Miqchiq kaol shenqpanl e zhiqmoq e dullaelmyel guqjin
18
Yesu laqcaqhael'ae dullaelmyel guqjin maellye geemyeq gil biq, gee: "Noteel haeqfu eiq heeldoq gee maoqhhae, heeldoq maeq gee goq yaevae lye haeq zongl gil." 2 Yoqhhaeq yol gee: "Milmae heeqmyel qiqgael vae shenqpanl e zhiqmoq qiq hhaeq zhol'ae. Yoqhhaeq Momil'ae maq gu, cholyaeqhael vae eiq maeq zunjinl biq. 3 Tyuqvae milmae heeqmyel vae miqchiq qiq hhaeq duqlye yoqhhaeq zael'ae geezaeq lael biq, gee: 'Ngaeq'ae chouqrenq qiq hhaeq zhol'ae, ngaeq'ae bal gaiqjiq laeq lye geezaeq lil!' 4 Yoqhhaeq maeq baelzongl biq myel qiqtongq ngeelvae, aeqnaol neemae onglci'ae nyuq: "Ngael Momil'ae maq gu, cholyaeqhael vae eiq maeq zunjinl biq. 5 Ngeelfeiq, miqchiq xitaeq duqlye ngaeq'ae geezaeq lael gae'lye, ngael yoqhhaeq'ae bal gaiqjiq biq maoq, aeqgael yoqhhaeq duqlye ngaeq'ae meel lael laeq maeqhe." 6 Hhaoqsongl gee: "Noteel maeq gongyil e shenqpanl e zhiqmoq xitaeq haelgee e saeziq mael naelhaeq gil! 7 Momil lye saelpodu hhei e cholyaeqhael mqkiq mqnao myel yoqhhaeq'ae geezaeq biq kaollaoq, Momil yoqhhaeteel'ae maq bal gaiqjiq biq maeq? Yoqhhaeteel'ae maolgael myel bi doq deel maeq? 8 Ngael noteel'ae geegaeq laeqngeel, yoqhhaeq nae'naemyel yoqhhaeteel'ae bal gaiqjiq biq maoqlye hhae. Ngeelfeiq, Cholyaeq Yaqyo yi fu, milcaeq taq'ae xilnye xinlxin saelpodu hhei ongl maeq?"Shuil shezaeq e cholyaeq kaol Faqlilsail cholyaeq e heeldoq
9 Yesu laoq gongyil e cholyaeq lil lye gee zaeq e cholyaeq'ae kaol ochoq'ae maeq fu'qiq'ongl biq e cholyaeq qiq miq'ae, dullaelmyel guqjin maellye gee gil biq: 10 "Cholyaeq niq nulhhaeq sholhaol vae da'li kaol heeldoq gee li, qiq hhaeq laoq Faqlilsail cholyaeq'ae, baeqjyelboq e qiq hhaeq laoq shuil shezaeq e cholyaeq'ae. 11 Faqlilsail cholyaeq aeqyoq qiq hhaeq myel haoqtul deelhhei kaol heeldoq xilnye gee: 'Momil o! Ngael noq'ae meeqyaevae lye gee lil, ngael baeqjyelboq e cholyaeqhael laoqmyel maeq dul yil. Yoqhhaeteel laoq ochoq'ae diqkoqzaeq, duqlaq myel zongl, kaol ochoq nyegael neemaeba, ngael shuil shezaeq e xitaeq laoqmyel eiq maeq dul yil. 12 Ngael siq nao onglci e niq nao'ae maeq zaeq myel zhol lil. Ngael zonglzaeq laeq hael laoq, qyel mael onglci e qiq mal noq'ae fenglxianl biq wae.' 13 Ngeelfeiq, shuil shezaeq e cholyaeq laoq gaelmaolsae'lye haoqtul deelhhei, mqmae vae maeq chifu peq biq, neeto oheiq'ae diq diq myel gee: 'Momil o! Ngael golsiq za e cholyaeq lil, kaol ngaeq'ae hhaoqsaeqsaeq laeq! 14 Ngael noteel'ae geegaeq laeqngeel, cholyaeq xitaeq laoqhaol vae hoqli fu, Momil gongyil e cholyaeq'ae lye suanl biq mael laoq shuil shezaeq e cholyaeq xitaeq'ae, Faqlilsail cholyaeq tyutaeq maeqngeel'ae. Aeqsul aeqyoyoq yaol deiqqei da zaq laol, aeqgael bi deiqgae hhei ngeelvae; aeqyoyoq maeq dilqeizaeq hael laoq, aeqgael hhae bi deiqqei da hhei kaol'ae."
Yesu yaeqguq guqyaeq'ae geeqlongq biq biq
15 Cholyaeq albye yaol dyel'eiq Yesu yiqsiboq'ae sheeqlaeq biq, kaol Yesu yaol yoqhhaeteel'ae bi so maoqlye hhae. Laqcaqhael mol hhei biq laol yoqhhaeteel'ae gaezaeq biq. 16 Ngeelfeiq, Yesu laoq yaeqguq guqyaeqhael'ae lael lye gul biq, gee: "Momil e Goqja laoq yaeqguq xihael laoqmyel e cholyaeqhael'ae biq biq maoq. Tyulkaol, Yaeqguq guqyaeq yaol ngaeq e saeqvae bi lael, yoqhhaeteel'ae haeq diqqye biq. 17 Ngael aeqdilmyel noteel'ae geegaeq gil laeqngeel, yaeqguq guqyaeq laoqmyel Momil e Goqja mael maq jyeqshel kaollaoq, Momil e Goqja'ae maq hha do'li'ae."
Yoha qiq hhaeq haeqfu eiq zadeel e aeqyil mael saelpo
18 Zhiqmoq yoheeq qiq hhaeq Yesu'ae naelhaeq biq: "Neemae meeq e laoqsi, ngael haelmillye zongl kaol haeqfu eiq zadeel e aeqyil mael hhamul hhaemaeq?" 19 Yesu yoqhhaeq'ae gee biq: "Nol aeqcheekaol ngaeq'ae neemae meeq e laoqsi lye gul laeq lilmaeq? Momil qiq hhaeq maoqlaol, neemae meeq e maeq zhol'ae. 20 Nol laoq gailminl mael loq'ae: Ochoq nyegael neemae maq hha ba'ae, cholyaeq maq hha xyeq'ae, lolbiq maeq hhae haoq'ae, jaq e zoqzenl maeq hhae bael gee'ae, aeqdae kaol aeqmae vae xiaolshunl biq maoqhhae." 21 Tyutaeq gee: "Xihael ngael meelhee'lye fu ae'lye zongl oqyil vae." 22 Yesu gaeq hhei biq laol yoqhhaeq'ae gee biq: "Nol qiq mal maq lo siq: Noq e halzahael gilzuqmyel ongqzaeq byel yil, kaol saeqyaeqhael'ae byel hhei yil biq, kaol ngaeq'ae cho'lyeq lael maoqhhae. Xilnye laol, mqmae taq'ae noq'ae laoq pyuqjyeqjyeq e moqgoq za wae." 23 Yoqhhaeq saeziq xihael gaeq hhei biq laol zhee nyuqsaeq biq'ae, yoqhhaeq'ae dyuqbaq zhee za kaol'ae.
24 Yesu yoqhhaeq xilnye nyuqsaeq biq she lye mol hhei biq, kaol gee: "Dyuqbaq za cholyaeq laoq Momil e Goqja'ae do'li mael teel eiq maeq yael'ae! 25 Loltoq aqhhoq gonglbyu'ae doyil mael laoq, yoha hamae Momil e Goqja'ae do'li mael taq'ae hhael yael'ae." 26 Bael gaeq e cholyaeqhael gee: "Tyulnye kaollaoq aeqsul hha deqjiul maeq?" 27 Yesu gee: "Cholyaeq maeq zonglkeel ongl mael laoq, Momil'ae lye gee'li'laol aeqchee eiq zonglkeel ongl'ae."
28 Biqdeq gee: "Nol fu, ngaeteel laoq ngaeteel e halzahael beiqdeelsaeq kaol noq'ae cho'lyeq lael aeqwae." 29 Yesu gee: "Ngael aeqdilmyel noteel'ae geegaeq laeqngeel, cholyaeq qiq hhaeq laoq Momil e Goqja gae'lye, laoqhaol, haeqmiq, algo aeqnil, aeqdae aeqmae, yaeqmiq kaol yaqyo, xihael ae'lye deelsae hhei kaollaoq, 30 Yoqhhaeq xi qiqyil'ae xihael haelnaeq naeqmaemyel hhamul'ae, aeqgael e shilgail lael fu haeqfu eiq zadeel e aeqyil mael hhamul'ae."
Yesu yoqhhaeq sil kaol dyeqhoqlal mael dilsan cil geedu
Tail 20:17-19; Keq 10: 32-34
31 Yesu lye shiqtuq qyelniq hhaeq yaol qiqjyelboq'ae sheeqtael yil, kaol yoqhhaeteel'ae gee biq: "Aedeeteel yaeqmeel Ye'lulsa'lenq'ae da'li gil maoq, xianzhihael lye cu deelhhei e silqinqhael, gilzuqmyel Cholyaeq Yaqyo e aeqhhaol taq'ae peqlal maoqlye hhae. 32 Yoqhhaeq yaol baeqjyelboq minqcuq'ae eemoq biq, yoqhhaeteel lye pasa biq, zonglkyuq biq, eelcael mye biq. 33 Yoqhhaeteel yoqhhaeq'ae caxu maellye zheq biq aeqnaol'ae, yoqhhaeq yaol xyeqsil maoqlye hhae, ngeelfeiq, dilsan tian laoq yoqhhaeq dyeqhoqlal maoqlye hhae." 34 Laqcaqhael silqinq xilmael teel eiq maeq nyuqtong ongl gil biq, saeziq xihael yoqhhaeteel'ae geehhaq biq wae siq, kaol yoqhhaeteel yoqhhaeq aeqchee mael gee hhae lye maeq loq gil biq'ae.
Mabyeq yaol zonglmeeq biq
35 Yesu Ye'lilge'ae deel niqli fu, mabyeq qiq hhaeq gaelmae gaeljyel'ae aelhoq saelzaeq hhae. 36 Yoqhhaeq cholyaeqhael deelpol duyil e gaeq hhei biq, kaol aeqchee zongl hhaemaeq lye naelhaeq gil biq. 37 Ochoq yoqhhaeq'ae Naqsa'lel cholyaeq Yesu deelpol duyil hhae lye geedu biq. 38 Kaol yoqhhaeq gul gae'lael aeqmyel gee: "Dalweil e Yaqyo Yesu o, ngaeq'ae hhaoqsaeqsaeq laeq!" 39 Laefuqboq'ae deel e cholyaeqhael yoqhhaeq'ae yotyel haq du lye gaezaeq biq, ngeelfeiq, yoqhhaeq laoq yotyel hhael heeq gae'lael aeqmyel gul'ae: "Dalweil e Yaqyo o, ngaeq'ae hhaoqsaeqsaeq laeq!" 40 Yesu songl deelhhei, yoqhhaeq yaol sheeqlaeq lye moqheilheil biq. Yoqhhaeq deelniq laeq laol, Yesu yoqhhaeq'ae naelhaeq biq: 41 "Ngael noq'ae aeqchee baelzongl laeq maeq?" Yoqhhaeq gee: "Hhaoqsongl o! Ngaeq'ae bi mol congl hoqlael laeq!" 42 Yesu gee: "Nol mol lael aeqkaovae! Noq e xinlxin lye noq yaol bi meeqsholyil vae." 43 Yoqhhaeq'ae qiqlaqmyel mol laelkiq biq vae, kaol Yesu'ae cho'lyeq li vae, maqqyemyel Momil'ae rongqyaol biq biq hhae. Gilzuqmyel cholyaeqhael silqinq xihael mol hhei biq laol, Momil'ae laqma deiqqei biq hhae.