Haeqmiq yaol maq mul biq vae lye maeq zongl hhaeq'ae
19
Yesu saeziq xihael gee byel hhei'laol, Ja'lillil ae'lye deelsae hhei vae, kaol Yoqtail milcaeq, Yoqdanl Lolbaeq e neeldu aelheiq boq'ae keellael. 2 Haelnaeqmyel cholyaeq qiq miq yoqhhaeq'ae cho'lyeq biq, kaol yoqhhaeq tyuqvae lye yoqhhaeteel yaol zonglmeeq biq vae. 3 Faqlilsail cholyaeq yoqhhaeq'ae shilfu lael biq, gee: "Aeqchee mael gae'lye kaol'eiq, cholyaeq haeqmiq yaol maq mul biq vae lye zongl hhaeq maeq?" 4-5 Yesu geehoq biq: "Mqdongq milbeibei fu cholyaeq zongldu e tyutaeq, haeqmiyaeq kaol haqyoyaeq zonglbeibei du hhei hhae, gee: 'Tyulkaol, haqyoyaeq laoq aeqdae aeqmae zael ae'lye deelsae hhei, kaol haeqmiq nyegael qiqgael kaeqmaoq deelhhei laoqmyel ngeel maoqhhae, kaol niq nulhhaeq laoq aeqhhaol qiq siq laoqmyel peqlal.' Suqhhaq xilmael noteel maeq duq gol yil maeq? 6 Xilnye kaollaoq, niqhhaq laoq aeqhhaol niq siq maeqngeel vae, aeqhhaol qiq siq laoqmyel wae. Tyulkaol, Momil lye qiqgael bi zhol mael laoq, cholyaeq maeq hhae eetael'ae." 7 Faqlilsail cholyaeq gee: "Xilnye laol, Moxi aeqcheekaol haeqmiq yaol maq mul biq vae lye e suqhhaq mael heilmoq hhei biq laol, haeqmiq yaol maq mul biq kael vae lye moqheilheil hhaemaeq?" 8 Yesu gee: "Moxi laoq noteel neehaha gae'lye, noteel'ae haeqmiq yaol maq mul biq kaol'eiq hhaeq'ae lye gee hhae, ngeelfeiq, mqdongq milbeibei fu laoq xilnye maeqngeel'ae. 9 Ngael noteel'ae geegaeq laeqngeel, aeqsul yoqhhaeq e haeqmiq'ae maq mul biq myel, baeqjyelboq e qiq hhaeq yaol sheeqtoqhoq hhei, haeqmiq xinqlalmyel zongl gae'lye maeqngeel kaollaoq, ochoq nyegael neemaeba e golsiq mael aeqyoq'ae zonglpizaeq wae." 10 Laqcaqhael Yesu'ae gee biq: "Haqyo kaol haeqmiq e guanxil mael xilnye kaollaoq, haeqmiq maeq sheeq mael hhael shoq wae." 11 Yesu yoqhhaeteel'ae gee biq: "Saeziq xilmael aeqsul myel loq maeqngeel'ae, aeqsul'ae biq hhei biq laol aeqsul maoq maeq loq'ae. 12 Qiqhhaeq laelhhaeq laoq aeqmae e oqma onglci'ae zhol fu ae'lye naelgol za biq, kaol maeq hhae sheeq maeq hhae mulzaeq, qiqhhaeq laelhhaeq laoq cholyaeq gae'lye maeq hhae sheeq maeq hhae mulzaeq, qiqhhaeq laelhhaeq laoq Mqmae Goqja gae'lye aeqyoyoq maeq sheeq maeq mulzaeq kaol'ae. Saeziq xilmael aeqsul naelhaeq do hhei ongl laol, aeqsul naelhaeq do hhei biq."Yesu yaeqguq guqyaeq'ae geeqlongq biq biq
13 Tyuqfu, cholyaeq lye yaeqguq guqyaeqhael yaol Yesu e yiqsi'ae sheeqlaeq biq, kaol yoqhhaeq yaol yoqhhaeteel'ae aqlaq baqcheeq da hheikaol heeldoq bi bael gee maoqlye hhae, laqcaqhael laoq cholyaeq tyuhael'ae gaezaeq biq. 14 Ngeelfeiq, Yesu gee: "Yaeqguq guqyaeq yaol ngaeq saeqvae bi lael, yoqhhaeteel'ae haeq diqqye biq, Mqmae Goqja vae zhol e cholyaeqhael laoq xilnye cholyaeq kaol'ae." 15 Yesu yoqhhaeteel'ae aqlaq baqcheeq da hheikaol heeldoq bael gee biq, kaol tyuqvae milcaeq'ae deelsae hhei vae.
Yoha qiq hhaeq haeqfu eiq zadeel e aeqyil mael saelpo
16 Cholyaeq qiq hhaeq lael kaol Yesu'ae naelhaeq lael biq: "Laoqsi, ngael haeqfu eiq zadeel e aeqyil mael mul maoqlye kaollaoq, aeqchee meeq e silqinq zongl maoqhhae maeq?" 17 Yesu yoqhhaeq'ae gee biq: "Nol aeqcheekaol ngaeq'ae meeq e silqinq mael naelhaeq laeq lilmaeq? Neemae meeq e laoq qiq hhaeq wae. Nol haeqfu eiq zadeel e aeqyil vae do'li maoqlye kaollaoq, gailminl mael laoqmyel zongl gaeyil maoqhhae." 18 Yoqhhaeq gee: "Gailminl hae hael laeq?" Yesu gee: "Cholyaeq maq hha xyeq'ae; ochoq nyegael neemae maq hha ba'ae; lolbiq maeq hhae haoq'ae; jaq e zoqzenl maeq hhae gee'ae; 19 Aeqdae kaol aeqmae vae xiaolshunl biq; dongqpyeq e cholyaeq'ae gaeq biq mael nol aeqyoyoq'ae gaeqzaeqhoq laoqmyel ngeel maoqhhae." 20 Yaqyoyaeq tyutaeq gee: "Xihael ngael gilzuqmyel zongl gaeyil aeqwae, aeqchee maq lo siq maeq?" 21 Yesu gee: "Nol qiqgiq geehhael maqza e cholyaeq geiq goq kaollaoq, noq'ae halzahael ongqzaeq yil, kaol saeqyaeqhael'ae byel hhei yil biq, xilnye laol, mqmae vae pyuqjyeqjyeq e moqgoq za wae; kaol ngaeq'ae cho'lyeq lael." 22 Yaqyoyaeq tyutaeq saeziq xilmael gaeq hhei biq laol, nyuqsaeq lael aeqmyel deel vae, yoqhhaeq'ae zaeqdye halngeiq zhee za kaol'ae. 23 Yesu laqcaqhael'ae gee biq: "Ngael aeqdilmyel noteel'ae geegaeq laeqngeel, yoha hamae Mqmae Goqja'ae do'li mael laoq teel eiq maeq yael'ae. 24 Ngael noteel'ae geegaeq laeqngeel siq, loltoq aqhhoq gonglbyu'ae doyil mael laoq, yoha hamae Momil e Goqja'ae do'li mael taq'ae hhael yael'ae!" 25 Laqcaqhael saeziq xihael gaeq hhei biq laol, gaqmaq zhee zuq li gil biq'ae, gee: "Xilnye kaollaoq, aeqsul hha deqjiul maeq?" 26 Yesu yoqhhaeteel'ae chifu deelhhei aeqmyel gee gil biq: "Cholyaeq'ae lye gee'li'laol maeq ongl'ae, Momil'ae lye gee'li'laol aeqchee eiq zonglkeel ongl'ae." 27 Tyulkaol, Biqdeq gee tullaeq, yoqhhaeq'ae gee biq: "Fu hhei, ngaeteel gilzuqmyel beiqdeelsaeq kaol noq'ae cho'lyeq lael aeqwae, ngaeteel aeqchee hhamul maeq?" 28 Yesu yoqhhaeteel'ae gee biq: "Ngael aeqdilmyel noteel'ae geegaeq laeqngeel, noteel ngaeq'ae cho'lyeq e cholyaeq xihael, aeqgael halzahael gilzuqmyel yosheq paellael, kaol Cholyaeq Yaqyo laoq aeqyoq e rongqyaol e zongmae duqtyel mael'ae zhol da deelhhei keellael fu, noteel eiq zongmae duqtyel qyelniq mal taq'ae zhol da deelhhei maoqlye hhae, kaol Yiqsellyel e qyelniq zhipail'ae shenqpanl maoqlye hhae. 29 Aeqsul ngaeq e cholmil gae'lye laoqhaol, paelsilmyel algo aeqnil, aelbae aeqnil, aeqdae aeqmae, yaeqguq kaol haeldye, xihael ae'lye deelsae hhei'laol, aeqgael laoq haelmael taq vae eiq haelnaeq naeqmaemyel hhamul'ae, kaol haeqfu eiq zadeel e aeqyil mael hhamul'ae. 30 Ngeelfeiq, haelnaeqmyel e laefuq fuqli e cholyaeq laoq aeqnaol naolli e cholyaeq peqyil maoqlye hhae, aeqnaol naolli e cholyaeq laoq laefuq fuqli e cholyaeq peqyil maoqlye hhae."