, aeqgael aeqyoyoq haelmillye sil maoqlye hhae lye mael'ae gee hhae. 34 Tyulkaol, cholyaeqhael yoqhhaeq'ae gee biq: "Ngaeteel lilfaq taq ae'lye Jidu laoq haeqfu eiq dyeqdeel'ae lye loq, nol haelmillyekaol 'Cholyaeq Yaqyo laoq aeqdilmyel hhae bi deiqqei hhei'ae' lye gee lilmaeq? Cholyaeq Yaqyo xitaeq laoq aeqsul maeq?" 35 Yesu gee: "Aeqcael mael noteel onglci'ae zhol e naohaeq maeq naeq vae. Noteel laoq aeqcael za siq fu deel maoqhhae, aeqgael nahongq mael noteel'ae lyeqmil laeq maeqhe. Nahongqlye vae deel e cholyaeq laoq, haeqvae deel yil maoqlye maeq loq'ae. 36 Noteel laoq aeqcael za siq fu aeqcael xilmael'ae xiangxinl maoqhhae, kaol noteel yaol aeqcael e yaeqguq bi peqlal."
Yoqtail cholyaeqhael maeq xiangxinl nae'ae
Yesu saeziq xihael gee byel hhei'laol, yoqhhaeteel zaellye deelsae hheikaol hoqhhaq hhei vae. 37 Yesu yoqhhaeteel yiqsi ae'lye shenqjiq haelnaeqmyel zongl vae, ngeelfeiq, yoqhhaeteel maeq xiangxinl gil biq wae siq. 38 Xilmael laoq Yiqsailyal xianzhi e saeziq mael peqlal maoqlye hhae, gee:
"Hhaoqsongl o, aedeeteel geegaeq mael aeqsul xiangxinl maeq?
Hhaoqsongl e onglzaeq mael aeqsul'ae bi mol kaollaeq?
39 Yoqhhaeteel maeq xiangxinl mael laoq, Yiqsailyal yol xilnye gee kaol'ae:
40 "Momil lye yoqhhaeteel'ae mabyeq bi byeq yil hhei, neemae mael neeha bi ha yil hhei,
aeqgael yoqhhaeteel ma'ne mol congl,
neemae nyuqtong ongl kaol polhoqlael,
kaol ngael yoqhhaeteel'ae zonglmeeq biq maeqhe."
41 Yiqsailyal saeziq xihael gee mael laoq, yoqhhaeq e rongqyaol mael mol vae, tyulkaol, saeziq xihael yoqhhaeq'ae gee hhae. 42 Xilnye feiq, zhiqmoq yoheeqhael onglci'ae Yesu'ae xinlzaeq e cholyaeq eiq zhee naeq'ae, ngeelfeiq, yoqhhaeteel laoq Faqlilsail cholyaeqhael gae'lye xiangxinl lil lye maeq cenqrenl peq biq'ae, aeqgael huiltangq ae'lye lyeqdu laq maeqhe lye kaol'ae. 43 Yoqhhaeteel cholyaeqhael ae'lye lael e rongqyaol mael'ae gaeq biq mael, Momil ae'lye lael e rongqyaol mael taq'ae hhaelgaeq biq kaol'ae.
44 Yesu yotyel haeqheemyel gee: "Ngaeq'ae xiangxinl hael laoq, ngaeq'ae xiangxinl dyul maeqcil'ae, ngaeq yaol moqheilheil duyi laq e qiq hhaeq'ae xiangxinl hhae. 45 Cholyaeq ngaeq'ae mol hhei'laol, ngaeq yaol moqheilheil duyi laq e qiq hhaeq'ae mol hhei ngeelvae. 46 Ngael laoq aeqcael lil, ngael milcaeq taq'ae lael mael laoq, ngaeq'ae hael xiangxinl hael laoq nahongqlye vae maeq bi zhol vae. 47 Cholyaeq ngaeq e saeziq mael gaeq hhei feiq maeq zongl gaeyil kaollaoq, ngael yoqhhaeq'ae maeq shenqpanl yil. Ngael lael mael laoq, milcaeq taq e cholyaeqhael'ae shenqpanl maoqlye maeqngeel yil, milcaeq taq e cholyaeqhael'ae jiul yi aeqlil. 48 Ngaeq yaol maq mul laq, ngaeq e saeziq mael maeq naelhaeq e cholyaeq laoq, yoqhhaeq'ae shenqpanl biq e za'ae. Ngael gee e saeziq mael aeqgael milcaeq taq e aeqnaol naolli qiq nao yoqhhaeq'ae shenqpanl biq maoq. 49 Ngael aeqyoyoq gae'lye gee maeqngeel yil, ngaeq yaol moqheilheil duyi laq e aeqdae, ngaeq'ae aeqchee lye gee kaol haelmillye gee lye minllinl laeq hhae. 50 Ngael laoq yoqhhaeq e minllinl mael laoq, haeqfu eiq zadeel e aeqyil mael ngeelvae lye loq lil. Tyulkaol, ngael haelgee mael laoq, Aeqdae ngaeq'ae gee lye moqheilheil laeq hael ngeelvae."