Haeqmiq yaol maq mul biq lye maeq zongl hhaeq'ae
10
Yesu tyuqvae lye deel hhei vae, Yoqdanl Lolbaeq yulboq ae'lye Yoqtail milcaeq vae keellael. Cholyaeqhael yoqhhaeq zael'ae yol zhol'eeq deelhhei lael, yoqhhaeq haelzael'ae laoqmyel yoqhhaeteel'ae geemyeq gil biq'ae. 2 Faqlilsail cholyaeqhael Yesu'ae shilfu lael biq, kaol yoqhhaeq'ae naelhaeq biq: "Haqyo haeqmiq yaol maq mul biq vae lye zongl hhaeq maeq?" 3 Yesu geehoq biq: "Moxi noteel'ae haelmillye moqheilheil gil laeq hhaemaeq?" 4 Yoqhhaeteel gee: "Moxi gee: 'Cholyaeq qiq hhaeq haeqmiq yaol maq mul biq vae lye e suqhhaq cu hhei laol, haeqmiq yaol maq mul biq kael vae." 5 Yesu yoqhhaeteel'ae gee biq: "Moxi laoq noteel neehaha gae'lye, noteel'ae gailminl xilmael cu biq hhae. 6 Ngeelfeiq, mqdongq milbeibei fu, Momil lye zongldu hhei e cholyaeqhael onglci'ae haeqmiyaeq zoq haqyoyaeq eiq zoq'ae. 7 Tyulkaol, haqyoyaeq laoq aeqdae aeqmae zael ae'lye deelsae hhei, kaol haeqmiq nyegael qiqgael kaeqmaoq deelhhei laoqmyel ngeel maoqhhae, 8 Kaol niq nulhhaeq laoq aeqhhaol qiq siq laoqmyel peqlal vae. Xilnye laol, yoqhhaeteel laoq aeqhhaol niq siq maeqngeel vae, aeqhhaol qiq siq laoqmyel wae. 9 Tyulkaol, Momil lye qiqgael bi zhol mael laoq, cholyaeq maeq hhae eetael'ae." 10 Laoqhaol'ae do'li laol, laqcaqhael Yesu'ae silqinq xilmael aeqchee mael'ae gee hhaemaeq lye naelhaeq biq. 11 Yesu yoqhhaeteel'ae gee biq: "Aeqsul lye haeqmiq'ae maq mul biq myel, baeqjyelboq e qiq hhaeq sheeqtoqhoq kaollaoq, ochoq nyegael neemaeba e golsiq hhae pi, kaol haeqmiq vae eiq maeq duilqiq'ongl biq vae. 12 Haeqmiq eiq haqyo'ae maq mul biq myel, baeqjyelboq e cholyaeq'ae mulzaeqhoq yil kaollaoq, ochoq nyegael neemaeba ngeelvae."Yesu yaeqguq guqyaeq'ae geeqlongq biq biq
13 Cholyaeqhael lye yaeqguqhael yaol Yesu yiqsiboq'ae sheeqlaeq biq, kaol Yesu yaol yoqhhaeteel'ae bi so maoqlye hhae. Ngeelfeiq, laqcaqhael tyuteel'ae gaezaeq biq hhae. 14 Yesu mol hhei biq laol hol li biq'ae, kaol laqcaqhael'ae gee biq: "Momil e Goqja mael laoq yaeqguq xihael laoqmyel e cholyaeqhael'ae biq biq maoq. Tyulkaol, yaeqguq guqyaeq yaol ngaeq'ae saeqvae bi lael, yoqhhaeteel'ae haeq diqqye biq. 15 Ngael aeqdilmyel noteel'ae geegaeq gil laeqngeel, yaeqguq guqyaeq laoqmyel Momil e Goqja mael maq jyeqshel e cholyaeq laoq, Momil e Goqja'ae maq hha do'li'ae." 16 Tyulkaol, Yesu lye yaeqguq guqyaeq yaol sheeqqei hhei, kaol yoqhhaeteel'ae aqlaq baqcheeq da hheikaol geeqlongq biq biq hhae.
Yoha qiq hhaeq haeqfu eiq zadeel e aeqyil mael saelpo
17 Yesu duyi kaol gaelmae deel fu, cholyaeq qiq hhaeq ki'laq kaol yoqhhaeq'ae yiqsiboq'ae vuqduqtongq gae deelhhei lael, kaol naelhaeq biq, gee: "Neemae meeq e laoqsi, ngael aeqchee silqinq zongl kaol caiq haeqfu eiq zadeel e aeqyil mael hhamul hhaemaeq?" 18 Yesu yoqhhaeq'ae gee biq: "Nol aeqcheekaol ngaeq'ae neemae meeq'ae lye gee laeq lilmaeq? Momil qiq hhaeq maoqlaol, neemae meeq e maeq zhol'ae. 19 Nol laoq gailminl mael loq'ae: Cholyaeq maq hha xyeq'ae, ochoq nyegael neemae maq hha ba'ae, lolbiq maeq hhae haoq'ae, jaq e zoqzenl maeq hhae gee'ae, zaqgiq maq hha giq'ae, aeqdae kaol aeqmae vae xiaolshunl biq maoqhhae." 20 Yoqhhaeq Yesu'ae gee biq: "Laoqsi, ngael mildi'lye fu ae'lye xihael zongl gaeyil aeqwae." 21 Yesu yoqhhaeq'ae chifu biq, kaol yoqhhaeq'ae zhee gaeq biq, yoqhhaeq'ae gee biq: "Nol qiq mal maq lo siq: Noq e halzahael gilzuqmyel ongqzaeq byel yil, kaol saeqyaeqhael'ae byel hhei yil biq, kaol ngaeq'ae cho'lyeq lael maoqhhae. Xilnye laol, mqmae taq'ae noq'ae laoq pyuqjyeqjyeq e moqgoq za wae." 22 Tyutaeq saeziq xihael gaeq hhei biq laol, nyuqsaeq gae'lael aeqmyel deel vae. Yoqhhaeq'ae zaeqdye halngeiq zhee za kaol'ae.
23 Yesu haeqvae lael'ee myel chifu laol, laqcaqhael'ae gee biq: "Dyuqbaq zhee za e cholyaeq laoq Momil e Goqja'ae do'li mael teel eiq maeq yael'ae!" 24 Laqcaqhael yoqhhaeq e saeziq mael gae'lye gaqmaqzuq li gil biq'ae. Yesu yoqhhaeteel'ae yol gee biq: "Yaeqguqhael o! Momil e Goqja'ae do'li maoqlye mael laoq teel eiq maeq yael'ae! 25 Loltoq aqhhoq gonglbyu'ae doyil mael laoq, yoha hamae Momil e Goqja'ae do'li mael taq'ae hhael do'li sael'ae!" 26 Laqcaqhael gaqmaq hhael zuq li gil biq, hhaellaelmyel geegaeq gil: "Xilnye kaollaoq, aeqsul hha deqjiul maeq?" 27 Yesu yoqhhaeteel'ae chifu deelhhei kaol, gee: "Momil laoq aeqchee eiq zonglkeel ongl'ae, tyulkaol, cholyaeq maeq zonglkeel ongl mael laoq, Momil laoq aeqchee silqinq eiq zonglkeel ongl'ae." 28 Biqdeq yoqhhaeq'ae gee biq: "Nol fu, ngaeteel laoq halzahael gilzuqmyel beiqdeelsaeq kaol noq'ae cho'lyeq lael aeqwae." 29 Yesu gee: "Ngael aeqdilmyel noteel'ae geegaeq laeqngeel: Aeqsul ngael kaol fuqyin gae'lye, laoqhaol, algo aeqnil, aelbae aeqnil, aeqdae aeqmae, yaeqguq kaol haeldye ae'lye deelsae hhei'laol, 30 Yoqhhaeq yaeqmeel milcaeq taq'ae laoq laoqhaol, algo aeqnil, aelbae aeqnil, aeqmae, yaeqguq kaol haeldye haelnaeq naeqmaemyel hhamul ngeelvae. Xihael hhamul fu, yoqhhaeq vae eiq guaeq'ei hhae bi diqqye ngeelvae. Ngeelfeiq, aeqgael e shilgail lael fu haeqfu eiq zadeel e aeqyil mael hhamul maoqlye hhae. 31 Tyulnye kaollaoq, laefuq fuqli e cholyaeq laoq aeqnaol naolli e cholyaeq peqyil ngeelvae, aeqnaol naolli e cholyaeq laoq laefuq fuqli e cholyaeq peqyil ngeelvae."
Yesu yoqhhaeq sil kaol dyeqhoqlal mael dilsan cil geedu
32 Laqcaqhael Ye'lulsa'lenq vae da'li e gaelmae ae'lye, Yesu laefuqboq'ae deel e mol hhei biq, kaol gaqmaqzuq li gil biq, yoqhhaeq'ae cho'lyeq e cholyaeqhael eiq gu gil biq. Yesu lye shiqtuq qyelniq hhaeq yaol qiqjyelboq'ae sheeqtael yil, kaol aeqyoq'ae aeqgael puqlael maoqlye e silqinq mael zhoqmyel yoqhhaeteel'ae geegaeq biq. 33 Gee: "Naelhaeq gil, aedeeteel Ye'lulsa'lenq vae da'li, Cholyaeq Yaqyo yaol jilsizhangqhael kaol Momil e saeziq mael loq e laqkiqhael'ae eemoq biq maoqlye hhae. Yoqhhaeteel yoqhhaeq'ae hhae sil e golsiq za'ae lye gee biq, tyuldyul maeqcilmyel, yoqhhaeq yaol baeqjyelboq minqcuq e cholyaeq'ae eemoq biq maoqlye hhae. 34 Yoqhhaeteel yoqhhaeq'ae pasa biq, yoqhhaeq'ae eelcael myecheeq biq, yoqhhaeq'ae caxu maellye zheq biq, kaol yoqhhaeq yaol xyeqsil biq maoqlye hhae; ngeelfeiq, suq nao aeqnaol laoq yoqhhaeq dyeqhoqlal maoqlye hhae."
Cholyaeq'ae fuqsil biq maoqhhae
35 Xibiqtail e yaqyo Yaqgel kaol Yoqhanl, Yesu e yiqsiboq'ae lael gil, kaol yoqhhaeq'ae gee biq: "Laoqsi, ngaeteel noq'ae aeqchee geezaeq kaol'eiq, nol ngaeteel'ae baelzongl laeq lye nyuqlil." 36 Yesu gee: "Ngael noteel'ae aeqchee baelzongl laeq maeq?" 37 Yoqhhaeteel gee: "Noq e rongqyaol onglci vae, ngaeteel yaol qiq hhaeq laoq noq e laqsseqboq'ae, qiq hhaeq laoq noq e laeqbaelboq'ae bi zhol laeq." 38 Yesu gee: "Noteel aeqchee mael'ae geezaeq hhae lye noteel maeq loq'ae. Ngael dol e beiziq mael, noteel dol ongl lilmaeq? Ngaeq'ae shelxiq laeq mael, noteel shel ongl lilmaeq?" 39 Yoqhhaeteel gee: "Ngaeteel ongl lil." Yesu gee: "Ngael dol e beiziq mael, noteel eiq hhae dol ngeelvae; ngaeq'ae shelxiq laeq mael, noteel eiq hhae shel ngeelvae. 40 Ngeelfeiq, ngaeq e laqsseqboq'ae, paelsilmyel laeqbaelboq'ae zhol mael laoq, Momil lye aeqsul'ae paeqgaelsael meeq deelhhei biq laol, aeqsul'ae biq biq maoqlye hhae, ngael hha biq maeqngeel'ae." 41 Shiqtuq qyel hhaeq vae gaeq hhei biq laol, Yaqgel kaol Yoqhanl'ae holzaeq gil biq'ae. 42 Yesu yoqhhaeteel yaol gul laeq, kaol yoqhhaeteel'ae gee biq: "Noteel loq'ae, baeqjyelboq e goqja laoq zongmae yoqhhaeteel'ae aeqchee zongl feiq guanq biq'ae, kaol zongmaehael yoqhhaeteel'ae aeqchee zongl hhaeq maeq zongl hhaeq'ae lye geegaeq gil biq. 43 Ngeelfeiq, noteel xilnye haeq zongl gil. Noteel onglci'ae, aeqsul hhael heeq e qiq hhaeq geiq goq kaollaoq, noteel e yaqhacheqzaq e cholyaeq geiq maoqhhae. 44-45 Cholyaeq Yaqyo yi mael laoq, cholyaeq yaol bi fuqsil maoqlye maeqngeel'ae, cholyaeq'ae fuqsil yi hhae, tyuldyul maeqcilmyel, yoqhhaeq e aeqyil maellye haelnaeqmyel cholyaeq yaol suq duhoq e hhaeqpyuq geiq maoqlye hhae. Tyulnye laol, aeqsul noteel onglci'ae laefuq fuqli e cholyaeq geiq maoqlye nyuq laol, yoqhhaeq laoq cholyaeqhael e yaqhacheqzaq e cholyaeq geiq maoqhhae."
Yesu lye mabyeq yaol zonglmeeq biq
46 Yoqhhaeteel Ye'lilge milmae heeqmyel vae do'li vae. Yesu kaol laqcaqhael kaol haelnaeqmyel cholyaeq Ye'lilge ae'lye duyi gil fu, aelhoq saelzaeq e mabyeq qiq hhaeq gaelmae gaeljyel vae zhol deelhhei'ae, yoqhhaeq laoq Diqmaiq e yaqyo Badiqmaiq'ae. 47 Yoqhhaeq'ae Naqsa'lel cholyaeq Yesu deelpo duyil hhae lye zhoq gaeq hhei biq laol, gul tullaeq, gee: "Dalweil e Yaqyo Yesu, ngaeq'ae hhaoqsaeqsaeq laeq!" 48 Cholyaeqhael yoqhhaeq'ae gaezaeq biq, kaol yoqhhaeq'ae yotyel haq du lye gee biq, ngeelfeiq, yoqhhaeq yotyel hhael ha myel gul'ae: "Dalweil e Yaqyo Yesu, ngaeq'ae hhaoqsaeqsaeq laeq!" 49 Yesu tyuqvae songl deelhhei vae, gee: "Yoqhhaeq yaol gul laeq." Kaol yoqhhaeteel mabyeq qiq hhaeq'ae gul biq, kaol yoqhhaeq'ae gee biq: "Tullael, yoqhhaeq noq'ae gul hhae, nol qiqgiq maq zoqgiq kael." 50 Yoqhhaeq aelhongq mael beiqgae deelsaeq, kaol dilqei tullael, kaol Yesu zael'ae deel keelli. 51 Yesu yoqhhaeq'ae gee biq: "Ngael noq'ae aeqchee baelzongl laeq maeq?" Mabyeq yoqhhaeq'ae gee biq: "Labo'niqa o! Ngaeq'ae bi mol congl laeq!" 52 Yesu gee: "Yil aeqkaovae! Noq e xinlxin lye noq yaol bi meeqsholyil vae." Yoqhhaeq qiqlaqmyel mol congl lael biq vae, kaol gaelmae vae lye Yesu'ae cho'lyeq vae.