Yesu maduq zhee za aeqmyel Ye'lulsa'lenq vae do'li
21
Yesu kaol laqcaqhael Ye'lulsa'lenq vae keelli maoq fu, Zhoqcae Geeqzhoq e Boqfaqqiq vae do'li, kaol laqcaq niq nulhhaeq yaol moqheilheil du hhei, 2 Yoqhhaeteel'ae gee biq: "Noteel yulboq e pusiq vae li gil, qiqlaqmyel tyuqvae mao'lyu qiq yaeq kaltoq deelhhei mol lael'ae, dongqpyeq'ae laoq mao'lyu lyuyaeq baelzhol hhae, kaol mao'lyu mael keelpyel hhei, kaol ngaeq e saeqvae cheellaeq. 3 Cholyaeq noteel'ae aeqchee aeqchee lye naelhaeq lael kaollaoq, noteel gee biq: 'Hhaoqsongl mao'lyu mulyo biq hhae.' Cholyaeq tyutaeq noteel'ae nae'naemyel bi cheellaeq laeq'ae." 4 Silqinq xilmael peqlal mael laoq, xianzhi gee gol e saeziq mael peqlal hhae, gee:5 'Xi'an e yaeqmiq yaqyo'ae gee biq maoqhhae:
Fu gil, noq e zongmae noq e saeqvae keellael,
yoqhhaeq laoq maeq dilqeizaeq e qiq hhaeq'ae,
yoqhhaeq mao'lyu ziq hhei hhae,
ziq hhei mael laoq mao'lyu lyuyaeq'ae,
aeq'yel chengdyeqlye toq e mao'lyu e aelyaeq'ae.'
6 Laqcaqhael Yesu moqheilheil laoqmyel zongl yil vae, 7 Mao'lyu kaol mao'lyu lyuyaeq mael cheellaeq, kaol yoqhhaeteel e aelhongq mael mao'lyu e dolcheq mael'ae heil da hhei'laol Yesu ziq da'li vae. 8 Haelnaeq naeqmaemyel cholyaeqhael aeqyoyoq e aelhongq mael gaelmae vae beiqhoq deelhhei, qiq miq laoq aelbol allaq mael dega hheikaol gaelmae vae beiqhoq deelhhei. 9 Laefuq aeqnaol myel deel e cholyaeqhael gul bonggaebyel'ae, gee:
"Heqsalnal maela Dalweil e Yaqyo'ae biq biq!
Hhaoqsongl e cholmil maellye lael e qiq hhaeq laoq maeqdaeqhhaeq'ae!
Hhaelgao gao'li e heqsalnal!"
10 Yesu Ye'lulsa'lenq vae do'li, milmae heeqmyel e haelzhol cholyaeq gilzuqmyel aeqvuqlaelvuqmyel zongl tul beq laq, gee: "Xitaeq aeqsul maeq?" 11 Cholyaeqhael gee: "Xitaeq laoq Ja'lillil e Naqsa'lel ae'lye lael e xianzhi Yesu'ae."
Yesu lye sholhaol vae moqgoq ongqzaeq hael lyeqsae biq
12 Yesu sholhaol vae do'li, sholhaol e dyekaeq vae moqgoq ongqzaeq vulzaeq e cholyaeqhael yaol lyeqdu byel hhei, pulziq mael heilpael e cholyaeqhael e zaelzhee, kaol haoqhaoq ongqzaeq e cholyaeqhael e duqtyel mael deiqlol byel biq, 13 Kaol yoqhhaeteel'ae gee biq: "Momil e Suqhhaq taq'ae cu deelhhei:
'Ngaeq e heelhaol mael laoq, heeldoq gee e heelhaol'ae lye gul biq maoqhhae,
ngeelfeiq, noteel lye lolbiq diqkoqzaeq e cholyaeq e laoqhaol zonglpeq vae!'"
14 Sholhaol e dyekaeq vae mabyeq kaol keeldil zhol'ae, kaol yoqhhaeteel Yesu e dongqpyeq vae keellael, kaol yoqhhaeq lye yoqhhaeteel yaol zonglmeeq biq vae. 15 Jilsizhangqhael kaol Momil e saeziq mael loq e laqkiqhael Yesu haelzongl e maeqdaeqhhaeq e silqinq mael mol hhei biq, yaeqguq guqyaeqhael sholhaol dyekaeq vae: "Heqsalnal mael Dalweil e Yaqyo'ae biq hhei biq!" lye gul e yol mol hhei biq laol zhee hol gil biq'ae, 16 Kaol yoqhhaeq'ae gee biq: "Cholyaeq xihael gul mael, nol gaeq wae maeq?" Yesu yoqhhaeteel'ae gee biq: "Gaeq aeqwae. Momil e Suqhhaq taq'ae gee: 'Noq lye yaeqguq guqyaeq kaol aeqchil dol e albye e myeqbongq ae'lye, Momil'ae laqma deiqqei biq e saeziq bi geedu hhei', xilmael noteel maeq duq gol yil maeq?" 17 Tyulkaol, yoqhhaeq yoqhhaeteel ae'lye deelsae hhei, milmae heeqmyel ae'lye duyi, kaol Boqdalniq vae yil vae, kaol tyuqvae haq hhae.
Yesu siqpyu'laq'oq e aelbol mael'ae doqchiq gee biq
Keq 11:12-14; 20-24
18 Mqshoq milmae heeqmyel'ae hoqli fu, yoqhhaeq myeq li biq'ae. 19 Gaelmae dongqpyeq vae siqpyu'laq'oq e aelbol qiq bol mol hhei biq, kaol dongqpyeq vae deel niqli, aelbol taq'ae alpaq maoqlaol qiqgiq maeq saelpopuq hhe'ae, kaol aelbol mael'ae gee biq: "Saeq ae'lye aeqnaol, nol aelsiq qiqzael eiq maeq siq laelkiq wae!" Siqpyu'laq'oq e aelbol tyu qiq bol qiqlaqmyel kuga hhei vae. 20 Laqcaqhael mol hhei biq laol, gaqmaq zhee zuq li gil biq'ae, gee: "Siqpyu'laq'oq e aelbol mael haelmillyekaol qiqlaqmyel kuga hhei hhaemaeq?" 21 Yesu yoqhhaeteel'ae geehoq biq: "Ngael aeqdilmyel noteel'ae geegaeq laeqngeel, noteel xinlxin za, maq huaiqyiq kaollaoq, ngael siqpyu'laq'oq e aelbol mael'ae zongl biq e silqinq mael zonglkeel ongl dyul maeqcilmyel, geeqzhoq xilmael'ae gee biq: 'Saeqvae milcaeq ae'lye deelsae hhei, kaol eeldeel deelmae vae jyedo yil!' Xilmael eiq peqlal kiq'ae. 22 Noteel heeldoq gee, aeqchee geezaeq haoq, xiangxinl laol Momil aeqdilmyel noteel'ae biq laq'ae."
Cholyaeqhael baelyaelmyel Yesu vae shilfu lael biq
23 Yesu sholhaol vae do'li, cholyaeqhael'ae geemyeq gil biq siq fu, jilsizhangqhael kaol cholyaeqhael e zhangqlaoqhael yoqhhaeq'ae naelhaeq lael biq: "Nol aeqchee laqtaq maellye silqinq xihael zongl lilmaeq? Noq'ae laqtaq biq laq e qiq hhaeq aeqsul maeq?" 24 Yesu yoqhhaeteel'ae geehoq biq: "Ngael eiq noteel'ae qiq doq naelhaeq maoq, noteel ngaeq'ae geedu laq kaollaoq, ngael noteel'ae aeqchee laqtaq maellye silqinq xihael zongl lil lye geedu gil laqngeel. 25 Yoqhanl e ciq e gui'liq mael haeqvae lye lael hhaemaeq? Mqmae ae'lye lael, paelsilmyel cholyaeq ae'lye lael hhaemaeq?" Yoqhhaeteel hhaellaelmyel geedazaq gil, gee: "Aedeeteel 'mqmae ae'lye lael hhae' lye gee kaollaoq, yoqhhaeq aedeeteel'ae gee laelkiq: 'Xilnye kaollaoq, noteel aeqcheekaol yoqhhaeq'ae maeq xiangxinl gil lilmaeq?' 26 Ngeelfeiq, 'cholyaeq ae'lye lael hhae' lye gee kaollaoq, aedeeteel cholyaeqhael'ae gu, cholyaeqhael gilzuqmyel Yoqhanl laoq xianzhi'ae lye kei gil biq kaol'ae." 27 Tyulkaol, yoqhhaeteel Yesu'ae geehoq biq: "Ngaeteel maeq loq yae." Yesu eiq yoqhhaeteel'ae geehoq biq: "Ngael eiq noteel'ae aeqchee laqtaq maellye silqinq xihael zongl lil lye maeq geedu."
Yaqyo niq nulhhaeq e dullaelmyel guqjin
28 "Xilnye silqinq qiq mal za'ae, noteel laoq haelmillye nyuq lilmaeq? Cholyaeq qiq hhaeq'ae yaqyo niq nulhhaeq zhol'ae. Yoqhhaeq hhael heeq e yaqyo'ae gee lael biq: 'Yaeqguq, yaeqnao nol siqbaq aeqhael'ae aeqhaelmul yil.' 29 Yoqhhaeq geehoq biq: 'Ngael maq yil', aeqnaol yoqhhaeq xilnye haeq gee maoq ngeelzhol'ae yae lye nyuqhoq li biq, kaol yil vae. 30 Yoqhhaeq hhael nil e yaqyo vae eiq xilnye gee lael biq. Yoqhhaeq geehoq biq: 'Aeqdae, ngael yil hhaeq', ngeelfeiq, maq yil'ae. 31 Yaqyo xi niq nulhhaeq haetaeq laoq aeqdae gee laoqmyel zongl yil hhaemaeq?" Yoqhhaeteel gee: "Hhael heeq e yaqyo'ae." Yesu gee: "Ngael aeqdilmyel noteel'ae geegaeq laeqngeel, shuil shezaeq e cholyaeqhael kaol jilnyuqhael, noteel e laefuqmyel Momil e Goqja'ae hha do'li'ae. 32 Yoqhanl noteel saeqvae lael, kaol noteel'ae gongyil e gaelmae sheeqmyeq biq, ngeelfeiq, noteel laoq yoqhhaeq'ae maeq xiangxinl biq'ae, shuil shezaeq e cholyaeqhael kaol jilnyuqhael laoq yoqhhaeq'ae xiangxinl kaol'ae. Noteel mol hhei feiq, neemae maeq paellael nae, kaol yoqhhaeq'ae maeq xiangxinl nae'ae."
Aeqhael mulpazaq e cholyaeqhael e dullaelmyel guqjin
33 "Noteel dullaelmyel guqjin qiq mal naelhaeq gil siq: Cholyaeq qiq haoq toq e hhaoqsongl lye siqbaq qiq koq duq du hhei, dongqpyeq dongqjyel'ae kilkul diqlongl byel hhei, onglci'ae zilbaeq deiqduzaq e eelzhol qiq mal duq du hhei, aeqhael fu'qye e haelcul qiq ssul cu hhei'laol, aeqhael mulpazaq e cholyaeqhael vae bi mulpazaq, tyulnye laol, gaelmaolsae'lye vae yil vae. 34 Aelsiq chezaq hhaeq fu keellael goqbiq vae, yoqhhaeq lye yaqhacheqzaq e cholyaeq yaol, aeqhael mulpazaq e cholyaeqhael zael'ae aelsiq heil hoqyil lye moqheilheil du hhei. 35 Aeqhael mulpazaq e cholyaeq lye yaqhacheqzaq e cholyaeqhael yaol eetyeq biq, qiq hhaeq yaol laoq tyel biq, qiq hhaeq yaol laoq xyeq biq, qiq hhaeq yaol laoq haqlo maellye beiqsil biq. 36 Hhaoqsongl laefuq taq'ae hhael naeq myel e baeqjyelboq e yaqhacheqzaq e cholyaeq yaol moqheil yol heil du hhei; aeqhael mulpazaq e cholyaeqhael laoq yoqhhaeteel vae eiq laefuq hael laoqmyel zongl gil biq hhae. 37 Aeqnaol naolli laoq yoqhhaeq aeqyoyoq e yaqyo yaol yoqhhaeteel tyuqvae moqheilheil du hhei, gee: 'Yoqhhaeteel ngaeq e yaqyo'ae zunjinl biq vae laoq.' 38 Ngeelfeiq, aeqhael mulpazaq e cholyaeqhael yoqhhaeq e yaqyo yaol mol hhei biq laol, hhaellaelmyel gee gil: 'Xitaeq laoq aeqgael zaeqdye halngeiq e hhaoqsongl geiq maoqlye hhae. Lael gil, aedeeteel yoqhhaeq yaol xyeq biq, kaol yoqhhaeq e zaeqdye halngeiqhael mulchiqzaeq gil biq maoq!' 39 Tyulkaol, yoqhhaeteel lye yoqhhaeq yaol eetyeq biq, kaol yoqhhaeq yaol siqbaq aeqhael nildu'ae beiq du hheikaol xyeq biq vae. 40 Siqbaq aeqhael e hhaoqsongl lael fu, aeqhael mulpazaq e tyuhael'ae haelmillye zongl biq maoqlye hhaemaeq?" 41 Yoqhhaeteel gee: "Hhaoqsongl duqlaq maellye duqlaq e cholyaeq tyuhael yaol zonglmye biq maoqlye hhae, kaol siqbaq aeqhael mael naohaeq keellael laol aelsiq heilhoq nae e aeqhael mulpazaq e tyuhael'ae, bi mulpazaq maoqlye hhae." 42 Yesu yoqhhaeteel'ae gee biq: "Noteel Momil e Suqhhaq taq'ae saeziq xihael maeq duq gol yil maeq?
'Laoqhaol cuzaq e cholyaeq lye beiqgae e haqlob mael laoq,
congqciq paeqhhael e hhal mulyo e haqlo peqlal vae.
Xilmael laoq Hhaoqsongl haelzonglhael'ae,
aedeeteel e ma'ne maellye fu kaollaoq maeqdaeqhhaeq'ae.'
43 Tyulkaol, ngael noteel'ae geegaeq gil laeqngeel, Momil e Goqja mael noteel ae'lye diqkoqzaeq yil, kaol aelsiq siq laelkiq e baeqjyelboq minqcuq e cholyaeq'ae biq hhei biq maoqlye hhae. 44 Aeqsul haqlo xilmael taq'ae tongqcheeq dayil laol, jyexul hhei ngeelvae; haqlo xilmael aeqsul e aeqhhaol'ae jyecheeq dayil laol, aeqsul yaol yaqnu hhei ngeelvae."