Siqbaq aeqhael'ae mulhhael mul e dullaelmyel guqjin
20
"Mqmae Goqja laoq cholyaeq qiq haoq toq e hhaoqsongl mqshoq naqlye, yoqhhaeq e siqbaq aeqhael vae aeqhael bi mul lal e cholyaeq saelpo yil laoqmyel hhae. 2 Yoqhhaeq aeqhael mulyaeq'ae qiq nao pulziq dyuqbaq qiq mal heil laeqngeel lye geemeeq deelhhei biq laol, yoqhhaeteel yaol siqbaq aeqhael vae bi yil vae. 3 Mqshoq jiuqdianq laellye fu duyil laol, gaiziq vae qiqgiq zonglhhael maqza biq e cholyaeq haoqtul deelhhei siq e mol hhei biq, 4 Kaol yoqhhaeteel'ae gee biq: 'Noteel eiq siqbaq aeqhael vae do'li gil, noteel'ae hhae heil maoq e mulhhael hhaeqpyuq mael, ngael heil gil laeqngeel.' 5 Kaol yoqhhaeteel eiq do'li vae. Yoqhhaeq naoongl laellye fu, kaol xalvuq sandianq fu yol duyil, yoqhhaeq eiq xilnye zongl hhae. 6 Xalvuq vuqdianq laellye fu yol duyil, yoqhhaeq tyuqvae cholyaeq haoqtul deelhhei siq e mol hhei biq, kaol yoqhhaeteel'ae naelhaeq biq: 'Noteel aeqcheekaol qiq nao myel qiqgiq maeq zongl myel saeqvae haoqtul gil lilmaeq?' 7 Yoqhhaeteel gee: 'Cholyaeq ngaeteel'ae mul maoqlye maeq saelpo yi gil laeq kaol'ae.' Yoqhhaeq gee: 'Noteel eiq siqbaq aeqhael vae do'li gil.' 8 Mqkiq keellael, siqbaq aeqhael e hhaoqsongl aeqhael mulyaeq e yoheeq'ae gee biq: 'Aeqhael mulyaeqhael gul laeq, kaol yoqhhaeteel'ae aeqnaol ae'lye lael hael ae'lye mael, laefuq'ae lael hael keellye mulhhael hhaeqpyuq heil hhei gil biq.' 9 Xalvuq vuqdianq laellye fu lael e cholyaeqhael lael vae, haetaeq eiq pulziq dyuqbaq qiq mal heilzaeq hhei vae. 10 Laefuq fuqli'ae lye gul laeq e tyuhael lael vae, hhael naeq hhae heilzaeq'ae lye kei biq, ngeelfeiq, haetaeq eiq pulziq dyuqbaq qiq mal maoq maeq heilzaeq hhei'ae. 11 Yoqhhaeteel mulhhael hhaeqpyuq heilzaeq hhei'laol, tyutoq e hhaoqsongl'ae buqzaq biq, gee: 12 'Ngaeteel qiq nao myel honglbo'lye mul, aeqnaol naolli'ae lael hael laoq yiq gol xiaoqshiq maoq maq mul yo'ae, nol yoqhhaeteel'ae kaol ngaeteel'ae heil laeq mael qiqsheel maeq?' 13 Hhaoqsongl yoqhhaeteel onglci e qiq hhaeq'ae geehoq biq: 'Yelchoq, ngael noq'ae heil lo hhei biq aeqwae, nol kaol ngael geemeeq deelhhei mael laoq pulziq dyuqbaq qiq mal maeqngeel maeq? 14 Noq e dyuqbaq mael heil hheikaol deel oq! Ngael aeqnaol'ae lael hael'ae kaol noq'ae heil biq mael qiqsheel'ae, ngael xilnye zongl mael hhaeq lil, 15 Ngaeq e moqgoq mael ngael haelmillye nyuqtongq deelhhei laol haelmillye maq hha mul maeq? Ngael meeq e cholyaeq geiq laol, nol heiqcilnael laeq hhaemaeq?' 16 Xilnye laol, aeqnaol naolli e cholyaeq laoq, laefuq fuqli e cholyaeq peqyil maoqlye hhae, laefuq fuqli e cholyaeq laoq, aeqnaol naolli e cholyaeq peqyil maoqlye hhae."Yesu yoqhhaeq sil kaol dyeqhoqlal mael dilsan cil geedu
17 Yesu Ye'lulsa'lenq'ae da'li fu, gaelmae ae'lye laqcaq qyelniq hhaeq yaol yotyel maqdumyel qiqjyelboq'ae sheeqtael yil, kaol yoqhhaeteel'ae gee biq: 18 "Naelhaeq gil, aedeeteel Ye'lulsa'lenq'ae da'li gil maoq, Cholyaeq Yaqyo yaol jilsizhangqhael kaol Momil e saeziq mael loq e laqkiqhael'ae eemoq biq maoqlye hhae; yoqhhaeteel yoqhhaeq'ae hhae sil e golsiq za'ae lye gee biq maoqlye hhae, 19 Kaol yoqhhaeq yaol baeqjyelboq minqcuq e cholyaeqhael'ae eemoq biq kaol pasa biq, caxu maellye zheq biq, kaol shiqziljal taq'ae diqcheeq biq maoqlye hhae; dilsan tian yoqhhaeq dyeqhoqlal maoqlye hhae."
Cholyaeq'ae zhaofu biq maoqhhae
20 Tyuqfu, Xibiqtail e yaqyo e aeqmae kaol yoqhhaeq e yaqyo niq nulhhaeq laefuqboq'ae deel da laq, kaol Yesu'ae vuqduqtongq lael biq, kaol yoqhhaeq'ae silqinq qiq mal geezaeq biq. 21 Yesu yoqhhaeq'ae naelhaeq biq: "Nol aeqchee mul maoq maeq?" Yoqhhaeq Yesu'ae gee biq: "Noq e Goqja vae ngaeq e yaqyo xi niq nulhhaeq yaol, qiq hhaeq laoq noq e laqsseqboq'ae bi zhol, qiq hhaeq laoq noq e laeqbaelboq'ae bi zhol." 22 Yesu geehoq biq: "Noteel aeqchee mael'ae geezaeq hhae lye maeq loq'ae. Ngael dol maoqlye e beiziq mael, noteel dol ongl lilmaeq?" Yoqhhaeteel yoqhhaeq'ae gee biq: "Ngaeteel dol ongl lil." 23 Yesu yoqhhaeteel'ae gee biq: "Ngael dol e beiziq mael, noteel eiq aeqdilmyel hhae dol hhae. Ngeelfeiq, ngaeq e laqsseq laeqbaelboq'ae zhol mael laoq, ngael hha biq maeqngeel'ae, ngaedae aeqsul'ae paeqgaelsael meeq deelhhei biq laol aeqsul'ae biq biq hhae." 24 Baeqjyelboq e laqcaq qyel hhaeq gaeq hhei biq laol, yoqhhae niq goyaeq'ae zhee hol biq hhae. 25 Kaol Yesu lye yoqhhaeteel yaol gul laeq, gee: "Noteel loq'ae, baeqjyelboq e goqja laoq zongmae yoqhhaeteel'ae aeqchee zongl feiq guanqliq biq'ae, kaol zongmaehael yoqhhaeteel'ae aeqchee zongl hhaeq maeq zongl hhaeq'ae lye geegaeq gil biq. 26 Ngeelfeiq, noteel onglci'ae xilnye maeq zongl hhaeq'ae. Noteel onglci'ae, aeqsul hhael heeq e qiq hhaeq geiq goq kaollaoq, noteel e yaqhacheqzaq e cholyaeq geiq maoqhhae; 27 Aeqsul laefuq fuqli e cholyaeq geiq maoqlye nyuq laol, noteel e yaqhacheqzaq e cholyaeq geiq maoqhhae. 28 Cholyaeq Yaqyo yi mael laoq, cholyaeq yaol bi fuqsil maoqlye maeqngeel'ae, cholyaeq'ae fuqsil yi hhae, tyuldyul maeqcilmyel, yoqhhaeq e aeqyil maellye haelnaeqmyel cholyaeq yaol suq duhoq e hhaeqpyuq geiq maoqlye hhae."
Yesu lye mabyeq niq nulhhaeq yaol zonglmeeq biq
29 Yoqhhaeteel Ye'lilge vae lye duyi fu, cholyaeq qiq miq Yesu'ae cho'lyeq biq. 30 Mabyeq niq nulhhaeq gaelmae dongqpyeq vae zhol deelhhei hhae, Yesu deelpol duyil hhae lye gaeq hhei biq laol, gul gae'lael aeqmyel gee: "Hhaoqsongl o, Dalweil e Yaqyo, ngaeteel'ae hhaoqsaeqsaeq laeq!" 31 Cholyaeqhael yoqhhaeteel'ae gaezaeq biq, kaol yoqhhaeteel'ae yotyel maeq bi du'ae, ngeelfeiq, yoqhhaeteel laoq nyeq'ei hhael gul tullaeq, gee: "Hhaoqsongl o, Dalweil e Yaqyo, ngaeteel'ae hhaoqsaeqsaeq laeq!" 32 Kaol Yesu songl deelhhei vae, yoqhhaeteel yaol gul laeq, gee: "Noteel laoq ngael noteel'ae aeqchee baelzongl laeq maeq?" 33 Yoqhhaeteel gee: "Hhaoqsongl o, ngaeteel e ma'ne mael bi mol congl lael laeq." 34 Yesu hhaoqsaeqsaeq li biq, kaol yoqhhaeteel e ma'ne mael'ae so hhei biq laol, yoqhhaeteel qiqlaqmyel mol congl lael biq vae, kaol Yesu'ae cho'lyeq li vae.