Yonaq Su
Yonaq Yeheqhuaq e saeziq mael maeq naelhaeq'ae
1
Yeheqhuaq e saeziq mael Yalmiqtail e yaqyo Yonaq'ae yo'li biq, gee: 2 "Waekei, Niqniqvei haeqheemyel e milmae heeqmyel vae yil. Tyuqvae milmae heeqmyel e cholyaeqhael xinqlalmyel, maeq fu goq lal aeqmyel zongl hael ngaeq e yiqsiboq'ae keellael vae. Ngaeq e saeziq mael milmae heeqmyel e tyuqvae e cholyaeqhael'ae yotyel ha'lye geedu hhei gil biq." 3 Ngeelfeiq, Yonaq laoq deelsae hhei vae. Yoqhhaeq Yeheqhuaq yaol hoqhhaq maoqlyekaol Tashi vae yil maoqlye hhae. Yoqhhaeq Yopal'ae gaeyil, Tashi vae yil maoqlye e hoq qiq mal saelpopuq hhei, hoq e hhaeqpyuq heilmoq hhei biq, kaol hoq mael taq'ae da'li vae. Yoqhhaeq hoq mael taq e cholyaeqhael nyegael Tashi vae qiqgael yil maoqlye hhae. Yoqhhaeq xilnye zongl mael laoq, Yeheqhuaq yaol hoqhhaq maoqlye kaol'ae.Yeheqhuaq eeldeel deelmae vae zaeqxil xilmae bi bo tullaeq
4 Ngeelfeiq, Yeheqhuaq eeldeel deelmae taq'ae qiqlaqmyel zaeqxil haeqheemyel bi bo tullaeq, tyulnye laol, eeldeel deelmae onglci'ae zaeqxil xilmae zhee bo, hoq mael dyel'eiq bo ba goqbiq vae. 5 Eelcuq laqkiqhael eiq zhee gu gil biq'ae, aeqsul eiq aeqyoyoq e momil vae nyuqsaeq lael aeqmyel geezaeq biq hhae; yoqhhaeteel hoq mael maeq hhael bi cheng lyekaol, hoq mael taq'ae moqgoqhael eeldeel deelmae vae beiqdo hhei. Ngeelfeiq, Yonaq laoq hoq e holhhaq hhaqli yilcenq'ae gaeyil, ssuqza ga hheikaol yuqxul vae. 6 Hoq mael fu'qyezaq e qiq hhaeq yoqhhaeq e yiqsiboq'ae deel niqli, kaol yoqhhaeq'ae gee biq: "Noq'ae aeqchee zongl laeq hhaemaeq? Xuldyulmyel yuqxul sael biq! Wae tullael kaol noq e momil vae geezaeq biq! Momil aedeeteel'ae fupol laeq laol, aedeeteel maeq hhae sil maeqhe!"
Yonaq yaol eeldeel deelmae vae beiqpuq do biq
7 Cholyaeqhael hhaellaelmyel gee gil'ae: "Lael gil! Aedeeteel suqhhaq o gil maoq, aeqsul gae'lye zai'nanl mael aedeeteel'ae yo'lael hhaemaeq lye loq maoq." Tyulkaol, yoqhhaeteel suqhhaq o gil vae, kaol Yonaq vae opuq hhei biq." 8 Yoqhhaeteel Yonaq'ae gee biq: "Ngaeteel'ae geedu laq, aeqsul gae'lye kaol zai'nanl xilmael ngaeteel'ae yo'lael hhaemaeq? Nol aeqchee mulzaeq lilmaeq? Nol haeqvae lye lael lilmaeq? Nol haeqvae milcaeq cholyaeq lilmaeq? Hae qiqsheel e minqcuq lilmaeq?" 9 Yoqhhaeq geehoq biq: "Ngael laoq Xiboqlaiq cholyaeq lil. Ngael laoq Yeheqhuaq, mqmae taq e Momil'ae zun eiq zunjinl gu eiq gu lil, yoqhhaeq laoq milgee kaol eeldeel deelmae zongldu e qiq hhaeq ngeelvae."
10 Cholyaeqhael yoqhhaeq Yeheqhuaq'ae hoqhhaq hhae lye loq biq. Laefuq Yonaq yoqhhaeteel'ae geedu yo biq kaol'ae. Cholyaeqhael gilzuqmyel gusil maoqmyel gu gil biq'ae, yoqhhaeq'ae gee biq: "Nol aeqcheekaol xilnye zongl lilmaeq?" 11 Zaeqxil bo mael nyeq'ei ta nyeq'ei hhael heeq lael, yoqhhaeteel yoqhhaeq'ae yol gee biq: "Ngaeteel noq'ae haelmillye zongl kaol zaeqxil maeq bi bo myel qye'li hhaemaeq?" 12 Yoqhhaeq geehoq biq: "Ngaeq yaol baqqei hheikaol eeldeel deelmae vae beiqpuq do'laq, xilnye zongl laol, zaeqxil maeq bo vae, ngael loq lil zaeqxil xilmae xilmael noteel'ae yo'lael mael laoq ngaeq gae'lye kaol'ae." 13 Cholyaeqhael aqha halzoqmyel he, kaol hoq mael eeldeel deelmae deeljyel'ae he hoqli maoqlye hhae, ngeelfeiq, maq he hoqli ongl biq'ae. Tyuqfu zaeqxil xilmae bo mael nyeq'ei ta nyeq'ei hhael heeq lael. 14 Yoqhhaeteel Yeheqhuaq'ae geezaeq biq, gee: "Yeheqhuaq o! Nol haelmillye mulgoq laol haelmillye zongl lil, ngeelfeiq, ngaeteel noq'ae neemae qiqsiqmyel geezaeq lil. Ngaeteel'ae xitaeq gae'lye haeq bi sil laeq. Qiqgiq maeq zonglba yo e cholyaeq e siq mael ngaeteel e aqlaq mael'ae haeq heilmoq laeq."
15 Tyulkaol, yoqhhaeteel lye Yonaq yaol baqqei hheikaol, eeldeel deelmae vae beiqpuq do biq, eeldeel deelmae mael maeq holzaeq maeq dongni vae. 16 Cholyaeq tyuhael Yeheqhuaq'ae gusil maoqmyel zhee gu gil biq'ae, tyulkaol, yoqhhaeteel Yeheqhuaq vae baqheel laeqngeel lye xuqyuanlkei biq wae.
17 Yeheqhuaq lye ngaeqdyel haeqheemyel qiq yaeq saelpodu hhei, kaol Yonaq yaol meqdo biq. Kaol Yonaq ngaeqdyel oqma onglci'ae suq nao suq mil zhol vae.